BIBLIA mu, Génesis kapitulo 22 pengeli Chaw Ngünechen ñi feypifiel ta Abraam ñi amual kamapu mu tañi chalintukulelaetew kiñe mañumtun. Biblia feypi: “Abraham meñkukünulelfi ta Isak ti mamüll tati kutraltuael, fey ka pürüm nüy ñi kuchillu ka ñi aylen kütral, fey mür amuy engu” (Génesis 22:6).

Tati Biblia feypilay chumngechi ñi kütraltukeel pu che kuyfi mu. Feymu Abraam ka Isaak, ¿kütraltuyngu fey ñi yenieal feychi kütral? Kiñe wentru adümuwlu Biblia dungu mu feypi ñi pepilnoel tañi üyküleal feychi kütral alüñmalu am ñi miyawün. Feymu Abraam ka Isaak yefingu chi kom ñi duamnieel tañi kütraltual.

Welu kakelu che feypikey ñi küdawngen tañi kütraltual kuyfi mu. Feymu pepilfalngefule, tati pu che üykülechi kütral mu nentukefuyngün aylen femngechi ñi kütraltual, yemekefuyngün chi aylen kiñe karukatu mu. Fentren che adümuwlu Biblia dungu mu rakiduamkeyngün Abraam ñi entuel kiñeke aylen kiñe üykülechi kütral mu petu ñi tripanon. Tukufi chi kiñe metawe mew pültrülelu kiñe kadena mu, fey tripalu yepelafi ti metawe (Isaías 30:14). Fey tüfachi aylen mu ka angken mamüll kütraltuafuy chew rume ñi ayüel.