TI LIFRU Matew feypi: “Jesus konpuy tati ngillatuwe ruka mew, fey wemünentupufi tiye mew kom tati fendemekelu ka tati ngillakamekelu. Ütrüfrulpañmafi tañi mesa tati trafkintulelkefilu pülata tati pu che, ka femngechi ütrüfrulpañmafi tañi wangku tati fendekelu palluma ka feypifi: ‘Tati Wirin Chillka mew wirikonküley: “Iñche tañi ruka ngillatuwe ruka pingey”, welu eymün nietufimün weñefe ñi ruka reke’” (Matew 21:12, 13).

Ti rupan kuyfi, pengeli pu fendekefulu ngillatuwe ruka mew ñi weda femkefiel pu che, rume kofrakelu kay. Feychi antü mu, pu palluma pichi falikefuyngün, feymu pu pofre pepi ngillakefuyngün ñi chalintukuafiel. Welu kiñeke kuyfi dungu ñi wirintukuel pu judio, pengeli wünen siglo mu, pu che mülefuy ñi küdawal 25 antü ñi ngillayafiel epu palluma. Alün kofrangekefuy pu palluma mu, feymu pu pofre pepi ngillakelafuy (Levítico 1:14; 5:7; 12:6-8). Kiñe longkolelu ti judio religion mu, Simeon ben Gamaliel pingelu, müna illkuy tüfachi dungu mu, feymu feypifi pu judio ñi doy pichin kulliñ chalintukual. Feymew müten pu fendekelu rume kofrawelayngün, fey tati pu che küdawafuyngün küla ora müten ñi ngillayal epu palluma.

Chumngechi ngüneduampeiñ, pu fendekefulu ngillatuwe ruka mu diñmatukefuyngün ta plata ka weda femkefuyngün pu che. Feymu Jesus welulkawlay ñi feypifiel “weñefe” engün.