RUME wütrengey ti puliwen, epe akuley ti pukem. Iñche ka kiñeke che müleiñ chew ñi elkünungekem pu kulliñ, ka ngelay chew kütraltual, feymu kom trüntrünküleiñ. Witraleiñ inafül chew ñi tukungekeel ti ko, tüfa rume wütrengey. Kom tüfa rupay fentren tripantu kuyfi mu, Brookings, Dakota del sur, Estados Unidos mew. Fewla nütrameluwayiñ tañi mongen, fey kimaymün chumngelu taiñ mülen fey mu.

Choyüngen 7 konchi marzo 1936 mu. Tañi pu chaw niefuyngu meli pichikeche, iñche tati inan-ngelu. Mülefuiñ kiñe lelfün mew chew ñi ngan-ngeken ka ñi mülen kulliñ, Dakota del sur mu. Ti ngan ketran rume falin-ngefuy tañi pu che ñi mongen mew, welu tañi pu chaw wülfingu ñi mongen Jewba mew, feymu doyümkefuyngu ñi femal Chaw Dios ñi ayükeel. Fawtisawingu ñi Dungukelu Iney Ngen Jewba ngeal 1934 mu. Tañi chaw Clarence, ka fey wüla tañi malle Alfred, taiñ pichi trawünche mu Conde, Dakota del Sur mew, küdawkefuyngu ti peñi reke adkünukelu ti trokiñ longkolelu famülke mew.

Amukefuiñ ti trawün mu, ka fill ruka püle kimeltukefuyngün Biblia ñi maneluwün küpalechi antü mu. Tañi pu chaw ñi küme femün ka taiñ pepikaetew, kellueiñmew taiñ piwkeyeafiel ta Jewba. Tañi deya Dorothy ka iñche eluwiyu ñi amuldungual petu tayu fawtisawnon, nielu iñchiw kayu tripantu. Koneltun ti Chillkatuwe ta Amuldungual Ngünechen ñi Dungu 1943 mu, we amulelu.

Rume falintukefuiñ ti fütrake trawün. Petu ngoymakelan kiñe fütra trawün 1949  tripantu mu, Sioux Falls, Dakota del Sur mu. Taiñ peñi Grant Suiter wüli ti wewpin “¡Doy fülkülepay ñi afael ta antü tami rakiduamken mu!”. Kidu kimeltuy kom pu inaniekefilu ta Jesus, ñi eluwal tañi amuldungual Chaw Ngünechen ñi Ngünenien mu. Fey wüla, wülün tañi mongen Jewba mew, fey fawtisawün ti inalechi fütra trawün mew 12 konchi noviembre 1949 tripantu mu, Brookings mew. Feymu mülerkefun chew ñi elkünungekem pu kulliñ, iñche ka kakelu che fawtisangeiñ fey mu, chew ñi tukungekeel ti ko.

Fey küpa wünelefun amuldungun mew. Nielu 15 tripantu eluwün ñi wüneleal amuldungun mu. Biblia ta feypiley: “Kimche engu miyawkelu ka kimchengeay”, ka tañi reñma mew fentren kimche kelluenew ñi wüneleal (Proverbios 13:20). Amuldungukefun tañi malle Julius engu, niefulu 60 tripantu. Doy fütra wünen-ngefuy iñche mu, welu ayüwün mu mür amuldungukefuyu. Fentren kümeke dungu kimürpun tañi rupan mu. Pichiñma mu, Dorothy ka wünelefuy amuldungun mu.

Wechengelu iñche, tañi pu chaw mangelkefuyngu fentren witran-ngepakechi longkolelu tañi domo engu. Jesse ka Lynn Cantwell rume kellukefenew, duamtukefenew ka yafültukukefenew engu. Witranmafilu engu tati pülleleyechi trawünche, kiñeke mu mangelkefenew ñi amuldungual kidu engu. Rume ayüwülkefenew ñi trür müleal. Ayüfun ñi eluwküleal Jewba ñi küdaw mu kidu engu reke, ka wüneleal amuldungun mu.

Tati inalechi witran-ngepakechi longkolelu, fey ta Bud Miller. Iñche niefun 18 tripantu kidu witranmafilu taiñ trawünche tañi domo engu. Fey mülefun ñi amual chew ñi mütrümngeel pu soltaw ngeal. Pu soltaw ayüfuyngün iñche ñi femal kiñe küdaw, welu iñche rakiduamün feychi dungu ñi chaftufiel Jesus ñi werküel taiñ koneltunoal politiko dungu mu. Iñche küpa amuldungufun Chaw Ngünechen ñi Ngünenien mu (Juan 15:19). Feymu feypin ñi kimngeal kiñe küdawkelu religion mu.

 Tañi peñi Miller kompañenew kiñe trawün chew ñi mütrümngeel pu soltaw ngeal. Kidu yewechengekelafuy ka llükanchengekelafuy, ka küme kimniefuy ti Biblia. ¡Tüfa kelluenew ñi llükanoal! Feymu küme tripalu kay feychi trawün, kimngen kiñe küdawkelu religion mu, aflu ti walüng 1954 mu. Feymu lifrelefun ñi küdawülafiel ta Jewba.

Pichi rupalu tüfa, mangelngen ñi küdawal Fetel mu, Watchtower pingechi lelfün mu, Staten Island, Nueva York mu. Küla tripantu mu küdawün fentren kimche engün, feymu fentren kümeke dungu kimürpun.

Ti lelfün mu mülefuy ti radio WBBR. Pu Dungukelu Iney Ngen Jewba adkünufingün tüfachi radio 1924 puwlu 1957 tripantu mu. Ti Fetel reñma mu, 15 kam 20 che küdawkefuiñ ti lelfün mu. Epe kom wechengefuiñ ka adümuwkelafuiñ. Welu kiñe chachay dullingelu, Eldon Woodworth pingelu küdawi iñchiñ mu. Chaw trokikefuiñ, ka fentren dungu kimeltueiñmew. Kiñeke mu yafkawlu iñchiñ, ti chachay feypikefuy: “Jewba ñi femken afmatufali, kulpafengelu rume ñi pu küdawülkeetew”.

Taiñ peñi Frederick W. Franz ka kompañeiñmew ka kellueiñmew. Kidu kimchengefuy ka küme kimniefuy ti Biblia. Kiduke iñchiñ duamtukefeiñmew. Tati peñi dewmakelu ti iyael Harry Papargyropoulos pingefuy, welu tañi apellido rume küdawngefuy ñi feypial, feymu Peterson feypikefuiñ. Taiñ peñi Harry kiñe dullinchengefuy ka piwkeyekefuy ti amuldungun. Küme küdawkefuy Fetel mu, welu ka eluwkefuy ñi amuldungual. Fentren pataka chillka wülkefuy fill küyen mu, küme kimniefuy ti Biblia ka wiñoldungukefuy taiñ ramtun.

Ti lelfün mew pepikakefuiñ fillke fün ka tukukan, ka tukukefuiñ charu mu. Fill tripantu pepikalelkefuiñ ti Fetel reñma 45.000 charu nielu fün ka tukukan. Küdawün kiñe lamngen engu Etta Huth pingelu, kidu kimchengefuy. Feypikefuy chumngechi ñi pepikangeal ti fün ka tukukan. Kakelu lamngen ka kellueiñmew ti küdaw mu, ka Etta adkünukefuy kidu engün ñi  küdaw. Etta rume kimfuy chumngechi ñi pepikangeal ti iyael, welu müna yamkefuy pu peñi longkolelu ti lelfün mu. ¡Inayentufalngefuy llemay!

Kiñe üllcha domo küpalu taiñ kelluaetew Angela Romano pingefuy. Taiñ lamngen Etta kellueyew we konlu ti rüf dungu mu. Angi ka iñche niewiyu Abril 1958 mu, ka 58 tripantu yenieyu tayu mür küdawülkefiel ta Jewba. Angi ñi nor piwkeyefiel ta Jewba, kellukey ñi newenküleal tayu kurewen kom tüfakechi tripantu mu. Kidu kimchengey ka chem weda dungu mu rupalu rume iñche manelniefiñ.

Fendengelu ti radio WBBR 1957 tripantu mu, pichiñma mu küdawün Fetel Brooklyn mew. Elkünun Fetel niewlu Angi engu. Küla tripantu mu wünelefun amuldungun mu Staten Island mu. Pichiñma mu küdawülkefiñ pu ngillakafilu ti radio, fewla WPOW pingefuy.

Kiñe adümfalngechi mongen yekefuyu, femngechi tayu pepi amuldungumeal chew ñi duamniengeel kellu. Feymu 1961 mu, mangelngeyu tayu wüneleal amuldungun mu Falls City, Nebraska mu. Pichi rupalu, mangelngeyu ñi amual kiñe küyen mu ta South Lansing, Nueva York mew tayu amual ti Chillkatuwe ñi Pepikangeam pu Longkolelu ka Konakechi Kellukelu. Ayüwmayu tayu pepikangeel ka rakiduamiyu wiñotual Nebraska mu dewle ti chillkatuwe. Feymu afmatuyu elungelu kiñe we küdaw, ¡werküngeyu ñi amuldungumeal Camboya mapu mu! Tüfachi trokin mapu müley sudeste asiatico mew, üye allküfiyu, lelifiyu ka kümentufiyu fillke dungu tayu kimnofel. Küpa kimeltulelfiyu pu che Chaw Ngünechen ñi Ngünenien.

Welu kaletuy ti politiko dungu Camboya mu, feymu werküngeyu Vietnam del Sur mew. Epu tripantu rupalu, weda kutranün, feymu weñangkün mu wiñotuyu Estados Unidos mew. Alüñman ñi tremotual. Welu dew tremotulu, eluwiyu ñi wüneleal amuldungun mu.

Marzo 1965 mu, witran-ngepakechi longkolelu ngerpun. Angi iñchiw, 33 tripantu mu, ayüwmayu tayu witranmakefiel pu trawünche ka kelluel fütrake trawün mu. Rume ayüfiñ ti fütrake trawün, feymu müna ayüwman tüfachi küdaw. Kiñeke tripantu mu witranmakefiyiñ pu trawünche mülelu Nueva York waria mew ka fillke püllelechi lof mu, ka fentren fütrake trawün femngekefuy pu Yankee ñi estadio mew.

Angi iñchiw llowiyu fentren fütrake küdaw. Mangelngen ñi kimeltual ti Chillkatuwe ñi Pepikangeal pu Küdawkelu ti Trawünche mu 1995 tripantu mew. Küla tripantu rupalu, mangelngeyu ñi küdawal Fetel mu, 40 tripantu rupalu wüla ñi konün üye mu tañi küdawülkefiel ta Jewba fill antü, feymu rume ayüwkülefun. Kiñeke tripantu mu, küdawün ti Trokiñche  Adkünukelu ti Amuldungun, ka kimeltukefun fentren chillkatuwe mu. Ti Kiñewkülechi Ngünenielu, 2007 tripantu mu, elkünuy ti Trokiñche Adkünukefilu tati Chillkatuwe femngekelu Patterson mu, ka kiñeke tripantu mu longkolefun feychi trokiñche mu.

Fillke dungu küme elkünungetuy pu chillkatuwe Fetel mu pichi rupachi tripantu mu. Ti Chillkatuwe ñi Amual pu Longkolelu Trawünche mu ellakoni 2008 mu. Epu tripantu rupalu, kimeltungey doy 12.000 longkolelu Patterson mu ka ti Fetel mülelu Brooklyn mew. Tüfachi chillkatuwe petu femngey fillke trokiñ mapu mew. Ti Chillkatuwe ñi Pepikangeal pu Küdawkelu ti Trawünche mu 2010 tripantu mu welutukungey ñi üy, fey ti Chillkatuwe ñi Amual pu Kurengenolu ñi Chillkatuafiel Biblia pingetuy, ka elngey ti Chillkatuwe ñi Amual pu Kurewen ñi Chillkatuafiel Biblia.

Septiembre 2014 mu, tüfachi epu chillkatuwe trapümngey, fey elngey Pu Amuldungukelu Ngünechen ñi Ngünenien tañi Chillkatuwe. Tüfa mu amuafuyngün pu kurewen, pu fütangenolu ka pu kurengenolu. Fentren che wall Mapu püle ayüwi kimlu ñi femngeal tüfachi chillkatuwe tañi trokiñ mapu mew. Ayüfalngey kimal fentren peñi ka lamngen ñi amual tüfachi chillkatuwe mu. Rume mañumkülen ñi kimfiel fentren peñi ka lamngen küme elkünulu ñi mongen tañi pepikangeal tüfachi chillkatuwe mu.

Rakiduamlu tañi mongen mu petu ñi fawtisawnon feychi ruka mu chew ñi elkünungekem pu kulliñ ka fanten mu, mañumkefiñ ta Jewba ñi eluñmaetew tañi kimfiel fentren kimche. Fey engün kelluenew ñi doy kimafiel ta Jewba ka ñi doy küme poyeafiel. Kiñeke doy wechengefuyngün iñche mu kam doy füchangefuyngün. Kakelu katripanchengefuyngün. Welu ñi femken ka ñi rakiduam mu engün, ngüneduamkefiñ ñi rume piwkeyefiel ta Jewba. Feymu mañumkülen ñi nieel fentren kümeke weni kimchengelu Jewba ñi trokiñche mu, tañi kimeltuaetew engün.