Ayüwküleyu tayu adümfalngechi mongen mu
DANIEL KA MIRIAM niewingu septiembre 2000 tripantu mu, ka niekefuyngu kiñe ülmen mongen Barcelona mu (España). Daniel feypi: “Küme küdaw niefulu am imekefuyu kümeke restaurante mu, amukefuyu kake mapu mu ka falichi takuwün ngillakefuyu. Kafey rume amuldungukefuyu”. Welu kiñe dungu rupay nga.
Kiñe fütra trawün 2006 mu, Daniel allkütuy kiñe wewpin ñi feypin: ‘Pu che amuley reke ñi langümngeal, ¿eluwkeiñ ñi kelluafiel engün tañi nierpual afnoachi mongen?’ (Proverbios 24:11). Ti wewpin feypi ñi falin-ngen taiñ amuldungual Biblia ñi werkün dungu tañi montuluwal pu che (Hecho 20:26, 27). Daniel feypi: “Jewba dungumekeenew trokiwün”. Ti wewpin ka feypi taiñ ayüwülkeetew doy küdawülafiel ta Jewba. Daniel kimi ñi rüfngen tüfa, ngüneduamlu Miriam ñi ayüwületew wünelekeal amuldungun mu.
Tüfa puwi Daniel tañi piwke mu, fey wiño adkünutuy tañi mongen. Fey doy pichin küdawi, koneltuy wünelekelu amuldungun mu, ka rakiduami tunte ñi ayüwülaetew Miriam engu amufule chew doy duamniengelu kellun.
WÜNELU KÜDAWNGECHI DUNGU, FEY WÜLA MÜNA KÜMEKE DUNGU
Mayo 2007 tripantu mu, Daniel ka Miriam elkünuyngu tañi küdaw ka wiñamtuwingu Panama mew, tüfa kiñe mapu ñi kimfiel. Rakiduamingu tañi müleal üye mu pura küyen peno tañi ngülümelchi plata mu. Fey amuldungukefuyngu kiñeke trawülechi wapi Bocas del Toro pingelu, Caribe lafken mew. Epe kom pu che üye mu, ngabe tuwün-ngey.
Farku ka bicicleta mu miyawkefuyngu pu wapi püle. Longkontukuyngu ti wünen rupa bicicletatuyawlu 30 kilometro kiñe witralechi wingkul mu, feychi antü rume arengey, fey Daniel epe tranapuwfuy fente tañi ürkülen. Pu ngabe ñi kimürpufiel engu, müna tuteeyew, doyelchi may Daniel ka Miriam kimkantulu tañi kewün engün. Pichin mu wüla, kimelelfingu Biblia ta 23 che.
Niewenolu plata engu, ¿chem rupay? Daniel feypi: “Llangkünagi tayu külleñu rakiduamlu tayu wiñotual ta España. Müna weñangkün-ngeafuy elkünual pu chillkatukelu Biblia”. Welu kiñe küyen rupalu, feypingeyngu müna kümeke dungu. Miriam feypi: “Mangelngeyu tayu wünelekeal amuldungun mew doy 130 ora fill küyen. Müna ayüwiyu mülekayalu kay Panama mu”.
TAÑI DOY AYÜWÜLKEETEW
Pichi kakünungelu am chumngechi ñi adkünungeel Jewba ñi trokiñche, 2015 mu Daniel ka Miriam feypingeyngu ñi wüneleal amuldungun mew 70 ora fill küyen mu. ¿Chem chumingu? Maneluwingu ñi feypilen Salmo 37:5: “Jewba mu elkünunge tami dungu, maneluwnge kidu mew, fey kidu füreneaeymu”. Peyngu kiñe küdaw ñi eluñmaetew ta wünelekeal amuldungun mew, ka fewla koneltuleyngu kiñe trawünche mülelu Veraguas mu (Panama).
Daniel feypi: “Petu tayu tripanon España mu, ‘¿rüf nierpuafuyu adümfalngechi mongen?’, ramtuwiyu. Fewlake ta yenieyu, ka niekeyu kom tayu rüf duamtunieel”. ¿Chem doy ayüwülkeeyew? Mür feypingu: “Kelluafiel pu ñom che ñi kimürpuafiel ta Jewba müna ayüwülkeeyumu”.