PU CHE ÑI MONGEN
Pilungen rume, kimeltuken ti rüf dungu
Fawtisawün 1941 tripantu mu, nielu iñche 12 tripantu. Welu 1946 mu adümürpufiñ Biblia ñi rüf dungu. ¿Chumngelu? Nütramkaleluwayiñ ñi mongen.
TAÑI pu chaw elkünuyngu Tiflis waria (Georgia) 1910 tripantu püle, fey puwingu kiñe lelfün mew fülkülelu Pelly lof mew (Saskatchewan, Canada). Iñche choyüngen 1928 mu, tañi pu chaw niefuyngu kayu yall, iñche tati inan-ngelu. Tañi chaw lay kayu küyen iñche ñi choyüngen mu. Ka tañi ñuke lay nielu iñche kiñe tripantu. Pichin mu, lay tañi wünen lamngen Lucy pingelu, nielu 17 tripantu müten. Feymu taiñ weku Nick dapieiñmew tañi pu peñi ka lamngen iñchiñ.
Kiñe antü epu tripantu nielu iñche, tañi pu che penieenew ñi nüfiel kiñe kawellu ñi külen. Rume llükayngün rakiduamlu am ñi manküafetew. Feymu wirarenew ñi femnoal. Welu iñche ñi furi püle mülefuyngün, fey allkütulafiñ engün. Chumlaenew rume ti kawellu, feychi mu tañi pu che ngüneduamingün ñi pilungen iñche.
Kiñe weni feypifi tañi pu che ñi doy kümelkayafetew amuli chillkatuwe ruka mu kakelu pichikeche pilungelu engu. Feymu tañi weku Nick werküenew kiñe chillkatuwe ruka mu Saskatoon mew (Saskatchewan). Alü kamapulefuy ti chillkatuwe ruka, ka iñche kechu tripantu niefun müten, feymu müna pellkelefun. Walüng mu ka feriado müten pemerkeafun tañi pu che. Rupalu chi antü, kimürpun seña dungu ka ayüwülkefenew ñi awkantual kakelu pichikeche engün.
KIMÜRPUN BIBLIA ÑI RÜF DUNGU
Marion, kiñe tañi doy wünen lamngen, niewi Bill Danylchuck engu, 1939 mew, fey dapieyumew tañi lamngen Frances iñchiw. Kidu engu ti wünen tañi pu che mu ñi chillkatufiel ta Biblia pu Dungukelu Iney Ngen Jewba engün. Walüng mew yafüluwkefuyngu tañi kimeltuaetew ti Biblia, welu küdawngefuy taiñ nütramkawal, kidu engu am kimnolu seña dungu. Welu ngüneduamingu iñche ñi ayükefiel tañi kimeletew Jewba mu. Ngüneduamürpufiñ ñi femken engu Biblia ñi feypin, feymu eluwün ñi kiñeñtrür amuldungual. Pichi rupalu, küpa fawtisawün. Feymu 5 konchi septiembre 1941 mu, Bill fawtisaenew chew ñi ngülümngeel rünganko. ¡Rume wütrengefuy ti ko anay!
Mülen kakelu pilu engu kiñe fütra trawün Cleveland mu (Ohio), 1946 mew
Wiñotulu iñche ruka mew walüng 1946 tripantu, amuiñ kiñe fütra trawün mu, Cleveland mew (Ohio, Estados Unidos). Ti wünen antü, tañi pu lamngen wirintukuyngu ñi feypingeel, femngechi ta iñche ñi adümafiel. Welu ti epungechi antü kimün ñi rulpangeel ti trawün seña dungu mu, tüfa rume ayüwülenew. Feymu ayüfiñ ti trawün, ka rume ayüwülenew adümfiel Biblia ñi feypin.
KIMELTUKEN TI RÜF DUNGU
We dewlu ti Epungechi Fütra Weychan kom wall Mapu püle, pu che küpa pengeli ñi nor piwkeyefiel tañi trokiñ mapu. Welu iñche wiñotulu ti chillkatuwe ruka mu dew rupalu ti fütra trawün, eluwkülefun ñi nor piwkeyeafiel ta Jewba müten. Feymu poyewelafiñ ti bandera, ülkantuwelan seña dungu mew ti himno nacional, ka koneltuwelan pu che ñi kawiñ mew. Kafey amuwelan iglesia mew tañi pu kompañ engu. Tañi femün lladkülkafi pu küdawkelu chillkatuwe ruka mu, feymu dikümtukukefenew ka koyladungukefenew tañi rulpaduamelaetew. Tañi pu kompañ ngüneduamingün ñi rupameken, feymu amuldungulelfiñ engün. Rupalu ti tripantu, kiñeke tañi pu kompañ koningün Jewba ñi trokiñche mu, tüfa ta kiñeke: Larry Androsoff, Norman Dittrick ka Emil Schneider, tüfa engün petu poyeniefingün ta Jewba.
Amulu kakelu waria mu, yafüluwkefun ñi amuldunguafiel pu pilu. Kiñe rupa Montreal mu, amun chew ñi trawüken pu pilu. Üyew amuldungufiñ ta Eddie Tager, tüfa kiñe weche nielu kiñe trokiñche pilungelu, ti pu che illamkakefeyew. Fentepuwlu ñi mongen rupachi tripantu mu, kidu amukefuy kiñe trawünche seña dungu mew, Laval waria mu (Quebec, Canada). Kafey kimfiñ ta Juan Ardanez. Tati pu Berea che reke wünen siglo mew, Juan ngüneduami ñi feypingeel ñi kimal tañi rüf küpan Biblia mu (Hecho 17:10, 11). Kidu ka koneltukefuy Jewba ñi trokiñche mu ka longkolefuy kiñe trawünche Ottawa mu (Ontario) fentepuwlu ñi mongen.
Amuldungun rüpü püle, we konlu 1950 tripantu
Wiñamtuwün Vancouver waria 1950 tripantu mew. Rume ayükefiñ amuldunguafiel pu pilu. Welu ngoymakelan ñi nütramkafiel kiñe papay pilungenolu, Chris Spicer pingefulu. Feychi antü eluwi ñi llowal taiñ chillka fillke küyen mu. Kidu ayüfuy ñi chalintukuaetew tañi wentru, Gary pingelu. Feymu pemefiñ tañi ruka mu, fey fentren nütramkawiyiñ, welu wirintukuiñ taiñ küpa feypiel. Kiñeke tripantu rupalu, wiño pewtuiñ
kiñe fütra trawün Toronto mew (Ontario). ¡Tüfa afmatuenew! Feychi antü fawtisawi Gary. Tüfa rakiduamelenew ñi rume falin-ngen tañi amuldunguken. Kimlaiñ iney ñi llowafiel ti rüf dungu rupale ti antü.Fey wüla wiñotun ta Saskatoon mew. Üye mu kimfiñ kiñe domo, kidu feypienew ñi kimeltulelafiel ti Biblia tañi epuntu püñeñ pilungelu, Jean ka Joan Rothenberger pingelu. Kidu engu amukeyngu ti chillkatuwe ruka mu iñche ñi amukefel. Pürüm feypifingu tañi pu kompañ ñi kimeltungeel engu, feymu kechu tañi pu kompañ koningün Jewba ñi trokiñche mu. Kiñe tüfa ta Eunice Colin. Kimfiñ ta Eunice mülelu iñche ti inan tripantu tati chillkatuwe ruka mu. Feychi mu, kidu eluenew kiñe kochülu, ka ramtuenew: “¿Weniyewafuyu?”.
Eunice engu 1960 ka 1989 mu
Eunice tañi ñuke kimlu kidu tañi chillkatukefiel ti Biblia, feypifi tati longkolelu ti chillkatuwe ruka mu ñi rulpaduamelafiel ta Eunice ñi femwenoal. Ti longkolelu dikümtukufi ka müntuñmafi tati papil nütramkalu Biblia mu, welu Eunice eluwkülefuy ñi nor piwkeyeafiel ta Jewba. Küpa fawtisawlu, tañi pu chaw feypieyew: “Dungukelu Iney Ngen Jewba ngerpulmi, wemünentuwayiñ taiñ ruka mu”. Feymu Eunice nielu 17 tripantu müten, wiñamtuwi kiñe reñma Dungukelu Iney Ngen Jewba ñi ruka mu. Kidu amulefuy ñi chillkatufiel ti Biblia ka fawtisawi. Kidu rume falin-ngerpuy iñche tañi mongen mu, rupalu chi antü tañi domo ngerpulu kay. Niewiyu 1960 tripantu mu, welu Eunice tañi pu chaw küpalayngu ti mafün mu. Rupalu chi tripantu, tañi pu chaw yamnieeyumu chem tayu feyentukeel ka chumngechi tayu kimeltufiel tayu pichikeche.
CHAW JEWBA DAPIKEENEW
Tañi fotüm Nicholas ka tañi domo Deborah, küdawkeyngu Fetel Londres mu
Nierpuyu regle pichikeche pilungenolu, küdawngefuy tayu tremümfiel. Welu kimeltukefiyu seña dungu taiñ küme nütramkawal ka tayu kimeltuafiel ti rüf dungu. Pu peñi ka lamngen trawünche mew rume kellueyumu. Kiñe rupa, kiñe peñi wirintukuy tayu feypiaetew kiñe tayu pichikeche ñi pekanka dungumeken Trawünwe Ruka mu. Feymu norümfemfiyu. Meli tañi pu fotüm, James, Jerry, Nicholas ka Steven, longkoleyngün kidu ñi trawünche mu ka poyekefingün ta Jewba tañi pu che engün. Kafey Nicholas ka tañi domo Deborah, kellukeyngu chew ñi rulpangekeel fillke papil seña dungu mew, Fetel Londres mu. Ka Steven ka tañi domo Shannan küdawkeyngu ñi rulpangeal fillke papil seña dungu mu, Fetel Estados Unidos mew.
Tañi pu fotüm ka ñi pu domo fillke dungu mew kellukeyngün ñi amuldungungeal seña dungu mew.
Pichilewelu tayu puwal 40 tripantu tayu niewün, Eunice lay cancer kutran mu. Müna weda. Kom feychi antü ñi chaftufiel tañi kutran, newentukefeyew ñi maneluwün ti wiñomongetun mu.
Rume ayülen ñi puwal feychi antü tañi petuafiel.Faye ka James, Jerry ka Evelyn, Shannan ka Steven
Febrero küyen 2012 mu, tranün ka trafoy tañi rongewe. Feymu duamnien ñi kellungeal. Fey wiñamtuwün tañi fotüm ka kidu tañi domo ñi ruka mew. Amukeiñ ti trawünche seña dungu Calgary mu (Alberta, Canada), üye mu longkolen. Tüfa tati wünen rupan ñi amuken kiñe trawünche seña dungu mew. Fey, ¿chumngechi weniyefiñ ta Jewba kom tüfachi tripantu mülelu rume kiñe trawünche gringudungun mew? Jewba kelluenew. Kidu femi ñi feypikünuel ñi dapiafiel tati pu kuñifallkülelu (Salmo 10:14). Rume mañumkefiñ kom tati pu che eluwkülelu ñi femal kom tañi pepilnieel ñi wirintukual, ñi kimal seña dungu kam ñi rulpaetew ñi feypingeel, femngechi tañi kelluaetew ta iñche.
Amun ti Chillkatuwe ñi Pepikangeam pu Wünelekelu Amuldungun mew seña dungu mu, nielu iñche 79 tripantu
Kiñeke mu, kimlafun chem ñi feypingeel ka rakiduamün iney no rume ñi kimnon chumngechi ñi kelluafiel pu pilu, feymu weda duamün ka afeluwün. Welu rakiduamkefun Pedro ñi feypifiel ta Jesus: “Ñidol, ¿iney mew kay amuafuiñ? Eymi tami dungun ta rumel mongen dungun” (Juan 6:66-68). Fentren pilu reke poyekefilu ta Jewba fentren tripantu mu, iñche kimürpun ñi afeluwnoal. Kafey kimürpun ñi maneluwal Jewba mu ka tañi trokiñche mew. Tüfa müna kelluenew. Fewla müley fillke dungu Biblia mu ti seña dungu mew ñi kimürpuel pichikalu iñche, ka amuafun fillke trawün ka fütrake trawün Americano seña dungu, tüfa ayüwülkeenew. Feley tati, ayüwün mongen nien poyekefilu am ta Jewba, taiñ Fütra Chaw Ngünechen.