1. Tañi weniyewal epu che, ¿chem müley tañi femal?

TAÑI doy weniyewal epu che, müley tañi küme nütramkawal, femngechi tañi doy küme kimuwal engu. Welu doy küdawngeafuy weniyeafiel ta Jesus. ¿Chumngelu am? Ngüneduamafiyiñ.

2. ¿Chumngelu küdawngeafuy taiñ weniyeafiel ta Jesus?

² Famülke mu, iñchiñ pekelafiyiñ ta Jesus, feymu küdawtuafuiñ taiñ weniyeafiel. Fütra kuyfi mu, fentren wünenke cristiano ka femngechi turpu pelafingün ta Jesus. Feymu Pedro feypi: ‘Eymün piwkeyefimün ta Jesukristo, pekelafimün rume. Feyentuleymün ta kidu mew fey tamün pekenofiel rume’ (1 Ped. 1:⁠8). ¿Chem kimeltukeeiñmu tüfa? Penofiliyiñ rume ta Jesus, weniyerpuafuiñ.

3. ¿Ka chem dungu mew küdawtuafuiñ taiñ weniyeafiel ta Jesus?

³ Kafey nütramkawkelaiñ Jesus iñchiñ, feymu küdawngeafuy taiñ weniyeafiel. Llellipun mu iñchiñ, üytukefiyiñ ta Jesus, welu nütramkakefiyiñ ta Jewba. Jewba müten feley tañi püramyengeal, feymu Jesus pilay taiñ ngillatuafiel (Mat. 4:⁠10). Felefule rume, pengelafuiñ ta Jesus fente taiñ piwkeyeniefiel.

4. 1) ¿Ka chem dungu mu küdawngeafuy taiñ weniyeafiel ta Jesus? 2) ¿Chem ngüneduamaiñ tüfachi chillkatun mu?

⁴ Kafey mülelu am Jesus wenu mu, trür mülekelaiñ kidu mu, feymu küdawngeafuy taiñ weniyeafiel. Welu femngefule  rume, küme kimürpuafuiñ ta Jesus. Fewla ngüneduamaiñ chumngelu fente falin-ngey taiñ weniyeafiel ta Jesus. Fey wüla, peaiñ meli ngülam taiñ doy küme weniyeafiel ta Jesus.

5. ¿Chumngelu fente falin-ngey taiñ weniyeafiel ta Jesus? (Inaduamnge ti wichulechi dungu “ Weniyefiliyiñ ta Jesus, weniyerpuafiyiñ ta Jewba” ka “ ¿Tunte piwkeyeafiyiñ ta Jesus?”).

⁵ Mülefuy taiñ küme weniyeafiel ta Jesus, femngechi taiñ küme weniyeafiel ta Jewba. ¿Chumngelu feypiafuiñ tüfa? Jesus feypifi tañi pu inanieetew Chaw Ngünechen “piwkeyeeymünmew eymün am piwkeyemukefiel ta iñche” (Juan 16:⁠27). Jesus ka feypi: “Iñche mew müten feyentulu amuay ta Chaw mew” (Juan 14:⁠6). Rakiduamnge tüfachi dungu, konpulayafuymi kiñe ufisa corral mu, nienolmi chew tami konpual. Ka femngechi puwlayafuymi Ngünechen mu kellunoelmu ta Jesus (Juan 10:⁠7). Feymu doy küme weniyefiliyiñ ta Jesus, doy küme weniyerpuafuiñ ta Jewba. Kafey ngüneduamliyiñ ñi chumün ta Jesus, doy küme kimürpuafuiñ ta Jewba ka doy piwkeyeafuiñ. Jesus küme inayentufi ñi chumngen tañi Chaw, feymu feypifi tañi pu inanieetew: “Tañi pekeetew ta iñche, pekefi ta Chaw” (Juan 14:⁠9).

6. ¿Ka chem dungu mu falin-ngey taiñ weniyeafiel ta Jesus?

⁶ Müley taiñ weniyeafiel ta Jesus, femngechi taiñ allkütuñmangeal taiñ ngillatun. Ngillatun mu iñchiñ, kimnieiñ taiñ feypial “Jesus tañi üy mu” taiñ fentepual. Welu re feypilayaiñ müten, doy may  ka piwkentukuaiñ Jesus tañi duam mu allkütukeeiñmu Jewba. Jesus feypifi tañi pu inanieetew: “Kom tamün ngillatuel ta eymün iñche ñi üy mew [...], iñche ta feman” (Juan 14:⁠13). Jewba müten dullikey chumngechi taiñ wiñoldunguaetew taiñ llellipufiel, welu elfalkünufi ta Jesus ñi femürpual (Mat. 28:⁠18). Feymu petu taiñ wiñoldungunoetew Jewba taiñ ngillatun, wüne ngüneduamay taiñ inaniekefiel Jesus tañi feypin. Rakiduamnge tüfachi dungu, Jesus feypi: ‘Eymün ta wiñoduamatufilmün ta kakelu tamün wedake femkeetew, tamün Chaw ta wenu mapu mülelu ka femngechi wiñoduamatuaeymünmew ta eymün. Welu wiñoduamanofilmün ta kakelu che, ka femngechi wiñoduamalayaeymünmew tamün Chaw eymün tamün culpan mew’ (Mat. 6:⁠14, 15). Duamfali llemay taiñ perdonacheal chumngechi taiñ perdonakeetew Jewba ka Jesus.

7. ¿Chem müley taiñ femal taiñ montulngeal?

⁷ Müley taiñ weniyeafiel ta Jesus, femngechi taiñ montulngeal. ¿Chumngelu feypiafuiñ tüfa? Jesus feypi “tañi wülal kidu ñi mongen kütu ñi weni mew” (Juan 15:⁠13). Fütra kuyfi mu, petu ñi küpanon Jesus, kiñeke che poyekefingün ta Jewba, welu kimürpulafingün ta Jesus. Kiñeke tüfa ta Abraam, Sara, Moyse ka Raab. Kom engün wiñomongetuayngün, fey müley tañi kimürpual ta Jesus ka weniyeafiel, femngechi tañi elungeal ti rumel mongen (Juan 17:⁠3; Hecho 24:⁠15; Eb. 11:⁠8-12, 24-26, 31).

8, 9. 1) Taiñ weniyefiel mu ta Jesus, ¿chem falin küdaw nieiñ? 2) Ñi feypin Juan 15:⁠4, 5, ¿chumngelu duamnieiñ taiñ kelluaetew Jesus?

⁸ Amuldunguchekeiñ Chaw Ngünechen tañi kümeke dungu, femngechi chaf küdawkeiñ reke Jesus iñchiñ. Feymu ayüwküleiñ. Jesus mülepalu Mapu mu, kimeltufi tati pu che. Mülepuy wenu mapu mu, fey longkolerpuy Ngünechen tañi trokiñche mu. Feymu adniefi ti amuldungun küdaw. Jesus falintukefi taiñ newentu küdawmeken ñi kimeltucheal. Welu taiñ femürpual tüfachi küdaw, duamnieiñ taiñ kelluaetew Jewba ka Jesus (papeltunge Juan 15:⁠4, 5).

⁹ Biblia kimeltukeeiñmu taiñ piwkeyeafiel ta Jesus, femngechi taiñ ayüwülafiel ta Jewba. Feymu peaiñ meli dungu taiñ kelluaetew weniyeafiel ta Jesus.

10. Wünelu mu, ¿chem müley taiñ femal taiñ küme weniyeafiel ta Jesus?

¹⁰ Fewla peaiñ meli dungu taiñ weniyeafiel ta Jesus. Kiñe, doy küme kimafiyiñ ta Jesus. ¿Chumngechi femürpuafuiñ tüfa? Chillkatuafiyiñ ti lifru Matew, Marku, Luka ka Juan. Papeltuliyiñ feychi lifru, ngüneduamaiñ Jesus ñi kutranpiwkeyechen, femngechi doy yamnieafuiñ ka doy piwkeyerpuafuiñ. Jesus falin wentru ngefuy, welu ngenkawlay tañi pu inanieetew mu. Doy may, Jesus küme weni trokiyefi tañi pu inanieetew. Feymu feypifi chem tañi rakiduamkülen ka chem ñi mülen tañi piwke mu (Juan 15:⁠15). Jesus pefiel mu tañi pu inanieetew ñi weda duamkülen ka ñi ngümameken, kidu ka inaye ngümay (Juan 11:⁠32-36). Kimfalngefuy Jesus ñi weniyefiel tañi pu küme allkütuetew, tañi pu kayñe kütu ngüneduamingün tüfa (Mat.  11:⁠19). Ka femngechi iñchiñ Jesus reke, küme trokituafiyiñ pu che. Femngechi doy küme yewküleafuiñ, doy ayüwküleafuiñ ka doy fütra piwkeyeafuiñ ta Jesus.

11. 1) ¿Ka chem dungu müley taiñ femal taiñ weniyerpuafiel ta Jesus? 2) ¿Chumngelu fente falin-ngey taiñ femngechi femal?

¹¹ Epu, inayentuafiyiñ Jesus tañi femün ka tañi rakiduam, femngechi doy küme weniyeafuiñ (1 Kor. 2:⁠16). Inaduamaiñ kiñe dungu ñi femün ta Jesus. Kidu kidutu duamuwlay, doy may eluwkülefuy ñi kelluafiel ta che (Mat. 20:⁠28; Rom. 15:⁠1-3). Feymu weda dunguyengelu rume, Jesus illkufemkelay, doy may wiñoduamtukefuy ta che (Juan 1:⁠46, 47). Ka femngechi weda rakiduamkelafuy pu che ñi welulkan engün (1 Tim. 1:⁠12-14). Feymu, ¿chumngechi inayentuafuiñ ta Jesus? Kidu feypi: “Welukonkechi piwkeyewülmün, kom mapu mew mülechi pu che kimayngün iñche tañi discipulo ngen ta eymün” (Juan 13:⁠35). Kümeafuy taiñ ramtuwal: “Jesus reke, ¿eluwkülepen may tañi küme yewküleal kom tañi pu peñi ka pu lamngen iñchiñ?”.

12. ¿Ka chem femafuiñ taiñ küme weniyeafiel ta Jesus?

¹² Küla, kelluntukuafiyiñ pu dullin cristiano, femngechi taiñ weniyerpuafiel ta Jesus. Tati pu dullingelu, Jesus tañi peñi reke feley. Feymu kelluntukufiliyiñ engün, kidu ta kellungelu trokiwkey Jesus (Mat. 25:⁠34-40). ¿Chumngechi kelluntukuafuiñ pu dullin cristiano? Kom taiñ newen mu amuldungucheaiñ ka kimeltucheaiñ chumngechi taiñ werküetew ta Jesus (Mat. 28:⁠19, 20; Hecho 10:⁠42). Pu dullin cristiano duamnieyngün ñi kelluaetew pu kakelu ufisa, femngechi müten wechurpuafuyngün tañi falin küdaw (Juan 10:⁠16). Feymu koneltuleliyiñ pu kakelu ufisa mu, eluwküleaiñ taiñ amuldungucheal. Femngechi pengelafuiñ taiñ piwkeyeniefiel pu dullin cristiano, welu doyelchi may taiñ piwkeyeniefiel ta Jesus.

13. ¿Chumngechi inayafuiñ ñi feypin Luka 16:⁠9?

¹³ Kelluntukuliyiñ plata mu ñi femken Jewba tañi trokiñche, ka femngechi weniyerpuafuiñ ta Jewba ka Jesus (papeltunge Luka 16:⁠9). Tüfachi plata taiñ wülkeel kelluntukuafuy ñi amuldungungeal fütra kamapu mu, ñi dewmangeal Trawünwe Ruka ka ñi kellungeal pu weda rupamekelu. Ka kelluntukuafuiñ plata mu ñi kullingeal fillke duam taiñ trawünche mu. Ka ngüneduamliyiñ ñi weda rupameken kiñeke taiñ pu peñi ka pu lamngen, ka kelluafiyiñ engün (Prov. 19:⁠17). Femliyiñ kom tüfachi dungu, kelluntukuafiyiñ pu dullin cristiano.

14. Ñi feypin Efesio 4:⁠15, 16, ¿chuchi am kangelu dungu taiñ weniyerpuafiel ta Jesus?

¹⁴ Meli, inayaiñ kom taiñ feypikeetew Jewba tañi trokiñche, femngechi taiñ weniyeafiel ta Jesus. Jesus longkoley Jewba tañi trokiñche mu, feymu müley taiñ yamnieafiel pu wentru kidu ñi longkokünuel, femngechi doy weniyeafiyiñ ta Jesus (papeltunge Efesio 4:⁠15, 16). Rakiduamnge tüfachi dungu: fentren trawünche trapümngey ka doy küme adkünungey chew ñi amuldungual engün, femngechi ñi apoleal tati Trawünwe Ruka, fey ñi ngünamkangenoal tati plata. Kiñeke peñi ka lamngen pütrükeñma mülekefuy kiñeke trawünche mu, feymu wimtulekefuyngün fey mu. Welu feypingeyngün ñi amual kake trawünche mu, welu ayüwünkechi femürpuyngün.  Rume ayüwülpelafingün ta Jesus tañi femün mu.

15. Küpalechi antü mu, ¿chumlerpuay taiñ küme weniyeafiel ta Jesus? ¿Chumngelu?

¹⁵ Tati pu dullinke cristiano ngünenieayngün Jesus engün wenu mapu. Tati pu dullin cristiano rumel kiñewküleayngün Jesus engün, fey peafingün ka nütramkayafingün ka trür küdawayngün (Juan 14:⁠2, 3). ¿Kakelu pu che kay ñi rumel müleal Mapu mu? Kidu engün ka femngechi ngüneduamayngün fente ñi piwkeyenieetew ka weniyeetew ta Jesus, ka rumel ayüwküleayngün chumngechi ñi adkünuel ta Jewba ka Jesus. Tüfachi pu che pelayafingün ta Jesus, welu rumel amuleayngün ñi küme weniyeafiel ta Jesus (Is. 9:⁠6, 7).

16. Taiñ weniyefiel mu ta Jesus, ¿chumngechi doy kümelkaletuaiñ?

¹⁶ Weniyefiliyiñ ta Jesus, doy kümelkaletuaiñ. ¿Chumngechi am? Famülke mu, Jesus piwkeyenieeiñmu ka kellukeeiñmu. Kafey maneluwküleiñ taiñ rumel mongeleal. Taiñ weniyefiel ta Jesus, tüfa kellukeeiñmu taiñ weniyerpuafiel ta Jewba. Kidu tati doy küme weni taiñ nierpuafel. ¡Müna küme dungu ürke taiñ weniyerpufiel ta Jesus!