1, 2. ¿Chumngechi inayafuiñ Jesus tañi femün? (Feypiaymi kiñe pengelün dungu).

PÜRALELIYIÑ wingkul mu apolechi pire mew ka kiñe che wüneley adnieeiñmu, fey elnewpuy tañi trekan pire mu. Petu taiñ inaniefiel pewerumelafiyiñ, welu llükalaiñ. Inaniefiyiñ müten chew tañi amulen.

² Fente ñi wedalkalen ti dungu Mapu mew, kiñe kuñiwün-ngechi rüpü reke feley. Fey kom iñchiñ taiñ cristianongen mu, amuleiñ reke tüfachi rüpü mew. Feymu rume mañumniefiyiñ ta Chaw Jewba, fey taiñ küme adnieaetew. Elkünuy tañi Fotüm Jesukristo taiñ inayentuafiel tañi femün (1 Ped. 2:⁠21). Tüfa mu, Pedro trürümfi ta Jesus kiñe che mu taiñ adniekeetew kiñe rüpü mew chew taiñ amual. Chumngechi elngekey tañi trekan taiñ inayafiel, ka femngechi Jesus elkünuy tañi femün taiñ inayafiel. Welu, ¿chumi Jesus taiñ inayentuafiel? ¿Chemu mülefuy taiñ inayentuafiel? Ka, ¿chumngechi femafuiñ?

3. ¿Chem pilefuy ñi inañmangeal ñi trekan kiñe che?

³ ¿Chem pilefuy ñi inañmangeal ñi trekan kiñe che? Fentren rupa Biblia mew ñi trekan kiñe che trürümngey  tañi femün mew. Chumngechi iñchiñ inakefiyiñ ñi trekan kiñe che, ka femngechi inayafuiñ kakelu che kümeke dungu femlu.

4. ¿Chumngelu inayentufali ta Jesus?

⁴ Kom iñchiñ inayafuiñ Jesus tañi femün. ¿Chumngelu inayentufali ta Jesus? Jesus rupay ta fentren kutrankawün mu, welu aguantay, femngechi wirintukuy ti apostol Pedro. Welu Jesus ka femi fentren dungu ñi inayentungeal (1 Ped. 2:⁠18-25). Kom tañi nütramkan ka tañi femün ta Jesus, kom kümey ñi inayentungeal.

5. Taiñ culpanchengen mu, ¿rüf küme inayentupeafuiñ may ta Jesus? ¿Chumngelu?

⁵ Iñchiñ culpafe chengeiñ. Fey, ¿rüf küme inayentupeafuiñ may ta Jesus? Femafuiñ llemay. Welulkawafuiñ rume, welu eluwküleafuiñ taiñ küme inayentuafiel. Femngechi femliyiñ, nieaiñ lif mongen Jesus reke. Tüfa ñi ngülamtuel ti apostol Juan (1 Juan 2:⁠6).

6, 7. Inayentuliyiñ Jesus ñi femün doy küme weniyeafuiñ ta Jewba, ¿chumngelu feypiafuiñ?

⁶ Inayentufiliyiñ Jesus tañi femün doy küme weniyeafiyiñ ta Jewba. ¿Chumngelu feypiafuiñ tüfa? Kiñe dungu, feyta Jesus miyawpalu Mapu mu, kom ñi mongen mu ayüwülfi ta Jewba (Juan 8:⁠29). Feymu inayentufiliyiñ ñi femün ta Jesus, ayüwülafiyiñ ta Jewba. Ayüwülfiliyiñ taiñ Wenu Chaw, fülkontunieaeiñmu llemay (Sant. 4:⁠8).

⁷ Kangelu dungu, Jesus fente küme inayentufi tañi Chaw Jewba. Feymu feypi: “Tañi pekeetew ta iñche, pekefi ta Chaw” (Juan 14:⁠9). ¿Chumkefuy ta Jesus? Kutranpiwkeyechekefuy. ¿Chumngechi?  Tremoltufi kiñe leproso ka kiñe domo mollfüñ kutran niefulu. Kafey kutranpiwkeyefi tati pu layeluwchi che. Jesus reke kutranpiwkeyecheliyiñ, ka inayentuafiyiñ ta Jewba (Mar. 1:⁠40, 41; 5:⁠25-34; Juan 11:⁠33-35). Fey doy inayentufiliyiñ ta Jewba, doy küme weniyeafiyiñ. 

8. Inafiliyiñ Jesus tañi femün wewafiyiñ ti wedake dungu, ¿chumngelu?

⁸ Inayentufiliyiñ ta Jesus, püntütripalayaiñ Jewba mu. Biblia pengeli Jesus miyawpalu Mapu mu, wewfi reke tati wedake dungu (Juan 16:⁠33). ¿Chem pifel tüfa? Jesus eluwlay ñi welurakiduamelaetew tati pu che ka inalafi tañi wedake femün engün. Werküngelu ta Mapu mu, Jesus doyümfi ñi püramyengeal ta Chaw Jewba. ¿Iñchiñ kay? ¿Chem müley taiñ femal? Famülke mu, fentren wedake dungu müley taiñ welulkayafetew, welu doyümfiliyiñ taiñ püramyenieafiel ta Chaw Jewba, wewafiyiñ kom ti wedake dungu (1 Juan 5:⁠5).

9. ¿Chumaiñ taiñ rumel mongeleal?

⁹ Inafiliyiñ Jesus tañi femün, aflayay taiñ mongen. Kiñe rupa kiñe weche wentru ramtufi ta Jesus: “Kimeltufe, ¿chem küme dungu am feman tañi nieal rumel mongen?”. Fey Jesus feypieyew: “Küpange ka inaen” (Mat. 19:⁠16-21). Kangelu rupa Jesus feypifi ta kiñeke feyentulenochi judio: ‘Iñche ñi pu ufisa inakeenew. Iñche ta eluafiñ rumel mongen’ (Juan 10:⁠24-29). Ka rupa kiñe fariseo longkolelu pu judio mew, Nikodemo pingey, doy küpa kimi Jesus ñi kimeltun mu. Fey Jesus feypi tañi pu feyentuetew müten rumel mongeleay (Juan 3:⁠16). Iñchiñ, ¿chumngechi pengelafuiñ taiñ feyentulen Jesus mew? Müley taiñ inayafiel ñi kimeltuel ka ñi femel ta Jesus. Femliyiñ, turpu aflayay taiñ mongen (Mat. 7:⁠14).

10. ¿Chem mülefuy taiñ kimal Jesus mu? (Juan 17:⁠3).

¹⁰ Petu taiñ inanon Jesus tañi femün, müley taiñ küme kimafiel (papeltunge Juan 17:⁠3). Fill antü müley taiñ doy kimafiel tañi chumngechi chengen, tañi ayükeel, tañi ayükenoel ka tañi werküel. Tunten tripantu yenieliyiñ rume Jewba ñi rüpü mu, eluwküleaiñ taiñ doy kimafiel ta Jewba ka Jesus.

11. ¿Chem mu nütramkay tati meli evangelio?

¹¹ Jewba kellukeeiñmu taiñ doy kimafiel ta Jesus. ¿Chumngechi? Biblia mew elkünuy meli lifru: Matew, Marku, Luka ka Juan. Tüfa evangelio ka pingekey.  Feytachi meli lifru mu, peafuiñ Jesus ñi fempan ka ñi amuldungupan Mapu mu. Ka kimafuiñ ñi kimeltuel ka chem rakiduam tañi niekefel (Eb. 12:⁠3). Küme estudiafiliyiñ tati meli evangelio, doy küme kimafuiñ ta Jesus ka inayafuiñ ñi femel.

12. ¿Chumaiñ taiñ doy kimafiel ta Jesus?

¹² Re papeltulayaiñ müten tüfachi meli lifru. Doy may küme estudiayafiyiñ ka rakiduamaiñ taiñ papeltuel mu (ka ngüneduamafuymi Josué 1:⁠8, kimal dungu). Femngechi müten doy kimafuiñ ta Jesus. Taiñ femal tüfa, peaiñ epu dungu taiñ kelluaetew.

13. ¿Chumngechi penieafuiñ reke ñi rupan ta Jesus?

¹³ Wünelu mu, peniekayafimi reke chem ñi rupan. Petu papeltulmi kiñe che ñi rupan, imaginayaymi ti che tañi pen, ñi allküel ka tañi chum duamkülen. Ka kintuafuymi iney ngen ti che ka chew ñi miyawkefel. Tami femal tüfa, küme ngüneduamafuymi taiñ fillke publicacion. Kafey, petu papeltulmi kiñe trokiñ Biblia, ka ngüneduamafuymi kakelu versiculo ñi nüwkülen tami papeltumekeel mu. Kiñeke mu, feychi rupan tami papeltuel kiñe evangelio mu, ka wirikonküley kangelu evangelio mu, fey trürümafuymi. ¿Chumngelu? Kiñe evangelio mu doy nütramkangekey, kangelu müte femngekelay.

14, 15. Küpa inaliyiñ chem taiñ kimürpuel Jesus mu, ¿chumaiñ?

¹⁴ Epu dungu, chem ñi kimeltuel tati evangelio, inayaiñ taiñ mongen mu (Juan 13:⁠17, TNM). ¿Chumngechi inayafuiñ taiñ kimürpuel? Küme ngüneduamfiliyiñ wüla taiñ papeltuel, ramtuwaiñ: “Tañi papeltuel, ¿chem enseñalkeenew iñche? Tañi kimürpuel mu, ¿chumngechi  kelluafun ta kakelu che?”. Rakiduamaiñ iney taiñ kelluafiel. Fey wüla kümefule, piwkeyenkechi feypiafiyiñ ti che chem taiñ kimürpuel.

¹⁵ Fewla, ngüneduamaiñ ñi rupan kiñe lantu domo. Fey, peaiñ chumngechi inayafuiñ tüfachi epu ngülam taiñ inaduampeel.

16. Ñi feypin Marku 12:⁠41, ¿chem rupay feychi antü mu? ¿Chem pimi kay?

¹⁶ Penieafiyiñ reke chem ñi rupan (papeltunge Marku 12:⁠41). Rakiduamaiñ chem ñi rupameken: puwi ti 11 konchi nisan küyen, fey pichilewey ñi layal Jesus. Epe kom feychi antü Jesus kimeltumekefuy tati ngillatuwe ruka mu. Welu tati pu longkolechi religioso kayñetudungueyew ka ramtukadungueyew engün (Marku 11:⁠27-33; 12:⁠13-34). Rupalu tüfa, amuy chew ñi tukungekem plata, fey anülen adkintuniefi pu che tukumekelu plata. Fentren ricuche alün moneda tukumekeyngün. Fey Jesus allkülepelay ñi triliwkonpun ti moneda caja mu.

17. Ñi feypin Marku 12:⁠42, ¿chumi ti pofre lantu domo?

¹⁷ (Papeltunge Marku 12:⁠42). Jesus inaduamrumefi kiñe pofre lantu domo. Rume küdawtukey ñi nieal chem rume. Felefulu rume, ñochikechi konpuy chew ñi tukungekem plata, fey tukupuy epu pichike moneda, newe triliwlay rume tañi moneda. Jesus kimniefuy chumten moneda ñi tukun, lepton pingekefuy feychi moneda. Tüfa newe falilafuy. Pu pichike gorrion müte falilafuy, welu kiñe gorrion rume ngillangelayafuy feychi epu lepton mu.

18. Ñi feypin Marku 12:⁠43, 44, ¿chumngentufi Jesus ñi femün ti lantu domo?

¹⁸ (Papeltunge Marku 12:⁠43, 44). Jesus afmatulewey ñi femün tüfachi lantu domo. Jesus feypifi tañi pu discipulo ñi inaduamafiel, fey feypifi engün: “Tüfachi pofre lantu domo doy alün tukupay kom ti kakelu pu che mew [...]. Kom kakelu wülkey engün tañi sofrantunieelchi plata, welu ti domo, pofrengefuy rume, wüli kom ñi niefel tañi mongeluwam”. Tüfachi domo kom tukulu tañi nieelchi plata caja mu, pengeli tañi rüf maneluwkülen Jewba ñi kidukünunoaetew (Sal. 26:⁠3).

19. Ñi feypin Jesus tati lantu domo mu, ¿chem kimeltueiñmu?

¹⁹ Taiñ kimürpuel inayaiñ taiñ mongen mu. Jesus ñi feypin ti lantu domo mu, ¿chem kimeltukeeiñmu? Rakiduamaiñ feytachi domo mu. Ayüpelafuy ñi doy eluafiel ta Jewba, welu pepi femlay. Felelu rume, elufi kom tañi nieel ta Jewba. Jesus kimniey ta Chaw Jewba falintuñmafi ñi wülün tati domo. Tüfa kimeltueiñmu kiñe falin dungu: Chaw Jewba falintukey taiñ serfiafiel kom piwke mu (Mat. 22:⁠37; Kol. 3:⁠23). Kom taiñ newen mu amuldunguliyiñ ka amuliyiñ trawün mu, Jewba rume ayüway. Feley llemay, Jewba falintukefi kom taiñ femkeel taiñ poyeafiel.

20. Jesus reke, ¿chumngechi yafültukuafuiñ taiñ pu peñi ka pu lamngen?

²⁰ Dew ngüneduamfiyiñ Jesus ñi feypin tati lantu domo mu. Fey, ¿iñchiñ kay? ¿Chumngechi yafültukucheafuiñ? Rakiduamaiñ iney duamniey ñi yafültukungeal. Mülepelay kusheke papay trawünche mu, kutrankülelu ka  yafüngewenolu. Fey amuldunguwelayngün chumngechi ñi femkefel kuyfi, tüfa rume weda duamelkeeyew. Ka mülepelay kiñeke peñi fente ñi kutrankülen mu, pepi amuwelay trawün mu. Küme dunguafiyiñ, femngechi ñi ayüwmayal engün (Efes. 4:⁠29). Feypiafiyiñ chem taiñ kimürpuel ñi rupan tati lantu domo ñi feypiel Jesus. Taiñ feypin mu, kelluafuiñ ñi longkontukunieal engün Jewba rume falintueyew ñi femün (Prov. 15:⁠23; 1 Tes. 5:⁠11). Femngechi femün mu iñchiñ, inayentukefiyiñ ta Jesus.

21. Tami ngüneduampeel tüfa, ¿chem eluwküleymi tami femal?

²¹ Tati meli evangelio fentren dungu kimeltukeeiñmu Jesus mu. Feymu rume mañumküleiñ. Femngechi küme inayentuafuiñ ta Jesus. Kümeafuy taiñ kidu estudiayal tati meli evangelio kam kiñentrür taiñ familia iñchiñ, femngechi doy küme inayafuiñ ta Jesus. Longkontukuaiñ: estudiafiliyiñ ti meli evangelio, eluwküleaiñ taiñ penieafiel reke chem ñi rupan ka inayaiñ taiñ kimürpuel taiñ mongen mu. Femngechi müten küme inayafiyiñ ta Jesus. Rume falin-ngey taiñ inayal Jesus ñi femün, welu ka falin-ngey taiñ küme allkütual Jesus ñi feypin. Feymu küpalechi trokiñ mu inaduamaiñ Jesus ñi feypin epe puwlu ñi layal.