¿Chumngelu Jesus petu ñi lanon feypi ti Salmo 22:⁠1 David ñi wirintukuel?

Puwlu ñi layal, Jesus feypi: ‘Iñche ñi Ngünechen, iñche ñi Ngünechen, ¿chumngelu kidukünuen?’, chumngechi feypiley Matew 27:⁠46. Feypin mu tüfa Jesus wechutriparpuy ñi feypilen David Salmo 22:⁠1 mu (Mar. 15:⁠34). Jesus ñi feypin mu tüfachi dungu, ¿feyentuwelay Ngünechen mu piafuiñ? Femlay llemay. Jesus küme kimniefuy chemu ñi layal ka eluwkülefuy ñi femal (Mat. 16:⁠21; 20:⁠28). Puwlu chi antü ñi layal, kimniefuy Ngünechen tañi ingkañpenoaetew (Job 1:⁠10). ¿Chumngelu ingkañpelaeyew Jewba? Femngechi Jesus pengelkünuy tañi piwkeyeniefiel ka feyentuniefiel ta Jewba, tunte kutrankülefule rume tañi lan (Mar. 14:⁠35, 36).

Feymu, ¿chemu feypi Jesus ñi feypilen tüfachi salmo? Peaiñ chem rakiduamfuy chi Jesus.⁠ *

Jesus küpa pengelafuy chi tañi Chaw ñi katrütunoaetew tañi layal. Jesus mülefuy ñi wülal tañi mongen kidu ñi newentun mu, Jewba ñi kellunon mu. Jesus mülefuy ñi layal femngechi ñi montulafiel “itrokom che” (Eb. 2:⁠9).

Jesus ayüniefuy chi pu che ñi acordayal kom tati salmo. Feychi antü mu, pu judio longkontukuniefingün fentren salmo. Feymu allkütulu engün kiñe salmo, acordafemkefuyngün  kom tati salmo. Tati salmo 22 mu wirintukungey fentren profecia nüwkülelu Jesus tañi lan mu. Feymu Jesus ayüniefuy chi tañi pu inanieetew ñi acordangeal (Sal. 22:⁠7, 8, 15, 16, 18, 24). Kafey inalechi salmo mu, püramyengey ta Jewba ka kimfalküley tañi Reyngen. Feymu Jesus ayüniefuy chi tañi pu discipulo ñi acordangeal tüfachi salmo (Sal. 22:⁠27-31).

Jesus ayüniefuy chi ñi pengelal tañi culpafe chengenon. Petu ñi lanon, Jesus koyla juzgangey, dalluntukungey ka ‘koylatufe’ pingey (Mat. 26:⁠65, 66). Pu longkolelu Sanedrin mu epe wünlu trawüluwingün ñi juzgayafiel ta Jesus, ka inalayngün ti ley ñi nieel engün ñi juzgacheal (Mat. 26:⁠59; Mar. 14:⁠56-59). Jesus ñi feypin Salmo 22:⁠1 feypikay reke: “Iñche chem weda dungu rume femlan, feymu ¿chumngelu anta kisukünuen?”. Feymu Jesus ayüniefuy chi ñi kimfalkünual tañi weda femnon, feymu ngelafuy ñi langümngeal.

David wirintukuy tüfachi salmo, fey Jesus küpa rakiduamelfi chi tañi pu inanieetew David ñi rupan. Kidu weniyefuy rume ta Jewba, rupay kutrankawün mu. David fentekünukelay tañi feyentuken Jewba mu. Tüfachi salmo mu kimfalkünuy ñi maneluwken Jewba mu tañi montulafiel ñi pu che, ka Jewba rumel kümelkaeyew (Sal. 22:⁠23, 24, 27). Ka femngechi Jesus, kutrankawlu rume tati orkon mew, ayüwülmafi ñi piwke ta Jewba. Feymu Jewba rume falintunieeyew (Mat. 21:⁠9).

Jesus rume kutrankawi tañi ingkañpenoetew mu tañi Chaw, feymu peno feypi tati salmo. Jewba ayünielafuy tañi Fotüm ñi femngechi kutrankawal ka ñi layal. Welu duamfali ñi femngechi rupayal Adan ka Eva tañi feyentunofiel mu ta Jewba. Jesus femlafuy chem weda dungu no rume, welu mülefuy ñi kutrankawal ka ñi layal ñi pengelal Weküfü ñi koylatufengen. Kafey ñi wiño ngillayal reke kom ñi ñamümel ti wünen wentru Adan (Mar. 8:⁠31; 1 Ped. 2:⁠21-24). Feytachi dungu mu Jewba pichiñma mu ingkañpelafi ta Jesus, femngechi Jesus ñi pengelal tañi nor piwkeyefiel tañi Chaw.

Jesus ayüniefuy chi tañi pu discipulo ñi longkontukual chumngelu Jewba katrütulay ñi layal kiñe orkon mamüll mew.⁠ * Jesus kimniefuy tañi langümngeal kiñe culpafe che reke weda rakiduamelafuy fentren che (1 Kor. 1:⁠23, TNM). Pu discipulo ngüneduamfule chumngelu mülefuy ñi layal Jesus, doy pepilafuyngün chumngelu ñi femngechi langümngeel (Gal. 3:⁠13, 14, TNM). Femngechi kimtukuyngün Jesus ñi culpafengenon, doy may tañi montulchefengen.

Chuchi dungu ngefule rume ñi feypin tati salmo, Jesus küme kimniefuy ñi femmeken ñi ayünieel ta Jewba. Pichiñma mu ñi feypiel tati salmo, Jesus feypi: ‘Itrokom dungu dew wechutripay’ (Juan 19:⁠30; Luka 22:⁠37). Jewba pichin tiempo mu kellulafi ta Jesus, femngechi Jesus femürpuy kom tañi werküetew tañi Chaw. Ka femngechi wechutriparpuy kom ñi feypikünuel kidu mu Moyse ñi ley dungu mew, pu profeta ñi wirin dungu mew ka tati pu salmo lifru mew. Kom wechutriparpuy (Luka 24:⁠44).