1. ¿Chem müna falintukefiyiñ kom iñchiñ?

MÜNA falintukefiyiñ taiñ konkülen Jewba tañi trokiñche mu. Kiñentrür serfikefiyiñ ta Jewba taiñ pu peñi ka pu lamngen iñchiñ, feymu ayüwkülekeiñ ka tüngkülekeiñ. Welu kake kiñeke iñchiñ, ¿chemu falin-ngeiñ ti trawünche mu? Peafiyiñ.

2. ¿Chem pengelün dungu pengeli Pablo tañi carta mu?

² Kiñeke carta mu, Pablo trürümfi ti trawünche ta kiñe cuerpo mu. Ka feypi kom pu koneltulelu ti trawünche mu trürümngey tati troy mülelu ti cuerpo mu. Feyta kimeltukeeiñmu kom taiñ falin-ngen trawünche mu (Rom. 12:⁠4-8; 1 Kor. 12:⁠12-27; Efes. 4:⁠16).

3. ¿Chem küla dungu peaiñ feytachi chillkatun mu?

³ Kom iñchiñ yafültukuafuiñ pu peñi ka pu lamngen. Chem tuwün nieliyiñ rume, tunten plata nieliyiñ rume ka tunten educacion nieliyiñ rume, kom iñchiñ falin-ngeiñ Jewba tañi trokiñche mu. Feytachi chillkatun mu, peaiñ küla falin dungu taiñ enseñaletew Pablo ñi pengelün dungu: 1) Peaiñ chumngelu kake kiñeke iñchiñ falin-ngeiñ Jewba tañi trokiñche mu. 2) Peaiñ chem chumafuiñ müte falinolu trokiwliyiñ. 3) Peaiñ chumngelu mülefuy  taiñ femal ti küdaw taiñ eluetew Jewba kake kiñeke iñchiñ.

4. ¿Chem enseñaleiñmu Romanu 12:⁠4, 5?

⁴ Pablo ñi pengelün dungu enseñalkeeiñmu kake kiñeke iñchiñ falin-ngeiñ Jewba tañi trokiñche mu. Kidu feypi: “Chumngechi kiñe cuerpo mew müley ta fentren pichike troy cuerpo, fey itrokom troy mülelu cuerpo mew kakerume küdaw niey. Ka femngechi ta iñchiñ, tunte alün-ngefuiñ rume, kiñe cuerpo reke ta feleiñ ta Kristo mew ka kiñewküleiñ kiñe cuerpo mew reke felelu” (Rom. 12:⁠4, 5). ¿Chem enseñaleiñmu Pablo? Kake kiñeke iñchiñ kakerumen küdaw nieiñ, welu kom iñchiñ falin-ngeiñ.

5. ¿Chem elufi Jewba tati trawünche?

⁵ Jesus tañi duam mu, Jewba werküfi kiñeke “wentru ñi kümelkayafiel ti trawünche” (Efes. 4:⁠8, TNM). Müley Cuerpo Gobernante ka tañi pu kellukeetew, pu adniekelu ta Betel, pu witran-ngepakechi longkolelu. Müley pu kimeltukelu fillke escuela mu ñi nieel Jewba tañi trokiñche, pu longkolelu ka pu siervo ministerial. Kom feytachi pu peñi Jewba tañi newen mu elkünungeyngün, fey cuidakefingün ka yafültukukefingün pu peñi ka pu lamngen (1 Ped. 5:⁠2, 3). Feymu tüfachi pu peñi rume falin-ngeyngün ti trawünche mu (1 Tes. 5:⁠12; Eb. 13:⁠17).

6. Ñi feypin 1 Tesalonisense 2:⁠6-8, ¿chem doyümkefingün pu peñi nielu falinke küdaw?

⁶ Taiñ namun ka taiñ kuwü trür küdawkey ñi kümelkayafiel kom taiñ cuerpo. Ka femngechi pu peñi nielu kakerume küdaw, trür küdawkey ñi kümelkayafiel kom ti trawünche. Kintuyawülkelay tañi fampüramngeal engün, doy may yafültukukefi pu peñi ka pu lamngen (papeltunge 1 Tesalonisense 2:⁠6-8). Feytachi pu kümeke peñi doyümkefingün ñi kümelkaleal ti trawünche, feymu rume mañumtukefiyiñ ta Jewba.

7. ¿Chem kümeke dungu llowkeyngün pu wünelekelu amuldungun mu ka pu misionero?

⁷ Fentren trawünche mu müley wünelekelu amuldungun mu: regulares, especiales ka misioneros. Kom Mapu püle, fentren taiñ pu peñi ka pu lamngen eluwkey ñi amuldungucheal ka kimeltucheal fill antü, femngechi kellukefi pütrüken che ñi discipulo ngerpual. Epe kom feytachi pu peñi ka pu lamngen ricungelafuy, welu Jewba müna kümelkakeeyew (Mar. 10:⁠29, 30). Müna piwkeyefiyiñ feytachi pu peñi, pu lamngen, ka ayüwküleiñ ñi mülen taiñ trawünche mu.

8. ¿Chumngelu kom pu amuldungukelu falintukeeyew Jewba?

⁸ Pu peñi nielu falinke küdaw, pu wünelekelu amuldungun mu ka pu misionero, ¿fey engün müten pemay falin-ngey trawünche mu? ¡Femlay llemay! Kom pu amuldungukelu falintukeeyew Jewba ka falintukeeyew tati pu trawünche (Rom. 10:⁠15; 1 Kor. 3:⁠6-9). ¿Chemu am? Tati trawünche elkünungey ñi kelluafiel ta che ñi discipulo ngerpual (Mat. 28:⁠19, 20; 1 Tim. 2:⁠4). Kom pu amuldungukelu, fautizawkülefule rume, femnofule rume, doyümniekeyngün tañi amuldungucheal, feymu müna falin-ngeyngün (Mat. 24:⁠14).

9. ¿Chumngelu fente falintukefiyiñ taiñ pu lamngen?

⁹ ¿Pu lamngen kay? Jewba ka falintukeeyew engün, feymu elukeeyew falinke küdaw  ti trawünche mu. Jewba falintukefi ñi serfikeetew kom tüfachi pu lamngen, pu fütangelu, pu fütangenolu, pu ñuke ka tati pu lantulu. Biblia nütramkay fentren domo inayentufalngelu. Fentren tüfachi pu domo kimchengefuy, maneluwkefuy Chaw Dios mu, küdawfe ngefuy, fütra piwkengefuy, fürenechekefuy ka kümelkachekefuy, feymu ayüwülfingün ta Jewba (Luka 8:⁠2, 3; Hecho 16:⁠14, 15; Rom. 16:⁠3, 6; Filip. 4:⁠3; Eb. 11:⁠11, 31, 35). Famülke mu, taiñ trawünche mu taiñ pu lamngen ka femngey. Feymu rume mañumtuniefiyiñ ta Jewba tüfachi pu lamngen mu.

10. ¿Chemu falintukefiyiñ tati pu füchalelu?

¹⁰ Ka femngechi rume falintukefiyiñ pu füchakeche mülelu taiñ trawünche mu. Kiñeke engün kom tañi mongen mu serfikefingün ta Jewba. Kakelu kimürpufingün ta Jewba dew füchalu engün. Fentren tüfachi pu peñi ka pu lamngen kutranküleyngün tañi füchan mu, feymu newe pepi küdaw-wekelayngün trawünche mu ka pepi amuldungukelayngün tunte tañi ayükeel. Femfule rume, chumkeyngün rume tañi amuldungucheal ka eluwkeyngün ñi yafültukuafiel ka pepikayafiel pu peñi ka pu lamngen. Fentren kimeltun entuafuiñ feytachi füchalechi peñi ka pu lamngen mu. Jewba rume falintukeeyew engün, iñchiñ ka falintukefiyiñ (Prov. 16:⁠31).

11, 12. ¿Chumngechi yafültukukeeiñmu ñi femün pu wechekeche?

¹¹ ¿Pu wechekeche kay? Feytachi Mapu ngünenieetew am tati Weküfü, pu wechekeche fill püle famtukulelngey wedake dungu, feymu küdawtukeyngün ñi femnoal Jewba tañi üdekeel (1 Juan 5:⁠19). Küdawngefule rume, tüfachi pu wechekeche eluwkeyngün tañi amuldungual, koneltual trawün mu ka ingkañpekefi tañi feyentun. Taiñ pefiel tüfa, rume yafültukukeeiñmu. Eymün pu weche, rume falin-ngeymün Jewba tañi trokiñche mu (Sal. 8:⁠2).

¹² Welu kiñeke taiñ pu peñi ka pu lamngen  falinolu trokiwkeyngün trawünche mu. ¿Chumngechi kimürpuafuiñ kake kiñeke iñchiñ taiñ falin-ngen trawünche mu? Peafiyiñ.

13, 14. Kiñeke cristiano, ¿chumngelu rakiduamafuy ñi falin-ngenon trawünche mew?

¹³ Pablo ñi pengelün dungu ka kiñe dungu kimeltukeeiñmu: pütrün peñi ka lamngen falinolu trokiwingün trawünche mu. Pablo feypi: “Fey ti namun feypifule nga: ‘Iñche ta kuwü no, feymew koneltulelan ta cuerpo mew’. Fey ta famngechi elkünulayafuy ñi koneltulen ta cuerpo mew. Fey pilun nga feypifule: ‘Iñche ta nge no, fey iñche ta koneltulelan ta cuerpo mew’. Fey ta famngechi elkünulayafuy ñi koneltual ta cuerpo mew” (1 Kor. 12:⁠15, 16). ¿Chem kimeltukeeiñmu ñi feypin ta Pablo?

¹⁴ Trürümuwliyiñ taiñ pu peñi, pu lamngen mu, falintuwlayafuiñ. Kiñeke peñi küme kimeltuchekey, yafültukuchekey ka küme adkünukefi fillke küdaw ti trawünche mu. Trürümuwliyiñ kidu engün mu, “femngechi femlayafun tañi peñi reke” piafuiñ. Feytachi rakiduam nieliyiñ, pengelafuiñ taiñ ñom chengen (Filip. 2:⁠3). Welu kuñiwtukuwaiñ. Trürümuwmekeliyiñ pu peñi ka lamngen mu doy adümuwlu, weda duamnagafuiñ, fey falintuwlayafuiñ trawünche mu. ¿Chem kelluafeiñmu taiñ famentual feychi weda rakiduam? Inaduamafiyiñ.

15. Chumngechi feypi 1 Korintio 12:⁠4-11, ¿chem rakiduamaiñ taiñ pepiluwün mu?

¹⁵ Rakiduamaiñ tüfa mu: kuyfi mu Jewba elufi ñi newen kiñeke cristiano, femngechi kiduke kake nieyngün ñi pepiluwün (papeltunge 1 Korintio 12:⁠4-11). Feytachi pu cristiano kakerumechi pepiluwün elungeyngün, welu kom falin-ngeyngün. Ka femngechi fachantü nieiñ kakerumechi pepiluwün, welu kom iñchiñ falin-ngeiñ.

16. ¿Chem ngülam ñi feypiel Pablo inayafuiñ?

¹⁶ Trürümuwlayaiñ taiñ pu peñi ka pu lamngen iñchiñ, doy may inayaiñ Pablo ñi ngülam. Kidu feypi: “Feley ta kake  kiñeke che kidutu tañi inaduamuwal tañi femkeelchi dungu. Fey ka femngechi ngelay tañi trürümtukumekewal kangelu che ñi femkeelchi dungu mew” (Gal. 6:⁠4).

17. ¿Chumngechi kümelkayafeiñmu Pablo ñi ngülam?

¹⁷ Inaliyiñ Pablo ñi ngülam, inaduamuwaiñ taiñ femkeelchi dungu, fey kimtukuafuiñ taiñ nieel kiñeke pepiluwün ñi nienoel taiñ pu peñi ka pu lamngen. Rakiduamnge tüfa, kiñe longkolelu newe küme wewpitukelay, welu rume küme amuldunguchekey. Kangelu longkolelu müte küme adkünukelafi kiñeke küdaw ti trawünche mu, welu rume fürenechekey ka rume piwkeyechefe ngey, feymu pu peñi ka pu lamngen fülkontueyew tañi ngülamtungeal (Eb. 13:⁠2, 16). ¿Chem rakiduamelkeeiñmu kom tüfa? Inaduamuwliyiñ taiñ pepiluwün, kimtukuaiñ taiñ falin-ngen ti trawünche mu. Kafey ütrirlayafiyiñ pu peñi ka pu lamngen tañi pepiluwün mu.

18. Jewba, ¿chumngechi pepikakeeiñmu taiñ doy küme kimeltucheal?

¹⁸ Chem küdaw rume nieliyiñ Jewba tañi trokiñche mu, kom iñchiñ müley taiñ doy küme küdawelafiel ta Jewba ka müley taiñ doy küme kimeltuchefe ngeal. Taiñ femürpual, Jewba tañi trokiñche pepikakeeiñmu. Fill semana, ti trawün Taiñ Mongen ka Taiñ Amuldungukeel kellukeeiñmu taiñ doy küme amuldungucheal ka doy küme kimeltucheal. ¿Eluwkepeiñ may taiñ pepikangeal feytachi trawün mu?

19. ¿Chumafuiñ taiñ amual tati Escuela para Evangelizadores del Reino?

¹⁹ Ka femngechi ti Escuela para Evangelizadores del Reino rume küme pepikakeeiñmu. Tüfachi escuela mu amuafuy pu peñi ka pu lamngen fill antü küdawelkefilu ta Jewba, müley ñi nieal engün 23 ka 65 puwchi tripantu. “Iñche turpu amulayafun feychi escuela mu” piafuymi chi. Welu rakiduamtukulayaymi chem katrütuafeymu amual feytachi escuela mu, doy may rakiduamaymi chemu ayüfuymi tami amual. Fey küme rakiduamaymi chumngechi adkünuafuymi tami mongen tami amual feytachi escuela mu. Femülmi, Jewba kelluafeymu tami amual feytachi escuela mu, pepi amunoalu trokiwülmi rume.

20. ¿Chem kimeltukeeiñmu Romanu 12:⁠6-8?

²⁰ Pablo ñi pengelün dungu ka kiñe dungu kimeltukeeiñmu (papeltunge Romanu 12:⁠6-8). Feyta mu, Pablo ka kiñe feypi kake kiñeke iñchiñ nieiñ kakerumechi pepiluwün. Welu chem pepiluwün rume nieliyiñ, kom iñchiñ mülefuy taiñ yafültukuafiel ti trawünche.

21. ¿Chem kimeltukeeiñmu ñi rupan taiñ peñi Roberto?

²¹ Peafiyiñ ñi rupan kiñe longkolelu, Roberto pingelu.⁠ * Taiñ peñi elfalkünungey ñi amuldungual ka mapu mu, welu rupachi antü mu feypingey ñi wiñotual tañi pais mu, fey ñi küdawal Betel mu. Welu ka feypingey: “Rakiduamlayaymi tami weda femürpun tami küdaw ka mapu mu”. Feypingelu rume, taiñ peñi weda duamkülekefuy. Kidu feypikey: “Fentreñma rakiduamkülefun ñi weda entun tañi küdaw ka mapu mu, feymu ayüwkülelafun. Fentren rupa rakiduamün ñi tripatual Betel mu” pikey. ¿Chem kellueyew ñi ayüwkületual? Kiñe longkolelu feypieyew: “Chew taiñ serfikefiel ta kuyfi, Jewba kimeltukeeiñmu fentren falinke dungu. Fey tüfa kellukeeiñmu  taiñ küme femal ti küdaw chew taiñ mülen ta fewla”. Femngechi taiñ peñi Roberto kimürpuy tañi chumafel. Mülefuy ñi rakiduammekenoal ñi femün ta kuyfi, doy may mülefuy ñi rakiduamtukual chem ñi femal ta fewla.

22. ¿Chem kimeltukeeiñmu ñi rupan taiñ peñi Felice?

²² Ka femngechi dungu rupay taiñ peñi Felice Epíscopo. Kidu tañi domo engu amuyngu Galaad pingechi Chillkatuwe mu 1956 tripantu mu. Feymu werküngey ñi witranmayafiel pu trawünche Bolivia mapu mu. Welu 1964 tripantu mu, tañi domo nierumey kiñe püñeñ, feymu fentekünufingu ñi küdaw. Taiñ peñi feypikey: “Rume weda duamelenew elkünual tañi küdaw, feymu kiñe tripantu mu ‘müna weda awüngen’ pifun. Welu Jewba kelluenew tañi küme rakiduamtual. Feymu eluwün tañi küme chaw ngerpual” pi taiñ peñi. Kiñeke mu, iñchiñ ka rakiduamafuiñ Roberto ka Felice reke. Niewenoliyiñ ti küdaw taiñ femkefel ta kuyfi, weda duamafuiñ. Welu rakiduamaiñ chem chumafuiñ fewla taiñ kelluafiel taiñ pu peñi ka pu lamngen ka taiñ serfiafiel ta Jewba, femngechi ayüwkületuafuiñ. Feymu kom taiñ pepiluwün mu kelluafiyiñ ka yafültukuafiyiñ taiñ pu peñi ka pu lamngen, fey ayüwküleaiñ.

23. 1) ¿Chem mülefuy taiñ rakiduamal? 2) ¿Chem ngüneduamaiñ küpalechi chillkatun mu?

²³ Jewba falintukefi kom tañi pu poyekeetew. Kidu ayüniey taiñ koneltuleal tañi fütra familia mu. Feymu rakiduamaiñ chumngechi taiñ kelluafiel taiñ pu peñi ka pu lamngen, ka eluwaiñ taiñ femal. Femngechi doy falintuwaiñ ti trawünche mu. Küpalechi chillkatun mu, ngüneduamaiñ chumngechi pengelafuiñ taiñ falintukefiel pu peñi ka pu lamngen.