1, 2. ¿Chem ngüneduamaiñ tüfachi trokiñ mu?

KIMNIEIÑ ñi pichiñmaken taiñ mongen, ka fentren wedake dungu kontupakeeiñmu, feymu kiñeke mu weda duamkülekeiñ (Job 14:⁠1). Ka femngechi kiñeke che poyekefilu ta Jewba kuyfi mu weda duamkefuy kiñeke mu. Kiñeke engün ayüfuy ñi layal kütu (1 Rey. 19:⁠2-4; Job 3:⁠1-3, 11; 7:⁠15, 16). Welu Jewba yafültukukeeyew ka newentukukeeyew engün. Tañi rupan feytachi pu che wirintukungey Biblia mu taiñ yafültukuaetew ka taiñ kimeltuaetew (Rom. 15:⁠4).

² Tüfachi trokiñ mu ngüneduamaiñ chem ñi rupan ta Jose, Noemi, Rut, ti levita wirintukulu ti Salmo 73 ka ti apostol Pedro. Kom tüfa engün rupayngün wedake dungu mu, feymu weda duamkülefuy kiñeke mu. ¿Chumngechi newentukueyew Jewba? Iñchiñ kay, ¿chem kimürpuafuiñ fey engün tañi rupan mew? Taiñ ngüneduamal tüfa, pengelaeiñmu “Jewba fülmaniekefi kom pu weñangkülelu ñi piwke; ka montulkefi kom pu weda duamkülelu” (Sal. 34:⁠18).

3, 4. Petu wechengelu ta Jose, ¿chumi?

³ Jose nielu 17 tripantu epu pewmay, femngechi Chaw Jewba pengeleleyew ñi rume falin wentru ngerpual (Gén. 37:⁠5-10). Welu pichi rupalu ñi pewman ta Jose, wedake dungu mu rupay. Ñi falin wentru ngeafel, fendeeyew tañi pu peñi, fey esclavo ngerpuy Egipto mapu mu. Fey mülerpuy Potifar tañi ruka mew (Gén. 37:⁠21-28). Fütra kalerumetuy ñi mongen ta Jose. Kiñe antü mülefuy tañi chaw tañi ruka mu, müna piwkeyekefeyew. Ka antü esclavo ngerpuy, mülefuy ñi küdawelafiel ta Potifar, poyekelafuy rume ta Jewba (Gén. 39:⁠1).

 ⁴ Fey ka müten no. Potifar ñi domo re koyla dungu mu dalluntukufi ta Jose, “ayüfuy tañi nüntukayaetew” pi. Potifar ngüneduamlay rume ñi rüfngepen may ñi feypin tañi domo, carceltukufi müten ta Jose, trarikünungey cadena mu (Gén. 39:⁠14-20; Sal. 105:⁠17, 18). Jose weche wentrungefuy müten, feymu rume weda duampelay feypingelu ñi küpa nüntukafiel kiñe domo. Kafey kimngefuy Jose ñi serfikefiel ta Jewba, feymu pu che allküfule feytachi dallukan dungu, weda acordangepelayafuy ta Jewba. ¡Fey llemay! Müna weñangkün-ngey kom ñi rupan ta Jose.

5. ¿Chem chumi Jose ñi küme rakiduam nieal?

⁵ Feychi küdawelfilu ta Potifar ka presulelu, Jose pepi dullilafuy ñi doy kümelkaletual. ¿Chem chumi ñi küme rakiduam nieal? Jose rakiduamkülewelay tañi pepi femwenon, welu kom chi küdaw ñi elungen küme entufi. Doyelchi may rume falintukefi tañi ayüwülafiel ta Jewba. Feymu lle, Jewba kümelkafi ta Jose kom tañi femün mu (Gén. 39:⁠21-23).

6. ¿Chumngechi ti pewma yafültukueyew ta Jose?

⁶ Kafey Jose yafültukupelaeyew ti pewma ñi eluetew Jewba petu wechengelu. Tüfachi pu pewma kimeleyew ñi kümelkalerputual ka ñi petuafiel tañi familia. Femngechi rupay. Feychi Jose nielu 37 tripantu, wechutriparpuy tañi pewma (Gén. 37:⁠7, 9, 10; 42:⁠6, 9).

7. Ñi feypin 1 Pedro 5:⁠10, ¿chumngechi kelluaeiñmu rupaliyiñ wedake dungu mu?

⁷ Iñchiñ, ¿chem kimeltueiñmu? Jose ñi rupan mu pengeleleiñmu famülke mu wedalkayafeiñmu ta che. Kiñeke peñi kam lamngen wedalkayafeiñmu chi. Welu maneluwliyiñ Jewba mu, rume weda duamlayaiñ ka küdawelnieafiyiñ ta Jewba (Sal. 62:⁠6, 7; papeltunge 1 Pedro 5:⁠10). Jose niefuy 17 tripantu müten, Jewba elueyew ti epu pewma. Tüfa pengeli Jewba ñi maneluwkülen pu wechekeche mu. Famülke mu müley fentren pu weche Jose reke, rume maneluwküleyngün Jewba mu, kiñeke presuleyngün kütu ñi feyentufiel mu ta Jewba (Sal. 110:⁠3).

8. ¿Chem rupay Noemi engu Rut?

⁸ Noemi niefuy epu wentru püñen. Tañi füta engu kiñentrür mülefuyngün Juda mapu mu. Fey mu mülerkey fütra filla, fey amuyngün ka mapu, Moab pingechi mapu mu. Fey mülepulu üyew engün, Noemi tañi füta larkey. Fey Noemi kidulewey tañi epu püñeñ engu. Rupayechi antü mu, tañi pu püñeñ niewi epu moabita domo engu, Rut ka Orpá. Rupalu 10 tripantu, Noemi tañi pu püñeñ larkey. Feytachi epu wentru elkünulayngu fotüm ka ñawe no rume, feymu Rut ka Orpá ka kiduleweyngu (Rut 1:⁠1-5). Tüfachi küla domo rume weñangkülepelayngün. Rut engu Orpá küpa fütangele, fütangetuafuy engu. Welu Noemi dew kushefuy, kimlafuy iney tañi cuidayaetew. Rume weñangkülefuy, feymu ayüniefuy ka üy tañi feypingeal. ¿Chem pin feychi üy? “Rume weñangkülelu”. Fente ñi kutrantupiwken eluwi ñi wiñotual Belen, Juda mapu mu, tañi nanüng Rut compañeyew (Rut 1:⁠7, 18-20).

9. Ñi feypin Rut 1:⁠16, 17, 22, ¿chumngechi Rut yafültukufi ta Noemi?

⁹ Noemi pengelelngey rüf piwkeyen, femngechi kellungey. Rut kidukünulaeyew, femngechi pengeleleyew ñi rüf piwkeyeetew. Rut feypifi ta Noemi: ‘“Feypikeeli tami elafiel ka tañi wichual ta eymi mew. Amuan chew rume amulmi ta eymi, ka mülean chew rume ta mülelmi. Eymi tami che iñche tañi che ngeay, ka tami Ngünechen iñche tañi Ngünechen ngeay. Chew rume lalmi ta eymi, iñche ka feymew layan, ka fey tüfey mew ayülen tañi rüngalngeal. Jewba fentren lladken mew kutrankaechimew kidukünutueliyu ta eymi, lapefuli müten may” pieyew ñi nanüng. Fey tüfa famngechi ti Noemi pingechi domo wiñometuy ta Moab mapu mew Rut engu. Puwtuy engu ta Belen petu we cosechangelu kawella’ (Rut 1:⁠16, 17, 22). Belen mu, Rut rume küdawi ñi üñiftual kawella ñi nieal iyael Noemi engu. Feymu kimngey ta Rut ñi küme piwkengen ka ñi küdawfengen (Rut 3:⁠11; 4:⁠15).

10. Jewba, ¿chumngechi pengelelfi ñi piwkeyefiel tati pu pofre?

¹⁰ Jewba elufi kiñe ley tati pu israelita. Tüfachi ley pengeli ñi kutranpiwkeyefiel tati pu pofre. Jewba feypifi pu israelche cosechale engün, mülefuy ñi katrünoal inaltu, femngechi ñi ñimituam tati pu pofre (Lev. 19:⁠9, 10). Femngechi Noemi engu Rut nierpuy iyael, mongetuyawlafuyngu.

11, 12. Boaz, ¿chumngechi ayüwülfi Noemi engu Rut?

¹¹ Feychi mapu Rut tañi küdawmum, fey ti ngen mapu Boaz ürke. Boaz afmatulewey pefilu Rut ñi kidukünunofiel ta Noemi ka fente tañi piwkeyefiel. Rupachi antü mu, Boaz niefi ta Rut. Ka ngillafi Noemi ñi niekefelchi mapu, fey Rut ñi pu püñeñ herencia ngetualu feychi mapu (Rut 4:⁠9-13). Rupachi antü mu, Rut nierpuy kiñe püñeñ, Obed pingey, lakuyerpufi ta David (Rut 4:⁠17).

¹² Noemi rume ayüwkülepelafuy ñi metaniefiel ta Obed ka mañumniefuy kom ñi piwke mu ta Jewba. Welu Noemi engu Rut wiñomongetule ti we Mapu mu, doy ayüwküleayngu. Kimayngu Obed ñi familia mu ñi küpan ti Mesia.

13. Noemi engu Rut ñi rupan, ¿chem falinke dungu kimeltueiñmu?

¹³ Iñchiñ, ¿chem kimeltueiñmu? Rupaliyiñ wedake dungu mu, rume kutrantupiwkeafuiñ. Rakiduamafuiñ ñi turpu afnoal taiñ weda rupameken. Femngechi dungu mu rupaliyiñ, maneluwaiñ Jewba mu ka püntütripalayaiñ taiñ pu peñi ka lamngen mu. Jewba wiñoleltulafi tañi füta ta Noemi ka tañi pu püñeñ. Iñchiñ ka femngechi entuñmalayafeiñmu chi taiñ wedake dungu. Welu Jewba rumel yafültukuaeiñmu  ka kelluaeiñmu. Kiñeke mu adnieafuy taiñ pu peñi, taiñ pu lamngen taiñ kümelkayaetew (Prov. 17:⁠17).

14. ¿Chumngelu fente weda duami ti levita?

¹⁴ Ti wirintukulu ti Salmo 73 levita tuwün-ngefuy, feymu niefuy ti falin küdaw ñi serfiafiel ta Jewba tañi ruka mu. Tüfachi levita ütrirpufi tati pu wedake che ka ti pu mallmangelu, feymu weda duamkülefuy. Ütrirkelafi ñi wedake femken engün, doy may ütrirkefi tañi küme felen mu engün (Sal. 73:⁠2-9, 11-14). Feytachi wedake che riculekefuy. Re küme rupamekelu tañi mongen mu trokifi, feymu tüfachi levita rume weda duami. Fey feypi: “Rüfkünu, ngünam lif piwkengen ka ngünam pengelken tañi nor piwkengen”. Amulele ñi weda rakiduamün tüfachi levita, serfiwelayafuy ta Jewba.

15. Ñi feypin Salmo 73:⁠16-19, 22-25, ¿chem chumi tati levita ñi weda duamkülenoal?

¹⁵ Ti levita feypi: “Feychi ayüfulu ñi kimtukual, rume weda duamelenew. Welu doy küme duamtun konpulu iñche tami yamfal ruka mu, fey ngüneduamün ñi chumlerputual pu wedake che. Trayafngechi mapu mu reke elkünukefimi engün, femngechi ñi tranal ka ñi apümkangeal engün. ¡Pürümkechi apümkangeayngün! Lef akuay ñi antü ñi afal engün, rume weda kutrankawayngün. Iñche kim rakiduamkelafun, ngüneduamkelafun chem no rume. Tami adkiñ mu, kulliñ reke felekefun. Welu fewla eymi mu mülen fill antü. Eymi nünieñmaen tañi man kuwü. Eymi adniekeen tami ngülam mu. Rupachi antü mu, ka kümelkayaen. Wenu mu, ¿iney ka kelluafenew iñche? Eymi ka müten. Tayu weniyewün mu, ka chem no rume duamnielan Mapu mu” (Salmo 73:⁠16-19, 22-25). Ti levita konpuy Chaw Dios ñi yamfal ruka mu, üye mu mülefuy kakelu che poyekefilu ta Jewba. Tañi mülepun üyew, ti levita tüngkülekefuy, küme rakiduamkülefuy ka nütramelkefuy ta Jewba tañi weda duamelnieetew. Femngechi ti salmista ngüneduami ñi welulkawkülen tañi rakiduam, fey ñi weda rakiduamün mu weniyewelayafuy ta Jewba. Ti levita ka ngüneduami kom pu wedwedke che ñi pürümkechi  apümkangeal engün ka ñi rume kutrankawal. Tüfachi levita mülefuy ñi inayal Jewba tañi rakiduam, femngechi tañi weda duamkülenoal ka ñi ütrirnoafiel pu wedake che. Femlu tüfa, tüngduamtuy ka ayüwkületuy. Feymu ti levita feypifi wüla ta Jewba: “Tayu weniyewün mu, ka chem no rume duamnielan Mapu mu”.

16. ¿Chem kimeltueiñmu ñi rupan ti levita?

¹⁶ Iñchiñ, ¿chem kimeltueiñmu? Ngelay taiñ ütrirafiel küme felen yenielu reke pu wedake che. Afay tañi ayüwün engün ka apümkangeayngün (Ecl. 8:⁠12, 13). Ütrirfiliyiñ, weda duamafuiñ ka weniyewelayafuiñ ta Jewba. Feymu ütrirpufiliyiñ pu wedake che, inayentuafiyiñ ñi femün ti levita. Allkütuñmayafiyiñ ñi ngülam ta Jewba ka kiñentrür müleaiñ taiñ pu peñi ka pu lamngen iñchiñ. Feychi piwkeyefiliyiñ ta Jewba kom taiñ piwke mu, feyta rüf ayüwün nieaiñ ka amuleaiñ tati rüpü mu taiñ yeaetew “tati rüfngechi mongen” mew (1 Tim. 6:⁠19).

17. Pedro, ¿chumngelu fente weda duami?

¹⁷ Pedro kim wentru ngefuy. Welu kiñeke mu femkefuy kiñeke dungu ñi rakiduamnon rume, fey weda duamketufuy. Kiñe rupa, Jesus feypifi tañi pu inanieetew ñi rupayal kutrankawün dungu mu ka tañi layal. Welu Pedro feypieyew: “¡Fey tüfachi dungu mew ta rupalayaymi!”. Fey Jesus norümtufi ta Pedro (Mat. 16:⁠21-23). Ka antü, küpay kiñe kechan che ñi presupayafiel ta Jesus. Pedro kay entuy ñi fütra cuchillo, fey ñi rakiduamnon mu rume katrünentuñmafi ñi pilun ta kiñe wentru. Ka norümeyew Jesus (Juan 18:⁠10, 11). Kafey Pedro feypifi ta Jesus: “Tunte kom elkünutuayngün rume tañi maneluwün eymi mew, welu iñche femlayan” (Mat. 26:⁠33). Welu feychi pun müten fütra llükay, fey küla rupa “kimlafiñ ta Jesus” pi. Fente tañi kutrantupiwken mu, “Pedro tripapatuy ta tiye mew, fey rume fütra ngümakawi” (Mat. 26:⁠69-75).  Ramtuwpelafuy Pedro Jesus ñi perdonayafetew chi.

18. Jesus, ¿chumngechi kellufi ta Pedro ñi weda duamkülenoal?

¹⁸ Pedro weda duamkülefuy rume, fentekünulay ñi serfiafiel ta Jewba. Welulkawlu rume, amulerpuy ñi serfiniefiel ta Jewba pu kakelu apostol engün. (Juan 21:⁠1-3; Hecho 1:⁠15, 16). ¿Chem kellueyew ta Pedro? Longkontukuniepelay Jesus tañi feypietew: ‘Iñche ta llellipupefiñ ta Ngünechen eymi mew, femngechi tañi afnoal tami feyentun iñche mew. Fey eymi, dew wiñotulmi ta iñche mew, kelluafimi tami pu peñi tañi newentuleal engün’. Fey Jewba femi ñi chem llellipuetew ta Jesus. Fey wüla dew wiñomongetulu Jesus, pewfaluwfi ta Pedro ñi yafültukuafiel peno (Luka 22:⁠32; 24:⁠33, 34; 1 Kor. 15:⁠5). Ka antü dew ñi challwameken kom kiñe pun pu apostol, pewfaluweyew ta Jesus. Feychi mew, Jesus elufi ta Pedro ñi feypiaetew ñi piwkeyeetew. Kafey Jesus elufi doy fentren küdaw tañi sakin weni Pedro, femngechi pengelelfi ñi perdonafiel (Juan 21:⁠15-17).

19. Ñi feypin Salmo 103:⁠13, 14, ¿chem rakiduamkey Jewba culpan mu iñchiñ?

¹⁹ Iñchiñ, ¿chem kimeltueiñmu? Jesus ñi küme femfiel mu ta Pedro kimfali ñi kutranpiwkeyecheken Jewba reke. Feymu culparumeliyiñ, “Jewba turpu perdonalayaenew” pilayaiñ. Weküfü may rakiduamelchekey taiñ perdonanoaetew Jewba. Longkontukunieaiñ: Jewba müna piwkeyenieeiñmu. Kimniey taiñ culpafe chengen, feymu eluwküley taiñ perdonayaetew. Ka femngechi müley taiñ inayentuafiel ta Jewba kiñeke che wedalkaeliyiñmu. Biblia feypi: “Kiñe chaw reke kutranpiwkeyefi tañi pu yall, ka femngechi Jewba kutranpiwkeyefi tañi yamkeetew. Kidu am küme kimnielu chumngechi taiñ dewmangen, ka acordaniey taiñ trufür mapungen” (Salmo 103:⁠13, 14).

20. ¿Chem peaiñ küpalechi trokiñ mu?

²⁰ Ñi rupan ta Jose, Noemi engu Rut, ti levita ka Pedro pengeli “Jewba fülmaniekefi kom pu weñangkülelu ñi piwke” (Sal. 34:⁠18). Jewba kiñeke mu katrütukelay taiñ rupayal wedake dungu mu ka taiñ weda duamküleal. Welu rupan mu iñchiñ ta wedake dungu, Jewba ta kellukeeiñmu, feymu doy maneluwkeiñ kidu mu (1 Ped. 1:⁠6, 7). Küpalechi trokiñ mu ngüneduamaiñ chumngechi kellukefi Jewba tañi pu poyekeetew weda duamkülen mu.