1, 2. Kom pu cristiano müley ñi kimal ñi chumngeal ti wiñomongetun wenu mu, ¿chemu anta?

ALÜN che poyekefilu ta Jewba famülke mu maneluwkey tañi rumel mongeleal Mapu mu. Pichin cristiano müten dullingey ñi amual wenu mu. Tüfachi pu dullin cristiano ayüniefuy ñi kimal ñi chumleal ñi mongen wenu mu. Welu maneluwliyiñ rume taiñ müleal wenu mu kam nag Mapu mu, kom iñchiñ müley taiñ kimal ñi chumngeal ti wiñomongetun wenu mu. ¿Chemu am? Tüfachi wiñomongetun kümelkayafi kom pu mongelealu Mapu mu.

² Chaw Dios adkünufi kiñeke discipulo ñi wirintukual ñi chumngeal ti wiñomongetun wenu mu. Apostol Juan feypi: “Chaw Dios tañi fotüm ka ñawe ngetuiñ. Petu kimlaiñ ñi chumletual taiñ mongen. Welu kimnieiñ pewfaluwle ta Chaw Dios, kidu reke femngeaiñ” (1 Juan 3:⁠2, TNM). Pu dullin cristiano kimlayngün ñi chumlerpual ñi mongen wiñomongetule wenu mu. Puwle engün wenu mu, peafingün ta Chaw Jewba. Biblia feypilaeiñmu kom dungu ti wiñomongetun mu wenu, welu Pablo kimeltueiñmu kiñeke dungu. Pu dullin cristiano kiñewküleay Jesus engün tañi apümkayafiel “itrokom tati ñidolküleyelu, ka ti pu autoridadkülelu ka ti nieyelu ta pepiluwün”.  Kafey Jesus engün apümkayafingün “ti kiñelewechi kayñe, tati lan dungu”. Fey Jesus ka tati pu dullin che eluwayngün ñi ngünenieaetew Chaw Jewba ka eluafingün ñi ngünenieal itrokom dungu (1 Kor. 15:⁠24-28). ¡Rume ayüwün-ngeay feychi antü!⁠ *

3. Ñi feypilen 1 Korintio 15:⁠30-32, fente ñi feyentulen ti wiñomongetun mu Pablo, ¿chem chumi?

³ Fente tañi feyentulen ti wiñomongetun mu, Pablo chaftukefi fentren wedake dungu (papeltunge 1 Korintio 15:⁠30-32). Pablo feypifi tati korinto che: “Fill antü inayawülenew reke tati lan dungu”. Pablo ka feypi: “Iñche ta weychaken trapial reke felechi pu che mew ta Efeso waria mew”. Feypilu tüfa Pablo, rakiduampelafuy feychi pu judio tañi kayñetukeetew kam kakelu che mu tañi weda femetew (Hecho 19:⁠26-34; 1 Kor. 16:⁠9). Ñi feypin Pablo ka rulpadungungeafuy: “Kewakefun awkan kulliñ Efeso mew”. Feymu Pablo küpa feypifuy chi tañi rüf weychakefiel awka kulliñ (2 Kor. 1:⁠8; 4:⁠10; 11:⁠23). Chumngepe rume, rüf kimnieiñ Pablo ñi chaftufiel fütrake dungu, welu maneluwkülefuy ñi küme mongen nieal küpalechi antü mu (2 Kor. 4:⁠16-18).

4. Pu cristiano, ¿chumngechi kellueyew tañi maneluwkülen ti wiñomongetun mu? (Inaduamnge ti adentun wenulelu).

⁴ Famülke mu, müleiñ kuñiwün-ngechi antü mu. Kiñeke taiñ pu peñi ka pu lamngen wedake dungu femngey. Kiñeke peñi, lamngen chew ñi mülen engün müley weychan, fey rume llükalekeygün. Kakelu pais mu katrütungekey taiñ amuldungual. Welu taiñ pu peñi, pu lamngen femkeyngün müten carceltukungeafuy rume kam langümngeafuy rume. Kom feytachi pu peñi ka pu lamngen taiñ nütramkapeel, amuleyngün ñi poyefiel ta Jewba, feymu inayentufalingün. Kom engün maneluwkey latripafule engün, Chaw Jewba wiñomongeltuafeyew engün küpalechi antü mu.

5. Taiñ maneluwküleal tati wiñomongetun mu, ¿chem weda rakiduam famentuafiyiñ?

⁵ Pablo feypi kiñeke che ñi rakiduamkefel: “¡Iaiñ ka putuaiñ, fey wüle am layalu iñchiñ!”. Fey feypifi pu cristiano ñi famentuafiel feychi weda rakiduam. Kuyfi mu, pu che dew niekefuy femngechi rakiduam. Pablo entupelay ñi feypin ti lifru Isaías mu (Is. 22:⁠13). Feyta pengeli ñi rakiduamkefel tati pu israelche. Duamtukefuyngün ñi küme rupaleal müten, eluwlayngün ñi doy piwkeyeafiel ta Jewba. Pu israelita rakiduamkefuyngün chem antü rume ñi layafel engün. Feymu “fill antü müley tañi küme rupaleal” pikefuyngün ñi rakiduam mu. Ka femngechi rakiduamkey fentren che famülke mu. Biblia mu wirikonküley fente ñi weda tripan pu israelche tañi weda rakiduam mu (2 Crón. 36:⁠15-20).

6. Kimfiel mu iñchiñ ñi müleal ta wiñomongetun, ¿chem weni famentuafiyiñ?

⁶ Pu peñi ka pu lamngen mülelu Korinto mu mülefuy ñi weniyenoafiel feychi pu che feyentukenolu ti wiñomongetun mu. Ka femngechi iñchiñ kimfiel mu ñi wiñomongetual pu layelu, ka müley taiñ küme dulliafiel taiñ pu weni. Feychi pu che rakiduamkelu ñi küme rupaleal müten famülke mu, kümelayafuy taiñ weniyeafiel. Weniyefiliyiñ engün, ñochikechi inayentuafuiñ ñi wedake rakiduam ka famtukuafeiñmu taiñ femal Chaw Dios tañi üdekeel. Feymu Pablo küme ngülamtuy tüfa: ‘Eymün feley tamün wiño nietual küme rakiduam, ka doy culpawelayaymün’ (1 Kor. 15:⁠33, 34).

7. Ñi feypin 1 Korintio 15:⁠35, ¿chem ramtungeafuy kiñeke che ti wiñomongetun mu?

⁷ (Papeltunge 1 Korintio 15:⁠35). Iney rume maneluwkülenole ti wiñomongetun mu, welurakiduamelafuy ta che ramtufile: “¿Chumngechi chi wiñomongetuay tati pu layelu? ¿Chumngechi cuerpo chi nietuay engün?”. Famülke mu tati pu che kakerume dungu feypikey ñi chumleketun pu layelu, feymu kümey taiñ ngüneduamal ñi chem pin ta Biblia tüfachi dungu mu.

8. Ñi feypin 1 Korintio 15:⁠36-38, ¿chem pengelün dungu entuy Pablo?

⁸ Lan mu ta che, funakey tañi cuerpo. Welu Chaw Dios dewmafi tati pu che, niey newen ñi wiñomongeltuafiel ta che ka elutuafiel kiñe cuerpo (Gén. 1:⁠1; 2:⁠7). Welu wiñomongetule ta che wenu mu, elulayafi ti cuerpo ñi niekefel petu tañi lanon. Tañi kimeltual tüfa, Pablo entuy kiñe pengelün dungu (papeltunge 1 Korintio 15:⁠36-38). Tukungen mu kiñe fün, tremkey, we anümka ngetukey. Ñi chumngetun tati anümka trürlay tañi chumngen ti fün. ¿Chem kimeltukeeiñmu tüfa ñi feypin Pablo? Chaw Dios eluafuy pu wiñomongetulu chem cuerpo rume tañi ayüniefel.

9. Ñi feypin 1 Korintio 15:⁠39-41, ¿chumngechi trürlay kom tati mülelu wenu mu ka nag Mapu mu?

⁹ (Papeltunge 1 Korintio 15:⁠39-41). Pablo feypi Chaw Jewba kom trür femngechi dewmalafi tati mülelu wenu mu ka nag Mapu mu. Trürlay ñi chumngen tati kulliñ, ti üñüm ka tati challwa. Pablo ka feypi ñi trürnon ti antü ka tati küyen. Ka feypi ti pu wangülen trürlay ñi wilüfün. Pürakintuliyiñ ta kallfü wenu, ngüneduamlayafuiñ ñi trürnon tati pu wangülen. Welu pu cientifico feypikey ñi kakerumen. Müley kiñeke fütrañma ka kiñeke pichiñma. Kiñeke wangülen kelüley, kakelu fülangküley ka kiñeke chodküley. Pablo ka  feypi ñi trürnon ñi chumngen tati mülelu wenu mu ka nag Mapu mu. Mapu mu iñchiñ ta cuerpo nieiñ, welu wenu mu müley ta püllü.

10. ¿Chumngeay feychi pu che ñi wiñomongetual wenu mu?

¹⁰ Pablo ka feypi: “Ka femngechi feley tati pu layelu ñi wiñomongetun mew. Tati rüngaltukuel ta funakey, welu tati wiñomongetualu rumel mülekey”. Küme kimnieiñ lan mu ta che funakey tañi cuerpo, fey trufür ngeketuy (Gén. 3:⁠19). Fey, ¿chumngechi am wiñomongetuafuy kiñe che tañi rumel müleal? Feyta mu, Pablo nütramyelafi feychi pu che wiñomongetulu Mapu mu. Doy may nütramyefi pu wiñomongetualu wenu mu (1 Kor. 15:⁠42-44).

11, 12. 1) Feychi wiñomongetulu ta Jesus, ¿chumngetuy? 2) Pu dullin cristiano kay, ¿chumngeay wiñomongetun mu?

¹¹ Mülepalu Jesus Mapu mu, niekefuy mapu tuwchi cuerpo, welu wiñomongetulu püllü ngetuy ka müleputuy wenu mu. Ka femngechi pu dullin cristiano wiñomongetule, püllü ngetuayngün ñi mülepual wenu mu. Pablo feypi: ‘Chumngechi adentuleiñ ti wentru mew tati dewmangelu trufür mew, ka femngechi adentuleaiñ tüyechi wentru mew tati wenu mapu tuwlu’ (1 Kor. 15:⁠45-49).

¹² Wiñomongetulu ta Jesus, nierpulay mapu tuwchi cuerpo. ¿Chumngelu am? Pablo ta feypi: “Tüfey engün nielu ta cuerpo pepi konlayay Ngünechen tañi longko ülmen mülewe mew” (1 Kor. 15:⁠50). Wiñomongetun mu pu apostol ka pu dullin cristiano, nierpulayafuy ta cuerpo wedañmawkelu. Welu Pablo feypi tüfachi pu cristiano ñi pürüm wiñomongetunoal ta wenu mu, doy may feypi ñi femal engün rupalechi tripantu mu. Feychi wirintukungelu ti carta Wünen Korintio pingelu, tati apostol Santiaw ka kakelu discipulo dew layey engün.  Rupachi antü mu, kakelu dullin cristiano ka larpuy (Hecho 12:⁠1, 2; 1 Kor. 15:⁠6).

13. ¿Chem feypikünungey ñi rupayal ngünenierpule ta Jesus?

¹³ Jesus ka Pablo feypikünuyngu ñi puwal chi antü ñi ngünenieal Jesus wenu mu. Ka feypingey puwle feychi antü ñi müleal ta weychan, nüyün, kutran ka fillke wedake dungu wall Mapu püle. Feytachi profecia koni ñi femtripayal 1914 tripantu mu. Jesus ka feypikünuy feytachi antü mu ñi amuldungungeal Chaw Dios tañi kümeke dungu “kom trokiñke mapu mew mülechi pu che” (Mat. 24:⁠3, 7-14). Pablo ka feypi ngünenierpule ta Jesus ta wenu mu, wiñomongetuay pu dullin cristiano ñi amual ta wenu (1 Kor. 15:⁠23; 1 Tes. 4:⁠14-16).

14. Lale pu dullin cristiano famülke mu, ¿chumngeayngün?

¹⁴ Lan mu pu dullin cristiano famülke mu, esperakelay ñi wiñomongetual wenu mu. Feymu Pablo tañi carta mu feypi pu dullin cristiano pürüm müten ñi nietual kangelu cuerpo wenu mu (1 Kor. 15:⁠51, 52). Famülke mu wechutriparpumekey tüfa. Wiñomongetule pu dullin cristiano rume ayüwküleayngün, müleayngün Jesus engün (1 Tes. 4:⁠17).

15. Pu dullin cristiano, ¿chem küdaw femayngün wiñomongetule wenu mu?

¹⁵ Tati Biblia ka kimeleiñmu chem küdaw ñi femal pu dullin cristiano wiñomongetule wenu mu. Jesus feypi: ‘Eluafiñ ta autoridad kom trokiñ mapu mew, chumngechi tañi Chaw eluenew autoridad ta iñche. Ngünenieafi engün ta fütrake trokiñ mapu kiñe  pañillwe reke felechi retrü mew, fey trafoafi engün tati rag challa reke’ (Apok. 2:⁠26-28). Pu dullin cristiano inayafingün ta Jesus, fey ngünenieafingün kom pu che “kiñe pañillwelechi retrü mew reke” (Apok. 19:⁠11-15).

16. ¿Chumngechi wewngeay tati lan dungu?

¹⁶ Kom taiñ ngüneduampeel küme pengelkeeiñmu pu dullin cristiano ñi wewafiel reke tati lan dungu (1 Kor. 15:⁠54-57). Tañi wiñomongetun mu pu dullin cristiano, kelluntukuayngün ñi apümkangeal kom wedake dungu akule Armagedon. Ka femngechi fentren cristiano mongetripayayngün ti fütra kutrankawün mew, femngechi wewafingün reke tati lan dungu (Apok. 7:⁠14). Feytachi pu cristiano peafingün fentren che ñi wiñomongetun, femngechi ka peayngün ñi wewngen ti lan dungu. ¡Müna ayüwün-ngeay feychi antü! (Hecho 24:⁠15). Ka rupale warangka tripantu, pu poyeniefilu ta Jewba wewafingün tati lan dungu ñi llowel Adan mu, rumel mongeleayngün.

17. ¿Chem feypikeeiñmu taiñ femal 1 Korintio 15:⁠58?

¹⁷ Feley llemay, Pablo ñi wirintukulelfiel pu korinto che rume yafültukukeeiñmu, feymu rume mañumküleiñ. Fey inayafiyiñ Pablo tañi ngülam, küdawelafiyiñ ta Jewba kom taiñ newen mu (papeltunge 1 Korintio 15:⁠58). Fill antü küme femliyiñ feytachi küdaw, ayüwün mongen nieaiñ küpalechi antü. Iñchiñ rakiduamlayafuiñ fente ñi kümen feychi mongen taiñ nierpual. Rüf kimürpuaiñ taiñ refalta küdawkenon Chaw Dios tañi dungu mew.