KIÑE küme weni werküelmu kiñe carta tami yafültukuaetew, ayüwpelayafuymi. Timotew llowi kiñe carta tañi werkületew Pablo. Feychi carta müley Biblia mu, Epungechi Timotew pingey. Timotew llowlu ti carta, kintupelafuy chew ñi tüngküleal tañi papeltuafiel. Timotew ramtuwpelafuy chi: “¿Chumley chi ta Pablo? ¿Ngülamtupeafenew may ñi doy küme femal tañi elfal küdaw? Tañi ngülamtuetew Pablo, ¿kellupeafenew may ñi doy küme amuldungual ka kelluafiel kakelu che?”. Feychi carta mu llowdungungey tañi ramtuel. Tüfachi trokiñ mu peaiñ kiñeke ngülam ñi mülen tüfachi carta mew taiñ kelluaetew.

We papeltulu ti carta, Timotew ngüneduamfemi fente tañi piwkeyeetew Pablo. Piwkeyewün mu, “iñche ñi sakin fotüm” pieyew ta Pablo (2 Tim. 1:⁠2). Timotew llowi tüfachi carta 65 tripantu mu peno. Timotew niepelafuy doy 30 tripantu ka dew longkolefuy ti trawünche mu. Doy 10 tripantu kiñentrür küdawkiyawfuy Pablo engu ka fentren dungu kimürpuy.

Pablo presukonkülefuy Roma mu ka pichilewefuy tañi langümngeal (2 Tim. 1:⁠15, 16; 4:⁠6-8). Müna yafültukupelaeyew ta Timotew kimal Pablo ñi püntütripanon Jewba mu fente kutrankawlu rume. Timotew papeltulu ti carta, ngüneduami fente ñi newen piwkengen ta Pablo (2 Tim. 2:⁠8-13). Timotew reke iñchiñ ka rume kelluafeiñmew ngüneduamal fente ñi newen piwkengen ta Pablo.

Pablo ngülamtufi ta Timotew ñi rume falintuafiel tañi küdaw trawünche mu. Pablo feypifi ta Timotew: “Chumngechi mefürniengey ti kütral, ngülameyu tami küme adümnieafiel chem tami eluetew Chaw Dios” (2 Tim. 1:⁠6, TNM). Tüfachi versiculo mu Pablo feypilu “chem tami eluetew”, griego kewün mu feypi ti palabra khárisma. Tüfachi palabra pengelkey kiñe regalo ñi elungekeel kiñe che, welu kidu tañi duam elungelay. Timotew elfalkünungelu falinke küdaw trawünche  mu, elungey reke femngechi regalo (1 Tim. 4:⁠14).

Timotew feypingey “chumngechi mefürniengey ti kütral, ngülameyu tami küme adümnieafiel chem tami eluetew Chaw Dios”. Timotew papeltulu tüfa, rakiduampelay feychi kütral ñi pepikakeel che tañi ruka mu. Feychi kütral re aylenkülewey, welu mefürngele ka wiño üykületuafuy. Feytachi versiculo mu Pablo ka feypi ti palabra anazōpyréō. Tüfa pengelkey ñi mefürngekeel ti kütral, fey ñi üyküleal. Tüfa adentuley fente ñi eluwkülen kiñe che ñi femal kiñe küdaw. Feymu tüfachi versiculo mu Pablo feypikafi reke ta Timotew: “Eluwkülenge tami küme femal tami küdaw”. Iñchiñ ka femngechi müley taiñ femal. Eluwküleaiñ taiñ küme femal taiñ küdaw trawünche mu.

Tañi carta mu, Pablo ka kiñe ngülam elufi ta Timotew ñi küme femürpual tañi küdaw. Pablo feypi: “Küme adniefinge Ngünechen tami maneletewchi dungu” (2 Tim. 1:⁠14). Kangelu versiculo mu, Timotew feypingey ñi küme inanieafiel “tati nor küme kimeltun”, fey tüfa tati rüf dungu Biblia mu mülelu (2 Tim. 1:⁠13). Feymu Timotew manelngey ñi amuldungulelafiel ti rüf dungu tati pu trawünche ka tati pu che poyekenofilu ta Jewba (2 Tim. 4:⁠1-5). Timotew ka üytungey ñi longkoleal tañi adnieafiel Ngünechen tañi pu che ufisa reke felelu (1 Ped. 5:⁠2). Timotew mülefuy ñi küme adnieafiel ti rüf dungu ñi kimeltuchekeel, fey tüfa kiñe müna falin dungu tañi manelngeel. ¿Chumngechi femürpuafuy? Mülefuy ñi maneluwal Chaw Jewba tañi newen mu ka tañi Dungu mu (2 Tim. 3:⁠14-17).

Famülke mu iñchiñ ka elfalkünungeiñ feychi rüf dungu taiñ kimeltucheal (Mat. 28:⁠19, 20). Feymu müley taiñ llellipual ka ngüneduamal Chaw Dios tañi dungu, femngechi falintunieafiyiñ tüfachi rüf dungu taiñ kimeltukeel (Rom. 12:⁠11, 12; 1 Tim. 4:⁠13, 15, 16). Kiñeke iñchiñ longkoleliyiñ kam fill antü küdawelfiliyiñ ta Jewba, müley taiñ ñom piwkengeal. Ka müley taiñ maneluwal Chaw Dios mu taiñ wechunenturpual taiñ elfalngeelchi küdaw. Femngechi femliyiñ, pengelaiñ taiñ falintukefiel Chaw Dios taiñ eluetew.

Timotew ka mülefuy ñi pepikayafiel ta kakelu che ñi femal ti küdaw. Feymu Pablo feypifi ta Timotew: ‘Tami allküñmakefiel iñche ñi ngülam tañi feypiel, werküfinge ti manelfalchi pu wentru ka ti doy adümuwlu ñi kimeltuafiel ta kakelu pu che’ (2 Tim. 2:⁠2). Pablo ngülamtufi ta Timotew ñi kimeltuafiel kakelu pu peñi kom tañi kimel. Famülke mu ka femngechi müley ñi femal pu longkolelu. Pu longkolelu ngelay tañi ellkayafiel tañi kimün, doy may müley ñi kimeltuafiel kakelu peñi ñi doy pepikawküleal. “Doy kimürpule kakelu peñi, doy küme femle ti küdaw, iñche ta duamngelayan” femngechi rakiduamkelay pu longkolelu. Re wenche kimeltukelafingün pu peñi chumngechi ñi femngeal kiñeke küdaw, doy may kom enseñalkefingün ñi küme weniyeafiel engün ta Jewba. Femngechi tüfachi pu manelfal wentru doy pepikawküleayngün ñi kelluafiel ti trawünche.

Timotew rume falintufi Pablo ñi werkületewchi carta. Mufüke rupa papeltukepelafuy Pablo ñi ngülamtuetew. Ka rakiduamkepelafuy chumngechi ñi inañmayafiel tañi ngülam tañi küdaw mu.

Iñchiñ ka ayünieiñ taiñ inañmayafiel ñi ngülam ta Pablo. ¿Chumngechi femafuiñ? Eluwaiñ taiñ küme femal taiñ küdaw. Küme adnieafiyiñ taiñ manelngeel. Kimeltuafiyiñ kakelu che kom taiñ kimtukunieel. Femfiliyiñ, wechunenturpuaiñ taiñ küdaw (2 Tim. 4:⁠5).