1. Allkütulu ti wewpin 1935 tripantu mu, ¿chem kimtukuy kiñe weche wentru?

RAKIDUAMAIÑ chem ñi rupan pataka tripantu kuyfi. Kiñe kurewen koneltulefuy Jewba tañi trokiñche mu. Niekefuy küla fotüm ka epu ñawe, enseñalelfingu ñi poyeafiel ta Jewba. Kiñe tañi fotüm fautizawi 1926 tripantu mu. Feychi antü mu kom pu serfikefilu ta Jewba ikefuyngün ti kofke ka pütokokefuyngün ti pulku ti trawün Jesus tañi lan ñi acordangeal, feymu feychi weche wentru ka femngechi femkefuy. 1935 tripantu mu tüfachi wentru allkütuy kiñe wewpin “Ti fütra trokiñche” pingelu, fey wüli taiñ peñi Joseph Rutherford. Feymu tüfachi weche wentru maneluwürpuy ka dungu tañi eluaetew Chaw Dios küpalechi antü mu.

2. ¿Chem kimeltuy ti peñi Rutherford tañi wewpin mu?

² Kuyfi mu küme kimngekelafuy ñi iney ngen tati fütra trokiñche, gran muchedumbre ka pingelu (Apok. 7:⁠9). Feypingekefuy ti fütra trokiñche kom piwke mu poyelafingün ta Jewba, “feymu amuayngün rume ta wenu, ngünenielayayngün ta Jesus engün” pingekefuy. Welu tañi wewpin mu taiñ peñi Rutherford kimeltuy ñi feyngenon tüfa. Doy may taiñ peñi Rutherford kimeltuy tüfachi  fütra trokiñche fey ti kakelu ufisa⁠ * ürke, mongetripayayngün “ti fütra kutrankawün mew”, fey ñi rumel mongeleal tüfachi Mapu mu. Tüfa engün kom piwke mu poyekefingün ta Jewba (Mat. 25:⁠31-33, 46; Apok. 7:⁠14). Jesus feypikünuy: ‘Ka femngechi nien ti kakelu ufisa mülenolu tüfachi corral mew, fey kidu engün ka müley tañi küpalafiel. Kidu engün ka allkütuaenew, fey müleay kiñe kechan müten ka kiñe kamañ müten’ (Juan 10:⁠16). Peaiñ tüfachi we kimeltun chumngechi kellufi tüfeychi weche wentru ka fentren poyekefilu ta Jewba (Sal. 97:⁠11; Prov. 4:⁠18).

3, 4. ¿Chem kimtukuy fentren che 1935 tripantu mu?

³ Feychi fütra trawün mu femngelu 1935 tripantu, 20.000 che trawülefuy. Taiñ peñi Rutherford feypi: “Witrapürape pu ayünielu ñi rumel mongeleal Mapu mu”. Doy 10.000 che witrapüray pingey. “¡Tüfey tati fütra trokiñche!” pi taiñ peñi Rutherford. Fey kom pu trawülelu ayüwünkechi wakeñingün. Kom ti witrapüralu kimtukuyngün ñi amunoal wenu mu. Kimtukuyngün ñi dullinoetew Jewba tañi newen mu. Ka antü mu 840 che fautizawi, epe kom engün koneltuley pu kakelu ufisa mu.

⁴ Dew rupalu ti fütra trawün, ti weche wentru taiñ nütramkapeel iwelay ti kofke ka pütokowelay ti pulku ti trawün Jesus tañi lan ñi acordangeal. Ka femngechi femi fentren peñi ka lamngen. Ñom piwke mu, kiñe peñi feypi: “Iñche ikefun ti kofke ka pütokokefun ti pulku ti trawün Jesus tañi lan ñi acordangeal. Welu dew rupalu 1935 tripantu, femwelan. Kimtukun ñi dullingenon ñi amual ta wenu, doy may ayünien ñi rumel mongeleal Mapu mu” pi taiñ peñi (Rom. 8:⁠16, 17, TNM; 2 Kor. 1:⁠21, 22). Rupalu 1935 tripantu ta fantepu mu, fentren che maneluwküley ñi rumel mongeleal Mapu mu ka kiñentrür küdawkey pu dullin cristiano engün mülewelu Mapu mu.

5. ¿Chem rakiduamkey Jewba feychi pu cristiano mu iwenolu ti kofke ka pütokowenolu ti pulku?

⁵ Chumngechi ñi femün kiñeke cristiano 1935 tripantu mu, famülke mu kiñeke peñi ka lamngen rüf piwke mu rakiduamkefuyngün ñi dullingen ñi amual ta wenu, feymu ikefuyngün ti kofke ka pütokokefuyngün ti pulku. Welu kimtukuyngün ñi rüf dullingenon engün (1 Kor. 11:⁠28). ¿Chem rakiduamkey Jewba fey engün mu? Tüfachi pu cristiano müley ñi ngüneduamal ñi welulkawkülen engün, müley ñi iwenoal ti kofke ka pütokowenoal ti pulku Jesus tañi lan ñi acordangeal ka müley ñi poyenieafiel ta Jewba kom piwke mu. Femfule engün, Jewba eluaeyew ñi koneltual ti kakelu ufisa mu. Iwelayngün ti kofke ka pütokowelayngün ti pulku, welu mañumküleyngün ñi femün Jewba ka Jesus. Feymu amukeyngün müten ti trawün Jesus tañi lan ñi acordangeal.

6. Jesus, ¿chem werküfi ñi femal pu kümeke püllü?

⁶ Tuntelewelay ñi akual ti fütra  kutrankawün, feymu rume kelluafeiñmu ngüneduamal ñi chem pin Apokalipsi capitulo 7. Jesus feypifi meli kümeke püllü ñi tüngümnieafiel ti kürüf ñi küpalal ti fütra kutrankawün. Wüne, Jewba eluafi pu dullin cristiano ñi amual ta wenu, femngechi sellakünuafi tañi nor piwkengen mu. Fey wüla neykümngeay tati kürüf, akuay llemay tati fütra kutrankawün (Apok. 7:⁠1-4). Fey wüla kiñewkülen Jesus engün, pu dullin cristiano rey ka sacerdote ngerpuayngün (Apok. 20:⁠6). Jewba, Jesus ka pu kümeke püllü rume ayüwayngün ñi kiñewküleal kom pu dullin cristiano wenu mu.

7. Ñi feypin Apokalipsi 7:⁠9, 10, ¿iney engün pey ta Juan ka chummekeyngün? (Inaduamnge ti adentun wenulelu).

⁷ Fewla Juan pey kangelu fütra trokiñche mongetripalu Armagedon mu. Doy alün-ngeyngün ti pu 144.000 mu, pepi rakifal-lay (papeltunge Apokalipsi 7:⁠9, 10). Tüfachi fütra trokiñche “tukutuwküley engün fülang takuwün”. Mapu mu koneltulayngün wedake femün mu, femngechi liftuwküleyngün. Nor piwke mu serfikefingün ta Jewba ka Jesus (Sant. 1:⁠27). Ayüwün mu wiraringün ñi montuletew Jewba ka Jesus. Nünieyngün tapül palmera, femngechi pengelkeyngün ñi eluwkülen ñi ngünenieaetew Jesus, Jewba ñi dullielchi Rey (ka ngüneduamafuymi Juan 12:⁠12, 13).

8. Ñi feypin Apokalipsi 7:⁠11, 12, ¿chem chumay Jewba, Jesus, pu kümeke püllü ka pu dullin cristiano?

⁸ (Papeltunge Apokalipsi 7:⁠11, 12). Juan feypi Jewba, Jesus, pu kümeke püllü ka pu dullin cristiano peayngün ti fütra trokiñche ñi mongetripayal ti fütra kutrankawün mu, fey rume ayüwküleayngün ka püramyeafingün ta Jewba.

9. Ñi feypin Apokalipsi 7:⁠13-15, ¿chummekey ti fütra trokiñche famülke mu?

⁹ (Papeltunge Apokalipsi 7:⁠13-15). Juan feypi tati fütra trokiñche ‘küchayey tañi takuwün ka fülangeltufi reke tati Cordero ñi wütrulelchi mollfüñ mew’. Tüfa pengeli lif rakiduam nieyngün ka norngeyngün Dios tañi adkiñ mu (Is. 1:⁠18). Tüfachi pu cristiano fautizaleyngün, feyentuleyngün Jesus ñi lan mu ka küme weniyekefingün Jewba (Juan 3:⁠36; 1 Ped. 3:⁠21). Ayüwülkefingün ta Jewba tañi femün mu, feymu “antü ka pun poyekefi engün” Mapu mu. Tüfachi fütra trokiñche doyümniey Chaw Dios ñi dungu tañi mongen mu, feymu rume amuldungukeyngün (Mat. 6:⁠33; 24:⁠14; 28:⁠19, 20).

10. 1) ¿Chem küme kimnieyngün ti fütra trokiñche? 2) ¿Chem peayngün ñi wechutriparpual?

¹⁰ Pu mongetripayalu ti fütra kutrankawün mu küme kimnieyngün Chaw Dios tañi cuidanieaetew engün. ¿Chumngelu kimnieyngün tüfa? Biblia feypi “tati anülelu ti longko ülmen wangku mew ingkanieaeyew engün”. Feychi antü mu “angkümüñmangetuay engün tañi külleñu, fey ngewelayay ta lan, ngüman no rume, eyütun no rume, kutrantun no rume. Itrokom tati mülekefulu am ta kuyfi dew ta mülewetunolu” (Apok. 21:⁠3, 4). “¡Awem! Femtriparpuy tañi maneluwkülemum fentren tripantu” piayngün.

11, 12. 1) Ñi feypin Apokalipsi 7:⁠16, 17, ¿chumlerpuay tati fütra trokiñche? 2) ¿Chum duamküley ti pu kakelu ufisa ñi maneluwün mu? Fey, ¿chumkeyngün ti trawün Jesus tañi lan ñi acordangeal?

¹¹ (Papeltunge Apokalipsi 7:⁠16, 17). Famülke mu kiñeke peñi, lamngen ngüñüwtuley. Nielayngün plata ñi ngillayam iyael. Kañpüle müley ta weychan, feymu fillalekeyngün. Kakelu peñi, lamngen  presuntukungeyngün ñi serfifiel mu ta Jewba. Welu ti fütra trokiñche rume ayüwküleyngün. Kimnieyngün ti we Mapu mu müleay fentren iyael ka fentren kimeltun Jewba mew küpalu. Ka femngechi apümkangele Weküfü ñi ngünenieel, Jewba ingkanieafi tati fütra trokiñche. Feymu Apokalipsi feypi “are rume ta wedalkalayaeyew engün”. Dew rupale ti fütra kutrankawün, fey wüla Jesus adkünuafi tati fütra trokiñche chew ñi pütokoal “fentren ko tati wülkelu rumel mongen”. Rakiduamnge, ti fütra trokiñche müten mongetripayay ti fütra kutrankawün mu, fey chumkawnorume lalayafuyngün. ¡Müna küme maneluwün llemay! (Juan 11:⁠26).

¹² Ti pu kakelu ufisa rume mañumniefingün ta Jewba ka Jesus ñi eluetew maneluwün. Jewba dullilafeyew rume, müna piwkeyeeyew chumngechi ñi piwkeyefiel tati pu dullin cristiano. Dullingeliyiñ rume taiñ amual ta wenu, femnofuliyiñ rume, kom iñchiñ amukeiñ ti trawün Jesus tañi lan ñi acordangeal. Femngechi pengelkeiñ taiñ piwkeyefiel ka mañumtufiel ta Jewba ka Jesus.

13, 14. ¿Chumngelu kom iñchiñ trawüluwkeiñ taiñ acordayal Jesus tañi lan?

¹³ Rupayechi tripantu mu, femngelu ti trawün Jesus tañi lan ñi acordangeal, warangkake che mu kiñe che müten peno ikey ti kofke ka pütokokey ti pulku. Feymu pichin che müten femkey tüfa, epe kom pu trawüluwkelu maneluwkey ñi mongeleal Mapu mu. Fey, ¿chumngelu amukeyngün ti trawün mu? Ñi piwkeyefiel mu llemay ta Jesus ka tati pu dullin cristiano. Trürümngeafuy mafün mu reke. Pu weni amukey ñi piwkeyefiel mu, ñi falintufiel mu ti we kurewen. Fey, ¿amunoafulu kay pu kakelu ufisa ñi acordayal Jesus tañi lan? Welu fey ka müten no. Kafey trawüluwkeyngün fente ñi mañumniefiel Jesus tañi lan mu, fey ta eluafeyew ñi rumel mongelerpual.

¹⁴ Kafey pu kakelu ufisa amukey ti trawün Jesus tañi lan ñi acordangeal ñi inayafiel Jesus tañi werkün dungu. Fey feypifi tañi pu apostol: ‘Femkeaymün tüfa iñche tamün acordamuafiel’ (1 Kor. 11:⁠23-26). Feymu petu mülewele dullin cristiano Mapu mu, pu kakelu ufisa amuayngün  feychi falin trawün mu. Ka femngechi pu kakelu ufisa mangelkefi itrokom che ñi ka amual feychi trawün mu.

15. ¿Chumngechi pengelafuiñ ta Jewba ka Jesus taiñ piwkeyefiel ka taiñ mañumniefiel?

¹⁵ Amun mu iñchiñ ti trawün Jesus tañi lan ñi acordangeal, ülkantukeiñ ka llellipukefiyiñ ta Jewba. Femngechi pengelkeiñ taiñ piwkeyefiel ka mañumtufiel ta Jewba ka Jesus. Ti wewpin taiñ allkütual feytachi tripantu feypiley “Mañumküleaiñ Chaw Dios ka Jesus ñi femün iñchiñ mu”. Feytachi wewpin kelluaeiñmu taiñ doy mañumnieafiel ta Jewba ka Jesus. Rulpangele ti kofke, rakiduamtukuaiñ ñi adentulen Jesus ñi cuerpo. Ka femngechi rulpangele ti pulku, rakiduamtukuaiñ ñi adentulen Jesus tañi mollfüñ. Ka rakiduamtukuaiñ fente taiñ piwkeyenieetew Jewba. Fey wüli tañi Fotüm ñi lapayal iñchiñ taiñ duam mu, fey taiñ nierpual ta rumel mongen (Mat. 20:⁠28). Feymu taiñ piwkeyefiel mu ta Jewba ka Jesus, amukeiñ ti trawün Jesus tañi lan ñi acordangeal.

16. ¿Chem dungu mu trüri pu dullin cristiano pu kakelu ufisa engün?

¹⁶ Pu dullin cristiano ka pu kakelu ufisa kake rume maneluwün niefuyngün rume, trüringün fillke dungu mu. Chaw Jewba wüli tañi sakin Fotüm ñi lapayal pu dullin cristiano ka pu kakelu ufisa mu, femngechi pengeli ñi trür piwkeyeniefiel ka falintuniefiel kom engün. Tüfachi epu trokiñche müley ñi nor piwkeyeafiel ta Jewba ka Jesus, fey ñi llowal tañi feypikünuetew (Sal. 31:⁠23). Ka acordanienge: chem maneluwün rume nieliyiñ, Jewba elukeeiñmu tañi newen tunte taiñ duamnieel.

17. ¿Chem ayüniey ti pu dullin cristiano mülewelu ta Mapu mu?

¹⁷ Pu dullin cristiano choyüngelu müten, maneluwlafuyngün ñi amual ta wenu. Chaw Dios tukuleleyew tüfachi maneluwün tañi piwke mu engün. Pu dullin cristiano rakiduamnieyngün tañi maneluwün, llellipukeyngün tañi maneluwün mu ka rume ayüfuyngün ñi mülepual ta wenu (Filip. 3:⁠20, 21; 1 Juan 3:⁠2, TNM). Kimlayngün rume chem cuerpo ñi nietual wenu, welu rume ayünieyngün ñi trawülepual Jewba engu, Jesus mu, pu kümeke püllü ka pu kakelu dullin cristiano engün, fey ñi koneltual Chaw Dios tañi Gobierno mu.

18. ¿Chem ayüniey ti pu kakelu ufisa?

¹⁸ Choyüngelu müten che, ayüniey tañi turpu lanoal. Feymu tati pu kakelu ufisa maneluwküley tañi rumel mongeleal Mapu mu (Ecl. 3:⁠11). Ayünieyngün  küdawal ñi wekünutuafiel tüfachi Mapu. Ayünieyngün kiduke ñi dewmayal ruka, ñi anümkayal ka ñi küme feletual kiñentrür tañi pu che engün (Is. 65:⁠21-23). Ayünieyngün amual wallke püle ñi kim mapumeal, ñi kimafiel fütrake wingkul, fütrake mawidantu, lafken, femngechi ñi doy ngüneduamafiel kom ñi dewmael ta Jewba. Welu doy may ayünieyngün fill antü ñi doy küme weniyenieafiel ta Jewba.

19. 1) Amuliyiñ ti trawün Jesus tañi lan ñi acordangeal, ¿chem pengelafuiñ? 2) Tüfachi tripantu kay, ¿chumül femngeay tüfachi trawün?

¹⁹ Chaw Jewba elufi müna küme maneluwün tati pu dullin cristiano ka tati pu kakelu ufisa (Jer. 29:⁠11). Jewba ka Jesus fütra kullingu reke taiñ nierpual ta rumel mongen. Feymu amuliyiñ ti trawün Jesus tañi lan ñi acordangeal, pengelafuiñ taiñ mañumniefiel engu. Tüfachi trawün doy falin-ngey kakelu trawün mu. Tüfachi tripantu 27 konle marzo dew konle ta antü, trawüluwaiñ taiñ acordayafiel Jesus ñi lan. Fentren iñchiñ küdawngelayay taiñ trawüluwal. Kakelu küdawngefule rume, rulpakünulayayngün ñi acordayafiel Jesus tañi lan. Ka kiñeke peñi, lamngen carcel mu kütu femayngün feytachi trawün. Chem ngepe rume, acordanieaiñ Jewba, Jesus ka kom pu mülelu ta wenu taiñ lelinieetew. ¡Kiduke iñchiñ ayüwmayaiñ ti trawün Jesus tañi lan ñi acordangeal!