1, 2. Jewba, ¿chumngelu (chemu) adkünuy taiñ koneltulerpual tañi pu che mu? Ka, ¿chumngechi femi tüfa?

JEWBA ayüniey taiñ koneltuleal tañi pu che mu, ¡rume küme dungu tüfa! Pu koneltulelu Jewba tañi pu che mu wülkeiñ taiñ mongen Jewba mu ka feyentukeiñ Jesus tañi lan mew. Kafey ayüwkülekeiñ taiñ kiñewkülen pu peñi ka pu lamngen iñchiñ. Kimnieiñ chem taiñ chumal taiñ mongen mu. Kafey ayüwülkeeiñmu taiñ nieelchi maneluwün, kiñeke che ñi rumel mongeleal wenu mu, kakelu che ti we Mapu mew.

² Jewba rume piwkeyenieeiñmew, feymu fütra kulli reke taiñ koneltulerpual tañi pu che mu (Juan 3:⁠16). Tati Biblia feypi Ngünechen ngillaeiñmew iñchiñ (1 Kor. 6:⁠20). Chaw Ngünechen wüli tañi Fotüm iñchiñ mu, femngechi taiñ doy fülmawal kidu mu. Taiñ Fütra Chaw doy alüpüraley itrokom tati mülelu mu, welu elueiñmu taiñ feypiafiel “Chaw”, rume küme duamelkeeiñmu tüfachi dungu. Kafey chumngechi ngüneduamiyiñ rupachi chillkatun mu, Jewba fey tati doy küme Chaw taiñ nieafel.

3. ¿Chem dungu ramtuwafuiñ? (Inaduamnge ti wichulechi dungu “ ¿Duamniepeenew may Jewba?”).

³ Fütra kuyfi mu, kiñe wentru wirintukulu Biblia feypi: “¿Chem mu am kulliafiñ ta Jewba kom kümeke dungu tañi femkeetew?” (Sal. 116:⁠12). Iñchiñ ka femngechi dungu ramtuwafuiñ chi, welu turpu kullilayafuiñ ta Jewba kom taiñ elukeetew. Femfule rume, fente taiñ piwkeyenieetew Jewba, iñchiñ ka ayünieiñ taiñ piwkeyeafiel. Ti apostol Juan wirintukuy: “Iñchiñ piwkeyefiyiñ ta kidu, fey kidu am wüne piwkeyeetew ta iñchiñ” (1 Juan 4:⁠19). Feymu, ¿chumngechi pengelafuiñ ta Jewba taiñ piwkeyeniefiel?

4. Santiaw 4:⁠8 ñi feypin, ¿chumngelu fülmawküleaiñ Jewba mu?

⁴ Jewba ayüniey taiñ fülmawküleal kidu mew ka taiñ nütramkayafiel, feymu yafüluwaiñ taiñ fülmawküleal kidu mu (papeltunge Santiaw 4:⁠8). Jewba rumel eluwkülekey taiñ allkütuaetew, ka feypikeeiñmu: “Yafüluwkülemün tamün ngillatuleal” (Rom. 12:⁠12). Jewba turpu ürkükelay ka niefule rume fentren duam, eluwkülekey taiñ allkütuaetew. Iñchiñ kay, ¿chumngechi allkütuafuiñ? Papeltunieafiyiñ tati Biblia ka taiñ fillke papel, ka femngechi küme allkütuaiñ amun mu trawün mew. Rakiduamnge tüfa, pu pichikeche küme nütramkakefi tañi chaw, doy fülmawkülekey. Ka femngechi iñchiñ fill antü nütramkafiliyiñ ta Jewba, doy fülmawküleaiñ kidu mew.

5. ¿Chumngechi doy küme llellipuafuiñ ta Jewba?

⁵ ¿Chumngechi llellipukefimi ta Jewba? Taiñ Fütra Chaw ayüniey taiñ feypiafiel chem ñi mülen taiñ piwke mu ka taiñ rakiduam (Sal. 62:⁠8). Feymu kümey taiñ ramtuwal: “¿Piwke mew entukepen may tañi ngillatun? Kam, ¿fill antü feypikepen may Chaw Ngünechen kiñe feypin müten?”. Rume piwkeyeniefiyiñ ta Jewba, fey ayünieiñ taiñ fülmawküleal ta kidu mew. Feymu llemay fill antü ngillatunieafiyiñ ta Jewba, feypiafiyiñ chem ñi mülen taiñ piwke mu, chem taiñ ayüwülkeetew ka chem taiñ weñangkülkeetew. Müchayke ngillatuafuiñ taiñ Wenu Chaw taiñ kelluaetew.

6. ¿Chumafuiñ taiñ fülmawküleal Jewba mew?

⁶ Taiñ fülmawküleal Jewba mew, müley taiñ kim mañumtual. Chumngechi wirintukuy kiñe wentru Biblia mew, iñchiñ ka feypiafuiñ: “Awem, tañi Ngünechen Jewba, fentreley tami femkeel. Fentren afmatun dungu femkeymi ka wechurpukeymi chem tami ayükeel iñchiñ mu. Iney no rume trürlay eymi mu. Rume fentren-ngey tami femkeel, feymu kom nütramkalayafun” (Sal. 40:⁠5). Feymu re mañumkülelaiñ müten taiñ piwke mu, doy may mañumniefiyiñ ta Jewba taiñ dungun mew ka taiñ femün mew. Femngechi pengelkeiñ taiñ trürnon tati pu che mülelu famülke mu, epe kom engün mañumkelafi ta Chaw Dios kom tañi elukeetew mu. Doy may pu che ñi kim mañumtunon pengelkeeiñmu taiñ mülen afaelchi antü mew (2 Tim. 3:⁠1, 2). Iñchiñ turpu inayentulayafiyiñ feychi pu che ñi femün engün.

7. Jewba, ¿chem ayüniey taiñ femal? Ka, ¿chumngelu?

⁷ Tati pu chaw ayükelay tañi pu yall ñi kewayal engün, doy may ayükey ñi küme yewküleal. Ka femngechi Jewba ayüniey kom tañi pu poyekeetew ñi weniyewal engün. Taiñ welukonkechi piwkeyewün mu pengelkeiñ taiñ rüf cristiano ngen (Juan 13:⁠35). Kuyfi mu, kiñe wentru poyekefilu ta Jewba wirintukuy: “¡Ngüneduamaymün! ¡Müna kümey ka ayüfalngey pu peñi ka lamngen ñi kiñentrür müleal!” (Sal. 133:⁠1). ¿Rüfngey no am chi ka femngechi taiñ rakiduamken? Piwkeyefiel taiñ pu peñi ka taiñ pu lamngen, pengelkeiñ taiñ piwkeyeniefiel ta Jewba (1 Juan 4:⁠20). Kom iñchiñ taiñ peñiwen ka lamngenwen-ngen, ‘küme piwkengeiñ’, ‘kutranpiwkeyewkeiñ ka welukonkechi wiñoduamtuwkeiñ’, ¡rume küme dungu tüfa! (Efes. 4:⁠32).

8. Ñi feypin 1 Juan 5:⁠3, ¿chumngelu inaniekefiyiñ Jewba tañi feypin?

⁸ Jewba ayüniey pu yall ñi allkütunieafiel tañi pu chaw ka ayüniey taiñ allkütunieafiel ta kidu (Efes. 6:⁠1). Jewba dewmaeiñmu, mongelkeeiñmu ka doy kimün niey chem chaw rume, feymu feley taiñ inanieafiel ñi feypin. Doyelchi may rume piwkeyeniefiyiñ ta Jewba, feymu küme inaniekefiyiñ tañi feypin (papeltunge 1 Juan 5:⁠3). Jewba feley tañi allkütungeal,  welu dikümtukukelaeiñmu (obligakelaeiñmu) taiñ inanieafiel ñi feypin. Jewba elukeeiñmu kidu dullial chem chumal, feymu rume ayüwkey taiñ feyentuniefiel piwkeyenkechi.

9, 10. ¿Chumngelu duamfali kimal ka inanieal chem taiñ ngülamtukeetew Jewba?

⁹ Tati pu chaw ayünieyngün ñi kümelkaleal tañi pu yall. Feymu ngülamtukefingün, fey ñi kuñiwtukuafiel. Tati pu pichikeche inaniefiel mu tañi pu chaw ñi feypin, pengelkeyngün ñi yamniefiel ka maneluwkülen tañi pu chaw mu. Doyelchi may iñchiñ müley taiñ kimal ka inanieal taiñ mongen mu chem taiñ ngülamtukeetew taiñ Fütra Wenu Chaw. Femngechi kümelkaleaiñ taiñ mongen mew ka pengelelafiyiñ ta Jewba taiñ piwkeyeniefiel ka yamniefiel (Is. 48:⁠17, 18). Welu pu famentukefilu Jewba tañi ngülam kidutu wedalkawkeyngün (Gal. 6:⁠7, 8).

¹⁰ Allkütufiliyiñ Jewba tañi ngülam, tremoleaiñ, küme duamküleaiñ ka küme weniyewküleaiñ Jewba iñchiñ. Taiñ Fütra Chaw doy küme kimniey chumngechi taiñ kümelkaleal. Kiñe lamngen Estados Unidos mapu mew mülelu, Aurora pingey, feypi: “Kimtukunien, inaniefiel mu iñchiñ Jewba tañi feypikeel, doy küme mongen niekeiñ”. ¡Feyngey llemay! Eymi kay, ¿chumngechi kümelkakeeymu inayal Jewba tañi ngülam?

11. ¿Chumngechi kelluaeiñmu tati ngillatun?

¹¹ Taiñ culpafe ngen mu iñchiñ, kiñeke mew küdawtukeiñ taiñ inayal Jewba tañi feypin. Welu tati ngillatun kellukeeiñmu taiñ inanieafiel Jewba tañi feypin küdawngefule  rume. Feymu müley taiñ yafüluwal, femngechi taiñ femal Jewba tañi ayükeel. Kiñe wentru wirintukulu ti salmo ngillatufi ta Jewba ñi kelluaetew ñi piwke mu ñi inayal kom tañi feypin (Sal. 51:⁠12). Kiñe lamngen Denise pingelu, wünelekey amuldungun mu, feypi: “Kiñeke mu, küdawtuken ñi inayal Jewba tañi werkün dungu, fey ngillatukefiñ ñi newentukuaetew femal Jewba tañi ayükeel”. Feley llemay, Jewba rumel wiñoldunguay femngechi ngillatufiliyiñ (Luka 11:⁠9-13).

12. ¿Chem feypikeeiñmu taiñ femal Efesio 5:⁠1?

¹² Biblia feypi: “Feymu llemay inayentunierpufimün ta Chaw Ngünechen, sakin pu fotüm ka ñawe reke” (Efesio 5:⁠1, TNM). Jewba ñi “sakin pu fotüm ka ñawe” ngelu am iñchiñ, rume yafüluwkeiñ taiñ inayentuafiel. ¿Chumngechi inayentukefiyiñ? Piwkeyechekeiñ, kümelkakefiyiñ ta che ka wiñoduamtuchekeiñ. Tati pu che poyekenofilu ta Jewba pefile taiñ küme femken, eluwafuyngün ñi doy kimafiel ta Chaw Ngünechen (1 Ped. 2:⁠12). Jewba kümelkakefi tañi pu yall, ka femngechi pu chaw müley ñi kümelkayafiel tañi pu yall, femngechi tüfa engün ayüafuyngün ñi weniyeafiel ta Jewba.

13. Yewenchengeliyiñ, ¿chem müley taiñ longkontukual?

¹³ Epe kom pu pichikeche ayüwkeyngün ñi chumngen tañi chaw, feymu ayüwünkechi nütramkakefingün kakelu che tañi chaw mu. Ka femngechi iñchiñ rume ayüwküleiñ ñi  chumngen taiñ Wenu Chaw, feymu ayükeiñ kom pu che tañi kimafiel. David reke rakiduamküleiñ, kidu feypi: “Püramyeafiñ ta Jewba” (Sal. 34:⁠2). Welu yewenchengeliyiñ, katrütuafeiñmu taiñ dungual Jewba mu. Femngechi chengeliyiñ, longkontukuaiñ rume ayüwülpelayafuiñ ta Jewba taiñ amuldungun mu ka rume kümelkalepetulayafuy ta pu che kimürpufile ta Jewba. Chaw Ngünechen newen piwkekünuaeiñmu taiñ dungual kidu mew. Chumngechi kellufi Jewba tati pu wünenke cristiano, ka femngechi kelluaeiñmu ta iñchiñ (1 Tes. 2:⁠2).

14. ¿Chumngelu fente falin-ngey taiñ amuldungual?

¹⁴ Jewba dullintuchekelay, fey pefiel mu taiñ piwkeyefiel itrofill che, rume ayüwkey (Hecho 10:⁠34, 35). Müley taiñ amuldungulelafiel pu che Ngünechen tañi kümeke dungu, femngechi pengelaiñ taiñ piwkeyechen (Mat. 28:⁠19, 20). Tati pu che allkütule taiñ amuldungun, doy küme mongen nietuafuyngün famülke mu ka rumel mongeleafuyngün küpalechi antü mew (1 Tim. 4:⁠16).

15, 16. ¿Chem kümeke dungu kimnieiñ taiñ ayüwküleal?

¹⁵ Jewba rume küme Chaw ngey, fey ayüniey kom tañi pu che ñi kümelkaleal (Is. 65:⁠14). Famülke mu, rupafuliyiñ wedake dungu mu, müley fentren kümeke dungu taiñ ayüwmayal. ¿Chem kümeke dungu chi? Rüf kimnieiñ taiñ Wenu Chaw rume piwkeyenieeiñmu. Kafey küme kimnieiñ Ngünechen tañi dungu Biblia mew mülelu (Jer. 15:⁠16). Ka koneltuleiñ Jewba tañi pu che mu, tüfa mu kom iñchiñ piwkeyefiyiñ ta Chaw Ngünechen, piwkeyefiyiñ tañi werkün dungu ka welukonkechi piwkeyewkeiñ, chew no rume pelayafuiñ femngechi dungu (Sal. 106:⁠4, 5).

¹⁶ Ka femngechi ayüwküleafuiñ, kimtukunielu kay iñchiñ taiñ doy küme mongen nietual küpalechi antü mu. Ka kimnieiñ pichiñma mu müten Jewba apümafi kom pu wedake che ka ngünenietuafi ti Mapu, femngechi kiñe küme mülewe ngetuay. Ka nieiñ kiñe ayüfalchi maneluwün, tati pu layelu wiñomongetuayngün, fey wiño petuafiyiñ engün tüfachi Mapu mew (Juan 5:⁠28, 29). ¡Ayüfal mongen nieturkeaiñ llemay! Doy may kimtukunieiñ chem ñi rupayal pichiñma mu, kom tati mongelelu wenu mapu mu ka nag Mapu mew kiñentrür püramyeafiyiñ taiñ küme Chaw Ngünechen chumngechi ñi ayüken ta kidu.