1. Ñi feypin 3 Juan 3, 4, ¿chem dungu ayüwülkeeiñmu?

FENTREN che ñi enseñalfiel ti apostol Juan amulerpuyngün ti rüf dungu mu, feymu müna ayüwmapelafuy ti apostol Juan. Juan fotüm ka ñawe reke trokikefi feytachi pu cristiano. Feymu rupalu engün wedake dungu mu, kellufi tañi newenküleal engün. Ka femngechi famülke mu, taiñ pu fotüm, ñawe ka feychi pu che taiñ enseñalfiel ta Biblia serfiniefile ta Jewba, iñchiñ rume ayüwküleaiñ (papeltunge 3 Juan 3, 4).

2. Juan, ¿chumngelu wirintukuy küla carta?

² Juan lifrekünungelu Patmo mapu mu, mülekefuy chi Efeso waria mu kam fülpüle. Feychi mu, Jewba adkünufi ta Juan ñi wirintukual küla carta. Feytachi carta kellufi pu cristiano ñi doy küme maneluwal Jesus mu ka ñi amuleal ti rüf dungu mu.

3. ¿Chem ramtun ngüneduamaiñ feytachi chillkatun mu?

³ Feychi antü mu, Juan müten mongelewefuy kom pu apostol mu. Kiñeke koylake cristiano konpuy ti trawünche mu. Kidu engün feypikefuyngün ñi kimfiel ta Chaw Dios, welu femkelafuyngün tañi feypietew. Feymu Juan müna rakiduamkülefuy tañi pu peñi ka tañi pu lamngen mu ñi welulkanoaetew feytachi pu koylake cristiano (1 Juan 2:⁠18, 19, 26).⁠ * Fewla peaiñ ñi wirintukuel ta Juan, fey ngüneduamaiñ küla ramtun: 1) ¿Chumafuiñ taiñ amuleal ti rüf dungu mu? 2) ¿Chumngelu küdawngeafuy taiñ amuleal tati  rüf dungu mu? 3) ¿Chumngechi welukontu kelluwafuiñ taiñ amuleal feytachi rüf dungu mu?

4. Ñi feypin 1 Juan 2:⁠3-6 ka 2 Juan 4, 6, ¿chumafuiñ taiñ amuleal ti rüf dungu mu?

⁴ Taiñ amuleal ti rüf dungu mu, müley taiñ kimafiel feytachi rüf dungu Biblia mu mülelu. Ka müley taiñ femal taiñ feypietew ta Jewba (papeltunge 1 Juan 2:⁠3-6; 2 Juan 4, 6). Jesus femi kom ñi feypietew tañi Chaw. Feymu taiñ femal taiñ feypietew ta Jewba, müley taiñ inayentuafiel ta Jesus (Juan 8:⁠29; 1 Ped. 2:⁠21).

5. ¿Chem mülefuy taiñ rüf maneluwal?

⁵ Ayüliyiñ taiñ amuleal ti rüf dungu mu, müley taiñ maneluwal ñi rüf dunguken ta Jewba. Feymu kom tañi feypikünuel Biblia mu rüfngey. Ka femngechi müley taiñ rüf maneluwal Jesus tañi Mesia ngen. Fachantü pütrünke che feyentukelay Jesus ñi reykülen Chaw Dios tañi Gobierno mu. Juan ka feypi ñi müleal “pütrün ngünenkachefe” ñi welulkayafiel pu newenkülenolu ti rüf dungu mu (2 Juan 7-11). Juan feypi: “¿Iney am tati koylangelu? Fey tüfa tati feypikelu Jesus tañi Kristongenon” (1 Juan 2:⁠22). Taiñ ngünenkangenoal, mülefuy taiñ papeltuafiel Biblia. Femliyiñ müten, kimürpuafiyiñ ta Jewba ka Jesus (Juan 17:⁠3). Fey küme kimaiñ taiñ mülen ti rüf dungu mu.

6. ¿Chemu kuñiwtukuwafuy pu wechekeche?

⁶ Kom iñchiñ taiñ cristiano ngen, mülefuy taiñ kuñiwtukuwküleal taiñ ngünenkanoaetew pu che ñi kimeltukeel (1 Juan 2:⁠26). Pu wechekeche doy mülefuy tañi kuñiwtukuwal. Kiñe lamngen Alexia pingelu,⁠ * 25 tripantu niey, feypi: “Doy üllcha domo ngelu iñche, kiñeke mu rume rakiduamelenew ñi feypin tañi pu profesor ti evolucion mu ka kakelu dungu ñi kimeltuel tati pu che. Kiñeke mu ayükefun kütu ñi feypin engün. Welu ngelafuy tañi feyentufemal kom ñi feypikeetew tañi pu profesor. Ka mülefuy ñi ngüneduamal Jewba tañi feypikeetew. Fey papelturpufiñ ti lifru La vida...  ¿cómo se presentó aquí? ¿Por evolución, o por creación? Pichi rupachi antü mu, rüf maneluwürpun Jewba mu. Rüf kimürpun tati Biblia mew müley ti rüf dungu. Ka ngüneduamün, inafili Chaw Dios tañi kümeke ngülam, ayüwkülean ka tüngkülean”.

7. Tunten tripantu nieliyiñ rume, ¿chem femlayaiñ?

⁷ Feymu kom iñchiñ taiñ cristiano ngen, tunten tripantu nieliyiñ rume, kuñiwtukuwaiñ taiñ nienoal epu rume mongen. Juan feypi iney no rume poyekefilu ta Jewba yenielayafuy podngechi mongen (1 Juan 1:⁠6). Küpa ayüwülfiliyiñ ta Jewba, longkontukunieaiñ kidu kimniey kom taiñ femkeel iñchiñ. Kakelu che penoeliyiñmu rume, welu Jewba may pekeeiñmu taiñ femken (Eb. 4:⁠13).

8. ¿Chem weda rakiduam famentuafiyiñ?

⁸ Juan feypi: ‘Nielaiñ culpan pileliyiñ, kidutu koylakawkeiñ’ (1 Juan 1:⁠8). Juan ñi antü mu, pu koylake cristiano feypikefuy: “Weda femle rume ti che, weniyenierpuafuy ta Jewba”. Famülke mu, fentren che ka femngechi rakiduamkey. Welu iñchiñ inayentuñmalayafiyiñ ñi rakiduamken pu che ti culpan dungu mu. Fentren che “feyentuken Chaw Dios mu” pikeyngün, welu kümelu trokikefingün Chaw Dios tañi üdekeel. Fentren che duamkülelay rume ñi yenieal lif mongen chumngechi ñi ayükeel ta Jewba. Fentren che femkey Jewba tañi üdekeel, welu feypikeyngün: “Iñche tañi mongen tati, feymu chumafun rume. Wedalkamekelan” pikeyngün.

9. Pu wechekeche inale Jewba tañi ngülam, ¿chumngelu kümelkayafuy?

⁹ Tati pu wechekeche inayenturpuafuyngün ñi femün tañi pu compañ colegio mu, küdaw mu, fey kümelu trokirpuafuyngün fillke podngechi dungu. Kiñe peñi Alexander  pingelu, feypi: “Colegio mu, kiñeke üllchake domo ngangekeenew tayu kudumuwal. Iñche kom famentukefiñ engün, feymu ‘¿wentru no am ta eymi?’ pingekefun” pi. Eymi weche, femngechi dungu rupamekelmi, maneluwküleaymi Jewba tañi kimün mu. Fey tüfa kelluaeymu tami yamuwal, tami tremoleal, tami küme duamküleal ka tami küme weniyeafiel ta Jewba. Doy famentufilmi wedake dungu, doy küdawtulayaymi tami femal Jewba tañi ayükeel. Fillke podngechi rakiduam ñi inakeel pu che famülke mu, Weküfü mu küpay. Feymu famentufilmi feytachi wedake rakiduam, wewafimi tati Weküfü (1 Juan 2:⁠14).

10. Ñi feypin 1 Juan 1:⁠9, ¿chumafuiñ taiñ kidutu culpawnoal?

¹⁰ Jewba müten feley tañi feypial chem ñi femnoafel ta che. Feymu famentukefiyiñ Jewba tañi üdekeel. Ka culpan mu iñchiñ, ngillatukefiyiñ ta Jewba, “perdonaen” pikefiyiñ (papeltunge 1 Juan 1:⁠9). Fütra culpaliyiñ, feypiafiyiñ pu longkolelu taiñ kelluaetew (Sant. 5:⁠14-16). Dew perdonaeliyiñmu Jewba, kidutu culpawlayaiñ taiñ kuyfike culpan mu. ¿Chumngelu am? Taiñ Fütra Chaw Jewba wüli tañi sakin Fotüm taiñ perdonayaetew. Rüf piwke mu küme rakiduamtuliyiñ taiñ culpan mu, Jewba rüf perdonayaeiñmu llemay. Femngechi kidutu culpawlayaiñ, doy may ayüwünkechi serfiafiyiñ ta Jewba (1 Juan 2:⁠1, 2, 12; 3:⁠19, 20).

11. Taiñ welulkanoaetew pu apostata, ¿chumafuiñ?

¹¹ Ka femngechi müley taiñ famentuafiel ñi kimeltukeel pu apostata. Tati Weküfü afkentu eluwkey ñi welulkayafiel pu cristiano, feymu duamfali taiñ ngüneduamal chem ñi rüfngen ka chem ñi rüfngenon.⁠ *  Taiñ pu kayñe wirintukukey koylake dungu internet mu, femngechi taiñ püntünentuaetew Jewba mu ka taiñ pu peñi ka taiñ pu lamngen mu. Weküfü mu llemay küpay feytachi koylake dungu, feymu famentuafiyiñ (1 Juan 4:⁠1, 6; Apok. 12:⁠9).

12. ¿Chumngelu müley taiñ doy maneluwal ti rüf dungu mu?

¹² Taiñ welulkanoaetew Weküfü, mülefuy taiñ maneluwal Jesus mu ka ñi femkeel Jesus ñi wechurpual tañi Chaw ñi ayükeel. Ka femngechi müley taiñ maneluwal ti “kim manelfal kona” mu, esclavo fiel y prudente pingey wingka dungun mu. Kidu engün müten adniekeeyew Jewba ñi adkünuafiel tañi trokiñche (Mat. 24:⁠45-47, TNM). Taiñ femngechi maneluwal, müley taiñ fill antü papeltuafiel ta Biblia. Femngechi fente taiñ maneluwken ti rüf dungu mu, kiñe fütra anümka reke felerpuaiñ küme foliluwkülelu. Pablo ka femngechi dungu wirintukulelfi kiñeke cristiano, feypifi: ‘Eymün chumngechi llowfimün ta Ñidol Jesukristo, fey ta famngechi kiñe nor mongen mew müley tamün kiñewküleal ta kidu mew tamün fente küme newentuwküleal ka tamün yafüluwküleal ta kidu mew tati feyentun dungu mew’ (Kol. 2:⁠6, 7). Küme maneluwküleliyiñ Jewba mu, chumle rume tati Weküfü ka tañi pu inanieetew, püntünentulayaeiñmu ti rüf dungu mu (2 Juan 8, 9).

13. 1) ¿Chem kimnieiñ taiñ femngeal? 2) ¿Chumngelu kimnieiñ tüfa?

¹³ Iñchiñ taiñ pu cristiano ngen, kimnieiñ taiñ üdengeal (1 Juan 3:⁠13). Juan feypi ‘kom tüfachi Mapu ñi ngünenieetew tati Weküfü’ (1 Juan 5:⁠19). Doy pichilewey tañi apümkangeal tati Weküfü, feymu rume illkuley (Apok. 12:⁠12). Kiñeke mu, Weküfü küdawkey taiñ ñochikechi püntünentuaetew ti rüf dungu mu, feymu famtukulelkeeiñmu podngechi rakiduam ka ñi kimeltukeel pu apostata. Welu kafey Weküfü weda kayñetukeeiñmu. Weküfü kimniey ñi pichilewen ñi antü, feymu chumkey rume ñi katrütuafiel taiñ amuldungun küdaw ka taiñ elkünual ti rüf dungu. Feymu kiñeke pais mu taiñ pu peñi ka pu lamngen katrütungekey ñi poyefiel ta Jewba. Kakelu pais mu, müte elungekelayngün tañi femal. Femfulu rume, taiñ pu peñi ka pu lamngen amuleyngün ñi serfiniefiel ta Jewba. Feymu feypiafuiñ chumle rume tati Weküfü, amuleafuiñ ti rüf dungu mu.

14. ¿Chumngechi kelluafuiñ taiñ pu peñi ka pu lamngen ñi amuleal ti rüf dungu mew?

¹⁴ Taiñ kelluafiel taiñ pu peñi, pu lamngen ñi müleal ti rüf dungu mu, müley taiñ kutranpiwkeyeafiel engün (1 Juan 3:⁠10, 11, 16-18). Welukontu piwkeyewaiñ, doyelchi may wedake dungu rupafule. Kiñeke taiñ pu peñi, lamngen, layeluwi chi, feymu duamniey tañi kellungeal ka yafültukungeal. Kakelu taiñ pu peñi, pu lamngen kom ñamümingün tañi nieel kiñe nüyün mu, lüfkonrukan mu, kürüftuku mawün mu, feymu duamnieyngün tañi dewmangetual tañi ruka ka tañi Trawünwe Ruka. Re wenche taiñ wün mew müten kutranpiwkeyelayafiyiñ taiñ pu peñi ka pu lamngen, doy may taiñ femün mew.

15. Ñi feypin 1 Juan 4:⁠7, 8, ¿chem mülefuy taiñ femal?

¹⁵ Welukonkechi piwkeyewliyiñ, inayentuafiyiñ ta Jewba (papeltunge 1 Juan 4:⁠7, 8). Rüf piwkeyewliyiñ, welukonkechi perdonawaiñ (Kol. 3:⁠13). Ngüneduamaiñ ñi  rupan kiñe peñi Aldo pingelu. Kiñe peñi weda piñmaeyew tañi raza, feymu illkutufi. Taiñ peñi fentren rupa ngillatufi ta Jewba ñi kelluaetew, femngechi ñi weda trokinoafiel feychi peñi. Ka femngechi “amuldungumeayu” pifi. Amuldunguyawlu engu, taiñ peñi feypifi fente ñi weda duameletew tañi weda pin. Aldo feypi: “Feypifilu iñche tañi weda duameletew, ‘perdonaen’ pienew rüf piwke mu. Kimfali tañi rüf repientetuwün, feymu perdonafiñ. Femngechi kümelkawtuyu”.

16, 17. ¿Chem eluwküleaiñ taiñ femal?

¹⁶ Apostol Juan rume duamniefuy kom tañi pu peñi ka pu lamngen, femngechi ñi küme weniyeafiel ta Jewba. Feymu küme ngülamtufi engün tañi küla carta mu. Pu dullingelu ñi ngüneniepual Jesus engün, rume duamnieaeiñmu ka piwkeyenieaeiñmu Juan reke. Rume ayüwülkeeiñmu taiñ kimfiel tüfa (1 Juan 2:⁠27, TNM).

¹⁷ Piwkentukunieaiñ kom taiñ ngüneduampeel feytachi chillkatun mu. Chem rume femliyiñ, inayaiñ kom taiñ feypikeetew Jewba, femngechi amuleaiñ ti rüf dungu mu. Ngüneduamafiyiñ ta Biblia ka maneluwaiñ fey mu. Rüf maneluwaiñ Jesus mu. Famentuafiyiñ pu che ñi wedake rakiduam ka famentuafiyiñ ñi kimeltukeel pu apostata. Epu rume mongen yenielayaiñ ka femlayaiñ Jewba ñi üdekeel. Inayaiñ Jewba ñi feypin taiñ lif mongen yenieal. Ka perdonayafiyiñ taiñ pu peñi ka pu lamngen ka kelluafiyiñ tati pu duamnielu, femngechi kelluafiyiñ engün ñi amuleal ti rüf dungu mu. Femngechi chem weda dungu rume rupafuliyiñ, amuleaiñ ti rüf dungu mu.