Fautizawlu Jesus 29 tripantu mu, longkolechi sacerdote ngerpuy. ¿Chumngelu feypiafuiñ? Fautizawlu Jesus, eluwi ñi femal Jewba tañi ayükeel. Biblia mu, Jewba ñi ayükeel trürümngey ta kiñe altar mu (Gal. 1:⁠4; Eb. 10:⁠5-10). Feymu fautizawlu Jesus, mülerpuy feychi altar. Welu tati altar kidu mülekelay, duamniey kiñe ngillatuwe ruka ñi elkünungeal. Feymu feypiafuiñ feychi fautizawlu ta Jesus, mülerpuy Jewba tañi ngillatuwe ruka. Feytachi ngillatuwe ruka adentuley kom ñi adkünuel ta Jewba taiñ fülkonpual kidu mu. Kom femürpuy Jesus tañi lapan mu (Mat. 3:⁠16, 17; Eb. 5:⁠4-6).

Jewba tañi ngillatuwe ruka duamniefuy ñi müleal kiñe longkolechi sacerdote. Feymu Jewba tañi newen mu dullifi ta Jesus ñi longko sacerdote ngeal (Mar. 1:⁠9-11; Hecho 10:⁠37, 38). Jesus longko sacerdote ngerpuy petu tañi lanon. ¿Chumngechi kimiyiñ tüfa? Taiñ wiñoldungual, ngüneduamaiñ ñi rupan Aaron ka ti kakelu longkolechi sacerdote.

Moyse ñi ley dungu feypi tati longkolechi sacerdote müten konpukefuy ti Doy Ponwitulechi Yamfal Ngillatuwe mu, Santisimo pingelu. Konpual tati Santisimo mu, ti longkolechi sacerdote rumekefuy kiñe fütra cortina mu. Fill tripantu feychi antü ñi wiñoduamtungeal pu israelche ñi culpan mu, ti sacerdote rumekefuy (Eb. 9:⁠1-3, 6, 7). Aaron ka ti küpalelu wüne mülefuy tañi longko sacerdotekünungeal, fey wüla rumekefuyngün ti cortina mu. Ka femngechi Jesus wüne mülefuy tañi longko sacerdotekünungeal, fey ñi rumeal ti cortina. Feytachi cortina adentuley Jesus ñi cuerpo. Jesus mülefuy ñi elkünutuafiel ñi cuerpo, fey ñi konpual ti wenu mu (Eb. 10:⁠20). Feymu Pablo feypi dew longko sacerdotekünungelu ta Jesus, konpuy Ngünechen tañi ngillatuwe mu ka konpuy wenu mu (Eb. 9:⁠11, 24).

¿Chumül femtriparpuy ti nuevo pacto?

Jesus wüli tañi mongen kom pu che tañi duam mu. Rupachi antü mu, konpuy wenu mu, feypifi ta Jewba ñi llowmayaetew ñi wülkünuelchi mongen. Femngechi femtriparpuy ti nuevo pacto. Tañi femtriparpual tüfa, küla dungu rupay. Fewla ngüneduamafiyiñ.

Kiñe, Jesus amuy wenu mu ñi müleputual tañi Chaw ñi adkiñ mu. Epu, Jesus feypifi tañi Chaw ñi llowmayaetew tañi wülkünuelchi mongen. Küla, Jewba ayüwünkechi llowmafi Jesus ñi wülkünuelchi mongen. Dew rupalu feytachi küla dungu, fey wüla femtriparpuy ti nuevo pacto.

Biblia feypilay chumül Jewba llowmafi Jesus ñi wülkünuelchi mongen. Feymu küme feypilayafuiñ chumül femtriparpuy ti nuevo pacto. Welu kimnieiñ Jesus müleputuy wenu mari antü petu ñi kon-non ti Pentekoste (Hecho 1:⁠3). Küme kimlaiñ chem antü Jewba llowmafi Jesus ñi wülkünuelchi mongen. Welu kimnieiñ may ñi femün petu amulelu feychi mari antü (Eb. 9:⁠12). Ti Pentekoste mu, kimfali Jewba ñi llowmafiel Jesus ñi wülkünuelchi mongen (Hecho 2:⁠1-4, 32, 33). Femngechi kimfali ñi femtriparpun ti nuevo pacto.

Tüfa kimürpuiñ, Jewba llowmafilu Jesus ñi wülkünuelchi mongen femtriparpuy ti nuevo pacto. Jesus tañi longko sacerdote ngen mu, rangiñelweley feytachi nuevo pacto mu (Eb. 7:⁠25; 8:⁠1-3, 6; 9:⁠13-15).