KOM iñchiñ kimnieiñ Jewba ñi adniekefiel tañi trokiñche famülke mu. Ka elukefi kom ñi duamnieel tañi weniyeaetew feytachi pichilewechi antü mu (2 Tim. 3:⁠1). Welu kake kiñeke iñchiñ, müley taiñ inayafiel Jewba tañi feypin. Kuyfi mu, dungulngekefuy trompeta ñi kimelelafiel pu israelche chem mülefuy tañi femal engün. Ka femngechi iñchiñ famülke mu, kimelngekeiñ chem taiñ femal. Fewla doy nütramkayaiñ ñi chumken pu israelche dungulngelu tati trompeta.

Jewba feypifi ta Moyse ñi dewmayal plata mu epu trompeta. Femngechi dungulngen mu ti trompeta, pu israelche kimkefuyngün tañi trawüluwal ka tañi amutual engün kañpüle (Núm. 10:⁠2). Chumngechi ñi dungulngeken tati trompeta, pu israelche kimkefuyngün chem tañi chumal engün (Núm. 10:⁠3-8). Pu israelche ñi antü mu kakerumekefuy chumngechi ñi dungulngeken tati trompeta. Ka femngechi famülke mu, kakerumey chumngechi taiñ kimeltukeetew Jewba tañi trokiñche. Feymu mangelngekeiñ fütrake trawün mu, küme pepikangekey tati pu longkolelu ka kaletukey kiñeke dungu ñi femken Jewba tañi pu che.

Kiñeke mu, Jewba ayükefuy ñi trawüluwal tati pu israelche, feymu pu sacerdote dungulkefuy ti epu trompeta ñi trawüluwal engün (Núm. 10:⁠3). Kom pu israelche allkükefuyngün ti trompeta chew rume tañi toltowkülen engün. Kiñeke israelita püllelefuy chew tañi trawüluwal engün, feymu müchay müten puwkeyngün. Kiñeke israelita doy kamapulefuyngün, feymu doy küdawtukeyngün tañi akual. Chew mülele engün rume, Jewba ayüfuy kom pu israelche ñi trawüluwal, femngechi ñi allkütual tañi ngülam.

Famülke mu, iñchiñ amukelaiñ chew ñi trawüluwkefel tati pu israelche. Welu ka amukeiñ fütrake trawün mu. Llowkeiñ fentren kimeltun ka kümeke ngülam. Kom Mapu püle, trür femngechi kimeltungekeiñ ka ayüwünkechi kiñewkülekeiñ feytachi trawün mu. Amualu tüfachi trawün mu, kiñeke peñi, lamngen alüke mapu küpakeyngün. Kom pu peñi, pu lamngen ayüwküleyngün tañi amun mu engün küdawtufulu engün rume.

Tati pichike trawünche kamapulelu tecnologia ñi duam mu ka peafuy ti fütrake trawün ñi femngekeel fütrake waria mu. Femngechi ka kümelkakeeyew ti kimeltun. Tati Cuerpo Gobernante werküy kiñe peñi ñi witranmayafiel pu peñi ka pu lamngen mülelu Benín mapu mu. Feymu femngey kiñe fütra trawün, amuy 44.131 che. Ka mapu mu müley kiñe pichi waria Arlit pingelu,  üye mu trawüluwingün küla peñi ka epu lamngen ka 16 che ayünielu tañi allkütual. Kidu engün video mu peyngün ti kangelu fütra trawün femngelu Benín pingechi mapu mu. Kamapulefuyngün rume, kiñewingün reke kom tañi pu peñi ka pu lamngen mu. Kiñe peñi pefilu ti fütra trawün ti pichi waria mu, feypi: “Rume ayüwkülen tañi pefiel video mu ti fütra trawün, rüf kimnien taiñ piwkeyenieetew kom taiñ pu peñi ka pu lamngen”.

Kuyfi mu, Israel mu, kiñeke mu kiñe trompeta müten dungulngekefuy, femngechi pu doy fütrake longko mülelu Israel mu, kimkefuy tañi trawüluwal (Núm. 10:⁠4). Femngechi Moyse kimeltukeeyew ñi doy küme adnieafiel tati pu che. ¿Eymi kay? Longkolefulmi feychi antü mu, rume yafüluwpelayafuymi tami amual feychi trawün mu.

Famülke mu, tati pu longkolelu ngenkawkelay Jewba tañi pu che mu (1 Ped. 5:⁠1-3). Welu chumkeyngün rume ñi cuidayafiel engün. Kiñeke mu mangelngekeyngün kiñeke escuela mu tañi doy pepikangeal engün. Kidu engün ayüwünkechi amukeyngün. Kiñe tüfachi escuela feypiley Chillkatuwe ñi Pepikangeam pu Longkolelu ka Konakechi Kellukelu. Feytachi escuela mu, tati pu longkolelu kimeltungekey tañi doy küme adnieafiel tati trawünche. Femngechi tati pu longkolelu ka kom pu peñi ka pu lamngen doy weniyekefingün ta Jewba.

Kiñeke mu, tati pu sacerdote pichike dunguldungultukefi tati trompeta. Femngechi pu israelche kimkefuyngün Jewba ayüniey tañi toltowmeal kañpüle (Núm. 10:⁠5, 6). Tañi femngechi femal mülefuy tañi küme pepikawal engün, feymu rume küdawtukefuyngün. Kiñeke mu kiñeke israelche müte eluwkülelafuyngün chi tañi amual kañpüle, ¿chumngelu?

Feychi mu, Jewba eli kiñe tromü. Chew ñi mülenagken ti tromü, fey mu pu israelche umañkeyngün. Welu tripatun mu tati tromü, pu israelche inakefingün tati tromü chew tañi amun. Kiñeke mu, feychi tromü kiñe pun müten mülenagkey. Kakelu rupa mülenagkey epu antü, kiñe küyen kam doy chi (Núm. 9:⁠21, 22). Rakiduamnge tüfa, Números capitulo 33 feypi pu israelche ñi toltowkülen 40 trokiñ mapu mu. Feymu kiñeke israelche rakiduamkefuy chi: “Müchayke feypingekeiñ taiñ amutual kañpüle”.

Pu israelche miyawkefuy desierto mu, welu kiñeke mu pefuyngün llawfeñ chew ñi toltowküleal (Deut. 1:⁠19). Fey tüfa rume ayüwmapelaeyew. Kiñeke rakiduamkefuyngün chi: “Pelayafuiñ famngechi mülewe kañpüle, doy kümeafuy taiñ mülenagal”.

Pichike dunguldungultungelu ti trompeta, pu israelche mülefuy ñi pepikawal, fey ñi toltowmeal kañpüle. Welu wünelu mülefuy ñi tripayal küla trokiñche müten, tüfa ta Juda, Isaakar ka Sabulon. Tripalu engün, pu sacerdote ka wiño dungulkefuy ti trompeta, fey tripakefuy ka küla trokiñche. Pu sacerdote femngechi adniefingün kom pu trokiñche ñi tripayal engün. Feymu kiñeke israelche afeluwpelayngün tañi esperayal chumül tañi tripayal engün (Núm. 2:⁠3-7; 10:⁠5, 6).

Famülke mu toltowkiyawkelaiñ kakerume mapu mu, welu kaletukey ñi femken Jewba tañi trokiñche. Kiñeke mu rakiduamafuiñ chi: “Pütrüken dungu kaletukey”. Kam ayükepelafuiñ chi chumngechi taiñ femkefel kiñeke dungu kuyfi mu. Feymu küdawtuafuiñ taiñ ñom piwkengeal ka inayal chem taiñ feypingekeel. Welu yafüluwliyiñ taiñ femal, ayüwküleaiñ ka ayüwülafiyiñ ta Jewba.

Moyse ñi antü mu, Jewba adniefi fentren wentru, domo, pichikeche ñi küme miyawal desierto mu. Jewba tañi kellun mu müten, küme tripayngün. Famülke mu, Jewba ka femngechi kellukeeiñmu taiñ küme miyawal tüfachi Mapu mew apolelu wedake dungu mew. Kellukeeiñmu taiñ fülmawküleal ka maneluwküleal kidu mu. Feymu kom iñchiñ inayentuafiyiñ ñi femün pu israelche allkülu ñi dungulngen tati trompeta.