Feytachi versiculo feypiley: “Tati llowkelu Ngünechen ñi newen femngechi chengeyngün: piwkeyechefengey, niey ayüwün, küme tüngün, ñochi duampiwkengey, fürenechekey, küme chengey, feyentukey Ngünechen mu, ñom duamngey ka kim ngüneniewkey” (Gal. 5:⁠22, 23, TNM). Feyta mu feypiley aylla dungu taiñ chumngechi chengeal pu cristiano ngen. Fey tüfa, fruto del espiritu pingey wingkadungun mu. Welu llowliyiñ Chaw Dios ñi newen, fey müten femlayaiñ, kakelu dungu femürpuafuiñ taiñ doy küme cristiano ngeal.

Petu ñi feypinon tüfa, Pablo feypi: ‘Küme kimfalkey ñi chumken tüfey engün tati pu inaniefilu ti wedake illutun: ñiwaldomokey engün, itrofill femkey engün tati ünun-ngechi wedake dungu ka wedake femün, püramyekefi engün ti adentun, ka adümkantukey engün kalku dungu. Müley ütrirtuwün, üdekawün, fillpimekewün ka nüngaytuwün. Ka müchay müten lladkükey engün, fillpimekewkey engün, wichunentuwkey ka püntülkawkey engün. Ütrirchefengey engün, langümchefengey, ngollifengey, ifengey, ka fentren wedake dungu femngerumelu’ (Gal. 5:⁠19-21). Welu Pablo feypilay kom ñi weda femkeel pu inaniefilu ñi wedake illutun (Kol. 3:⁠5). Ka femngechi Pablo feypilay kom ñi femken pu llowkelu Chaw Dios tañi newen, aylla dungu müten feypi.  

Pablo ngülamtufi ta Timotew: ‘Nienge ta kiñe nor mongen, fey fill antü tami maneluwküleal ta Ngünechen mew, feyentun mew, piwkeyen mew, yafüluwkülen mew, ka ñom piwke mew’ (1 Tim. 6:⁠11). Tati feyentun, piwkeyen ka ñom piwke müten koneltuley ti fruto del espiritu mu. Welu feytachi versiculo mu Timotew ka feypingey ñi nor mongen nieal, maneluwküleal Ngünechen mu ka yafüluwküleal. Kidu duamniefuy Chaw Dios tañi newen tañi femngechi femal (ka ngüneduamafuymi Kolosense 3:⁠12; 2 Pedro 1:⁠5-7).

Feymu llemay, Galata 5:⁠22, 23 feypiley ñi chumken pu llowkelu Chaw Dios tañi newen. Welu kakelu dungu ka koneltuafuy ti fruto del espiritu mu. Feymu taiñ küme cristiano ngerpual, müley taiñ inayal ñi feypiel Galata ka taiñ femal kakelu kümeke dungu Chaw Dios tañi newen mu. Femngechi nietuaiñ we küme mongen, “tati adkünuel chumngechi ñi ayüel ta Ngünechen, ka kimfalkelu ta kiñe nor mongen mew ka lif rakiduam mew” (Efes. 4:⁠24).