1. Jesus, ¿chemu feypifi tañi Chaw ñi kuñiwtukuafiel tañi pu inanieetew?

PICHILEWELU ñi layal ta Jesus, rakiduamkefuy tañi wedake dungu tañi rupayafel tañi pu inanieetew. Fente tañi piwkeyefiel engün, feypifi ta Jewba tañi kuñiwtukuafiel femngechi ñi famentunoaetew tati Weküfü (Juan 17:⁠14, 15, TNM). Jesus kimniefuy wiñotule ta wenu mu, Weküfü kayñetunieafi pu poyekefilu ta Jewba. ¡Feley llemay! Jewba ñi pu che duamnieafuy tañi kuñiwtukungeal.

2. ¿Chemu feypiafuiñ Jewba taiñ allkütuñmayaetew taiñ llellipun?

² Jewba fente tañi piwkeyefiel tañi Fotüm allkütuñmafi tañi llellipuel. Iñchiñ eluwliyiñ taiñ ayüwülafiel ta Jewba, piwkeyeaeiñmu ka allkütuñmayaeiñmu taiñ llellipuel, fey kelluaeiñmu ka kuñiwtukuaeiñmu. Jewba küme Chawngey feymu cuidanierpuafi tañi pu fotüm, pu ñawe. Femnofule, weda dunguyengeafuy tañi üy.

3. ¿Chemu duamnieiñ taiñ kuñiwtukuaetew Jewba?

³ Famülke mu doy duamnieiñ taiñ kuñiwtukuaetew Jewba, ¿chumngelu? Weküfü kechanakümngepay Mapu mu, feymu rume lladküley (Apok. 12:⁠12). Kiñeke che taiñ inakakeetew rakiduamkeyngün tañi femün mu engün poyekefingün ta Chaw Ngünechen. ¿Chumngelu femngechi rakiduamkeyngün? Weküfü rakiduameleyew tüfa (Juan 16:⁠2). Kakelu che inakakeeiñmu taiñ inanofiel mu kidu engün tañi rakiduam. Chem mu rume inakangeliyiñ, llükalayaiñ. ¿Chumngelu? Biblia feypi: “Ñidol manelfali itrokom ñi dungu mew, feymew kidu ta kelluaeymünmew tamün newentuleal, ka montulnieaeymünmew ti Weküfü ñi wedake dungu mew” (2 Tes. 3:⁠3). Ngüneduamaiñ epu dungu ñi femkeel Jewba taiñ kuñiwtukuaetew.

4. Ñi feypin Efesio 6:⁠13-17, ¿chem elueiñmu Jewba taiñ kuñiwtukuwal?

⁴ Chaw Jewba elueiñmu kom ti weychawe femngechi taiñ kuñiwtukuwal Weküfü mu. Biblia feypi: “Feymew, nüfimün kom ti weychawe reke felelu Ngünechen tamün eluetew, femngechi tamün newen-ngeal ti küpalechi kuñiwün-ngechi antü mew. Fey küme pepikawkülelmün tamün weychayal ka femngechi newentulelmün, wewlayaeymünmew ta Weküfü. Feymu, newentuwkülemün ka küme trarifimün reke tamün rongewe mew tati rüf dungu kiñe trariwe reke felelu, ka tukutuwaymün tati kuñiwtukukefilu ti piwke nor dungu mu, ka tukutuwaymün reke tamün okota ñi pepikawküleal tamün amuldungual tati kümeke dungu küpalnielu tüngün. Doyelchi may, nüafimün tamün fütra escudo reke felelu, fey tüfa tamün feyentun Ngünechen mew. Femngechi chongümafimün tati üykülechi flecha küpalu Weküfü mew. Kafey, llowaymün tati casco tamün montulaetew, ka tati fütra cuchillo küpalu Chaw Ngünechen ñi newen mew, fey tüfa Ngünechen tañi Küme Dungu” (Efesio 6:⁠13; 6:⁠14-17, TNM). Müley taiñ yenieal kom feytachi weychawe, femngechi müten küme kuñiwtukuwaiñ. Fewla ngüneduamaiñ kake kiñeke feytachi weychawe.

5. 1) ¿Chem am tati rüf dungu kiñe trariwe reke felelu? 2) ¿Chumngelu müley taiñ yenieal feychi trariwe?

⁵ Tati trariwe adentuley tati rüf dungu Biblia mew mülelu. Tüfa kelluaeiñmu taiñ ngünenkanoaetew tati Weküfü (Juan 8:⁠44). Fütra kuyfi mu eluwi ñi ngünenkacheal ka fantepu mew ngünenkakefi “kom mapu mew mülechi pu che” (Apok. 12:⁠9). ¿Chumngechi yenieafuiñ tüfachi trariwe? Kimafiyiñ ti rüf dungu Chaw Jewba mu, eluwaiñ taiñ adnieaetew Jewba tañi newen taiñ küme serfiafiel ka nor chengeaiñ kom dungu mew (Juan 4:⁠24, TNM; Efes. 4:⁠25; Eb. 13:⁠18).

6. 1) ¿Chem adentuley tati takun kuñiwtukukefilu ti piwke nor dungu mew? 2) ¿Chumngelu fente falin ngey taiñ yenieal tüfachi takun?

⁶ Tati takun kuñiwtukukefilu ti piwke adentuley Jewba tañi ngülam. ¿Chumngelu fente falin-ngey taiñ yenieal tüfachi takun? Tüfa kuñiwtukukefi pu weychafe ñi piwke. Ka femngechi, Jewba tañi ngülam kuñiwtukukeeiñmu fey taiñ nor piwkengeal (Prov. 4:⁠23). Chaw Jewba feypieiñmu taiñ piwkeyeafiel ka serfiafiel kom piwke mu (Mat. 22:⁠36, 37). Tati Weküfü ayüniey taiñ epu rume piwke nieal, feymu küpa ngünenkakeeiñmu taiñ ayünieal Jewba tañi üdekeel (Sant. 4:⁠4; 1 Juan 2:⁠15, 16). Pepi ngünenkanoeliyiñmu, inakayaeiñmu femngechi taiñ famentuaetew Jewba mu.

7. ¿Chumngechi yenieafuiñ reke feychi takun kuñiwtukukefilu tati piwke?

⁷ ¿Chumngechi yenieafuiñ reke feychi takun? Jewba feypikey chem ñi kümen ka chem ñi kümenon, fey eluwaiñ taiñ kimal Jewba tañi rakiduam ka inayafiyiñ (Sal. 97:⁠10). Kiñeke che rakiduamkey: “Inafili Chaw Dios tañi ngülam, pepi femlayan kom tañi ayünieel”. Rakiduamnge tüfa: kiñe guerra mu, kiñe weychafe rakiduamle “rume faney tañi takun” ka entufile, ngelayafuy chem no rume tañi kuñiwtukuaetew tañi piwke, fey iney rume allfülafeyew. Ka femngechi feleafuiñ iñchiñ inawenofiliyiñ Jewba tañi ngülam. Piwkeyefiliyiñ Jewba, tañi ngülam fanelayay iñchiñ mu (1 Juan 5:⁠3).

8. ¿Chem adentuley taiñ tukunieafiel taiñ okota ñi amuldungucheal?

⁸ Pablo ka yafültukukeeiñmu taiñ tukutuwal reke taiñ okota. ¿Chem adentuley tüfa? Pepikawküleiñ taiñ amuldungucheal chew rume. Enseñacheliyiñ Biblia tañi ngülam, doy maneluwaiñ Chaw Jewba mu.  Wall Mapu mu, Jewba tañi pu che eluwküley ñi amuldungucheal chew rume, tüfa müna yafültukukeeiñmu. Taiñ pu peñi ka pu lamngen amuldungukey küdaw mu, colegio mu, fill ruka püle ka chew ñi mülen negocio. Amuldungukefi tañi pu kimelchi che ka pu pariente poyekenofilu ta Jewba. Kafey tripalu engün ñi ngillakayal kam cerrawkonkülen mu rume tañi ruka mu amuldungukeyngün. Fentekünuliyiñ taiñ amuldungual taiñ llükan mu, fey wedalkayafeiñmu. Kiñe weychafe entufule tañi okota petu tañi weychameken, allfüafuy ka inalayafuy ñi feypietew tañi comandante. Iñchiñ ka femngechi feleafuiñ amuldunguwenoliyiñ.

9. ¿Chumngelu duamnieiñ kiñe fütra escudo?

⁹ Ti fütra escudo adentuley taiñ feyentun Jewba tañi femal kom tañi feypikünuel. Tüfa kellukeeiñmu taiñ chongümafiel reke tati üykülechi flecha küpalu Weküfü mu. ¿Chumngelu duamnieiñ yenieal tüfachi fütra escudo? Ngünenkalayaeiñmu ñi kimeltuel pu apostata. Ka newenküleaiñ ayentungeliyiñ rume. Feyentunoliyiñ Jewba mu, inayafuiñ pu che tañi rakiduam, fey famentuafuiñ Jewba tañi ngülam. Welu feyentuliyiñ Jewba mu, ingkañpeafiyiñ ti rüf dungu colegio mu kam küdaw mu (1 Ped. 3:⁠15). Kiñeke mu elungeafuiñ kiñe küdaw taiñ doy küme kullingeafel, welu katrütuafeiñmu  taiñ poyeafiel ta Jewba. Fey taiñ feyentun Jewba mu kelluaeiñmu taiñ famentuafiel (Eb. 13:⁠5, 6). Ka femngechi kayñetungeliyiñ taiñ cristianongen mu, newenküleaiñ fente taiñ feyentulen Jewba mu (1 Tes. 2:⁠2).

10. 1) ¿Chem adentuley ti casco? 2) ¿Chumafuiñ taiñ yenieal reke feytachi casco?

¹⁰ Tati casco adentuley ti maneluwün taiñ eluetew Chaw Jewba. Maneluwkeiñ Chaw Jewba kümelkayafi tañi pu nor piwkeyeetew. Kafey lafuliyiñ rume, wiñomongeltuaeiñmu (1 Tes. 5:⁠8; 1 Tim. 4:⁠10; Tito 1:⁠1, 2). Ti weychafe niefuy tati casco ñi kuñiwtukuaetew tañi longko, ka femngechi ti maneluwün taiñ eluetew Chaw Jewba kuñiwtukukeeiñmu taiñ rakiduam. ¿Chumngechi? Kellukeeiñmu taiñ longkontukunieal Jewba tañi feypikünuel. Ka kellukeeiñmu taiñ rume rakiduamnoal taiñ weda rupan mu. ¿Chumafuiñ taiñ yenieal reke feytachi casco? Eluwaiñ taiñ rakiduamal Jewba reke. Por ejemplo, maneluwkelaiñ tati falinke fillem mu, doy may maneluwkeiñ Jewba mu (Sal. 26:⁠2; 104:⁠34; 1 Tim. 6:⁠17).

11. 1) ¿Chem am tati fütra cuchillo? 2) ¿Chumngelu duamniefiyiñ?

¹¹ Tati fütra cuchillo adentuley tati Biblia. Tüfa kellukeeiñmu taiñ ngünenkangenoal ka taiñ famentual koylake kimeltun ka wedake wimtun (2 Kor. 10:⁠4, 5; 2 Tim. 3:⁠16, 17; Eb. 4:⁠12). Jewba tañi trokiñche elukeeiñmu fillke dungu taiñ küme adümafiel Biblia, welu kafey kake kiñeke iñchiñ müley taiñ küme estudiayafiel (2 Tim. 2:⁠15). Kom tüfachi weychawe elukeeiñmu Jewba taiñ kuñiwtukuwal. Welu, ¿ka chem elukeeiñmu? Peafiyiñ.

12. ¿Ka chem duamnieiñ? ¿Chumngelu?

¹² Pu kümeke weychafe kimniey ñi kidu wewnoafiel tañi pu kayñe, doy may duamniey tañi kiñentrür weychayal tañi pu compañ engün. Ka femngechi iñchiñ kidu wewlayafuiñ Weküfü ka tañi pu inanieetew, doy may duamnieiñ taiñ kelluaetew taiñ pu peñi ka pu lamngen. Jewba elueiñmu kiñe fütra familia kom Mapu mu mülelu taiñ kelluaetew (1 Ped. 2:⁠17).

13. Ñi feypin Ebrew 10:⁠24, 25, ¿chumngechi kellukeeiñmu taiñ trawün?

¹³ ¿Chumafuiñ taiñ kelluaetew taiñ pu peñi ka pu lamngen? Amuaiñ taiñ fillke trawün mu (papeltunge Ebrew 10:⁠24, 25). Kom iñchiñ weda duamkeiñ kiñeke mu. Femngechi duamküleliyiñ, müna yafültukuaeiñmu amual taiñ trawün mu. Trawün mu, taiñ pu peñi, pu lamngen tañi piwke mu entukey tañi feypin fey rume yafültukukeeiñmu. Wewpikeyngün ka entukey fillke nütram Biblia mu tuwlu, fey tüfa rume kellukeeiñmu taiñ serfinieafiel Jewba. Ka femngechi petu ñi kon-non ti trawün ka dewlu wüla, nütramkawkeiñ taiñ pu peñi, pu lamngen iñchiñ, tüfa rume yafültukukeeiñmu (1 Tes. 5:⁠14). Kafey trawün mu, kelluafuiñ taiñ pu peñi, pu lamngen, fey tüfa rume ayüwülkeeiñmu (Hecho 20:⁠35; Rom. 1:⁠11, 12). Kafey taiñ trawün kellukeeiñmu taiñ doy küme kimeltucheal. Enseñangekeiñ taiñ küme adümafiel fillke kellu taiñ kimeltucheal, feymu küme estudiayaiñ chem ñi ngüneduamngeal trawün mu. Küme allkütuafiyiñ chem ñi feypingeken trawün mu ka inayafiyiñ taiñ kimürpuel. Femliyiñ kom tüfa küme weychafe reke feleaiñ (2 Tim. 2:⁠3).

14. ¿Ka iney kellukeeiñmu?

¹⁴ Rume fentren kümeke püllü ka kellukeeiñmu. Küme kimnieiñ ñi femün kiñe küme püllü müten (Is. 37:⁠36). Fewla rakiduamaiñ fente ñi newen-ngen fentren kümeke püllü. Chem che no rume ka weda püllü no rume wewlayafuy Jewba ñi pu weychafe. Jewba kom newen niey feymu mülele iñchiñ mu, doy newen nieaiñ taiñ pu kayñe mu, tunten ngepe rume engün (Juec.  6:⁠16). Weda duameleliyiñmu kiñe compañ küdaw mu, colegio mu kam kiñeke taiñ pu che poyekenofilu ta Jewba, rakiduamaiñ fente taiñ kelluafetew Jewba, pu kümeke püllü kam taiñ pu peñi, pu lamngen. Longkontukunieaiñ taiñ kidu weychamekenon, inanieiñ Jewba tañi ngülam feymu kimnieiñ taiñ kellukeetew.

15. Ñi feypin Isaías 54:⁠15, 17, ¿chumngelu iney no rume katrütulayafeiñmu taiñ amuldungual?

¹⁵ Satana ñi ngünenieelchi pu che üdenieeiñmu fillke dungu mu. Iñchiñ kellukonkelaiñ politico dungu mew ka koneltukelaiñ weychan mu. Kimeltuchekeiñ Chaw Dios tañi üy ka amuldunguchekeiñ Chaw Jewba ñi Gobierno müten küme elkünutuafuy kom dungu taiñ tüngkületual. Kafey inanieiñ Jewba tañi ngülam. Kimelelfiyiñ pu che tati ngünenielu Mapu, tati Weküfü, weda piwkengey, koylatufe ngey ka langümchefe ngey (Juan 8:⁠44). Kafey kimeltuchekeiñ pichilewey ñi apümkangeal kom ñi ngünenieel ta Weküfü. Tunte kayñetueliyiñmu rume Weküfü ka tañi pu inanieetew, turpu katrütulayafuy taiñ amuldungun küdaw. Doy may tunte amule chi tripantu chumaiñ rume taiñ poyenieafiel ta Jewba. Weküfü newen niefuy rume, pepi katrütukelaeiñmu taiñ amuldunguafiel pu che kom wall Mapu mu. ¿Chumngelu? Kimfali Jewba taiñ kuñiwtukukeetew. Biblia feypi: “‘Kiñeke che lefkontuelmu, iñche werkülafiñ tati. Iney rume tami lefkontuaetew, trananagay eymi tami adkiñ mu. Chumngechi rume weychangelmi, wewngelayaymi, ka wingkañmangelmi, pengelaymi ñi koylangen chem rume tami dalluntukungeel. Tüfa ñi llowal tati pu poyekefilu ta Jewba, ka kidu engün ñi nor dungu küpay iñche mu’, tüfa ñi feypiel Jewba” (Isaías 54:⁠15, 17).

16. Jewba, ¿chumngechi montulafi tañi pu che ti fütra kutrankawün mu?

¹⁶ Küpalechi antü mu konay ti fütra kutrankawün, fey afmatuaiñ chumngechi taiñ montulaetew Jewba. Wünelu mu, Jewba adnieafi pu gobierno ñi apümkayafiel kom koylake religion, welu montulafi tañi trokiñche (Apok. 17:⁠16-18; 18:⁠2, 4). Fey wüla Armagedon mu, Jewba apümkayafi kom ñi ngünenieel Weküfü, fey montulafi tañi trokiñche (Apok. 7:⁠9, 10; 16:⁠14, 16).

17. ¿Chumngelu fente falin-ngey fülkonküleal Jewba mu?

¹⁷ Fülkonküleliyiñ Jewba mu, ti Weküfü turpu katrütulayafeiñmu taiñ llowal afnoachi mongen. Weküfü may apümkangeay (Rom. 16:⁠20). Feymu yenieaiñ kom ti weychawe taiñ eluetew Chaw Jewba ka famentulayafiyiñ kiñe no rume. Iñchiñ kidu weychalayafiyiñ Weküfü ka tañi ngünenieetewchi pu che, doy may kelluafiyiñ taiñ pu peñi, pu lamngen. Ka inayaiñ Jewba tañi ngülam. Femngechi femliyiñ, kimtukunieaiñ taiñ küme Chaw Jewba yafültukuaeiñmu ka kuñiwtukuaeiñmu (Is. 41:⁠10).