1. ¿Chumngelu falin-ngey pu weche peñi trawünche mu?

EYMÜN pu weche peñi rume kelluafuymün trawünche mu. Fentren eymün newen nieymün ka yafüluwküleymün (Prov. 20:⁠29). Feymu eymi weche, ayüafuymi chi tami siervo ministerialngerpual, welu rakiduamafuymi chi: “Kakelu peñi ka lamngen trawünche mu rakiduamkey rume wechengen iñche ka ñi pepikawkülenon tañi elfalngeal falinke küdaw”. Wechengefulmi rume, fillke dungu femafuymi tami manelfalchengeal ka yamfalchengeal tami trawünche mu.

2. ¿Chem ngüneduamaiñ tüfachi trokiñ mu?

² Tüfachi trokiñ mu inaduamaiñ ñi rupan ta David. Kafey inaduamaiñ ñi femün Asa ka Josafat. Ngüneduamaiñ kiñeke weda dungu ñi rupan engün, chumngechi chaftufingün ka chem kimürpuafuy pu weche peñi.

3. Pu weche, ¿chumngechi kelluafuyngün tati pu peñi ka pu lamngen trawünche mu?

³ David wechengelu adümürpuy falinke dungu, kimfalkülefuy ñi küme weniyefiel ta Jewba. Kafey rume küdawi ñi musicongerpual, femngechi kellufi tati rey Saul (1 Sam. 16:⁠16, 23). Eymün kay pu weche, ¿chem dungu mew adümuwküleymün? ¿Chumngechi kelluafuymün tati pu peñi ka pu lamngen trawünche mu? Rakiduamnge tüfa: tati pu peñi ka pu lamngen doy putremkülelu trawünche mu doy küdawtuafuyngün ñi küme adümafiel tati electronico chemkün. Welu eymi küme adümfimi, feymu kellufilmi, ayüwülafimi engün.

4. Pu weche, ¿chumngechi inayentuafuy ta David? (Inaduamnge ti adentun wenulelu).

 ⁴ David küme pengeli tañi manelfalngen. Petu pichi wentrungelu, rume küdawi ñi cuidalelafiel tañi pu ufisa tañi chaw. Tachi küdaw ka kuñiwün-ngefuy, feymu David nütramelfi ta Saul: “Iñche kamañkefiñ tañi chaw ñi kechan ufisa. Fey kiñe antü, küpay kiñe trapial ka kiñe oso, fey kake kiduke yepayngu kiñe ufisa ti kechan mu. Fey iñche inantukufiñ ka langümfiñ engu ka montulfiñ ti ufisa” (1 Sam. 17:⁠34, 35). David kimniefuy ñi cuidaufisayal, feymu llükakenon mu ingkañpefi pu ufisa. Ka femngechi eymün pu weche peñi inayentuafuymün ta David, feymu küme femaymün chem küdaw rume elungelmün.

5. Ñi feypin Salmo 25:⁠14, ¿chem doy falin-ngey ñi femal pu weche peñi?

⁵ Wechengelu ta David küme weniyekefi ta Jewba. David newen piwkengefuy ka küme dungulkefuy ti arpa, welu doy falintukefuy tañi weniyewün Jewba engu. David poyekefi ta Jewba, welu doyelchi may küme weniyefi. Biblia feypi: “Pu yamniefilu ta Jewba küme weniyerpufingün, fey kidu kimüñmayaeyew ñi eldungu” (Salmo 25:⁠14). Eymün pu weche ka femngechi küme weniyeafimün ta Jewba, fey tüfa tati doy falin dungu tamün femafel. Doy küme weniyefilmün, doy elungeaymün falinke küdaw trawünche mu.

6. ¿Chem rakiduamkefuy kiñeke che David mu?

⁶ Kiñeke che rakiduamkefuyngün ñi rume wechengen ka manelfalngenon ta David. Feychi rupa David küpa weychafilu ta Goliat, Saul katrütueyew ka feypieyew: “Eymi petu pichi wentrungeymi” (1 Sam. 17:⁠31-33). Kafey tañi peñi feypieyew ñi manelfalngenon (1 Sam. 17:⁠26-30). Welu Jewba küme kimniefuy ta David, feymu femngechi rakiduamkelafuy. David maneluwi Jewba mu tañi kelluaetew feymu langümfi ta Goliat (1 Sam. 17:⁠45, 48-51).

7. ¿Chem kimürpuafuymi David ñi rupan mu?

⁷ ¿Chem kimafuymi David ñi rupan mu? Müley tami nieal ta paciencia. ¿Chumngelu? Feychi pu che tami kimetew petu pichikalu eymi, alüñmayafuy ñi kimtukual tami tremün. Welu Jewba küme kimnieeymu ka kimniey chem mu tami pepiluwkülen (1 Sam. 16:⁠7). ¿Ka chem kimürpuafuymi David ñi rupan mu? Müley tami küme  weniyeafiel ta Jewba. David rakiduami Chaw Jewba ñi kom dewman mu ka chem kimeltueyew Chaw Jewba mu, femngechi küme weniyefi (Sal. 8:⁠3, 4; 139:⁠14; Rom. 1:⁠20). ¿Ka chem femafuymi? Llellipuafimi Chaw Jewba tami eluaetew newen. Ayentungelmi tami colegio mu tami testigongen mu, llellipuafuymi ta Chaw Jewba tami kelluaetew ñi newenküleal. Kafey entuafuymi kümeke ngülam Biblia mew ka taiñ fillke publicacion ka video mu. Ngüneduamfiel mu chumngechi tami kellukeetew Chaw Jewba, doy maneluwküleaymi fey mu. Kafey kakelu pu che ngüneduamfile tami maneluwkülen Chaw Jewba mu, doy manelfalngeaymi.

8. Petu ñi reyngenon, ¿chem kellueyew ta David ñi esperayal?

⁸ ¿Ka chem dungu mu rupay ta David? Jewba dullifi ñi reyngerpual, welu mülefuy ñi esperayal fentren tripantu tañi reyngerpual Juda mu (1 Sam. 16:⁠13; 2 Sam. 2:⁠3, 4). ¿Chem kellueyew ñi esperayal kom feychi tripantu? Eluwlay ñi weda duamal, re femkünuwlay, doy may eluwi ñi küdawal. Rakiduamnge ñi femün feychi ellkawkiyawlu Filistea mapu mu. Feychi mew eluwi ñi chaftuafiel pu israelita ñi pu kayñe, femngechi ñi kon-noal Juda mapu mew (1 Sam. 27:⁠1-12).

9. Pu weche, ¿chumngechi inayentuafuy ta David?

⁹ Pu weche peñi, ¿chem kimürpuafuy David ñi femün mu? Chumafuymi rume tami serfiafiel ta Dios ka tami pu peñi, pu lamngen. Peafiyiñ ñi rupan kiñe peñi Ricardo pingelu.⁠ * Mari tripantu nielu ayüy ñi wüneleal amuldungun mu, welu pu longkolelu feypieyew ñi pepikawkülenon. Welu taiñ peñi Ricardo eluwlay ñi weda duamal, doy may doy elantükünuy ñi amuldungual. Famülke mu, Ricardo feypi: “Acordafiel mu ñi rupan, kimtukun kümefuy tañi pichi feleal, femngechi ñi doy küme pepikawal. Feychi pichikalu iñche, eluwün ñi wiñopemeafiel feychi pu che allkütulu ti kümeke dungu ka doy küme pepikawken tañi küme kimeltucheal. Pen kütu tañi wünen estudio. Doy amuldungumeken mu llükachewelan” pi. Famülke mu, Ricardo wünelekey amuldungun mu ka siervo ministerialngey.

10. Petu ñi dullinon chem chumal, ¿chem femi David?

¹⁰ Rakiduamnge ka dungu ñi rupan ta David. Feychi lefmawkiyawlu David tañi pu weychafe engün, amuyngün kiñe weychan mu fey kidukünufingün tañi familia. Petu mülelu engün ta weychan mu, David ka tañi pu weychafe rukakontuñmangeyngün ka yeñmangetuyngün tañi pu familia. David küme weychafe ngefuy, feymu “pürüm müten montulmeafiñ ñi pu che” piafuy. Welu femlay, doy may eluwi ñi adnieaetew Chaw Jewba. Fey kiñe sacerdote ñi kellun mu, Abiatar pingelu, ramtufi ta Chaw Jewba: ‘¿Kümepeafuy may ñi inantukuafiel feytachi pu kayñe?’ pifi. ‘Amunge müten, fey montulnieafimi tami pu familia’ pieyew Jewba (1 Sam. 30:⁠7-10). Weche, ¿chem kimeltueiñmu David ñi rupan? Peafiyiñ.

11. Petu tami dullinon chem chumal, ¿chem femafuymi?

¹¹ Petu tami dullinon chem chumal, eluwaymi tami ngülamaetew kake che. Nütramkawafuymi tami chaw ka tami ñuke engu. Ka nütramkayafuymi pu longkolelu tami ngülamaetew. Jewba dullifi pu longkolelu ka manelniefi, fey eymi ka femngechi maneluwafuymi fey engün mew.  Jewba eli tüfachi pu wentru ñi kümelkayafiel ti trawünche (Efes. 4:⁠8, TNM). Eymi inayentuafuymi ñi maneluwün Jewba mu. Kafey allkütuafimi ñi ngülam engün, fey küme dulliaymi tami chumal. Fewla peafiyiñ chem enseñayafeiñmu ñi rupan tati rey Asa.

12. Wechengelu ta Asa, ¿chumngefuy?

¹² Wechengelu ta Asa ñom piwkengefuy ka newen piwkengefuy. ¿Chumngelu feypiafuiñ? Lalu tañi chaw, Asa reyngerpuy. Fey eluwi ñi apümkayafiel kom tati koylake religion. Kafey, feypifi ta Juda ñi kintuafiel ta Jewba ka ñi inayal ti Ley ka tati werkün dungu (2 Crón. 14:⁠1-7). Rupachi antü mu, Asa weychapaeyew kiñe fütra trokiñ weychafe, kiñe millon ngerkefuyngün. Fey eluwi ñi kelluaetew Chaw Jewba, llellipufi: “Awem Jewba, eymi duamniekelafimi ñi alün-ngen ka ñi newen-ngewenon tati che tami kellukefiel. Kellumuiñ, awem taiñ Chaw Ngünechen Jewba, eymi mew maneluwküleiñ” pifi. Fey llemay, Asa fütra maneluwkefuy Jewba tañi montulaetew kom engün. Fey Jewba wewfi tañi pu kayñe (2 Crón. 14:⁠8-12).

13. 1) Rupachi antü mu, feychi weychangelu ta Asa ¿chumi? 2) Fey, ¿chum tripay ñi femün ta Asa?

¹³ Asa llükakepelafuy ñi weychapaetew feychi fütra trokiñ weychafe. Welu maneluwi Jewba mu, feymu wewtripay. Rupachi antü mu, Asa weychapaeyew kiñe rey Baasá pingelu. Welu fewla maneluwlay Jewba mu, doy may eluwi ñi kelluaetew pu sirio. Weda tripay ñi femün ta Asa. Fey Jewba adkünufi ta Hananí ñi feypiafiel ta Asa: “Maneluwimi Siria ñi longko ülmen mu ka maneluwlaymi tami Chaw Ngünechen Jewba mu, feymu tati pu weychafe ñi nieel Siria ñi longko ülmen lefmawingün eymi mu”. Feychi ngey ñi weychangerpun Asa (2 Crón. 16:⁠7, 9; 1 Rey. 15:⁠32).

14. 1) ¿Chumngechi pengelafuymi tami maneluwken Jewba mu? 2) Ñi feypin 1 Timotew 4:⁠12, ¿chem diturpuaymi maneluwülmi Jewba mu?

¹⁴ ¿Chem enseñayafeiñmu Asa ñi rupan? Ñom piwkengeaymi ka maneluwaymi Chaw Jewba mu. Fautizangelu eymi, pengelimi fente tami maneluwken Jewba mu, fey ayüwün-ngechi lloweymu Jewba tañi familia mu. Fewla maneluwküleaymi Jewba mu.  Fütrake dungu dullin mu eymi, doy eluwküleafuymi chi tami maneluwal Jewba mu. Welu dullilmi chem dungu rume tami femal, maneluwaymi Chaw Jewba mew. Por ejemplo, dullilmi chem küdaw tami nieal, chumngechi tami küme rupaleal ka chem chumal tami mongen mu, maneluwaymi Chaw Jewba mu. Maneluwkilnge tami kidu kimün müten. Doy may kintuaymi ngülam Biblia mew, fey inayafimi (Prov. 3:⁠5, 6). Femülmi tüfa, ayüwülafimi Jewba ka yamniengeaymi trawünche mu (papeltunge 1 Timotew 4:⁠12).

15. Ñi feypin 2 Crónicas 18:⁠1-3; 19:⁠2, ¿chem dungu mu welulkawi Josafat?

¹⁵ Kom iñchiñ reke, eymi ka culpanchengeymi, feymu welulkayaymi kiñeke mu. Welu tüfa katrütulayaeymu tami küdawelafiel ta Jewba kom tami newen mu. Rakiduamnge ñi rupan tati rey Josafat. Müna küme wentrungefuy. We reyngerpulu, kintufi Jewba tañi kelluaetew ka inaniefi tañi ngülam. Josafat elfalkünufi kiñeke wentru ñi enseñalelafiel pu che Juda mew mülelu Jewba tañi feypin (2 Crón. 17:⁠4, 7). Welu Josafat kiñeke mu welulkawi. Kiñe antü Josafat weda dulli tañi chumal, feymu kiñe profeta norümeyew. Biblia feypi: “Josafat rume ricungefuy ka ülmen-ngefuy, welu adkünuy kiñe mafün femngechi ñi parienteyeafiel ta Acab. Fey kiñeke tripantu rupalu, pemefi Acab Samaria waria mu. Fey Acab langümfi fentren ufisa ka kulliñ fey ñi tuteafiel Josafat ka tañi pu compañetew. Fey wüla Acab ngüchalfi Josafat ñi kiñentrür weychayafiel Ramot-Galaad. Feymew Acab reyngelu Israel mew feypifi ta Josafat reyngelu Juda mew: ‘¿Compañpeafen may amual Ramot-Galaad mew?’. Fey Josafat feypieyew: ‘Iñche mülean eymi mu, ka tañi trokiñche müleay eymi tami trokiñche mu, fey kelluwayiñ tati weychan mu’. Jehú, ti pelon wentru Hananí ñi fotüm, pemefi tati longko ülmen Josafat ka feypifi: ‘¿Tati pu wedake che müley tami kelluafiel, ka pu üdekefilu ta Jewba müley tami piwkeyeafiel? Feymu Jewba lladkütueymu’” (2 Crónicas 18:⁠1-3; 19:⁠2).

16. ¿Chem kimeltueiñmu ñi rupan kiñe weche?

¹⁶ ¿Chem kimeltuafeiñmu Josafat ñi  rupan? Allkütufinge tami ngülamtuetew ka inaniefinge. Fentren wecheke peñi reke, eymi ka küdawtukeymi chi tami doyümafiel Jewba tañi dungu, welu yafüluwnge. Rakiduamnge ñi rupan kiñe weche peñi. Fey feypi: “Doy wechengelu iñche, kimlafun chem chumal tañi mongen mu. Feyti pu wechekeche reke, doy ayükefun ñi deportetual ka küme rupaleal. Welu müte ayükelafun ñi amual trawün mu ka tañi kimeltucheal” pi. ¿Chem kellueyew feytachi peñi? Kiñe longkolelu piwkeyen mu ngülamtueyew. Kellueyew ñi rakiduamal feychi ngülam mülelu Wünen Timotew capitulo 4, versiculo 8. Fey, ¿chem chumi ti weche peñi? Ñom piwke mu llowi chi ngülam, fey eluwi ñi doyümafiel Jewba tañi dungu tañi mongen mu. ¿Chum tripay ñi küme dullin? Rupachi tripantu mu siervo ministerialngerpuy.

17. Pu peñi ka pu lamngen, ¿chem rakiduamkey pu wecheke peñi mu?

¹⁷ Pu peñi ka pu lamngen falintukefi pu wecheke peñi. Ayüwkeyngün ñi poyeafiel ta Jewba “kiñewkülen mu” (Sof. 3:⁠9). Eymi weche, kom tami newen mu femkeymi tami elfalngeel, feymu falintungeymi tami trawünche mu. Feley llemay, manelfalngeymi ka yamniengeymi (1 Juan 2:⁠14).

18. Ñi feypin Proverbios 27:⁠11, Jewba ¿chem rakiduamkey pu weche peñi mu?

¹⁸ Eymün pu wecheke peñi, Jewba piwkeyenieeymu ka maneluwküley eymün mew. Jewba feypikünuy ñi müleal fentren wechekeche ñi küdawelaetew epe afchi antü mew (Sal. 110:⁠1-3). Jewba kimniey tami piwkeyeniefiel ka tami küpa küdawelfiel kom tami newen mu. Fey, ¿chem kelluafeymu kay? Kidutu nieluwaymi paciencia ka femaymi kakelu che mu. Welulkawülmi, inaniefinge tami ngülamtuetew, Jewba mu küpachi ngülam trokiafimi (Eb. 12:⁠6). Elfalkünungelmi chem küdaw rume, eluwnge tami küme küdawal. Doyelchi may, kom tami mongen mu ayüwülafimi tami Chaw Jewba. Jewba feypieymu: “Fotüm, kimchengeaymi ka ayüwülelman tañi piwke, femngechi pepi wiñoldunguafiñ tañi ayentumekeetew” (Proverbios 27:⁠11).