KIÑEKE taiñ pu peñi ka pu lamngen mülepuyngün ka mapu ñi doy nierpual ta plata. Welu rupachi tripantu mu wiñotuyngün tañi tuwün mapu mu. Fente ñi piwkeyefiel ta Jewba ka tati pu che, wiñamtuwingün chew ñi doy duamniengeel amuldungukelu (Mat. 22:⁠37-39). Ñi femal tüfa, ¿chumngechi adkünufingün kay ñi mongen? ¿Chumngechi kümelkakeeyew Jewba? Taiñ wiñoldungual, ngüneduamaiñ chem ñi rupan kiñeke peñi ka lamngen wiñotulu Camerún pingechi mapu mu mülelu África.

Kiñe peñi Onésime pingelu, Camerún tuwün-ngey. Welu 1998 tripantu mu, mülepuy ka mapu. 14 tripantu mülerpuy feychi mapu mu. Kiñe antü trawün mu, allkütuy kiñe pengelün dungu. Ti amuldungun trürümngey tati challwan mu. Ti wewpife feypi: “Epu weni challwamekeyngu, pichi alü tripaleyngu. Kiñe weni pefile ti kangelu ñi doy entumeken challwa, amuafuy chew ñi mülen tañi weni fey ñi doy entual ta challwa” pi tati wewpife.

Feymu taiñ peñi Onésime rakiduamürpuy ñi wiñotual Camerún mapu mu. Feytachi mapu mu, rume fentren che ayüniey ñi estudiayal ta Biblia. Feymu duamniengey fentren kellu. Welu taiñ peñi fentren tripantu yeniefuy ka mapu, feymu rakiduamkülefuy ñi rüf wimturpual Camerún mapu mu. Feymu petu tañi wiñamtuwnon, amuy kayu küyen ta Camerún. Fey 2012 tripantu mu amuy ñi mülenagpual.

Onésime feypi: “Rume küdawtun ñi wimtual tati fütra are mu ka chumngechi mongen ñi niekefel pu che Camerún mu. Ka mülefuy ñi wimtual ñi anüal yafülechi wangku mu. Doy küme allkütun mu reunion mu, doy duamtuwelafiñ ti ngüfar wangku”, pi ayüwün mu.

2013 tripantu mu, Onésime niewi Géraldine engu. Géraldine wiñotuy Camerún mu dew ñi mülemum 9 tripantu Francia mu. Tüfachi kurewen doyümniefingu ñi küdawelafiel ta Jewba, ¿chumngechi doy kümelkaeyew Jewba engu? Onésime feypi: “Kiñentrür amuyu ti Escuela para Evangelizadores del Reino. Fewla küdawküleyu ta Betel mu. Kiñe tripantu mu müten 20 estudiakelu fautizawingün iñchiñ taiñ trawünche mu. Fewla mülen chew ñi doy amuldungucheal. Mülen chew ñi doy entuchallwayal reke” (Mar. 1:⁠17, 18). Géraldine feypi: “Doy kümelkaenew Jewba ñi rakiduamkenofel rume”.

Judith Camerún tuwünche, wiñamtu amuy Estados Unidos. Ayüfuy ñi doy küdawelafiel ta Jewba. Taiñ lamngen feypi: “Amuyüm iñche ñi witrankontumeafiel tañi pu che Camerún mu, doy pekefun che küpa estudialu. Feychi ñi wiñotual Estados Unidos, weñangkükefun ñi elkünuafiel feychi pu che”. Feymu Judith ayüfuy ñi wiñotual Camerún mu. Welu Estados Unidos mu, niekefuy  kiñe küme küdaw ñi küme kullingeken. Femngechi niekefuy plata ñi kullilelafiel doctor tañi chaw. Feymu pichi llükalefuy ñi wiñotual ta Camerún, welu maneluwi Jewba mu, fey amutuy müten. Kiñeke mu taiñ lamngen duamtuniekefuy ñi niekefel Estados Unidos mu. Welu ngillatukefuy ta Jewba ñi wimtual. Kafey rume yafültukueyew kiñe witran-ngepakechi longkolelu ñi domo engu.

Wiñotulu ta Camerún, taiñ lamngen Judith fentren kümeke dungu rupay. Küla tripantu mu kellufi 4 che ñi fautizawal, tüfa rume ayüwüleyew. Taiñ lamngen niewi Sam-Castel engu, fey precursora especial ngerpuy. Fewla compañkefi ñi füta ñi witrankontumeafiel trawünkeche. ¿Chem rupay Judith tañi chaw mu feychi kutrankülefulu? Fey wüla Judith ka tañi pu che peyngün ka pais mu kiñe pital chew ñi operangeal tañi chaw, chew ñi cofrangenoal rume. Ayüwün dungu mu, ti operacion küme tripay.

Kiñe peñi Victor pingelu Camerún tuwün-ngey, welu wiñamtuwi ta Canadá ñi konal universidad mu. Fey papeltuy kiñe trokiñ Ti Werken mu ñi nütramyengen ti universidad. Feymu rakiduami chem ñi chumal. Fey elkünufi ti universidad. Koni ñi estudiayal kangelu dungu doy pichiñmalu, fey ñi pürüm küdawal. Fey wünelerpuy amuldungun mu. Rupachi antü mu, Victor niewi Caroline engu. Fey kiñentrür amuyngu ñi witran-ngemeal Camerún mu. Puwlu üyew, amuyngu ta Betel mu. Fey Betel mu, feypingeyngu: “Kümeafuy tamu mülenagal tamu küdawal Camerún mu”. Victor feypi: “Pelayu chemu rume tayu feypinoal. Doyümniefiyu iñchiw küdawelafiel ta Jewba tayu mongen mu. Feymu eluwiyu tayu mülepual ta Camerún” pi taiñ peñi. Caroline niefuy kiñe kutran rume, eluwingu ñi amual ta Camerún.

Victor engu Caroline koni ñi küdawal ñi kelluafiel kom pu che ayünielu ñi doy kimafiel ta Biblia. Kidu engu ngülümniefuy fentren plata. Feymu duamfal-lafuy ñi küdawal puwlu ta Camerún. Aflu ñi plata, amuyngu Canadá ñi küdawmeal mufüke küyen. Fey wüla ka wiñotuyngu Camerún ñi amuldunguleal. Jewba, ¿chumngechi kümelkaeyew engu? Amuyngu ti Escuela para Evangelizadores del Reino. Precursores especiales ngerpuyngu. Fewla kellukonküleyngu ñi dewmayal Trawünwe Ruka. Victor feypi: “Elkünufilu tayu doy küme felen, maneluwiyu Jewba mu, fey Jewba kellunieeyumu”.

Kiñe peñi Alain pingelu Camerún tuwünche, welu mülepukefuy Alemania. Üyew estudiakefuy universidad mu. 2002 tripantu papeltufi ti papel Joven, ¿qué harás con tu vida? pingelu. Tañi papeltufiel mu rakiduami chumngechi ñi doy küme küdawelafiel ta Jewba. Feymu 2006 tripantu mu, amuy ñi pepikawal ti Escuela de Entrenamiento Ministerial. Werküngey ñi wiñoal Camerún mu.

Camerún mu, taiñ peñi pey kiñe küdaw, rangiantü müten mülefuy ñi küdawal. Rupachi antü mu, taiñ peñi pey kangelu küdaw. Doy küme kullingekefuy, welu mülefuy tañi doy küdawal. Feymu pichi küdawtukefuy ñi doyümnieafiel ñi amuldungun. Fey wüla mangelngey tañi precursor especial ngeal. Taiñ peñi ‘amuan’ pilefuy. Fey tañi jefe feypieyew ñi doy plata kullial, fey tañi mülenagal. Welu taiñ peñi amutuy müten, fey ñi precursor especial ngerpual. Fey wüla taiñ peñi niewi Stéphanie engu. Taiñ lamngen fentren tripantu mülekefuy Francia mu. Welu wiñamtuwi ta Camerún. ¿Chem dungu mu rupay taiñ lamngen wiñamtuwlu ta Camerún?

Stéphanie feypi: “Mülepulu iñche ta Camerún, kontuenew pichike kutran ka alergia. Welu  lawentungeken, fey ñi doy küme duamkületual”. Tüfachi kurewen kümelkangeyngu ñi aguantan mu. Alain feypi: “Amuldungumeyu kiñe kamapulechi lof Katé pingelu. Fey pefiyu fentren che ayünielu ñi estudiayal ta Biblia. Wiñotulu iñchiw tayu ruka mu, enseñalelkefiyu Biblia kiñeke feychi pu che telefono mu. Epu feychi estudiakelu fautizawingu, fey mülerpuy mufüke amuldungukelu üye mu. Rume ayüwün-ngey kelluafiel che ñi eluwal tañi serfiafiel ta Jewba. Tayu mülepan tüfa mu, fentren rupa niekeyu feychi ayüwün dungu”. Fewla tüfachi kurewen elungey ñi witranmayafiel pu trawünche.

Taiñ lamngen Gisèle Camerún tuwünche. Welu mülekefuy Italia mapu. Estudiakefuy tañi doctora ngeal. Petu tañi estudiameken fautizawi. Ti kurewen ñi enseñaletew Biblia wünelekefuy amuldungun mu ka doyümniekefuy ñi küdawelafiel ta Jewba. Taiñ lamngen afmatulewey, fey ayüniefuy ñi ka femngechi femal. Feymu wünelerpuy amuldungun mu petu ñi estudiameken tañi doctora ngeal.

Taiñ lamngen ayüfuy ñi wiñotual ta Camerún tañi doy küdawelafiel ta Jewba, welu rakiduamkülefuy. Taiñ lamngen feypi: “Elkünufili Italia niewelayafun tañi residencia ka elkünuafun tañi pu che ka tañi pu weni mülelu Italia mu”. Welu mayo 2016 tripantu, taiñ lamngen wiñotuy müten ta Camerún. Rupachi antü mu, taiñ lamngen niewi kiñe peñi engu Léonce pingelu. Fey Betel mu feypingeyngu: “Kümeafuy tamu mülepual Ayos pingechi mapu mu”. Üye mu rume duamniengey amuldungukelu.

Feymu tüfachi kurewen amuyngu Ayos pingechi lof mu, welu küdawngefuy ta mongen. Taiñ lamngen feypi: “Kiñeke mu mufüke semana ngelafuy electricidad. Pepi cargakelafuiñ rume taiñ celular. Feymu nielafuyu reke celular. Mülefuy ñi dewmaiyalal kütral mu. Yemekefuiñ ko kiñe witrunko mu. Pun mu müte amukelafuy che, feymu pun yemekefuiñ carretilla mu. Kiñe linterna müten pelontukefeiñmu”. ¿Chem kellueyew tüfachi kurewen ñi aguantayal? Gisèle feypi: “Jewba kellueiñmu tañi newen mu. Kafey tañi füta iñchiw welukonke kelluwiyu. Kafey tañi pu che ka tañi pu kümeke weni yafültukueiñmu ka kiñeke mu elueiñmu plata”.

¿Ayüwkülepey may Gisèle tañi wiñotun mu ta Camerún? “May” pi. “Rume ayüwkülen llemay”. Ka feypi: “We akulu iñchiw ta Camerún, rupayu wedake dungu ka kiñeke mu weñangkülefuyu. Welu doy küme amulerpulu iñchiw ngüneduamiyu tayu rume kümelkameken”. Léonce engu Gisèle amuyngu ti Escuela para Evangelizadores del Reino. Fewla precursores especiales ngeyngu.

Pu challwafe newen piwke mu chaftukefingün wedake dungu, fey ñi doy entual challwa. Ka femngechi fentren taiñ pu peñi ka pu lamngen wiñotukeyngün tañi tuwün mapu mu küdawngefule rume. Fey ñi doy kelluafiel che tañi kimafiel ta Jewba. Fey rume falintukefi kom ñi femün engün tañi küdawelaetew (Neh. 5:⁠19; Eb. 6:⁠10). ¿Eymi kay? ¿Ka mapu mu müleymi? ¿Duamniengepey may doy amuldungukelu tami tuwün mapu mu? Feyngele, ¿eluwpeafuymi may tami wiñotual? Femülmi, Jewba rume kümelkayaeymu llemay (Prov. 10:⁠22).