1, 2. ¿Chumngechi inañmayafuiñ Eclesiastés 11:⁠6 ñi ngülam amuldungun mu?

KIÑEKE mapu mu, tati pu che ayüwünkechi allkütukefi tati kümeke dungu. Welu kake mapu mu, ti che müte duamkelafi Chaw Dios ka tati Biblia. ¿Tami mapu mu kay? ¿Chumngechi allkütukey tati pu che? Ti che allkütule rume kam femnofule rume, Jewba ayüniey taiñ amuldungucheal müten, “fentepuwpe” pile wüla ta Jewba.

² Jewba kimniey chem antü fentepuay taiñ amuldungun küdaw. Akule feychi antü, apümkangeay kom wedake dungu. Welu petu akunole, fentekünulayaiñ taiñ küdawmeken (Mat. 24:⁠14, 36). Biblia feypi: “Puliwentu nganaymi tami ketran, ka nagantü mu amulepe tami küdawmeken” (Eclesiastés 11:⁠6).⁠ * ¿Chumngechi femürpuafuiñ tüfa? Peafiyiñ.

3. ¿Chem inaduamaiñ tüfachi chillkatun mu?

³ Rupachi chillkatun mu ngüneduamiyiñ meli dungu. Inaliyiñ feychi ngülam, eluwaiñ taiñ amuldungucheal (Mat. 4:⁠19). Tüfachi chillkatun mu peaiñ küla dungu, femngechi doy eluwaiñ taiñ amuldungucheal chem dungu rume rupamekefuliyiñ. Peaiñ chumngelu müley taiñ doyümnieafiel ti amuldungun küdaw, nieal ta paciencia ka rüf feyentuleal Jewba mu.

4. ¿Chumngelu doyümafiyiñ ti küdaw taiñ eluetew Jewba?

⁴ Jesus feypifi tañi pu inanieetew ñi chumngeal tati pu che ka chem rupayal epe puwle Jewba tañi antü. Jesus kimniefuy, tüfachi dungu mu kiñeke tañi pu inanieetew doyümniewelayafuy ti amuldungun. Feymu Jesus feypifi tañi pu inanieetew ñi nepeluwküleal (Mat. 24:⁠42). Kuyfi mu, fillke dungu katrütufi pu che ñi allkütunoal Noe tañi feypin. Ka femngechi famülke mu, fillke dungu katrütuafeiñmu taiñ inanoal Jesus tañi feypin (Mat. 24:⁠37-39; 2 Ped. 2:⁠5). Feymu eluwaiñ taiñ doyümafiel ti amuldungun küdaw taiñ eluetew Jewba.

5. Ñi feypin Hecho 1:⁠6-8, ¿chew puwafuy taiñ amuldungun küdaw?

⁵ Famülke mu, duamfali taiñ doyümafiel amuldungual Chaw Dios tañi kümeke dungu. Jesus feypi ñi amuleal ti amuldungun küdaw tunte lafule rume. Feypi tañi pu inanieetew amuldungulelafingün doy fentren che ka doy alü kamapu (Juan 14:⁠12). Dew lalu ta Jesus, kiñeke tañi pu inanieetew wiño challwatuyngün. Feymu dew wiñomongetulu, Jesus kellufi kiñeke tañi pu inaniekeetew ñi entual rume fentren challwa. Welu ka feypifi ñi doy falin-ngen tañi amuldungucheal engün (Juan 21:⁠15-17). Epe püratulu ta wenu, Jesus feypifi tañi pu inanieetew ti amuldungun küdaw ñi puwal tuntepu ñi mülen ta Mapu (papeltunge Hecho 1:⁠6-8). Mufü rupachi tripantu, Jesus pengelelfi ta Juan chem ñi rupayal “Ñidol tañi antü mu”.⁠ * Feymu Juan pey kiñe küme püllü adkünufi ñi amuldungungeal “itrokom trokiñke mapu, ka tripanche, dungun ka trokiñche” (Apok. 1:⁠10; 14:⁠6). Kimfali llemay, Jewba ayüniey taiñ wechunenturpual ti amuldungun küdaw.

6. ¿Chem rakiduamnieaiñ taiñ doyümafiel ti amuldungun?

 ⁶ Rakiduamnieaiñ chumngechi taiñ kellukeetew Jewba, femngechi doyümnieafiyiñ ti amuldungun küdaw. Jewba fillke dungu elukeeiñmu taiñ kimeltuaetew. Nieiñ ta fillke papel ka lifru, nieiñ ta kimeltun taiñ electronico chemkün mu. Nieiñ audio, video ka nieiñ ta broadcasting. Taiñ pagina internet mu, müley kimeltun doy 1.000 kewün dungu mu (Mat. 24:⁠45-47, TNM). Famülke mu, tati pu che wichuley fillke dungu mu. Welu iñchiñ Jewba tañi pu che ngen, doy 8 millon ngeiñ wall Mapu mew. Kom iñchiñ kiñewküleiñ. Viernes 19 konchi abril, 2019 tripantu kom pu poyekefilu ta Jewba adkintuiñ kiñe video taiñ ngüneduamal ti texto diario. Ka feychi pun, fentren che amuiñ ti trawün Jesus tañi lan ñi acordangeal, 20.919.041 che trawüiñ feychi pun. Afmatufali kom ñi femün Jewba tañi trokiñche famülke mu. Pefiel mu tüfa, doy eluwkeiñ taiñ doyümnieafiel ti amuldungun küdaw.

7. Inayentuafiel ta Jesus, ¿chumngechi kelluafeiñmu taiñ doyümafiel ti amuldungun?

⁷ ¿Ka chem kelluafeiñmu taiñ doyümafiel ti amuldungun küdaw? Inayentuafiel Jesus tañi femün. Jesus doyümniefi ti amuldungun küdaw, feymu eluwlay chem no rume ñi katrütuaetew (Juan 18:⁠37). Jesus pilay tati Weküfü ñi eluaetew kom gobierno mülelu Mapu mu, ka pilay ñi reykünuaetew tati pu che (Mat. 4:⁠8, 9; Juan 6:⁠15). Jesus küdawlay ñi ricu chengerpual. Ka kayñetungefulu rume, amuley müten ñi amuldungumeken (Luka 9:⁠58; Juan 8:⁠59). Feymu weda dungu mu rupafuliyiñ, inayentuafiyiñ ta Jesus, chumngechi ñi feypin ta Pablo. Femliyiñ, amuleaiñ taiñ amuldungumeken (Eb. 12:⁠3).

8. 1) ¿Chumkey ti pu nielu paciencia? 2) ¿Chemu am falin-ngey taiñ femngechi femal fewla?

⁸ Feytichi nielu paciencia ayüwünkechi esperakey ñi rupayal ti wedake dungu, ka femngechi ayüwünkechi esperakey kümeke dungu ñi akual. Feymu rume falin-ngey taiñ nieal ta paciencia. Kuyfi, ti profeta Habacuc rume ayüniefuy ñi afal kom wedake dungu ñi rupamekefel Juda mapu mu (Hab. 1:⁠2). Ka femngechi Jesus tañi pu inanieetew ayüniefuyngün ñi pürüm lifrenentuaetew Chaw Dios tañi Gobierno, fey ñi ngünenienoaetew pu romano (Luka 19:⁠11). Iñchiñ rume ayünieiñ ñi akual Chaw Dios tañi Gobierno, fey ñi apümafiel kom wedake dungu, fey re kümeke che mületuay (2 Ped. 3:⁠13). Welu petu akunole Jewba ñi dullielchi antü, müley taiñ nieal ta paciencia taiñ esperayal. Jewba kimeltueiñmu chumngechi taiñ nieal ta paciencia. Fewla peafiyiñ.

9. ¿Chumngechi pengelkey Jewba ñi nien ta paciencia?

⁹ Inayentufali Jewba tañi nien ta paciencia. Elufi tiempo ta Noe ñi dewmayal ti fütra wampo ruka ka ñi amuldungucheal (1 Ped. 3:⁠20; 2 Ped. 2:⁠5). Rupachi fentren tripantu, Jewba rakiduamküley ñi apümkayafiel ti wedake waria Sodoma ka Gomora. Welu Abraam ramtukamekefi ta Jewba ñi kümepen may ñi femngechi femal, feymu Jewba ñochi allkütueyew (Gén. 18:⁠20-33). Fentren tripantu, Jewba perdonafi tati pu israelche, femngechi pengeli ñi nien ta paciencia (Neh. 9:⁠30, 31). ¿Famülke mu kay? Jewba elukefi tiempo tati pu che ñi norümtual tañi mongen, fey ñi weniyeaetew (Juan 6:⁠44; 1 Tim. 2:⁠3, 4; 2 Ped. 3:⁠9). Ka femngechi iñchiñ Jewba reke, müley taiñ nieal ta paciencia amuldungun mu. Kiñe pengelün dungu mülelu Biblia mu ka kimeltueiñmu taiñ nieal ta paciencia. Peafiyiñ.

10. ¿Chem kimeltukeeiñmu ñi feypin Santiaw 5:⁠7, 8?

 ¹⁰ (Papeltunge Santiaw 5:⁠7, 8). Ñi femken pu ngankelu kimeltukeeiñmu taiñ nieal ta paciencia. Epe kom anümka rume alüñmakey ñi wülal ta fün. Kuyfi Israel mapu mu, tati küdawkelu ti mapu ngankefuy ñi fün octubre küyen mu, fey cosechakefuy abril küyen mu. Kayu küyen mülefuy tañi esperayal engün, feymu mülefuy ñi nieal ta paciencia (Mar. 4:⁠28). Feychi pu wentru reke, iñchiñ ka femngechi müley taiñ nieal ta paciencia. Welu kiñeke mu küdawngeafuy.

11. Nieal ta paciencia, ¿chumngechi kelluafeiñmu amuldungun mu?

¹¹ Iñchiñ taiñ che ngen, ayüniefuiñ pürüm müten ñi küme tripayal taiñ küdaw. Kiñe che niele huerta, müley ñi küme küdawal ka müley ñi nieal ta paciencia. Müley ñi tukual, müley ñi ngedunentual tati wedake kachu ka müley ñi wütrukoal, femngechi ñi entuñmual ta fün. Ka femngechi iñchiñ taiñ kelluafiel ti che ñi discipulo ngerpual, müley taiñ rume küdawal ka müley taiñ nieal ta paciencia. Allkütunoeliyiñmu ti pu che, tati paciencia kelluaeiñmu taiñ weda duamnagnoal. Doy may kintuafiyiñ ta che ayünielu ñi allkütual. Ka femngechi küme allkütueliyiñmu ta che, ka müley taiñ nieal ta paciencia. ¿Chemu am? Obligalayafuiñ tati pu che ñi maneluwal Jewba mu. Jesus tañi antü mu, kiñeke tañi pu inanieetew alüñmayngün ñi adümal kiñeke kimeltun (Juan 14:⁠9). Pu chillkatukelu Biblia ka alüñmayafuy ñi entual wedake rakiduam tañi piwke mu. Longkontukuaiñ, iñchiñ tukukeiñ ka wütrukokeiñ reke, welu Ngünechen may elukey ñi tremal reke ti rüf dungu ti che ñi piwke mu (1 Kor. 3:⁠6).

12. Amuldungulelfiliyiñ taiñ pu che, ¿chumngechi pengelafuiñ taiñ nien ta paciencia?

¹² Amuldungulelfiliyiñ taiñ pu che poyekenofilu ta Jewba, küdawngeafuy taiñ nieal ta paciencia. Biblia feypieiñmu müley  “kiñe antü ñi ñüküfküleal ka kiñe antü ñi dungual” (Ecl. 3:⁠7). Inafiel mu feychi ngülam, rume kümelkayafeiñmu. Kümelkamekeliyiñ, amuldungulelafuiñ reke taiñ pu che. Ka femngechi küme pepikawküleaiñ taiñ dunguafiel engün Jewba tañi kümeke dungu (1 Ped. 3:⁠1, 2). Rume ayüleiñ taiñ amuldungulelafiel itrokom che, welu müley taiñ nieal ta paciencia, doy may nielelafiyiñ paciencia taiñ pu che.

13, 14. 1) Habacuc ka Pablo, ¿chumngechi pengeli ñi nien ta paciencia? 2) ¿Chumngechi pengeli kiñe kurewen ñi nien ta paciencia?

¹³ ¿Chem am kelluafeiñmu taiñ doy nieal paciencia? Ngüneduamafuiñ ñi femken pu poyekefilu ta Jewba kuyfi mu ka famülke mu. Habacuc rume ayülefuy ñi afal kom wedake dungu fey ñi antü mu, welu maneluwkülen feypi: “Iñche witralean chew tañi llüwatuleken” (Hab. 2:⁠1). Pablo kom piwke mu ayüniefuy ñi ‘wechunentual ñi küdaw’, welu amulerpuy “tañi kimelal Ngünechen tañi piwkeyechen”, femngechi pengeli ñi nien ta paciencia (Hecho 20:⁠24).

¹⁴ Ngüneduamaiñ chem ñi rupan kiñe kurewen famülke mu. Kidu engu amuyngu Galaad pingechi chillkatuwe mu, fey werküngeyngu ñi amual kiñe pais mu. Üye mu, pichiley pu poyekefilu ta Jewba ka fentreley pu cristiano ngenolu. Rume pichin che ayüfuy ñi kimeltulelngeal Biblia. Kiñeke tañi pu compañ Galaad mu ka tripalu, werküngey kake mapu mu ñi amual. Fey nütramelngekey feytachi kurewen ñi kellumekefiel fentren che ñi fautizawal. Welu felefule rume, tüfachi kurewen nielu am ta paciencia amuley ñi amuldungucheken müten. Pura tripantu rupalu wüla ñi amuldunguken, fautizawi kiñe che ñi chillkatulelkefiel Biblia, fey müna ayüwingu. ¿Chem kimeltukeeiñmu ñi femün Habacuc, Pablo ka feytachi kurewen? Kidu engün amulerpuy müten ñi küdawün ka pengelingün ta paciencia, feymu Jewba kümelkaeyew engün. Inayentuafiyiñ pu nielu ta paciencia ka pu maneluwkülelu ta Chaw Dios mu, fey tüfa engün reke llowaiñ Chaw Dios tañi feypikünuelchi dungu (Eb. 6:⁠10-12).

15. Feyentual taiñ werkün dungu mu, ¿chumngechi kelluaeiñmu taiñ amuldunguleal?

¹⁵ Iñchiñ feyentuleiñ ñi rüfngen taiñ werkün dungu, feymu ayünieiñ taiñ amuldungulelafiel fentren che. Maneluwkeiñ kom taiñ feypikünuetew Chaw Dios Biblia mu (Sal. 119:⁠42; Is. 40:⁠8). Küme ngüneduamnieiñ ñi femtripameken famülke mu kiñeke profecia, ka ngüneduamkeiñ ñi doy küme mongen ñi nierpuken pu inakefilu Biblia ñi ngülam. Femngechi llemay kimtukukeiñ che ñi duamnieel ñi allkütuñmual feytachi kümeke dungu.

16. 1) Ñi feypin Salmo 46:⁠1, feyentuleal Jewba mu, ¿chumngechi kelluaeiñmu taiñ amuldunguleal? 2) ¿Chumngechi kelluafeiñmu feyentuleal Jesus mu?

¹⁶ Ka femngechi feyentukeiñ Jewba mu, fey am taiñ eluetew tüfachi werkün dungu taiñ amuldungukeel. Ka feyentukeiñ Jesus mu, ti Rey ñi elkünuel Jewba tañi Gobierno mu (Juan 14:⁠1). Chem dungu rume rupafuliyiñ, Jewba afkentu kellunieaeiñmu ka newentukunieaeiñmu. Biblia feypi: “Ngünechen fey taiñ ellkawpeyüm ka newen, kellufemkeeiñmew may müleyüm ta weñangkün” (Salmo 46:⁠1). Kafey maneluwküleiñ Jesus ñi adniekefiel ti amuldungun küdaw. Jewba elueyew newen ka autoridad taiñ adnieaetew (Mat. 28:⁠18-20).

17. Feypinge chem ñi rupan kiñe üllcha domo.

¹⁷ Feyentuliyiñ Jewba mu, maneluwküleaiñ taiñ kümelkayaetew taiñ amuldungun mu. Kiñeke mu, kimlayafuiñ rume chumngechi taiñ kelluaetew ta Jewba (Ecl. 11:⁠6). Fill antü pütrün che rupakey inafül carrito mu. Jewba,  ¿kümelkakepefi may femngechi amuldungun? ¡Femkey llemay! Taiñ papel Nuestro Ministerio del Reino pingelu tripalu noviembre 2014, nütramkafi kiñe üllcha domo ñi rupan. Tüfa amukefuy universidad mu. Ayüfuy ñi wirintukual ñi chem chumken pu Dungukelu Iney Ngen Jewba. Welu pelay kiñe Trawünwe Ruka chew tañi amual. Welu universidad mu pey kiñe mesa nielu taiñ publicaciones, femngechi doy kimürpufi Jewba tañi pu che ka kimi chem tañi wirintukual. Eluwi ñi chillkatual ta Biblia, fey rupachi antü mu fautizawi. Famülke mu wüneley amuldungun mu. Tüfachi üllcha reke petu müley che duamnielu ñi allkütual Chaw Dios tañi kümeke dungu. Feymu llemay doy eluwküleiñ taiñ amuldungucheal.

18. ¿Chemu kimnieiñ ñi fentepuwal ti amuldungun küdaw Jewba ñi dullielchi antü mu?

¹⁸ Jewba dew elkünuy kiñe antü ñi tuntepuwal ti amuldungun küdaw, feymu alüñmalayay. Jewba rume küme dullikey chumül ñi femal tañi ayünieelchi dungu. Rakiduamaiñ ñi rupan Noe tañi antü. Jewba dulli chem antü ñi akual ti fütra mangin ko 120 tripantu petu ñi akunon. Rupachi tripantu mu, Jewba elfalkünufi Noe ñi dewmayal ti fütra wampo ruka. 40 tripantu kam 50 tripantu chi, Noe rume küdawi ñi dewmayafiel. Ka femngechi tunte allkütungelafuy rume, kom che feypifi ñi akual ti fütra mangin ko. Fey akuy antü Jewba ñi feypietew ñi tukual kulliñ ti fütra wampo ruka mu, fey Jewba cerrantukufi ti puerta ñi dullikünuelchi antü mu (Gén. 6:⁠3; 7:⁠1, 2, 16).

19. Fentekünunoliyiñ taiñ küdaw, ¿chem rupayay?

¹⁹ Pichin mu “fentepuwpe ti amuldungun” piay ta Jewba, fey afay kom ñi ngünenieel tati Weküfü, re kümeke che mületuay. Welu petu ñi akunon feychi antü, inayentuafiyiñ Noe ka Habacuc ka kakelu che, fey amuleay taiñ amuldungumeken. Doyümnieafiyiñ ti amuldungun küdaw, nieaiñ ta paciencia ka feyentuleaiñ Jewba mu ka tañi feypikünuel.