1, 2. 1) Pu amuldungukelu allkütukenoetew rume pu che, ¿chumngelu (chemu) yafültukukeeiñmu? (Inaduamnge ti adentun ellaka mu mülelu). 2) Jesus ñi feypin, ¿chumngechi llowngeafuiñ amuldunguliyiñ taiñ mapu mu? (Inaduamnge ti kimal dungu).

SERGIO KA OLINDA pingey kiñe kurewen Estados Unidos mu, doy 80 tripantu nieyngu ka ngellu trekakeyngu rume kutranlu kay ñi chang. Welu puliwentu amukeyngu kiñe pülasa mew inafül chew ñi üngümngeken mikro, fey mu pengelelkefingu pu che fillke papil. Fentren tripantu yewyey engu ñi femken tüfa. Kom pu che reke ngüneduamkelay rume tüfachi kurewen ñi femken, welu kidu engu fentekünukelay ka ayüwünkechi ngüneltukefingu pu che. Rangi antülu, ñochi trekakeyngu ñi amutual ruka mu. Ka tripakeyngu puliwentu ka antü mu. Femkeyngu tüfa kom ti tripantu, kayu antü fillke semana mew.

² Sergio ka Olinda reke, fentren peñi ka lamngen alün  tripantu yeniey ñi amuldungun kidu tañi mapu mu, allkütukenoetew rume pu che. Eymi ka femkeymi chi, feymu sakiwiyiñ tami afeluwnon amuldungun mu * (inaduamnge ti kimal dungu). Tami femken yafültukukefi pu peñi ka lamngen, fentren tripantu yenielu kütu Jewba ñi trokiñche mu. Ngüneduamnge ñi feypin kiñe witran-ngepakechi longkolelu: “Amuldungun mu pu peñi ka lamngen engün alün tripantu femkelu ñi küdaw, newentukukeenew ñi femken engün”. Kangelu feypi: “Fentekünukenolu kay engün ñi amuldungun, yafültukuenew ñi küdawün amuleal ka ñi fütra piwkekünuwal tañi amuldungual”. Kangelu ka feypi: “Füshküduamelkeenew ñi femken engün”.

3. ¿Chemke ramtun inaduamaiñ? ¿Chumngelu?

³ Tüfachi chillkatun mu inaduamaiñ küla ramtun: ¿chumngelu kiñeke mu yafüduamngewelayafuiñ? ¿Chem chumafuiñ taiñ wülal “kümeke kosecha”? ¿Chumngechi femafuiñ tüfa yafüluwün mew? Kimal tüfa, kelluaeiñmu taiñ fentekünunoal ti amuldungun taiñ elfalkünuletew Jesus.

4. 1) Fentren judiu ñi allkütunoetew, ¿chumngechi duamnagi Pablo? 2) ¿Chumngelu femngechi duamnagi?

⁴ Kiñeke mu, ¿yafüduamngewelaymi ñi allkütukenoetew pu che tami amuldungun? Femngechi duamülmi, kelluafeymu apostol Pablo ñi rupan. Kidu amuldunguy 30 tripantu, ka kellufi fentren che ñi inayafiel ta Jesus (Hecho 14:21; 2 Korintio 3:2, 3). Welu fentren judiu küpa inalafi ta Jesus. Doy may, allkütulafingün ta Pablo ka kayñetufingün (Hecho 14:19; 17:1, 4, 5, 13). Fey, ¿chumngechi duamnagi Pablo? Kidu feypi: “Rume weñangküley tañi piwke ka rumel kutrantupiwkeleken” (Romanu 9:1-3). ¿Chumngelu chi? Kidu rume falintukefilu kay ti amuldungun ka piwkeyechekefuy, rüf duamyekefuy pu judiu, feymu kutrantupiwkey kidu engün eluwnolu ñi kutranpiwkeyeaetew Chaw Dios.

5. 1) ¿Chumngelu amuldungukeiñ? 2) Yafüduamngewenofuliyiñ kiñeke mu, ¿chumngelu weda dungu no ta tüfa?

⁵ Pablo reke, iñchiñ piwkeyekefiyiñ ta che ka küpa kellukefiyiñ, feymu amuldungukeiñ (Matew 22:39; 1 Korintio 11:1). Taiñ mongen mew ngüneduamiyiñ fente taiñ kümelkakeetew poyekefiel ta Jewba. Küpa kellukefiyiñ pu che ñi ka femngechi femal. Feymu yafültukukefiyiñ ñi rüf kimafiel ta Jewba ka ñi ayükeel. Amuldungun mu elukefiyiñ reke tati pu che kiñe yewün, ka kom piwke mu feypikefiyiñ ñi llowafiel. Feymu Pablo reke kutrantupiwkelelkeeiñmu pu che küpa llownolu tüfachi yewün. Weñangküleliyiñmu tüfa, feypingelayafuy taiñ weniyenofiel ta Jewba, doy may pengelkeiñ fente taiñ piwkeyecheken. Feymu yafüduamngewenoliyiñ rume kiñeke mu, fentekünulayaiñ taiñ amuldungun. Rakiduamkeiñ Elena reke, kidu doy 25 tripantu wüneley amuldungun mu, fey feypi: “Küdawngelu trokikefiñ ti amuldungun. Welu chem  küdaw rume doyümlayafun ti amuldungun mu”.

6. ¿Chem ramtun inaduamaiñ?

⁶ Allkütunoeliyiñmu rume pu che, ¿küme tripayafuy taiñ amuldungun? Femay llemay. ¿Chumngechi fel? Taiñ kimal tüfa, ngüneduamaiñ epu nütram entulu Jesus, fey kimeltuy ñi duamfalngen wülal “küme kosecha” kam wülal fün reke (Matew 13:23). Wüne inaduamaiñ ti nütram kiñe anüm ofad mu.

7. 1) Jesus ñi nütram mu, ¿iney am “tati dapikefilu ti anüm ofad”, tati “anüm ofad” ka tati “row”? 2) ¿Chem ramtun müley taiñ wiñoldungual?

⁷ (Papeltunge Juan 15:1-5, 8). Jesus feypi “tati dapikefilu ti anüm ofad” fey ta Jewba, tati “anüm ofad” fey ta Jesus, ka tati “row” fey tañi pu disipulu * (inaduamnge ti kimal dungu). Fey Jesus ka feypifi tañi pu apostol: “Iñche ñi Chaw llowkey püramyen femngechi wülimün ta eymün fentren fün, fey ka femngechi ta rüf mew iñche ñi disipulungeaymün”. Fey, ¿chumngechi wülafuiñ fün? Tüfachi nütram mew, Jesus feypilay chem adentuley feychi fün kam kosecha, welu ngüneduamliyiñ ñi feypiel, kimürpuaiñ ti wiñoldungun.

8. 1) Taiñ wülal fün chumngechi ñi feypiel Jesus, ¿müley taiñ kelluafiel kiñe che tañi disipulungerpual? ¿Chumngelu kay? 2) ¿Chumngey kom taiñ feypietew Jewba taiñ femal?

⁸ Jesus feypi tañi Chaw ñi katrünentuafiel “tati row wülnolu ofad”. Tüfa kimeltueiñmew ñi duamfalngen wülal fün kam kosecha reke taiñ poyeafiel ta Jewba (Matew 13:23; 21:43). Feymu tüfachi nütram mew, ñi wülal fün ‘müley taiñ kelluafiel kiñe che tañi disipulungerpual’ pilayafuiñ (Matew 28:19). ¿Chumngelu? Rakiduamnge: fentren kümeke peñi ka lamngen mekey ñi amuldungun, welu pu che küpa allkütukelaeyew, feymu kellulafi iney no rume ñi disipulungerpual engün. Welu, ¿trürümngeafuy engün ti row wülkenolu ofad? ¡Femlayafuy llemay! Iñchiñ dikümtukulayafuiñ pu che ñi inayafiel ta Jesus. Kafey taiñ piwkeyeetew am, Chaw Jewba feypilayafeiñmew taiñ femal taiñ pepilkenon, kom taiñ feypietew Jewba taiñ femal, pepilfali llemay (Deuteronomio 30:11-14).

9. 1) ¿Chumngechi wülafuiñ fün? 2) ¿Chem inaduamaiñ fewla?

⁹ Feymu, ¿chumngechi wülafuiñ fün? Tüfa kiñe dungu kom iñchiñ taiñ femafel. Fey rakiduamnge, ¿chem küdaw elueiñmu Jewba ta kom iñchiñ? Amuldungual kidu ñi Ngünenien mu * (inaduamnge ti kimal dungu) (Matew 24:14). Jesus ñi nütram kiñe nganketrankelu mu küme pengeli tüfa. Inaduamafiyiñ.

10. 1) Jesus ñi nütram mu, ¿chem am tati fün ka ti mapu? 2) Kiñe longko kachilla, ¿chem wülkey?

¹⁰ (Papeltunge Luka 8:5-8, 11-15). Tüfa mu Jesus feypi tati fün fey “ti werken dungu” Chaw Ngünechen ñi  Ngünenien mu. Ti mapu fey tati che ñi piwke. Tati fün pachügnaglu ti küme mapu mew, foliluwi, wefi ka tremi. Fey tüfachi anümka mu “tripay pataka fün”. Longko kachillangefule tüfachi anümka, ¿chem wülafuy? ¿Longko kachilla pemay? Femlay, wülkey fün kachilla, fey tüfachi fün llegkey ñi longko kachillangerpual. Tüfachi nütram mu, kiñe fün wüli pataka fün. Tüfa, ¿chem kimeltukeeiñmu ti amuldungun mu?

11. 1) Jesus ñi nütram ti nganketrankelu mew, ¿chem kimeltukeeiñmu taiñ amuldungun mu? 2) ¿Chumngechi wülafuiñ fün kam kümeke kosecha?

¹¹ Taiñ pu chaw kam kangelu kristiano taiñ kimeltuetew Chaw Ngünechen ñi Ngünenien, fey nganingün reke kiñe fün taiñ piwke mu, küme mapu reke felelu. Rume ayüwingün ngüneduamlu taiñ llowfiel Chaw Dios ñi werkün dungu. Fey tüfachi fün eluwi ñi tremal, femngechi tañi wülal fün rupachi antü mu. Ngüneduampeiñ ti longko kachilla ñi wülkeel fün, wülkelay kakelu longko kachilla. Feymu kellunofiliyiñ rume ta kiñe che ñi disipulungerpual, wülafuiñ küme fün kam küme kosecha * (inaduamnge ti kimal dungu). ¿Chumngechi am? Amuldungulu iñchiñ Chaw Ngünechen ñi Ngünenien mu, feychi fün mülelu taiñ piwke mu alün-ngetukey ka pachügtukefiyiñ reke (Luka 6:45; 8:1). Feymu amulepe taiñ amuldunguken Chaw Ngünechen ñi Ngünenien, femngechi “kümeke kosecha” wülaiñ “kom yafüluwün mew”.

12. 1) Jesus ñi nütram tati anüm ofad ka ti nganketrankelu mu, ¿chem kimeltueiñmu? 2) ¿Chum duamelkeeymu tüfa?

¹² Jesus ñi nütram tati anüm ofad ka ti nganketrankelu mu, ¿chem kimeltueiñmu? Wülafuiñ fün kam küme kosecha allkütunoeliyiñmu rume pu che. Feymu fentekünulayaiñ taiñ amuldungun. Pablo ka kimeltuy tüfa feypilu: “Ngünechen may kulliafi ta kake kiñeke engün chem ñi küdawel mew” (1 Korintio 3:8). Jewba kümelkayaeiñmu fente taiñ küdawken, kellunofiliyiñ rume kiñe che tañi disipulungerpual. Kiñe lamngen Matilda pingelu, 20 tripantu wüneley amuldungun mu, fey feypi: “Jewba kümelkakeeiñmu fente taiñ yafüluwken ñi amuldungual, kimfiel tüfa ayüwülkeenew”.

13, 14. Ñi feypin Romanu 10:1, 2, ¿chumngelu Pablo fentekünulay ñi amuldungun?

¹³ Taiñ wülal fün kam küme kosecha “kom yafüluwün mew”, ¿chem kelluaeiñmu? Doy küme inaduamaiñ Pablo ñi femün. Kidu yafüduamngewelafuy pu judiu ñi allkütukenofiel ti kümeke dungu Chaw Ngünechen ñi Ngünenien mu. Welu Pablo fentekünulay ñi amuldungun. Ngüneduamnge ñi chumün, kidu feypi: “Iñche tañi ayünieelchi dungu ka ñi ngillatukefiel ta Ngünechen tati pu israelche mew, fey tañi montulngeael engün. Iñche feypian kisu engün ñi ayülen ñi poyeafiel ta Ngünechen, welu kisu engün ñi rakiduam  welulkawküley tati rüfngechi kimün mew” (Romanu 10:1, 2). Feymu, ¿chumngelu Pablo fentekünulay ñi amuldungun?

¹⁴ Küla dungu mew. Kiñe, Pablo feypi ñi chumngentukefiel tañi amuldungun: “Iñche tañi ayünieelchi dungu”, pi. Feymu rüf ayülefuy pu judiu ñi montual (Romanu 11:13, 14). Epu, Pablo feypi “ñi ngillatukefiel ta Ngünechen tati pu israelche mew”. Femngechi llellipufi ta Jewba ñi kelluafiel pu judiu tañi allkütual ti kümeke dungu ñi Ngünenien mu. Ka küla, Pablo feypi pu judiu “ñi ayülen ñi poyeafiel ta Ngünechen”. Tüfa pengeli kidu ñi ngüneduamfiel pu che ñi küme chumngen ka ‘turpu poyelayafingün ta Jewba’ pikelafuy. Tüfachi pu che küme eluwkülefuy ñi yenieal tañi feyentun, feymu Pablo kimniefuy ñi ka femngechi femafel engün tañi inayenturpuafiel ta Jesus, chumngechi ñi femün kidu.

15. ¿Chumngechi inayentuafuiñ ta Pablo? Feypinge kiñeke che ñi rupan.

¹⁵ Iñchiñ kay, ¿chumngechi inayentuafuiñ ta Pablo? Küla dungu mew. Kiñe, eluwaiñ kom piwke mu taiñ kintual pu duamnielu ñi kimürpuafiel ta Jewba. Epu, ngillatuafiyiñ ta Jewba ñi kelluafiel pu küme piwkengelu taiñ allkütuaetew (Hecho 16:14). Femngechi femkey Silvana, epe 30 tripantu wüneley amuldungun mu. Kidu feypi: “Petu amuldungunolu kiñe ruka mu, ngillatukefiñ ta Jewba ñi kelluaetew tañi nieal küme rakiduam amuldungun mew”. Kafey ngillatuafiyiñ ta Jewba, femngechi pu kümeke püllü taiñ kelluaetew ñi peafiel pu küpa allkütulu (Matew 10:11-13; Apokalipsi 14:6). Kiñe peñi Robert pingelu, doy 30 tripantu wüneley amuldungun mu, feypi: “Pu kümeke püllü kimniey chem ñi rupameken pu che tañi ruka mew, feymew ayüwmapiwkelkeenew kiñentrür küdawal pu  kümeke püllü engün”. Ka küla, yafüluwaiñ ñi ngüneduamal pu che ñi küme chumngen ka rakiduamlayaiñ ñi poyerpunoafiel engün ta Jewba. Kiñe longkolelu Carl pingelu, doy 50 tripantu mu yeniey Jewba ñi trokiñche mu, fey feypi: “Upewtuleken ñi ngüneduamal ti che ñi küme piwkengen: ayelele, ayüwünkechi ngüneltulele kam ramtule rüf küpa kimlu am”. Femliyiñ kom tüfa, wülaiñ fün kam küme kosecha “kom yafüluwün mew”, Pablo reke.

16, 17. 1) ¿Chem kimeltukeeiñmu Eclesiastés 11:6? 2) Taiñ amuldungun, ¿chumngechi puwkey pu che ñi piwke mew?

¹⁶ Longkontukuaiñ taiñ amuldungun ñi puwafel pu che ñi piwke mew, ngüneduamnoliyiñ rume. Biblia feypi: “Puliwentu nganaymi tami ketran, ka nagantü mu amulepe tami küdawmeken, kimnolu am eymi chuchi am küme tripayay, tüfa kam feyti, kam mür ñi küme tripayal” (Eclesiastés 11:6). Pu che adkintukeeiñmew. Ngüneduamkey taiñ küme tukutuwkülen ka taiñ poyecheken. Afmatuafuyngün, fey rupachi antü mu küme rakiduamafuy engün iñchiñ mu, küme trokinoetew rume ellaka mu. Sergio ka Olinda, ellaka taiñ nütramkapeel, ngüneduamingu ñi rüfngen tüfa.

¹⁷ Sergio feypi: “Kutranlu iñchiw, amuldungumelayu kiñeke antü ti pülasa mew. Wiñolu, pu che ramtueyumew: ‘¿Chumimu ama? Katrüduamwiyiñ’”. Olinda feypi ayüwün mu: “Pu amulmikrokelu maychikünuy ñi kuwü tayu chaliaetew, kiñeke ponwi mikro mu wirareleyumu: ‘¡Kümey tamu wiño küdawpan!’. Ka kiñeke entuyngün kütu kiñeke chillka”. Kafey kiñe wentru akuy chew ñi amuldunguken engu, elueyew kiñe yewün ka mañumtueyew ñi femken. Feymu Sergio ka Olinda afmatuleweyngu.

18. ¿Chumngelu küpa wülkeymi “kümeke kosecha” “kom yafüluwün mew”?

¹⁸ Feymu llemay, “amulepe tami küdawmeken” ñi amuldungucheal Chaw Ngünechen ñi Ngünenien, müna falin-ngey tami kimeltukefiel “kom trokiñke mapu mew mülechi pu che” (Matew 24:14). Welu doy falin-ngey tami ayüwülkefiel ta Jewba tami femken mu, feymu ayüwküleafuymi. Jewba piwkeyefi pu “wülkelu kümeke kosecha” “kom yafüluwün mew”.