Rosa feypi: “Re rakiduamkefun ñi rupayal wedake dungu ka doyelkünukefun tañi longko mew”. Welu kellueyew Matew 6:34 feypilu: “Feymew fill rakiduamkülekilmün tamün chumael ta wüle, fey wüle wüla kimaymün tamün chem chumael. Kake antü ta kisuke nieyey fentren welulkawünngechi dungu”. Rosa feypi tañi kelluetew Jesus ñi ngülam, fey fill rakiduamwelay chem ñi rupayal küpalechi antü mu. Ka feypi: “Ruparupangen fentren wedake dungu, feymu falilay rakiduamal ñi kontuafetew doy wedake dungu, tüfa turpu rupalayafuy chi”.

Elsa kafey fill rakiduamkülekefuy. Kidu feypi: “Fentren antü ngümakefun ka kiñeke pun pepi umawtukelafun rume, fey ngünenierpuenew tañi wedake rakiduam”. Welu kellueyew 1 Pedro 5:7 feypilu: “Elkünumün Ngünechen mew kom tamün fill rakiduamelnieetewchi dungu, kisu am ta piwkeyenieetew ta eymün”. Elsa feypi: “Rupalu chi antü amulen ñi ngillatukefiel ta Jewba, ka kidu wiñoldunguenew. Entuñmangen kiñe fütra dungu tañi fanetunieetew reke. Kiñeke mu kontupakeenew wedake rakiduam, welu fewla kimnien chumngechi famentuafiel”.

Kiñe üllcha domo Isabel pingelu feypi: “Famentuniekefiñ reke tañi küdaw tañi ürkütual ka adkintual television. Tañi chaw ka femkey, feymu femngechi felelu iñche trokiwün. Tüfa wedalkakefi ka fill rakiduamelkefi pu che küme enturpunolu am engün tañi küdaw”. Welu kellueyew 2 Timotew 2:15 feypilu: “Newentulenge tami müleael Ngünechen ñi dungu mew tati dew llowelchi küdawfe reke feyti nienolu chem dungu no rume ñi yewentukuwküleael”. Isabel ka feypi: “Ayülafun Chaw Jewba tañi yewentukuaetew famentuniefilu am iñche tañi küdaw”. Feymu küme elkünutuy tañi femün.

Ka femngechi Karla feypi: “Kiñeke mu entukefun tañi küdaw pichilewelu müten tañi femal. Fey ngümatripakefun, müte umawtukelafun ka fill rakiduamkefun, tüfa wedalkakefenew”. Welu kellueyew Proverbios 13:16 feypilu: “Tati adümuwün-ngelu pengelkey kimün tañi femken mu, welu ti wedwedkülelu pengelkey tañi wedwedngen”. Kidu feypi chumngechi tañi kelluetew rakiduamal feychi texto mu: “Kimchengey tati küme adkünukelu chem chumal. Feymu fewla nien kiñe cuaderno tañi adkünual tañi küdaw, femngechi küme kimnien chem ñi femal ka famentuwelan tañi küdaw”.

Cristina feypi: “Tañi wentru kidukünuenew tañi meli pichike püñeñ engu”. Welu kellueyew Proverbios 17:17 feypilu: “Kiñe rüfngechi weni rumel piwkeyechekey, ka kiñe peñi reke feley ñi mülen mu weñangkün”. Cristina eluwi tañi kellungeal trawünche mu. ¿Chum tripay tüfa? Kidu feypi: “¡Tañi pu weni müna kelluenew engün! Kiñeke mu elelpakeenew mongewe ka rayen tañi ruka mu. Küla rupa kiñe trokiñche kellueiñmew tañi pu püñeñ engu taiñ wiñamtuwal ka ruka mu, ka kiñe lamngen kelluenew ñi peal küdaw. Tañi pu weni afkentu kellukeenew engün”.

Delia nütramkangelu nga ka kidulelu trokiwkefuy. Dew kontuetew kom ñi wedake dungu, kidu feypi: “Weda duamkülefun, rakiduamkülefulu am tañi ayüwkülewenoal chumngechi ñi ayüwkülen kakelu che. Müna kidulewetun”. Welu kellueyew Salmo 68:6 feypilu: “Chaw Ngünechen eluyekefi tati pu kidulelu kiñe ruka ñi müleal engün”. Kidu feypi: “Ngüneduamlu tüfachi versikulo kimtukun Chaw Dios ñi elunoafetew kiñe ruka ñi müleal, doy may eluafenew ñi müleal kidu tañi trokiñche mu. Tüfa mu rüf küme duamkülen ka kiñewkülen kakelu che engu poyekefilu ta Jewba. Welu kimniefun ñi duamfalngen doy fülmawküleal Jewba mu tañi fülmawküleal pu lamngen mu. Feymu Salmo 37:4 kelluenew, tüfa feypi: ‘Penge tami doy fütra ayüwün Jewba mu, fey kidu eluaeymu tami piwke ñi ayükeel’”.

Delia ka feypi: “Kimtukun ñi duamfalngen doy maneluwküleal Chaw Jewba mu. Kidu am tati doy küme weni taiñ nieafel. Fey wüla wirintukun chem ñi femal kakelu che engün, femngechi tañi weniyeafiel pu poyekefilu ta Jewba. Kimürpun tañi ngüneduamal ñi küme femkeel ta che ka kiñepülekünuafiel tañi welulkan engün”.

Rüfkünu llemay, taiñ pu weni poyekefilu ta Chaw Dios kulpafengeyngün. Pu Dungukelu Iney Ngen Jewba rupakey wedake dungu kom pu che reke, welu Biblia ñi kimeltun yafültukueyew ñi kellucheal. Feymu rume kümey weniyeafiel femngechi che. Welu famülke mu küme elkünutulayafuiñ wedake kutran, ti lan dungu ka kakelu weda dungu. Fey rupaliyiñ tüfa, ¿chumngechi kelluafeiñmu ti Biblia?