ENOK fütra kuyfi mu mongelekefuy. Küdawngeafuy taiñ feyentual, welu kidu 365 tripantu mongerpuy, ¡doy meli rupa ñi mongeleken pu che famülke mew! Welu feychi antü mu füchalelu trokingelafuy. Feychi mu 5.000 tripantu kuyfi mu tati pu che doy tripantu mongekefuy. Choyüngelu Enok, Adan tati wünen wentru doy 600 tripantu niefuy, ka puwüli doy 900 tripantu. Adan kiñeke tañi pu che, doy tripantu mongekefuy. Feymu Enok nielu 365 tripantu, petu newen-ngefuy, kiñe che alüñma mongelekayalu reke felefuy. Welu fentreñma mongelay.

Enok kuñiwün-ngechi dungu mu rupapelay. Rakiduamnge, petu lefmawlu rakiduammekey feychi che mu ñi weda duamkülen ñi feypifiel Chaw Ngünechen tañi werkün dungu. Tati pu che kakünuwi tañi ad fente illkulu engün. Üdeeyew tüfachi pu che. Illamtufingün ñi werkün dungu ka tañi Chaw Ngünechen ñi werküetew. Kidu engün pepi kewatulafingün ta Jewba, Enok tañi Ngünechen, welu Enok feyke ta pepi kewatufingün. Kidu rakiduamkefuy chi: “¿Wiño petuafiñ tañi pu che?”. Rakiduamkefuy chi tañi domo mew, tañi pu ñawe, tañi fotüm Matusalen, kam tañi laku Lamek (Génesis 5:21-23, 25). ¿Puwpey may tañi layal?

Biblia mu pichi amuy Enok ñi nütram. Küla trokiñ Biblia mew müten feypi kiñeke dungu kidu mew (Génesis 5:21-24; Ebrew 11:5; Juda 14, 15). Welu ñi feypiel tüfachi versikulo, kellukeeiñmew taiñ kimafiel tüfachi wentru fentren mupiltun nielu. ¿Müley tami dapiafiel tami pu che? Kintukaduamngen mu, ¿newentuymi tami inayal ti kümeke dungu? Femngechi femülmi, müna kelluaeymu Enok ñi rupan.

Enok koneltulefuy tati regle trokiñ tuwünche mew llitulu ta Adan mew. Feychi mu tati pu che rume weda rüpü inaniefuy. Kafey fentren tripantu mongelekefuy, alüñmanofulu am Adan ka Eva ñi ñamümel tañi tutengechi mongen. Welu tati pu che wedake mongen yeniekefuy ka püntütripalefuyngün Chaw Ngünechen mew. Kom püle mülefuy kewan dungu. Tüfa eluwi ñi müleal Adan tañi yall mew, Kain langümfilu tañi peñi Abel. Kain kiñe tañi yomel kütu mallmawi ñi doy kewatufengen ka awükachefengen Kain mew. Tati küla trokiñ tuwünche mew ka kiñe weda che mülefuy. Tati pu che eluwi ñi mütrümafiel Jewba ñi üy, welu femkelayngün tañi poyeafiel. Kimfalngey ñi weda üytukefiel ta Chaw Ngünechen ñi fütra üy yamnienon mu (Génesis 4:8, 23-26).

Tüfachi weda religion petu mülepelafuy Enok ñi antü mew. Feymu Enok ñi tremün mu, mülefuy ñi dullial: ¿inayafuy tati pu che kidu ñi antü mew? Kam ¿inayafuy ta Jewba, tati rüfngechi Ngünechen ñi dewmael ti Mapu ka ti wenu mapu? Müna ayüwpelafuy ñi kimel Abel ñi femün mu, kidu langümngey tañi feyentun mu poyekefilu am ta Jewba chumngechi ñi ayükeel. Enok eluwi ñi inayentuafiel ta Abel. Feymu Génesis 5:22 feypiley:  “Enok inarkey Ngünechen ñi ayükeelchi dungu”. Tüfa pengeli ta Enok ñi küme wentrungen poyekefilu ta Ngünechen rangiñ pu wedake che mew. Tüfa tati wünen wentru ñi femngechi feypingeel Biblia mu.

Tüfachi versikulo ka feypiley Enok ñi inarkefiel ta Ngünechen dew choyüngelu ta Matusalen. Feymu Enok niefuy ñi reñma 65 tripantu nielu. Niefuy ñi domo, welu üytungelay Biblia mew ka feypingelay tunten “fotüm ka ñawe” ñi niefel. Kiñe küme chaw inanielu ta Ngünechen, kimeltukefi tañi pu che, elukefi ñi duamnieel, ka yafültukukefi ñi inayal Chaw Ngünechen tañi rüpü. Feymu Enok müna yafüluwkefuy chi ñi kimeltuafiel tañi pu yall Jewba tañi dungu mew. Ka ngüneduami Jewba ñi ayüel tañi kiñewal ñi domo engu (Génesis 2:24). ¿Chum tripay ñi femün?

Biblia feypi kiñeke dungu müten. Nütramkalay Matusalen ñi mupiltun mu, kidu tati wentru doy tripantu mongelu ñi feypiel ti Biblia, lay ti tripantu ñi akun ti Fütra Mangin Ko. Matusalen yallfi ta Lamek. Enok lay pataka tripantu dew choyüngelu tañi laku Lamek. Tüfa tremlu, nierpuy fentren mupiltun. Jewba ñi duam mew wüli kiñe pelon dungu Noe mu, kidu tañi fotüm, ka tüfa femtripay dew rupalu ti Fütra Mangin Ko. Enok reke, Noe inaniekefuy ta Chaw Ngünechen. Turpu kimuwlayngu, welu Enok elkünuleyew kiñe küme inayentufal. Noe ñi chaw, Lamek, kimeltueyew chi Enok mu, kam tañi laku Matusalen, kam Jared, Enok tañi chaw, lalu Noe nielu 366 tripantu (Génesis 5:25-29; 6:9; 9:1).

Rakiduamnge tunte ñi trürümfalngenon Adan engu Enok. Adan tutengechi mongen niefuy, welu kulpay Jewba mew ka kidu ñi femün mu tañi pu yomelche rupakey wedake dungu mu ka eluwkey ñi kayñetuafiel ta Chaw Ngünechen. Enok kulpafengefuy, welu inakefuy ta Chaw Ngünechen ka eli tañi pu yomelche kiñe küme inayentufal fente tañi mupiltun mu. Adan lay Enok ñi puwül 308 tripantu mu. Adan rakiduamkefuy kidu ñi kümelkalen mu müten, feymu tañi pu che ¿ngümapeyngün may ñi lan mu? Kimlaiñ, welu Enok ‘inarkey Ngünechen ñi ayükeelchi dungu’ (Génesis 5:24).

Yafüluwmekelmi ñi eluafiel tami pu che ñi duamnieel engün, fentren dungu kimürpuaymi Enok ñi mupiltun mu. Falin-ngey eluafiel tami pu che chem ñi duamnieel engün ñi kümelkaleal, welu doy falin-ngey tami kelluafiel ñi küme weniyeafiel engün ta Chaw Ngünechen (1 Timotew 5:8). Kellulayafimi tami pu che tami feypin mu müten, kafey tami femün mu. Feymu inaniefilmi ta Chaw Ngünechen Enok reke, ka eluwülmi tami ngüyulaetew ñi ngülam, fey elkünulelafimi tami pu che kiñe fütra yewün: kiñe küme inayentufal.

Rangiñ feychi wedake che mu ñi nienon mupiltun Enok kidulelu trokiwi chi. Welu tañi Chaw Ngünechen Jewba, ¿ngüneduampeeyew may? Femi tati. Kiñe antü Jewba dungufi ta Enok, elufi kiñe werkün dungu ñi feypiafiel tati pu che, femngechi pelon wentrukünufi ta Enok, tüfa tati  wünen pelon wentru ñi feypingeel ta Biblia mu. Kimnieiñ tüfa Juda, Jesus tañi peñi ñuke püle, wirintukulu am Jewba ñi duam mew Enok ñi feypielchi dungu fentren tripantu rupalu wüla. *

¿Chem pelon dungu feypi Enok? Tüfa: “Pefiñ ta Ñidol ñi küpalen. Kompañnieeyew tañi fentren warangka pu werken püllü, tañi ramtukadunguafiel ñi femelchi dungu mew itrokom tati pu che, fey ta famngechi ñi kondenayafiel itrokom che nielu wesake mongen, ka itrokom che ti wesake dungu femkelu ka itrokom wesake dungu feypikelu. Tañi yafkafe piwke ñi nien mew yamlafi engün ta Ñidol” (Juda 14, 15). Enok rume mupiltulefuy ñi rupayal feychi dungu. Chaw Ngünechen dew femürpulu ñi feypikünuel, trokiwi Enok. Tati pelon wentru feypi feychi dungu dew ñi femngeken, maneluwün-ngelu am ñi rupayal (Isaías 46:10).

Enok amuldungufilu tüfachi werkün dungu, kom tati pu che ¿chum duamnagkefuy? Ngüneduamnge fente ñi newen-ngen tüfachi ngüfetun dungu: küla rupa feypi “wesake” tañi feypial ñi chumngen tati pu che, tañi femün, ka ñi mongen. Wemünentungelu Eden mew, tati pu che kidutu adkünufi Mapu mew müleyechi dungu, welu Enok pengeli ñi rume wedalkalen tüfa. Welu apümkangeay akule Jewba ka “tañi fentren warangka pu werken püllü” kiñe trokiñ weychafe reke. Enok wüli tüfachi werkün dungu llükanon mu, ¡ka kidulen mew! Tañi laku Lamek pichi wentrungelu afmatulen mu ngüneduampelaeyew, ¿femngechi femnoafulu?

Taiñ pefiel mu Enok ñi mupiltun, ramtuwafuiñ: “¿Chaw Ngünechen reke trokikefiñ müleyechi dungu Mapu mew?”. Ti ngüfetun dungu llükakenon mu ñi feypiel Enok, kidu ñi antü mu reke ka femngechi küpayay famülke mu ñi apümkangeal ti müleyechi dungu. Ñi femtripayal Enok ñi feypiel, Jewba küpali ti Fütra Mangin Ko ñi apümkayafiel tati wedake che Noe ñi antü mew. Welu tüfa pengeli chem ñi küpayal (Matew 24:38, 39; 2 Pedro 2:4-6). Kuyfi reke, Jewba üngümküley tañi pu kümeke püllü engün tañi fempayal nor dungu tüfachi Mapu mew. Feymu kom iñchiñ müley taiñ küme llowal Enok ñi feypielchi dungu ka amuldunguafiel. Taiñ pu che ka taiñ pu weni famentuafeiñmu chi, fey kiñeke mu kidulelu trokiwafuiñ. Welu Jewba turpu kidu elkünulafi ta Enok, feymu elkünulayafi tañi pu manelfalngechi che famülke mu.

¿Chumngechi afi Enok tañi mongen? Feypiafuiñ ñi lan doy ngüneduamfali tañi mongen mu. Tüfa müten feypi Génesis: “Fey Enok am inarkelu Ngünechen ñi ayükeelchi dungu, feymew kiñe antü pengewerumeturkelay, fey Ngünechen am yeturkeetew” (Génesis 5:24). Chaw Ngünechen, ¿chumngechi yetufi ta Enok? Ti apostol Pablo feypi: “Ñi mupiltun mew ta Enok yengetuy petu ñi mongelen femngechi tañi lanoael. ‘Fey doy pengewetulay, Ngünechen am yetuetew.’ Fey Wirin Chillka ta feypiley: ‘petu ñi yengetunon Enok tuterkefi ta Ngünechen’” (Ebrew 11:5). Pablo feypilu “yengetuy petu ñi mongelen femngechi tañi lanoael”, ¿chem küpa feypi? Kiñeke Biblia feypiley Chaw Ngünechen ñi yetufiel ta Enok wenu mapu mew. Welu tüfa feyngelay. Biblia feypi, Jesus fey tati wünen wentru wiñomongetulu ñi amual wenu mapu mew (Juan 3:13).

Feymu, ¿chumngechi “yengetuy” Enok “femngechi  tañi lanoael”? Jewba kuñiwtukun mu rulpafi ta Enok ñi layal, femngechi ñi kutrankawnoal ñi lan mu. Welu wüne Enok kimelelngey ñi ‘tuterkefiel ta Ngünechen’. ¿Chumngechi? Epe puwlu ñi layal, Chaw Ngünechen pewfaleyew chi ta Enok kiñe dungu, pengeleyew chi ti Mapu kiñe küme mülewe reke. Femngechi Chaw Ngünechen pengelelfi ñi tutefiel, fey wüla Enok larkey. Ti apostol Pablo wirintukuy Enok ka kakelu pu manelfal che mu, fey feypi: “Itrokom tüfachi pu che layey engün [...] ñi mupiltun mew” (Ebrew 11:13). Tañi pu kayñe kintuyngün chi ñi la kuerpu, welu “doy pengewetulay”, Jewba ellkapelafi tañi kuerpu, femngechi pekan niengenoal kam ñi amultukungenoal ti koyla religion. *

Longkontukuaiñ tüfachi dungu ñi feypiel ti Biblia, fey rakiduamaiñ chumngechi afpelay Enok ñi mongen. Femngechi rupay chi: Enok lefmawi ürkülen mu. Tañi pu kayñe inantukueyew, ka pofolkawi ñi illkun engün tañi ngüfetun dungu mew. Enok pey chew ñi ellkawam ka pichi ürkütual, welu fentreñma mu ellkawkülelayafuy. Epe puwfuy ñi layal awükangen mu. Petu ürkütulu llellipufi ta Chaw Ngünechen. Feymu müna tüngkülefuy. Fey Enok pewfalelngey kiñe afmatun dungu kañpüle ñi yeetew reke, rüf mülelu üye mu trokiwi.

Rakiduamnge kidu ñi adkiñ mew ñi mülen kiñe we Mapu turpu ñi pekenofel. Doy adkülelu Eden lof mew trokifi, welu ngelay püllü ñi katrütufiel tati pu che ñi kon-noal. Müley fentren wentru ka domo, kom kümelkalelu ka wechelelu. Kom küme yewküleyngün. Ngelay üdewün ka kayñetuwün tañi religion mu, chumngechi ñi rupael Enok. Fey kidu ngüneduami Jewba ñi manelnieetew, piwkeyeetew ka llowetew. Kidu maneluwi ñi müleal feychi mülewe mew. Petu ñi tüngkülen mu, Enok umerkünuwi, fey eluwi ñi fütra umawtual.

¡Ka fantepu mu femngechi müley ta Enok, umawküley reke ti lan mew, ka Jewba ñi fütra rakiduam mew müley! Chumngechi ñi feypikünuel Jesus, puway ti antü kom tati pu layelu mülelu Chaw Ngünechen ñi rakiduam mew ñi allkütuafiel Kristo ñi dungun fey tripatual ti eltun mew, tañi ngüneduamal fente ñi küme adkülen ka küme felen ti we Mapu (Juan 5:28, 29).

¿Ayüafuymi tami müleal feychi we Mapu mu? Ayüpelayaymi tami kimafiel ta Enok. Rakiduamnge fente kümeke dungu taiñ kimeltuaetew. Feypiafeiñmew tunte ñi rüfngen taiñ rakiduamün ñi rupael epe puwlu ñi layal. Welu fewla müley taiñ kimafiel kiñe falin-ngechi dungu Enok mu. Dew nütramkalu kidu mu, ti apostol Pablo feypi: “Turpu ngelay ñi tutengeael ta Ngünechen ngenole maneluwün ta kisu mew” (Ebrew 11:6). Feymu ¡rume falin-ngey taiñ inayentual Enok ñi mupiltun llükakenon mu!