ALEXANDRA anülefuy kiñe mikro mu, epe konkülefulu am kangelu trokiñ mapu Sudamerica mu, fey allkürumey tüfachi dungu: “¡Amutupe ti mikro, welu ti chino mülenagpe!”. Kidu lelinagpay chem ñi rupameken, fey pey kiñe chino newe wingkadungunolu, ngellu nentumekelu ñi nütramkafiel ñi rupan ta kiñe policia llüwatumekelu. Alexandra koneltuley kiñe chino trawünche pu Dungukelu Iney Ngen Jewba mu, fey kellufi ti chino ñi rulpadungulelafiel.

Ti chino feypi: ‘Pu awtoridad eluñmaenew ñi mülenagal tüfachi mapu mu, welu weñeñmangen tañi documento ka tañi plata’. Pürümka müten ti policia feyentulaeyew ñi feypin ka rakiduami kütu Alexandra ñi küdawken ta fendengeal pu che. Af mew, ti policia feyentuy ti chino ñi feypin, welu multaeyew nienolu am ti duamfalchi documento. Ti chino nienolu am plata, Alexandra areleyew 20 dolar (epe 11.000 peso chileno). Ti wentru müna mañumtufi ka feypikünufi ñi wiñoleltuafiel doy tañi areletew mu. Alexandra feypi: ‘Tüfa llemay müley ñi femngeal, feymu ayüwkülen ñi femürpun, duamlan ñi doy kullitungeal’. Kafey elufi kiñeke papil Biblia mu ka yafültukufi ñi chillkatual Biblia pu Dungukelu Iney Ngen Jewba engün.

Yafültukukeeiñmu allkütuafiel femngechi nütram pu kümelkakefilu ta che ñi kimnofilu rume. Rüfkünu llemay, fentren che femkey tüfachi kümeke dungu koneltule kiñe religion kam femnole rume. Eymi kay, ¿femngechi fempeafuymi? Falin-ngey tüfachi dungu, Jesus kay feypilu: “Doy kümey ta wülael ta llowün mew” (Hecho 20:35). Ka femngechi tüfachi dungu koneltuley ciencia mu feypingelu am ta wülchefengeal kümelkakeeiñmu. Ngüneduamaiñ chumngechi kellukeeiñmu.

Ti rupan dungu pengeli ñi nüwkülen wülchefengeal ka ayüwküleal. Ti apostol Pablo feypi: “Ngünechen am piwkeyekefilu tati che ayüwünkechi wülkelu”. Fey Pablo nütramkay pu kristiano ayüwünkechi wülkelu ñi kelluafiel pu peñi ka lamngen weda rupamekelu (2 Korintio 8:4; 9:7). Kidu feypi tüfachi pu kristiano eluwkülelu am ñi wülal ka kellucheal, fey ayüwküleyngün.

Kiñe chillka feypi ta wülchefengeal “küdawülkey pu che tañi longko ñi kümelkaleal, ñi maneluwküleal, ñi tutewküleal pu che engu, fey küme duamelkeeyew”. Kangelu chillka feypi: “Feychi wülkelu plata kangelu che doy ayüwküley ta feyti ngillañmulu ñi kümelkawal mu”.

Tami femken mu, ¿ayüafuymi tami doy wülal? Rüfkünu may, kom iñchiñ küme duamküleafuiñ “tati che ayüwünkechi wülkelu” reke. Küme duam mu wülfiliyiñ, duamfalngelay wülal  fentren chemkün. Kiñe domo koneltulelu pu Dungukelu Iney Ngen Jewba mu werkülelfi plata ti pu entukelu tüfachi chillka, fey wirintukulelfi: “Fentren tripantu mu, wülken pichin plata müten ti Trawünwe Ruka mu”. Ka feypi: “Jewba doy wiñoleltuenew tañi elukefiel mu. [...] Mañumkülen tamün llowfiel tañi wülkeel, tüfa küme duamelenew”.

Taiñ wülchefengeal, wülal plata mu müten koneltulelay, doy may fillke dungu mu wülchefengeafuiñ.

Biblia feypi: “Kiñe küme wentru kidu kümelkawkey, welu ti wedañmangelu kidutu wedalkawkey” (Proverbios 11:17). Ti kümeke che wülchefengeyngün ka eluwküleyngün ñi wülal tañi newen, ñi antü ka fill dungu. Fey wülchefengeal kümelkakefi pu che fentren dungu mu, kiñe tüfa kellukefi ñi tremoleal engün.

Kiñeke chillka pengeli feychi pu kelluchekelu doy küme feleyngün ka doy ayüwküleyngün, feymu epe kom doy tremoleyngün. Tüfa ka rupakey feychi pu wedake kutran nielu kütu, tüfa ta esclerosis multiple kam VIH. Ka femngechi pu küpa ngollifengewenolu kellufile engün pu che, doy küdawün-ngetuay wiño putual ka ñi fütra weñangküleal.

¿Chumngelu am rupakey tüfa? Feypingekey ta che “kutranpiwkeyelu, küme piwkengelu ka wülchefengelu müte weda duamkülelay”. Ka femngechi ñi wülchefengen, kellukeeyew ñi fill rakiduamkülenoal ka presion kutran nierpunoal. Kafey ti pu lantulu eluwle ñi doy kellucheal, tüfa kelluaeyew ñi fütra weñangkülerpunoal.

Rüfkünu may, wülchefengeliyiñ doy kümelkaleaiñ llemay.

Jesus feypifi tañi pu inanieetew: “Kellukeafimün ta kakelu che femngechi ta Ngünechen kelluaeymünmew ta eymün. Kisu eluaeymünmew ta kiñe küme kullitun tati kümelu, ngüchegkülelu ka küme apolelu. Ngünechen ta medilaeymünmew tamün femkeelchi dungu chumngechi ta eymün medilkefimün ta kakelu che” (Luka 6:38). Wülchefengeliyiñ, pu che mañumtuaeiñmu ka inayentuafeiñmu. Fey llemay, wülchefengen mu pu che kelluwkey ka weniyewkey.

Kiñe chillka ngüneduamlu chumngechi ñi yewken pu che pengeli “feychi pu wülchefengelu yafültukukey pu che ñi inayentuaetew”. Femi llemay, “papeltual müten pu che ñi küme femken yafültukukey ñi doy wülchefengeal”. Feymu ka chillka feypi “kom iñchiñ rulpaduamelafuiñ ta fentren che, kimnofiliyiñ rume”. Tüfa küpa feypi kiñe che müten küme dungu femle, kakelu che tañi lof mu inayentuafeyew ñi wülchefengen.  ¿Ayüafuymi müleal femngechi mülewe mu? Feley llemay, pu che doy wülchefengefule, doy kümelkaleafuiñ.

Florida mapu mu (Estados Unidos), rupay kiñe dungu pengelkelu ñi küme tripan wülchefengeal. Dew rupalu fütra kürüf mewlenkülelu, kiñeke Dungukelu Iney Ngen Jewba eluwingün ñi kellucheal. Petu üngümkülelu engün kiñeke chemkün ñi küme elkünutuafiel kiñe ruka, pu küdawmekelu ngüneduamingün kiñe wentru ñi wülngiñ ruka ñi wedañmalen, fey feypingün ñi küme elkünutuafiel. Pichiñma wüla, ti wentru wirintukulelfi pu Dungukelu Iney Ngen Jewba ñi ngüneniechi ruka: “Müna mañumkülen. Turpu kimkelafun kümeke che eymün reke”. Fente mañumkülelu am, eluy fentren plata pu Dungukelu Iney Ngen Jewba mu ka “afmatufali ñi küdaw” pi.

Kangelu chillka feypi “pichikalu müten pu che eluwkülepey ñi kellucheal”. Ka feypi pu pichikeche “petu ñi kim dungunon wülchefengeyngün”. ¿Chumngelu am? Biblia feypi pu che dewmangey “Ngünechen tañi adentun mu”, fey tüfa inayentukefiyiñ Chaw Ngünechen ñi chumngen (Génesis 1:27, TNM).

Chaw Jewba taiñ dewmaetew, eluwküley tañi wülal, fey afmatufali ñi chumngen. Kidu elueiñmu ta mongen ka kom taiñ duamnieel ñi ayüwküleal (Hecho 14:17; 17:26-28). Biblia kellukeeiñmu ñi küme kimafiel taiñ Fütra Chaw ka tañi ayükeelchi dungu iñchiñ mu. Ka feypi kidu ñi adkünuel ti duamniengelu taiñ ayüwküleal küpalechi antü mu * (1 Juan 4:9, 10). Chaw Jewba dewmaeiñmu ñi adentun mu ka kidu mu tuwi ñi wülchefengeal, feymu inayentufiliyiñ, tüfa kümelkakeeiñmu ka kellukeeiñmu ñi tuteafiel (Ebrew 13:16).

Alexandra ñi nütram taiñ feypiel ellaka mu, ¿chum tripay? Kangelu wentru amulelu mikro mu feypieyew ‘wiñoleltungelayaymi tami plata’. Welu ti chino mütrümfi kiñeke weni mülelu ti waria chew ñi puwal ti mikro, fey ñi wiñoleltuafiel ta Alexandra ñi plata. Kafey femi ñi feypietew Alexandra ka eluwi ñi chillkatual Biblia. Küla küyen rupalu, Alexandra ayüwi ñi wiño pewtun kiñe fütra trawün chinodungun mu ñi pepikael pu Dungukelu Iney Ngen Jewba Peru mapu mu. Ti chino ñi mañumtuafiel ñi kelluetew, mangelfi tañi restaurante mu ta Alexandra ka kiñeke che ñi kompañetew.

Rüfkünu llemay, wülchefengeal ka kelluafiel pu che ayüwülkeeiñmu. Doy may kellufiliyiñ pu che ñi kimafiel Chaw Jewba, wülkelu itrokom kümeke dungu, ¡doy kümey! (Santiaw 1:17). ¿Eymi kay? ¿Ayüwmanieeymu ñi wülchefengeal?