Ti Biblia cüme elcünutueyu ñi mongen

¿CHEM quellueyu quiñe aucantuquelu plata mu ñi cüme elcünutual tañi mongen? ¿Chem quellueyu tañi hueñenoal? Allcütuhuaiñ ñi feipin.

“Iñche rume ayüquefun ñi cudeal cahuellu” (RICHARD STEWART)

TRIPANTU ÑI CHOYÜNGEEL: 1965

CHEU ÑI TUHUN: JAMAICA

ÑI RUPAN: AUCANTUQUEFUI PLATA MU CA HUEÑEQUEFUI

TAÑI CUIFI MONGEN: Tremümngen Jamaica ñi doi falin huaria, Kingston pingelu. Cheu ñi mülen rume pofrelefui che, ngelafui cüdau ca mülefui huesaque che. Pu che rume llicaquefui. Fill antü allcütungequefui tralca.

Tañi ñuque rume cüdaucülefui tañi cuidanieaeteu iñche ca tañi peñi ca tañi deya. Elunieiñmu cüme educacion. Huelu iñche cüpa amulan escuela mu, doi mai rume ayüquefun ñi cudeal cahuellu mu. Fentren rupa amuquelafun escuela mu ñi peal cuden. Quiñeque mu, ca püracahuelluquefun.

Rume ayüquefun aucantual plata mu ca ñi nieal fentren domo, pütremtuquefun marihuana. Tañi yenieal femngechi mongen mülefun ñi hueñeal. Fei nierquefun fentren arma, huelu turpu langümfiñ quiñe che tañi hueñenquiyahun mu.

Quiñe rupa carceltucungen, huelu lifretripalu müten, doi huesaque dungu femquefun. Cüme che femfaluuquefun, huelu rume mallma piuquengefun ca illcuquefun. Duamtuquelafun caquelu che.

TI BIBLIA CÜME ELCÜNUTUENEU ÑI MONGEN: Feichi mu tañi ñuque eluhui ñi quimelelngeal Biblia, fei fautizangei. Afmatuleneu tañi ñuque ñi cüme elcünutun tañi mongen. Chem quellueyu piquefun. Feimu iñche ca eluhun ñi quimelngeal Biblia.

Tañi quimeltuel pu Dunguquelu Ineingen Jehová trürlai caquelu religion mu. Biblia mu tripai com tañi feipin. Fill ruca püle amuldunguchequeingün ñi chem pilen Biblia, chumngechi ñi femquefel pu hunenque cristiano (Mateo 28:19; Hechos 20:20). Huelu doi afmatuleneu fente tañi piuqueyehun engün. Feimu tüfa tati rüf religion pin (Juan 13:35).

Biblia pengeleneu duamfalngefun ñi cüme elcünutual tañi mongen. Chau Jehová üdequei ti pod cudumuhun. Iñche cüpa ayühulfiñ ta Chau Dios, feimu mülefun ñi famentuafiel com huesaque dungu (2 Corintios 7:1; Hebreos 13:4). Rume afmatuleneu quimal Jehová ñi cüme piuquengen. Feimu tañi femquen iñche ayühulafiñ ca hueñancülafiñ (Proverbios 27:11). Elcünufiñ ti marihuana ca ti arma, fei eluhun ñi doi cüme chengetual. Doi cüdaungefui ñi elcünual tañi fentren domo ca ñi aucantual plata mu.

Ellaca mu feipilafiñ tañi pu hueni tañi chillcatumequen Biblia. Huelu papeltulu Mateo 10:33, cüme raquiduamtun. Tüfa mu feipi: “Inei rume quimlafiñ ta Jesús feipifile ta caquelu che, ca femngechi iñche quimlafiñ feichi che feipian tañi Huenu Chau”. Feimeu müten feipifiñ tañi pu hueni tañi chillcatumequen Biblia. Afmatulehueingün. “Eimi huesa mongen yenieimi, turpu cristianongerpulayaimi” piquefuingün. “Iñche ayünien cüme chengetual” pifiñ engün.

CHEM CÜMELCAN LLOHUN: Tañi ñuque rume ayühui quimlu iñche ñi inaniefiel Biblia tañi ngülam. Feula fill raquiduamcülehuelai tañi femquen iñche. Tañi ñuque iñchiu rume piuqueyefiyu ta Chau Jehová. Tüfa rume ayühuleyumu. Ngüneduamün mu tañi cuifi mongen, afmatulehuen fente tañi cambialetun Jehová tañi quellun mu. Feula famentufiñ ti pod mongen ca diñmatuhuelan ta plata.

Iñche quimnien allcütunofuli Biblia ñi ngülam, carceltucungeafun cam layafun. Huelu tañi quimürpun Biblia rumeñma ayühulqueneu iñche ca tañi pu che. Tañi domo quelluntucuqueneu ca tañi ñahue yamnieneu. Quiñentrür püramyefiyiñ ta Chau Jehová ayühun mu. Rume mañumcülen tañi quimeltungen Biblia. Feimu iñche ca eluhun ñi quimelelafiel ta che ñi chem pin Biblia. Rume mañumniefiñ ta Jehová iñche tañi coneltulen quisu tañi troquiñche mu. Fente tañi piuqueyenieteu Jehová cüpaleneu quisu mu.

[Feipin]

“Rume afmatuleneu quimal Jehová ñi cüme piuquengen. Feimu tañi femquen iñche ayühulafiñ ca hueñancülafiñ”

[Adentun]

Iñche tañi domo ca ñi ñahue iñchiñ

[Adentun]

Afmatuleneu tañi ñuque ñi cüme elcünutun tañi mongen