Ti Biblia cüme elcünutueyu ñi mongen

QUIÑE hueche tremümngefui Chau Dios ñi rüpü mu, huelu püntütripai, ¿chem quellueyu ñi huiñotual? Quiñe hueche nienolu chau, ¿chumngechi quimürpui ñi nien quiñe rüf cüme chau? Peafiyiñ chem ñi nütramcael engu.

“Raquiduamtucun tañi huiñotual Jehová meu” (ELIE KHALIL)

TRIPANTU ÑI CHOYÜNGEEL: 1976

CHEU ÑI TUHUN: CHIPRE

ÑI RUPAN: PÜNTÜTRIPALEFUI JEHOVÁ MU

TAÑI CUIFI MONGEN: Choyüngen Chipre, huelu tremümngen Australia mu. Tañi pu chau testigo de Jehová ngefui. Yafüluhuingu tañi quimeltuaeteu Jehová mu ca Biblia. Huelu huechengelu, ayün tañi quisu ngünehual. Pun ellca tripaquefun, trahuquefuiñ taiñ pu hueni iñchiñ tañi hueñeal auto. Rume huesa portaquefun.

Ellaca mu ellca femquefun tüfa tañi lladcülcanoafiel tañi pu chau. Ñochiquechi llicahuelan. Tañi pu hueni hunencülefui iñche mu ca poyequelafuingün Jehová. Fei engün yeeneu huesa rüpü meu. Tüfa müna huesalcaeneu, ayühuelan tañi testigo de Jehova ngeal. Tañi pu chau tüngcülen mu ayüfuingu tañi quelluaeteu, huelu iñche pilan. Müna hueñancüingu.

Rupachi antü mu, mülehuelan tañi ruca mu. Conün drogatual. Nganquefuiñ ti marihuana ca alün fendequefun. Podngechi mongen yeniequefun ca rumel amuquefun discoteca mu. Pürüm illcuquefun trürnon mu iñche tañi feipin ca quehuatuquefun. Com tañi feipieteu ñi pu chau ñi femnoal, iñche femquefun.

TI BIBLIA CÜME ELCÜNUTUENEU ÑI MONGEN: Hueniyerpufiñ quiñe drogadicto, petu pichicalu lai tañi chau. Epe hunmaquefuyu tayu nütramcan. Quiñeque rupa feipiqueneu tañi hueñancütuquefiel tañi chau. Iñche am petu pichicalu quimfilu ñi müleal ti huiñomongetun, iñche feipifiñ tañi hueni, Jesús tañi huiñomongeltun pu layelu ca ñi femal cüpalechi antü meu (Juan 5:28, 29). Feipifiñ: “Huiño petuaimi tami chau, ca com rumel müleaiñ tati hue mapu mu”. Tüfachi maneluhun puhui tañi piuque mu.

Quiñeque mu, tañi hueni nütramcaquefui afaelchi antü ca tati Trinidad dungu. Iñche pengelelfiñ Biblia meu tati rüf dungu (Juan 14:28; 2 Timoteo 3:1-5). Doi tañi nütramcalelfiel tañi hueni, doi raquiduamquefun Jehová meu.

Ñochiquechi acordatun tati rüf dungu tañi pu chau piuqueyen mu quimeleteu. Quiñeque mu mülequefun fiesta mu, drogatumequen acordarumequefun Jehová. Tañi pu hueni feipiquefui ñi poyefiel Chau Dios, huelu re huenche hun mu müten. Iñche ayülan ñi felerpual fei engün reque, feimu raquiduamtucun tañi huiñotual Jehová meu.

Iñche quimniefun chem tañi femal, huelu cüdaungei femal quiñeque dungu. Cüdautulan tañi elcünuafiel ti droga ca tañi pu hueni, ca tañi estudiayafiel Biblia.

Huelu rume cüdautun tañi pürüm illcunoal. Quiñeque mu ngüneuquefun tañi illcun mu, huelu pürüm ca illcurumequefun, feimu culpatuuquefun ca ngañhuadquefun. Feimu nütramcafiñ tañi peñi quimeleteu Biblia. Ñi tüng chengen mu ca poyechefengen mu, rume quellueneu. Quiñe rupa feipieneu ñi estudiayal quiñe troquiñ La Atalaya ñi falin-ngen tañi afeluunoal. * Pefiyu tañi chumal pürüm illcurumeli. Loncontucufiel mu ti troquiñ La Atalaya ca ñi llellipufiel mu, ñochiquechi ngünehun tañi illcufemhuenoal. Fei hula 2000 tripantu mu fautizahurpun, tüfa queta rüf ayühueleyu tañi pu chau.

CHEM CÜMELCAN LLOHUN: Drogatuhuelan ca niehuetulan ti pod mongen, tüngcülehuetui tañi raquiduam. Com tañi femqueel feula doi ayühueleneu.

Tañi pu chau cüme inayentufingu ta Jehová, fentecünulaingu tañi quellueteu, feimu rume mañumquefiñ ta Jehová. Ca raquiduamquen Jesús tañi feipin mülelu Juan 6:44: “Inei rume pepi cüpalayafui ta iñche meu, iñche ñi Chau ta cüpalnoeliyu”. Nengümuhui tañi piuque quimün mu Jehová tañi huiñoltueteu quisu mu.

“Ayüfun nieal quiñe chau” (MARCO ANTONIO ALVAREZ SOTO)

TRIPANTU ÑI CHOYÜNGEEL: 1977

CHEU ÑI TUHUN: CHILE

ÑI RUPAN: ENTUQUEFUI MUSICA HEAVY METAL

TAÑI CUIFI MONGEN: Tañi ñuque tremümeneu Punta Arenas, quiñe tüngcülechi huaria mülelu afal chi mapu Chile meu. Tañi pu chau hudahuingu iñche nielu quechu tripantu. Quisucünungelu troquihun, ayüfun nieal quiñe chau.

Tañi ñuque estudiaquefui pu testigo de Jehová engu. Amuquefuyu trahun meu. Iñche üdequefun amual trahun meu, rüpütulen mu illcurumequefun. Nielu iñche mari cüla tripantu amuhuelan.

Feichi meu deu ayüfiñ ti musica ca ngüneduamün ñi pepilfiel. Mari quechu tripantu nielu iñche, adümfiñ tati musica heavy metal pingelu. Tüfa pengelquei hueñancün dungu ca quehuan dungu ca lan dungu. Amuquefun festival meu, bar meu tañi pengelal ti musica. Adümuhun-ngechi musico engu trahuquefun, femngechi ayüfiñ caquelu musica. Amun tañi estudiayal musica quiñe escuela meu. Nielu iñche 20 tripantu, huiñamtuhun Santiago huaria tañi doi estudiayal. Amulerpun tañi entual musica heavy metal pingelu.

Femfun rume tüfa, hueñancülequefun. Tañi doi cüme duamcüleal, ngollicauquefun, drogatuquefun tañi pu hueni engün. Ayüfun ñi quisu ngünehual müten, feimu tucuquefun re curü ropa, cupiluuquelafun ca payuntuuquelafun.

Tañi femngen mu, conquefun quehuatun dungu mu, feimeu presungequefun. Pu fendequelu droga quiñe antü ayentueiñmu. Iñche am ngollilelu quehuafiñ, feimu ahucangen, trafoñmangen tañi trangatranga.

Huelu doi cutrantuleneu tañi poyenque che. Quiñe antü quimtucun tañi doi cüme hueni ellca poyeñmaeneu tañi ayün domo. Com tañi pu hueni quimniefui, huelu chem rume feipingelan. Feita rume cutrantuleneu.

Huiñotun Punta Arenas mapu. Cüdahun quimeltual musica ca violonchelo dungulafiel. Ca grabaquefun heavy metal pingechi musica. Feimeu quimfiñ Sussan, quiñe cüme ad üllcha domo. Rupachi antü eluhuiyu tayu trür müleal. Quiñe antü Sussan quimi tañi ñuque feyentuquei Trinidad quimeltun, huelu ca quimi iñche ñi feyentuquenon tüfachi quimeltun. Fei ramtueneu: “¿Chuchi am ti rüf dungu?”. Fei feipifiñ: “Biblia pengeli feichi quimeltun tañi coilangen. Iñche pepi pengelel-layafeyu, huelu pu testigo de Jehová femafuingün”. Feimu llellipufiñ ta Jehová tañi quelluaeteu, femhuequelafun tüfa fütra cuifi.

Pichin antü müten rupalu, pefiñ quiñe huentru quimfiel troquifiñ. Fei ramtufiñ ñi testigo de Jehová ngen. Mai pieneu. Tañi tucutun, ¿llicalcapelaeyu? Huelu piuqueyenquechi huiñoldungueneu tañi ramtun. Feipieneu chem antü mülequei trahun. Tüfa pengeleneu Jehová ñi allcütuñmaeteu ñi llellipun. Amun Trahunhue Ruca meu. Doi furi meu anüpun tañi rume pengenoal. Huelu, alün che quimfemtueneu. Poyen meu chalipaeneu ca pancoeneu engün, feimu rume tüngcülehuen. Huiñotulu tañi ruca meu troquihun. Pefilu tati peñi ñi quimeltueteu pichicalu iñche, feipifiñ tañi huiño quimeltuaeteu.

TI BIBLIA CÜME ELCÜNUTUENEU ÑI MONGEN: Quiñe antü papeltufiñ Proverbios 27:11, feipi: “Fotüm, quimchengeaimi ca ayühulelman tañi piuque”. Afmatuleneu ñi quimün quiñe culpafe che ñi ayühuelmayafiel Chau Ngünechen tañi piuque. Femngechi quimfiñ tañi Chau tañi quintuyahulquen: Jehová llemai.

Cüpa ayühuelquefuiñ tañi Chau Jehová, huelu yeniequefun alün tripantu tañi putufengequeel ca drogatuqueel. Fei quimtucun Jesús ñi feipin huiriconcülelu Mateo 6:24: “Inei rume ta poyelayafui epu ülmen huentru tañi mür cüdahuelafiel”. Petu cacünutulu ñi mongen, rume quellueneu 1 Corintios 15:33 feipilu: “Tati huesaque compañ huesalcaquefi tati cüme huimtun”. Feimu tañi elcünual tañi huesaque huimtun, ca mülefui elcünual tañi huesaque hueni. Biblia ñi feipiel, tañi cüme serfiafiel Jehová mülefui ñi elcünual quiñeque huimtun, cüdaungefule rume (Mateo 5:30).

Rume falintuquefuiñ tati musica heavy metal. Tüfachi musica tañi pengelqueel ayühuelquelafi ta Jehová, feimu mülefui tañi elcünuafiel heavy metal, fei ¡rume cüdautun anai! Huelu tañi pu hueni poyequefilu Jehová quellueneu, femngechi elcünun tati heavy metal. Ca elcünun tati ngollicahun, ca ti droga ca cupilün tañi lonco ca payuntuhun, ca tucutuhuelan re curü ropa meu müten. Feipifilu ta Sussan tañi cupiluhual, rume afmatui, fei cüpa amui taiñ trahun meu tañi pemeal taiñ chumquen. Müna cüme duameleyu tañi peel, feimeu pürüm ayüi tañi estudiayafiel Biblia. Pichi rupachi antü niehuiyu. Fei 2008 tripantu fautizahuiyu. Fachantü ayühunquechi serfiquefiyu ta Jehová ca tañi ñuque iñchiñ.

CHEM CÜMELCAN LLOHUN: Feula niehuetulan coila ayühun ca coilaque hueni. Petu ayüquefiñ ta musica, huelu feula doi cüme dulliquen chem musica tañi allcütual. Nütramcaquefiñ tañi pu familia ca caquelu che chem ñi rupan iñche, femngechi ñi quelluafiel engün, doyelchi mai tati pu huechequeche. Quiñeque dungu mülelu tüfachi mapu meu, rüf ayühuelaeneu piafuingün pu hueche, huelu re “falinochi dungu” ürque (Filipenses 3:8). Cüpa quelluquefiñ pu hueche ñi quimtucual tüfa.

Tañi fülcontufiel mu ta Jehová, pen cümeque hueni trahunche mu, rüf piuqueyeuqueiñ ca tüngcülequeiñ. Doyelchi mai, feula nietun quiñe rume cüme Chau: Jehová llemai.

[Quimngeal dungu]

[Feipin]

“Nengümuhui tañi piuque quimün mu Jehová tañi huiñoltueteu quisu mu”