• TRIPANTU ÑI CHOYÜNGEEL: 1963

• CHEU ÑI TUHUN: GRAN BRETAÑA

• ÑI RUPAN: ELCÜNUI FALINQUE CÜDAU

TAÑI CUIFI MONGEN:

Iñche choyüngen quiñe huaria fülcülelu Londres mu. Tañi pu chau tuhuingu quiñe huapi San Vicente pingelu. Ailla lamngen-ngefuiñ. Tañi ñuque coneltulefui Iglesia Metodista mu, huelu iñche duamtuquelafun. Pichicalu müten, ayüquefun fillque dungu tañi quimal. Vacaciones mu epe fill antü amuquefun ina lafquen ñi chillcatumeal fentren lifru.

Rupalu quiñeque tripantu ñi deulu ñi colegiotun, eluhun ñi quelluafiel pu nienolu quellu. Hunelu mu quellufiñ ti nienolu ruca, pu cutran che ca pu cuñifallcülelu. Fei amun universidad mu ñi chillcatumeal chumngechi doi cüme quelluafiel ti che tañi doi cümelcaleal. Tripalu universidad mu, rume cümeque cüdau niequefun. Cullingequefun fentren plata, feimu chem rume ñi ayüqueel pepi ngillañmuquefun. Rupachi tripantu mu, quisu ñi duam mu cüdahurpun, duamniefun quiñe computador müten ca internet. Rumel amuquefun fentren troquiñ mapu ca mülenagquefun ülmenque hotel mu. Cüdaucülequefun, huelu ca eluuquefun ñi cüme rupaleal. Raquiduamquefun ñi rume cüme mongen yenien, huelu ca raquiduamtucuniequefun pu che huesa rupalelu.

TI BIBLIA CÜME ELCÜNUTUENEU ÑI MONGEN:

Fentren tripantu meu ramtuhun: “¿Chumal am mongeleiñ?”. Huelu turpu quintulan huiñoldungun Biblia mu. Quiñe antü 1999 tripantu mu, pepaeneu tañi lamngen Margaret quiñe hueni engu. Mür Dunguquelu Ineingen Jehová ngeingu. Ti hueni piuqueyen mu nütramcaeneu, feimu inaduamlan rume chumngechi ñi lloufiel tañi quimeltuaeteu Biblia mu. Huelu fentren cüdau nielu iñche ca fill duam, rume ñochiquechi amulefui ñi chillcatun Biblia.

Feichi 2002 tripantu mu huiñamtuhun ca huaria mu Inglaterra mapu mu. Fei ca huiño conün universidad mu tañi doi chillcatual. Feichi huaria mu eluhun ñi trahuluhual fill semana pu Dunguquelu Ineingen Jehová engün, ca yequefun tañi pichi huentru püñeñ. Iñche fentren estudio niequefun, huelu estudiafilu Biblia, fei hula quimürpun fillque dungu tañi ramtuuquefel. Ca femngechi ngüneduamürpun rüfngei tañi feipin Mateo 6:24, pepi poyengequelai Chau Dios ca tati plata. Tüfa quellueneu ñi quimal chem doyümafiel tañi mongen mu.

Fei 2001 tripantu mu, iñche amuquefun ñi estudiayal Biblia quiñeque testigo engün. Quiñentrür estudiaquefuiñ ti lifru ¿Existe un Creador que se interese por nosotros? a Femngechi quimürpun Chau Jehová müten cümelcacünutuafi itrocom huesaque dungu. Huelu feula huiño conlu iñche universidad mu, quimeltungequefun duamfalngelai Chau Dios taiñ rüf ayüucüleal. Feita rume lladcüleneu. Epu cüyen müten yeniefun tañi estudiamequen universidad mu, huelu elcünufiñ. Fei eluhun tañi doi fülconal Chau Dios mu.

Ñi feipin Proverbios 3:5, 6 quellueneu ñi doi cüme adcünutual tañi mongen. Tüfa feipilei: “Maneluunge Jehová meu com tami piuque mu, ca eimi tami raquiduam mu recüluuquinolnge. Com tami rüpü meu raquiduamanieafimi, ca quisu norümaimu cheu tami miyahual”. Iñche fentren estudio niequefun, fentren plata ca quiñe cüme cüdau. Huelu chem no rume trürümngelayafui tañi quimfiel ta Chau Dios. Feita doi ayühueleneu. Doi piuquentucurpun Jehová ñi cüpalal fentren cümeque dungu ca ñi femün Jesús iñchiñ taiñ montulaeteu, femngechi doi ayürpun tañi serfiafiel ta Jehová. Abril 2003 tripantu mu fautizahun iñche. Fei doi cüme adcünutun tañi mongen tañi doi cüdahuelafiel ta Jehová.

CHEM CÜMELCAN LLOHUN:

Tañi hueniyefiel ta Jehová doi falin-ngei chem dungu meu rume. Quisu elueneu rüf tüngün ca ayühun. Ca femngechi rume ayüucülen ñi hueniyefiel Jehová tañi pu hueni.

Fentecünuquelan ñi quimürpual hueque dungu. Huelu feula doi quimürpuquen Biblia mu ca taiñ trahun mu. Feita rume ayühuelqueneu. Cafei ayühunquechi amuldungulelquefiñ ta che Jehová tañi cümeque dungu. Feula doyümniequefiñ feitachi amuldungun cüdau tañi mongen mu. Feimu junio 2008 tripantu mu eluhun tañi doi amuldungucheal. Femngechi quelluquefiñ ta che ñi doi cüme feleal feula ca maneluhurpuquei ñi rumel mongeleal. Feula rüf ayüucülen. Quimnien chem chumal tañi mongen mu, feimu rume mañumniefiñ tañi Chau Jehová.

• TRIPANTU ÑI CHOYÜNGEEL: 1973

• CHEU ÑI TUHUN: AUSTRIA

• ÑI RUPAN: AUCANTUQUEFUI ÑI HUEHUAL PLATA

TAÑI CUIFI MONGEN:

Choyüngen quiñe pichi huaria mu Austria mu mülelu. Feiti mu mülefui ülmenque che ca müte ngelafui hueñefe. Tremümngen quiñe familia catolica mu.

Quiñe antü 1984 tripantu mu, iñche niefun mari quiñe tripantu, pelotatulefun quiñe cüme hueni iñchiu. Pichi rupalu, feichi antü mu müten tañi hueni nierumei quiñe accidente, fei latripai. Ñi lan tañi hueni rume huesa duameleneu fentren tripantu. Ramtuuquefun chumlequetun tati pu layelu.

Rupalu quiñeque tripantu, tripan colegio mu fei electricistangetun. Pichi rupalu, eluhun ñi aucantual tañi huehual plata. Fentren plata apuestaquefun, huelu pofrequelafun. Elcünuquefun fentren tiempo tañi deportetual. Ca ayüquefun ti musica heavy metal ca ti musica punk pingelu. Podngechi mongen niequefun, huedhuedcauquefun ca amuquefun fentren fiesta mu. Femquefun com tañi ayüqueel, huelu rüf ayüucülequelafun.

TI BIBLIA CÜME ELCÜNUTUENEU ÑI MONGEN:

Quiñe antü 1995 tripantu mu, puhui tañi ruca mu quiñe fücha huentru, fei coneltulei pu Dunguquelu Ineingen Jehová mu. Fei pengeleleneu quiñe lifru Biblia meu tripalu. Huiñoldungui ti ramtun “¿Chumlequetui tati pu layelu?”. Iñche petu hueñancülequefun ñi lan mu tañi hueni, feimu lloufiñ tati lifru. Com papeltufemfiñ ti lifru.

Papeltufiel mu iñche ti lifru, quimürpun chumlequetun tati pu layelu ca fentren caquelu dungu. Pu catolico mu tremlu am iñche, doi falintuquefun ñi feyentual Jesús mu. Huelu tañi papeltufiel Biblia quellueneu ñi hueniyeafiel Jesús tañi Chau, Jehová pingelu. Ayühunquechi quimürpun Jehová taiñ duamnieteu ca ayüniei taiñ quimafiel (Mateo 7:7-11). Ca quimürpun iñchiñ taiñ femquen mu ayühuelafuiñ ta Jehová ca huesa duamelafuiñ. Ca quimürpun ñi rumel huechunentuquen ñi feipicünuel. Feimu eluhun tañi doi ngüneduamal chumngechi ñi femtripaquen tañi feipicünuel Biblia. Femngechi doi maneluhurpun Ngünechen mu.

Pürüm ngüneduamün pu Dunguquelu Ineingen Jehová müten rüf quelluquefi pu che ñi adümafiel ti Biblia. Papeltufiel mu iñche pu Dunguquelu Ineingen Jehová ñi lifru, pequefun quiñeque troquiñ Biblia, fei quintuquefun tañi Biblia catolica mu. Doi chillcatufiel mu Biblia, doi maneluhurpun tañi pefiel tati rüf dungu.

Papeltufiel mu Biblia, quimürpun Chau Jehová ayüniei iñche ñi inayafiel tañi ngülam. Papeltulu iñche Efesios 4:22-24, quimürpun ñi elcünual tañi cuifi mongen ca tañi huesaque huimtun, fei tañi nietual hue cüme mongen chumngechi ñi ayüqueel ta Ngünechen. Feimu elcünun tañi podngechi mongen ñi yeniequefel. Cafei aucantuhuelan tañi huehual plata, tüfachi aucantun meu am pu che rume diñmatuquefilu ta plata (1 Corintios 6:9, 10). Tañi norcünutual ñi mongen, mülefui ñi elcünual tañi cuifique hueni, doi mai ñi hueniyerpuafiel Chau Dios tañi pu hueni.

Cüme elcünutual ñi mongen cüdaungefui, huelu eluulu ñi trahuluhual pu Dunguquelu Ineingen Jehová mu, pen cümeque hueni. Fentecünulan tañi papeltufiel Biblia ca raquiduamquefun tañi quimürpuel mu. Femngechi doi cüme dullitun chem musica tañi allcütual, chem chumal tañi mongen mu ca chumngechi tañi tucutuhual. Feichi 1995 tripantu mu fautizahun tañi serfiafiel ta Jehová.

CHEM CÜMELCAN LLOHUN:

Feula doyümhuequelafiñ ta plata. Cuifi pürüm illcufemquefun, feula tüng chengetun. Fill raquiduamcülehuelan chem ñi rupayal cüpalechi antü mu.

Ayüucülen ñi coneltulen quiñe fütra troquiñche mu. Huall Mapu püle poyequefingün ta Jehová. Rupan mu rume huesaque dungu mu, püntütripaquelaingün Jehová mu. Feula doyümhuequelan ñi femal iñche tañi ayüqueel, doi mai Jehová tañi ayüqueel ca ñi quelluafiel caquelu pu che. Tüfa rüf ayühuelqueneu.

• TRIPANTU ÑI CHOYÜNGEEL: 1963

• CHEU ÑI TUHUN: INGLATERRA

• ÑI RUPAN: QUIMLAFUI ÑI CHUMAL TAÑI MONGEN MU

TAÑI CUIFI MONGEN:

Choyüngen Inglaterra mapu mu. Nielu iñche regle tripantu, huiñamtuhuiyiñ Australia mapu mu. Ricungelafuiñ, huelu niefuiñ com taiñ duamnieel.

Chem rume faltalelafun, huelu ayüucülelafun. Tañi chau ngollifengefui ca rume huesalcaquefui tañi ñuque. Feimu iñche piuqueyequelafuiñ. Mufüque tripantu rupalu hula, quimürpun fente ñi cutrancahun tañi chau petu ñi hueichafengefel ca mapu. “Feimu peno femngechi chengefui tañi chau” pin.

Ella hueche huentrungelu, conün ngollin dungu mu. Nielu mari cayu tripantu, elcünun ti colegio, fei conün ejercito mu. Feichi mu pütremturpun, drogaturpun ca ngollifengerpun. Ellaca mu, sabado ca domingo antü mu müten ngollicauquefun. Huelu rupalechi antü, fill antü ngollicauquefun.

Nielu 20 tripantu peno, ramtuuquefun: “¿Rüf feingepei mai ñi mülen ta Dios?”. Feipiquefun: “Rüf mülefule, ¿chumngelu chumquelai rume taiñ cutrancaunoal ca taiñ lanoal?”. Iñche huiriquefun poema, fei mu cütu ca culpatuquefuiñ Dios ñi mülen cutrancahun.

Nielu 23 tripantu, elcünun ti ejercito. Fei nierpun fillque cüdau ca quiñe tripantu mu miyahun fentren mapu mu. Huelu felecan müten ñi huesa duamcülen. Quimquelafun chem chumal tañi mongen mu, chem no rume ayüumaquelafeneu. Ayüquelafun ca cüdauquelafun ñi nieal quiñe ruca ca quiñe cüme cüdau, re ngünam dungu troquiquefuiñ. Ayühuelquefeneu re ngollicahual ca allcütual musica müten.

Mülepulu iñche Polonia mu, quiñe antü amun ñi pemeal cheu ñi mülequefel quiñe campo de concentracion, Auschwitz pingelu. Iñche chillcatuquefun ca allcüquefun ñi cutrancangequen ca ahucangequen fentren che üye mu. Huelu mülepulu iñche üye mu, rume hueñancünagün. Raquiduamcülehuen, ¿chumngechi fel chi fente huesa piuquengei quiñeque che? Petu trecayaulu feichi campo de concentracion mu, llancünagi tañi cülleñu. Fei ramtuhun: “¿Chumngelu fente cutrancangei ti che, fei ñi chem chumnon rume?”. Feichi antü ayün ñi quimal chumngelu taiñ mülen Mapu mu.

TI BIBLIA CÜME ELCÜNUTUENEU ÑI MONGEN:

1993 tripantu mu huiñotun Australia mapu mu. Fei eluhun tañi quintual huiñoldungun Biblia mu. Pichi rupalu müten, acui tañi ruca mu epu Dunguquelu Ineingen Jehová. Fei mangeleneu quiñe fütra trahun mu ñi femngeal quiñe fülcülechi estadio mu. Fei amun.

Iñche deu amufun feichi estadio mu ñi peal quiñe partido. Huelu trürlai rume tati fütra trahun mu. Pu Dunguquelu Ineingen Jehová cüme chengeingün, cüme tucutuucüleingün ca tañi pu pichiqueche cüme portaqueingün. Rangiantülu, pu Dunguquelu Ineingen Jehová anücünuhuingün cachu mu tañi iyal. Huitrapüratulu engün, chem no rume tranacünulafingün. Iñche ülalehuei tañi hun. Huelu doi afmatuleneu ñi tüngcülen ca ñi ayüucülen engün. ¡Fei ürque tañi duamniefel iñche! Acordalan chem hueupin no rume ñi allcütufiel feichi antü. Huelu turpu ngoimaquelan ñi cümeque chengen pu Dunguquelu Ineingen Jehová.

Quiñe tañi pu primo papeltuquefui Biblia ca ngüneduamquefui fillque religion. Quiñe antü feipieneu Jesús ñi feipin tañi femün meu quimfalngeai tati pu rüf cristiano (Mateo 7:15-20). Feimu feula deulu tati fütra trahun, iñche acordan tañi feipieteu. Feimu raquiduamün, mülefui tañi ngüneduamal chumngelu pu Dunguquelu Ineingen Jehová trürlai caquelu religion mu. Feichi antü, “feula doi ayühun mongen nietuafun chi” pin. Turpu femngechi raquiduamquelafun.

Quiñe semana rupalu, ti epu Dunguquelu Ineingen Jehová tañi mangeleteu fütra trahun mu huiñotuingu tañi ruca mu. ¿Cüpa chillcatuimi Biblia? pingen. Mai pifiñ. Ca eluhun ñi amual pu Dunguquelu Ineingen Jehová ñi trahun mu.

Papeltufiel mu Biblia iñche, huesa raquiduamhuetulan Chau Dios mu. Ca quimürpun Chau Dios turpu ayüquelai taiñ cutrancahual ca ñi müleal huesaque dungu. Doi mai huesa duamquei pefiel mu pu che ñi femquen huesaque dungu (Génesis 6:6; Salmo 78:40, 41). Eluhun tañi femal cümeque dungu tañi hueñancülnoafiel ta Jehová. Doi mai ayüfun tañi ayühuelafiel (Proverbios 27:11). Feimu pütremtuhuelan, ngollihuelan ca femhuelan podngechi dungu. Fei marzo 1994 tripantu mu fautizahun tañi poyeafiel ta Jehová.

CHEM CÜMELCAN LLOHUN:

Feula rüf ayüucülen. Duamhuelan pulcu tañi cüme duamtual. Doi mai huesa duamcülen mu, llellipuquefiñ ta Jehová (Salmo 55:22).

Nierpun quiñe cüme domo Karen pingelu. Quisu ca poyequefi ta Jehová. Mari tripantu yenieyu tayu niehun. Ñi domo ñi püñeñ Nella pingei, müna cüme piuquengei. Ayühunquechi amuldunguqueiñ com taiñ nehuen mu ca quelluquefiyiñ pu che ñi quimafiel engün ta Jehová. Feula llemai quimnien chem chumal tañi mongen mu.