Choyüngen Santo Domingo mu, tati doi falin huaria República Dominicana mu. Nien epu peñi ca quiñe deya, iñche tati inan-ngelu. Tañi pu chau nierquei cüme educacion, ayüquefuingu taiñ tremümngeal cümeque che engün. Meli tripantu petu ñi choyüngenon iñche quimürpuingu quiñeque misionero mormon. Afmatui engu tañi cüme chengen ca tañi cüme tucutuucülen. Müchai müten taiñ familia coneltulerpui tati Iglesia de Jesucristo de los Santos de los Últimos Días, Iglesia Mormona ca pingelu. Tañi pais mu pichin che müten coneltulerquefui feichi mu.

Iñche quelluntucuquefun tati fillque trahun ñi femquen ti iglesia. Huelu doi ayüquefun ñi falintuniefiel engün tati familia ca ñi yenieal lif mongen. Rume ayüquefun ñi mormon-ngen, feimu misionerongean pilefun.

Nielu iñche mari pura tripantu tañi familia huiñamtuhui Estados Unidos mapu mu, femngechi ñi amual iñche cüme universidad mu. Quiñe tripantu rupalu, Florida mu pepaeiñmu tañi palu ñi füta engu, Dunguquelu Ineingen Jehová ngei engu. Fei mangeleiñmu taiñ amual quiñe fütra trahun ngüneduamngealu Biblia. Rume afmatulehuen pu che ñi quintufiel ñi chem pin Biblia ca ñi huirintucuquen falinque dungu, feimu aretun papel ca lapiz ñi ca femngechi femal.

Aflu chi fütra trahun, ñi palu tañi füta engu feipieneu ñi doi quimeltuaeteu Biblia mu, cüpa misionerongelu cai iñche. Cümei pin, müte quimlafiñ ta Biblia, doi quimfiñ ti Libro de Mormón.

Amutulu engu, mütrümquefeneu taiñ nütramcayal Biblia mu. Yafültucuqueneu engu ñi ngüneduamafiel iñche ñi feyentuqueel ca ñi chem pin ta Biblia. Ayülefuingün iñche tañi quimürpual ti rüf dungu.

Cümelu troquiquefun fillque dungu tañi religion mu. Huelu, ¿rüf quiñeucülepefui mai Biblia ñi feipin mu? Quimlafun. Tañi palu mandaeneu ti revista ¡Despertad! tripalu 8 conchi Noviembre 1995 tripantu mu, ñi entuel pu Dunguquelu Ineingen Jehová. Feichi revista nütramcai pu mormon ñi quimeltun. ¡Afmatulehuen! Cüme quimlafun fillque dungu ñi feyentuqueel tañi iglesia. ¿Rüfngepei mai ñi feipin ti revista? pin. Feimu ngüneduamün pu mormon ñi sitio de internet. Cafei amun fillque museo ñi nien pu mormon Utah mapu mu. Rüfngei llemai com ñi feipin ti revista.

Iñche raquiduamquefun tati Biblia ca tati Libro de Mormón quiñeucülei ñi feipin. Huelu doi papeltulu iñche tati Biblia, quiñeucülelai pin. Quiñe dungu: Ezequiel 18:4 ti Biblia feipi ti alma ñi laquen. Huelu ti Libro de Mormón, Alma 42:9 mu feipi: “Ti alma laquelai”.

Huelu feica müten no, ca hueluraquiduameleneu pu mormon ñi doi falintuquefiel ta Estados Unidos. Por ejemplo feipiqueingün Edén lof mülequefui Estados Unidos mapu meu, Jackson, Misuri troquiñ mapu mu. Cafei pu mormon ñi pu loncolelu feipiqueingün Chau Dios adcünuafi Estados Unidos ñi gobierno tañi ngünenieafiel com ti Mapu.

Feimu ramtuuquefun chumngeai tañi pais ca ti pu caquelu. Quiñe antü mütrümeneu quiñe che, fei estudiamequefui ñi misionerongeal. Ramtufiñ “Tami pais hueichamequeule cangelu pais engu, ¿hueichayafimi pu mormon feichi pais meu mülelu?”. Mai feipieneu. Afmatulehuen, fei doi ngüneduamün ñi feyentuqueel pu mormon ca ramtufiñ quiñeque fütraque loncolelu. Cüpalechi antü mu quimfalngeai tüfachi dungu, huelu petu quimfal-lai pieneu engün.

Tañi feipin engün huesa duameleneu. Ramtuhun “Rüfcünu, ¿chumngelu cüpa misionerongen?”. Ngüneduamün ñi cüpa quelluquefiel ta caquelu che, cafei ayüquefun ñi yamniengeal. Huelu müte quimlafiñ ta Chau Dios. Fentren rupa papeltuquefun quiñeque troquiñ Biblia mu, huelu rüf falintuquelafun. Cafei quimlafun chumngechi ayüniei Chau Ngünechen ñi feleal ti Mapu ca tati pu che.

Chillcatulu iñche ti Biblia pu Dunguquelu Ineingen Jehová engün quimürpun fentren dungu: inei pingei Chau Ngünechen, chumlequetui pu layelu, chumquei Jesús ñi femtripayal Chau Dios tañi ayünieel. Feulaque ta eluhun ñi quimürpuafiel tüfachi falin lifru ca rume ayüquen ñi nütramcalelafiel caquelu che chem tañi quimürpuel. Quimquefun ñi mülen ta Chau Ngünechen, huelu feula nütramcaquefiñ, rüf hueniyequefiñ llemai. Ñi Dunguquelu Ineingen Jehová ngeal fautizahun 12 conchi julio 2004 tripantu mu. Cayu cüyen rupalu, eluhun ñi huneleal amuldungun mu.

Cüdahun quechu tripantu tati fütra Betel ruca ñi nieel pu Dunguquelu Ineingen Jehová Brooklyn, Nueva York mu. Rume ayühun ñi pichi quelluntucual ñi deumangeal Biblia ca fillque papel. Tüfa cümelcafi fentren che huall Mapu mu. Rume cüme duamcülen ñi quelluniefiel tati pu che ñi quimafiel ta Chau Ngünechen.