Petu pichicalu iñche, rume ayüquefiñ chi lelfün. Iñche ca tañi familia huimtulefuiñ taiñ pemeal tati mahuida ca leufü püllelelu tañi huaria mu, Jiväskylä pingelu. Cafei rume piuqueyeniefiñ tati pu culliñ. Petu pichicalu iñche ayüfun ñi pancocafiel com pu trehua ca ñarqui. Tremlu iñche, müna huesa duameleneu pu che ñi cutrancafiel tati pu culliñ. Fei coneltun quiñe organizacion ñi incayafiel tati pu culliñ. Feichi meu pefiñ pu che raquiduamlu iñche reque.

Fillque dungu femquefuiñ taiñ incayafiel tati pu culliñ. Hulquefuiñ tati pu che fillque papel ca protestaquefuiñ ñi chaftuafiel tati laboratorio ca tati empresa deumaquelu trülque. Feimu deumaiñ quiñe organizacion ñi incañpeafiel pu culliñ. Fente taiñ pofolcachequefun culpaiñ pu autoridad meu, feimu fentren rupa presuntucungeiñ ca juzgangeiñ.

Raquiduamtucuniequefun fill huesaque dungu rupaquen Mapu mu, feimu coneltun Amnistía Internacional ca Greenpeace mu. Com tañi nehuen mu quelluntucufiñ. Cafei incañpefiñ pu ngüñülelu ca feiti pofrengelu.

Rupachi antü mu, quimtucun iñche cambialayafun chem ñi rupamequen Mapu mu. Pichin doi cüme elcünutuiñ quiñeque dungu, huelu ti doi fütraque dungu felerpui ñi huesalcalen. “Inei rume duamlai ñi chumlerpual chi Mapu fachantü”, raquiduamquefun. Com tañi femqueel duamfal-lai troquiuquefun.

Cuifi mu, chillcatuquefun Biblia pu Dunguquelu Inei Ngen Jehová engün. Rume falintuquefiñ ñi llaumachefengen engün. Feichi meu pepicaucülelafun ñi cüme elcünutual ñi mongen. Huelu rupalu ta antü, fente tañi huesa duamcülen, caletui ñi raquiduam. Feimu raquiduamün Chau Dios mu ca Biblia meu.

Quintun ñi Biblia ñi papeltual. Tremoleneu ñi allfün piuque reque. Papeltun fillque texto Biblia meu ngülamtueiñmu taiñ cuñiutucunieal tati pu culliñ. Proverbios 12:⁠10 feipi tati cümeque che “cuñiutucuquefi tañi pu culliñ”. Cafei quimtucun Chau Dios cüpalquelai huesaque dungu, doi mai fentrenque che inaniequelai Jehová tañi ngülam, feimu huesaque dungu rupaquei. Quimürpufiñ Jehová tañi piuqueyechefengen ca ñochi duampiuquengen, feimu nengümuhui tañi piuque (Salmo 103:⁠8-14).

Feichi antü meu pefiñ quiñe cupon. Huercüfiñ correo mu, fei ñi huercülelngeal chi lifru Tati Biblia ñi rüf kimeltukeel. Rupalu ta antü, epu Dunguquelu Inei Ngen Jehová acui tañi ruca mu. Ramtueneu: “¿Ayüafuimi tami estudiayal ta Biblia?”. Fei “mai”, pifiñ. Cafei eluhun ñi trahuluhual. Feimu com tañi quimelelngeel Biblia mu puhui tañi piuque mu.

Biblia tañi quellun mu cüme elcünutun tañi mongen. Pütremtuquelan ca ngollife ngehuelan. Cüme tacun nietun ca dunguhuelan ünufal dungu. Doi cüme raquiduam nietun tati pu autoridad meu (Romanos 13:⁠1). Cafei coneltulefulu rume cudumuhun dungu mu, huelu feula lif mongen nietun.

Rume falintuquefuiñ feiti organizacion incañpefilu pu culliñ ca pu che, fei rume cüdautun ñi reyüconcülehuenoal. Müna huesa duamcülefun tañi coneltuhuenon. Huelu ngüneduamün Jehová tañi Gobierno müten cüme elcünutuafui chi Mapu. Feimu com tañi nehuen mu quelluntucufiñ ca quimelelfiñ ta caquelu pu che (Mateo 6:⁠33).

Cuifi mu, raquiduamquefun ñi mülen epu troquiñche: pu cümeque che ca ti huesaque che. Fei rume caiñetuquefiñ pu huesaque che. Huelu feula Biblia ñi quellun mu üdehuelafiñ chi pu che, doi mai piuqueyeniefiñ (Mateo 5:⁠44). Tañi pengelelafiel pu che tañi piuqueyeniefiel, amuldungulelfiñ Biblia ñi cümeque dungu. Tüfachi cüdau quelluniefi pu che ñi tüngcüleal ca ñi cüme yeucüleal. Cafei elufi quiñe maneluhun, feimu rume ayüucülen.

Maneluucülen Jehová meu müten feimu tüngduamcülen. Jehová taiñ deumaeteu, apümafi pu che ca pu culliñ ñi cutrancahun. Cafei catrütuafi ñi huesalcangehuenoal chi Mapu. Doi mai Jehová tañi Gobierno mu, com cüme elcünutuafi (Isaías 11:⁠1-9). Iñche quimniefiñ Jehová ñi rüf dungu ca quelluniefiñ pu che ñi maneluhual Biblia mu, feimu rume ayüucülen. Raquiduamhuelan rume iñche ñi cüme elcünutual chi Mapu.