Choyüngen ca tremün quiñe pofrengechi lof mu Roma huaria meu. Rume cüdaungefui ñi mongen. Quimlafiñ tañi ñuque ca cüme yeuniequelayu tañi chau iñchiu, feimu quisu tremcülerpun.

Nielu 10 tripantu iñche, eluhun ñi hueñeal. Nielu 12 tripantu, elcünun tañi ruca. Huelu huiñotun. Fentren rupa entumetueneu tañi chau comisaria mu. Müna cüpa quehuaquefuiñ chi pu che ca lelicaquefiñ engün. Nielu 14 tripantu, elcünun ñi ruca, huiñomehuetulan. Drogatuquefun ca nielafun ruca tañi müleal. Feimu pun meu umautuquefun fillque auto calle mu mülelu. Pulihuen quintuquefun cheu tañi cüchahual.

Doi cüme hueñefe ngetun. Müntuñmaquefiñ bolsa tati pu che ca pun meu conquefun ruca mu ñi hueñeal. Quimfali ñi cüme hueñefe ngen. Feimu mangelngen ñi conal quiñe cuñihun-ngechi pandilla. Feimu cüme amulei ñi hueñefe ngeal ca hueñequen banco mu. Tañi cuñihun-ngechi chengen yamniengequen tati pandilla mu. Cheu rume amuli, miyahulquen tañi pistola ca umautulu iñche miñche almohada elcünuquen. Com tañi rupan mu quehuatuquefun, drogatuquefun, cudumdomoquefun ca huesa entuquefun ñi dungun. Feichi mongen niequefun. Tati pu soltau inantucuyahulqueneu engün ca fentren rupa presuntucuqueneu. Fentren tripantu rupan calle mu ca carcel mu.

Quiñe antü pemefiñ quiñe tia. Iñche quimlafun, huelu tañi tia ca epu primo Dunguquelu Inei Ngen Jehová ngetuingün. Mangeleneu tañi amual ñi trahunche mu, fei iñche amun ñi quimal ñi chumquen engün. Puulu iñchiñ Trahunhue Ruca mu, anünagpun hulngiñ puerta mu, femngechi tañi lelinieafiel inei tañi conpun ca inei tañi tripan. Iñche yeniefiñ tañi pistola.

Com ñi rupan feichi trahun mu puhui tañi piuque mu, ¡afmatulehuen! Feichi mu mülerquei ayüucülechi che. Fantepu mu ngoimaquelan pu Dunguquelu Inei Ngen Jehová ñi piuqueyechefengen. Com tañi pefiel feichi trahun mu trürlai tañi yeniequeel iñche tañi huesa mongen.

Eluhun ñi estudiayal ta Biblia pu Dunguquelu Inei Ngen Jehová engün. Amulelu tañi quimal ti Biblia, quimtucun tañi norümcünutual tañi mongen. Eluhun ñi inayafiel chi ngülam mülelu Proverbios 13:⁠20 mu, feipilu: “Quimche engu miyauquelu ca quimchengeai, huelu tati quiñeucülelu pu huedhuedcülelu engün huesa triparpuai”. Quimtucun tañi coneltuhuenoal tañi pandilla. Cüdautufun, huelu Jehová quellueneu.

Cafei liftun tañi cuerpo. Yafüluhun tañi pütremtuhuenoal ca drogatuhuenoal. Cupiluhun tañi lonco, entun tañi chahuai ca fill huesa dungu feipihuelan. Quimtucun tañi ngünehual.

Turpu ayüquelafun ñi papeltual ca estudiayal, feimu rume cüdautun tañi quim estudiayal chi Biblia. Femfulu rume, piuqueyerpufiñ Jehová ñochiquechi. Amulelu tañi papeltufiel Biblia, lef huesa duameleneu tañi raquiduam. Rume huesa duamcülequefun. “Jehová turpu perdonalayaeneu tañi huesa femün” piquefun. Tañi huesa duamcülen, Biblia mu papeltuquefiñ tañi rupan tati rey David ca chumngechi perdonaeyu Jehová ñi fütra culpan. Tüfa yafültucuqueneu (2 Samuel 11:⁠1-12:⁠13).

Cafei cüdautufun ñi amuldungual tati pu che tañi ruca meu (Mateo 28: 19, 20). ¡Rume llicafun tañi peal quiñeque che tañi huesalcafiel! Femfulu rume, ñochiquechi elcünun tañi llican. Fei cüme amulei tañi quimeltucheal, ayühun-ngechi dunguquefiñ tati pu che Jehová mu, taiñ Fütra Chau perdonachequelu.

Quimfilu Jehová, montuleneu tañi mongen. Cuifi tañi pu hueni epe com laingün ca carceltucungeingün. Huelu iñche doi ayüucületun ca maneluucülen tañi doi cümelcaleal cüpalechi antü mu. Quimtucun tañi ñom piuquengeal, tañi feyentual ca tañi ngünehual. Feimu quehuatuhuelan, fei tüfa quellueneu tañi cüme yeucüleal tati pu che engün. Nierpufiñ tañi cüme adngechi domo, Carmen pingelu, fei rume ayüucülen. Quiñentrür quelluquefiyu tati pu carucatu ñi quimeltulelafiel Biblia.

Petu tañi ngoimanon, quiñe cüme cüdau nietun. Quiñequechi cüdaucülen banco mu, huelu hueñehuequelafiñ, doi mai liftuquefiñ.