Petu pichicalu iñche, tañi familia mülefui Leipzig, Alemania mapu mu. Püllelei Polonia mu ca tati República Checa. Nielu 6 tripantu, amutuiñ ñi mülenagpual hune Brasil mapu mu, fei hula Ecuador mapu, tañi chau ñi cüdau mu.

Nielu 14 tripantu, huercüngen ta quiñe internado Alemania mapu mu. Tañi pu chau rume camapulefui, mülefuingu Sudamérica mapu mu. Feimu quimtucun tañi quisutu cuñiutuculeal. Inei no rume quelluquelaeneu, feimu quisutu femquen chem rume. Raquiduamlan rume chumngechi duamcülefui tati pu che tañi femün mu.

Nielu iñche 17 tripantu, tañi pu chau huiñotuingu Alemania mapu mu. Iñche mülequefun quisu engün mu. Huimtulefun ñi quisulen, feimu cüdautun ñi müleal tañi familia iñchiñ. Nielu 18 tripantu, tripan tañi ruca mu.

Tüngcülehuelan, quintuquefun chem chumal tañi mongen mu. Peniefiñ fillque organizaciones. Fei quimtucun, ayüfun ñi quimafiel ti Mapu com püle, petu tati pu che huesalcamequenon chi Mapu.

Tripan Alemania mapu mu. Ngillan quiñe moto ca amun África mapu püle. Huelu pürüm huesañmahui tañi moto, feimu huiñotun Europa mapu mu tañi cüme elcünutual ñi moto. Deu cüme elcünutun ñi moto, fei hula amun ta Portugal mapu mu. Acun ta quiñe playa mu. Feimu raquiduamün, ‘miyauli farcu mu, doi cüme quimafun ti Mapu’. Feimu elcünufiñ tañi moto.

Trahuiñ quiñeque hueche iñchiñ ñi miyahual farcu mu Océano Atlántico mu. Feimu quimfiñ tañi ayün domo, Laurie pingelu. Hune amuiñ tati pu isla mülelu Caribe püle, fei hula pichiñmameiñ Puerto Rico mapu mu. Fei amutuiñ Europa mapu mu. Laurie iñchiu ayüniefuyu ñi peal quiñe velero tayu cüme elcünutuafiel ñi müleal fei mu. Huelu rupalu cüla cüyen müten, feipingen tañi conal ejercito aleman mu. Tüfa catrütueyumu tayu raquiduam.

15 cüyen mülefun ejercito marina mu. Petu tañi mülen marina mu, niehuiyu Laurie iñchiu. Ayüniefuyu tayu quiñentrür quimal tati Mapu. Petu tañi connon ejercito mu, Laurie iñchiu ngillafuyu quiñe lancha. Feimu petu tañi mülen ejercito mu, cüme elcünutufiyu ñi velero ngerpual. Adcünuquefiyu tayu mongen, fei tayu müleal feiti farcu velero, femngechi tayu quimürpual com püle. Deu tripalu iñche ejercito mu, petu tayu cüme elcünufiel ti farcu quimfiyu ta pu Dunguquelu Inei Ngen Jehová. Eluhuiyu tayu papeltual Biblia.

Raquiduamün, “duamfal-lai ñi caletual tañi mongen”, feipiquefun. Deu nieucüleyu tañi domo iñchiu, fei pütremtuwelan (Efesios 5:⁠5). Raquiduamquen com püle mülei ñi quimafiel Jehová ñi deumael, “cümepelai” piquefun.

Huelu femlai. Rüf duamniefun tañi cüme elcünutual ñi raquiduam. Iñche rume mallma huentrungefun ca quisutu ngüneucülequefun. Quisutu raquiduamquen iñche mu müten. Duamquelafiñ caquelu che. Com tañi dungun mu, dunguquen chumün iñche.

Quiñe antü, papeltufiñ Jesús tañi quimeltun, Sermon del Monte pingelu (Mateo, capitulo 5-7). Müte adümlafiñ chem pi Jesús dunguquelu ayühun mu. Feipilu Jesús pu ngüñülelu ca huihulelu nieai ayühun, iñche müte adümlafiñ (Mateo 5:⁠6). ¿Chumngelu am quiñe che ngüñülelu ca huihulelu ayüucüleafui? Femngechi ramtuuquen. Amulen tañi papeltun, fei ngüneduamün com duamniefiyiñ Chau Dios ñi dungu. Huelu taiñ cüme quimürpual ta Chau Dios, duamnieiñ quiñe ñom piuque. Chumngechi feipi Jesús: “Ayühun niei tati duamnielu ñi llohual Ngünechen ñi cüme dungu” (Mateo 5:⁠3).

Laurie iñchiu estudiamequeyu Biblia Alemania mapu mu, fei hula huiñamtuhuiyu Francia mapu mu. Fei hula ca amuyu Italia mapu mu. Cheu rume amuyu, pequefiyu ta pu Dunguquelu Inei Ngen Jehová. Afmatufiñ ñi quiñeucülen engün ca ñi hueluconque piuqueyehun. Ngüneduamquen pu Dunguquelu Inei Ngen Jehová quiñe familia reque felei com huall Mapu mu (Juan 13:⁠34, 35). Rupachi antü, Laurie iñchiu fautizahuiyu ñi pu Dunguquelu Inei Ngen Jehová ngeal.

Deu fautizaulu iñche, amulen ñi cüme elcünutual tañi chumngen. Laurie iñchiu amuyu quiñe farcu mu África mapu ñi lafquen. Fei hula amuyu Océano Atlántico mu tayu puhual Estados Unidos mapu mu. Lafquen mu iñchiu quisuleyu, quiñe pichi fote mu müten. Com püle mülei co. Chau Dios doi alüi iñchiñ mu ngüneduamün. Fei lafquen mu nielafun duam, feimu fentren tiempo nien, feimu papeltun Biblia. Doi puhui tañi piuque mu com ñi femün Jesús mülepalu Mapu mu. Jesús culpanchengelafui. Doi adümuucülequei, huelu quisutu duamnieuquelai müten. Ñi mongen mu raquiduamquelai ñi duamnieel, doi mai femi com ñi ayüqueel Jehová.

Loncontucufiñ Jesús tañi femün, fei ngüneduamün duamniefun tañi doyümnieal Chau Dios tañi Gobierno (Mateo 6:⁠33). Laurie iñchiu puulu Estados Unidos mapu mu, catrütufiyu tayu viajes ñi tripahuenoal. Fei ñi müleal Estados Unidos mapu mu, fei doi poyeafiel Jehová.

Cuifi mu mallma chengefun, feimu quimlafun chum tripayai tañi dulliel. Huelu feula Biblia tañi quellun mu, cüme dulliquen ca cüme yenien tañi mongen (Isaías 48:⁠17, 18). Fei hula tañi mongen mu, cüme poyequefiñ Chau Dios ca quelluquefiñ caquelu pu che ñi quimal Jehová ñi cümeque dungu.

Biblia quelluqueiñmu tayu cümelcaleal Laurie iñchiu. Ca llohuiyu quiñe cümelcan: tañi ñahue. Fei quimfi ca poyequefi ta Jehová.

Taiñ mongen cüdaungefui, huelu Jehová ñi quellun mu amuleaiñ ñi poyequefiel. Chem no rume catrütulayafeiñmu maneluhual quisu mu (Proverbios 3:⁠5, 6).