Tañi chau elcünui Alemania 1949 tripantu mu ñi quintual cüdau Australia mapu mu. Üyeu cüdahui mina ca electricidad mu. Tañi Chau puulu Victoria mapu mu quimfi tañi ñuque, fei niehuingu. Choyüngen 1953 tripantu mu.

Rupalu pichin tripantu, tañi ñuque eluhui ñi chillcatuafiel Biblia tati pu Dunguquelu Ineingen Jehová engu. Feimu pichicalu iñche, quimün chem ñi quimeltuqueel ta Biblia. Huelu tañi chau rume illcui, quisu ayüquelafui chem religion no rume. Tañi chau cutrancafi tañi ñuque, huelu quisu fentecünulai tañi chillcatuniefiel Biblia ca rume falinturpufi tañi quimürpuel. Tañi chau mülenolu ruca mu, tañi ñuque quimeltueiñmeu iñche ca tañi lamngen tañi quimürpuel Biblia mu. Tañi ñuque quimeltueiñmeu tati Mapu ñi ayüfalngetual. Ca feipieiñmu, taiñ rüf ayüucüleal mongen mu mülei taiñ inanieal Biblia tañi feipin (Salmo 37:10, 29; Isaías 48:17).

Fente tañi illcumequen tañi chau, 18 tripantu nielu iñche elcünun tañi ruca. Quimtucufun tañi quimeltueteu ñi ñuque Biblia mu, huelu eluulan ñi yenieafiel ñi mongen. Cüdahun mina de carbon mu ca curengen 20 tripantu nielu. Cüla tripantu rupalu choyüngei tañi hunen ñahue. Fei raquiduameleneu chumngechi yenieel tañi mongen. Quimtucuniefun Biblia ñi quelluquefiel pu familia. Feimu eluhun tañi chillcatuafiel, huelu tañi domo ayülafi pu testigo. Quiñe antü amulu trahun mu, tañi domo feipieneu: “Amulelmi tami chillcatufiel Biblia, quechanentuayu tañi ruca mu”. Quimlan ñi chumal. Feimu elcünun ñi chillcatufiel Biblia, huelu rume cutrancahun tañi femün.

Quiñe antü tañi compañ cüdau pengeleneu pod dungu, pornografia pingelu. Quimfun ñi podngen, huelu rume ayünien ñi peafiel. Fei rume huesa duameleneu. Quimniefun Biblia ñi feipilen. Feimu raquiduamün Chau Dios tañi castigayaeteu. Huelu amulen mu tañi adquintufiel podngechi dungu, huesa raquiduamel-laeneu.

Rupachi 20 tripantu, nguyünentufiñ tañi quimeltueteu ñi ñuque. Tañi femün meu pengelmequen huesa dungu ñi mülen ñi raquiduam mu. Huesa entuquefun tañi hun ca pod ayecan feipiquefun. Tañi raquiduamquefel cudumuhun dungu meu huichurcülequefui. Niefun tañi domo, huelu cudumfiñ caquelu domo. Quiñe antü comütumequelu iñche, raquiduamün ünufalngen. Feimu piuqueyeulan.

Hudahuiyu tañi domo engu. Fei chuchicahui chi tañi mongen. Fei hula llellipufiñ ta Jehová com tañi piuque mu. Eluhun tañi chillcatuafiel Biblia rupalu rume 20 tripantu. Feichi mu deu lafui tañi chau ca tañi ñuque deu concülefui Jehová tañi pu che meu.

Biblia tañi feipiel ca iñche taiñ chummequen trürngelafui. Tüfa hula eluhun ñi femal Biblia ñi feipin, femngechi tañi tüngcüleal. Feimu huesa dunguhuelan ca illcun chengehuelan. Cafei elcünun com ti pod dungu, ngollihuelan, conhuelan apuesta meu ca hueñehuelan tañi cüdau mu.

Tañi pu compañ cüdau afmatulehuingün tañi cacünun ñi mongen. Feimu cüla tripantu meu dicümtucueneu engün tañi huiño conal huesaque dungu meu. Quiñeque mu huesa entuquefun tañi feipin cam huelulcauquen tañi femün meu. Fei tañi pu compañ cüdau ayentun mu feipiquefeneu: “¡Tüfei! Huiñotui ti cuifi Joe”. Müna cutrancaqueneu feichi dungu, falihuelan troquiuquefun.

Tañi cüdau mu apolei ta pornografia, ti pod dungu. Tañi pu compañ cüdau fill antü yequeingün fillque papel nielu pornografia, computador mu ca pefingün. Cüdautuquefun tañi penoal pornografia, huelu tañi pu compañ cüdau ayünieingün tañi ca peafiel iñche. Hutufiñ tañi quimeltueteu Biblia, fei nütramcafiñ tañi quelluaeteu. Quisu tüngcülechi piuque mu allcütueneu. Biblia meu pengeleneu chumngechi chaftuafiel tañi huesa huimtun. Cafei yafültucueneu tañi llellipuafiel ta Jehová, femngechi tañi quelluaeteu (Salmo 119:37).

Quiñe antü trucolfiñ tañi compañ cüdau, fei feipifiñ ñi eluafiel cerveza epu compañ nehuentulelu tañi putunoal. Com quimniefuiñ ñi putuquenon tüfachi epu huentru. Feimu müten illcunquechi huiraringu “Femlayaiñ”. Tüfachi epu huentru nehuentumequeingu tañi putunoal. Fei feipifiñ: “Iñche ca femngechi rupamequen ñi penoal pornografia”. Feichi antü meu tañi pu compañ cüdau dicümtucuhuelaeneu ñi peal pornografia. Feimu tüngümeneu engün.

Rupachi antü mu Jehová quellueneu ñi elcünual tañi huesa huimtun. Feimu 1999 tripantu mu fautizahun. Elungen tañi huiño ayüucüleal ca cüme mongen yenieal. Feimu rume ayüucülen.

Tüfa hula quimürpun chumngelu Chau Jehová üdequei tañi ayüquefel cuifi mu. Quiñe cüme chau reque Chau Jehová ayüquelai tañi huesalcayaeteu ti pornografia. Rüfngei ñi feipin Proverbios 3:5, 6 feipilu: “Maneluunge Jehová meu com tami piuque mu, ca eimi tami raquiduam mu recüluuquinolnge. Com tami rüpü meu raquiduamanieafimi, ca quisu norümaimu cheu tami miyahual”. Biblia tañi feipin incañpequeiñmeu, huelu cafei quelluqueiñmu taiñ miyahual nor rüpü mu com taiñ mongen meu (Salmo 1:1-3).

Cuifi mu ünufalngen troquiuquefun. Tüfa hula piuqueyehun ca ayüucülen. Lifcülei tañi mongen ca quimnien Jehová tañi perdonaeteu ca tañi quelluqueteu. Niehuiyu Karolin iñchiu 2000 tripantu mu. Quisu quiñe atün-ngechi domo testigongelu, iñche reque ca piuqueyeniefi ta Jehová. Tayu ruca mu mülei tüngün. Jehová tañi pu che cüme chengei ca piuqueyechefengei. Feimu rume ayüucüleyu tayu concülen Jehová tañi troquiñche meu.