Fill tripantu, quiñeque peñi ca lamngen femquelu falinque cüdau mangelngequei Galaad pingechi Escuela mu. Tüfachi escuela femngequei Betel mülelu Patterson pingechi huaria mu (Nueva York).⁠ a Pu peñi ca lamngen quimeltungequei doi cüme femal tañi elfacünungeelchi cüdau. Fei huercüngequeingün fill huall mapu mu, trahunqueche mu ca Betel mu. Ñi cüme quimeltungen mu engün, cüme quellupuquefingün pu peñi ca pu lamngen.

 Galaad mu mangelngequei pu peñi, pu lamngen com huall Mapu mu. Quiñe ejemplo, 2019 tripantu mu femngei tati clase 147, mangelngei 56 peñi ca lamngen, cüpaingün 29 pais mu. Pu peñi, pu lamngen mangelngelu Galaad Escuela mu femqueingün falinque cüdau. Quiñeque cüdauqueingün Betel mu, misionero ngeingün, precursor especial ngeingün ca huitran-ngepaquechi loncolelu.

 Mufüque cüyen petu ñi connon ti clase, femngequei fillque cüdau. Quiñe ejemplo, pu mangelngelu Galaad mu ngillalelngeingün pasaje. ¿Tunten plata gastangequei? 1.075 dolar peno fali ti pasaje amulu Galaad mu ca huiñotulu ñi mapu mu pu estudiante mangelngelu ti clase 147 mu. Pu peñi mülelu islas Salomón mu nüingün meli avion ñi puhual Patterson mu. Huiñotulu ñi mapu mu engün, nüingün cüla avion. Alünque antü alüñmaingün ñi miyahun mu avion mu engün. Quiñeque pasaje fali 2.300 dolar. Pu peñi cüdauquelu ti Central Mundial mu deumaingün quiñe programa computador mu. Tüfachi programa quintuquei pasaje faratulelu. Peyüm quiñe pasaje faratulelu, reservacünuquefi ca quintuniefi cüpalechi cüyen mu doi faratulechi pasaje. Tüfachi pu peñi pünequefingün cupon ca descuento ñi hulqueel ta pu peñi ca pu lamngen femngechi ñi doi faratu ngillayafiel pasaje engün.

 Ca mapu cüpachi pu che ñi conpual Estados Unidos mu, gobierno mülei ñi eluaeteu permiso, visa pingelu tüfa. Pu peñi cüdauquelu ley dungu mu Central Mundial mu quelluquefingün pu estudiante ñi elungeal visa pingelu. Tüfachi dungu ñi nentungeal gastangequei 510 dolar quiñeque che mu.

 Ñi quimeltungeel tüfachi pu peñi ca lamngen Galaad mu, ¿chumngechi cümelcaqueiñmu com iñchiñ? Quiñe loncolelu Asia mapu mu tuulu Hendra Gunawan pingei. Fei ñi trahunche mu mülei quiñe curehuen ngemelu Galaad mu. Tüfachi peñi feipi: “Cuifi mu ngequelafui hunelequelu amuldungun mu taiñ trahunche mu. Tüfachi curehuen aculu, yafültucufingün com pu peñi ca lamngen. Feula fentrelei hunelequelu amuldungun mu. Ca quiñe taiñ lamngen trahunche mu mangelngei tati Escuela ñi Pepicangeam pu Amuldunguquelu Ngünechen ñi Gobierno”.

 Peñi Sergio Panjaitan mülei quiñe Betel mu Asia mapu mu mülelu, ca cüdauquei quiñeque peñi engün ngemelu Galaad mu. Fei feipi: “Tüfachi pu peñi ñi quimeltungeel Galaad mu quisu müten cümelcaulaingün, iñchiñ ca cümelcaqueiñmu. ¡Rume quimürpuingün! Huelu quimcauquiyauquelaingün, doi mai quimeltufingün caquelu chem tañi quimeltungeel engün üyeu. Tüfa nehuentuqueiñmu iñchiñ, ca femngechi iñchiñ yafültucuquefiyiñ caquelu”.

 ¿Chumngechi cullingequei tüfachi escuela ñi femngeal? Nentungequei ti hulngeelchi plata ñi femngeal Jehová tañi cüdau. Caquerumei chumngechi ñi hulngequeel tüfachi plata, ti pagina donate.pr418.com quimeltui chumngechi ñi hulngequen. Mañumuhuiyiñ tamün hulün tamün plata com tamün piuque mu. Eimün tamün quellun mu femngequei tüfachi escuela ñi cüpayal pu peñi ca pu lamngen com huall Mapu mu.