Latinoamérica mu mülei patacaque millonque pu che, ca mülei millonque che indigena ngelu. Tañi cuifi tuhun-ngen mu engün, niei tañi quisuque quehun dungu ca quisuque ñi huimtun engün. ¿Chumngechi quellungequei tüfachi pu che ñi quimafiel chem pin ta Biblia? Latinoamérica mapu mu, pu Dunguquelu Ineingen Jehová rulpadunguquefingün ti lifru 130 quehun dungu mu indigenangelu.⁠ a Fentrenque pu peñi ca lamngen indigenangeingün, fei ca falintuquefingün tañi tuhun engün ca tañi huimtun. Huelu fei engün femquelafingün ti huimtun dungu Biblia ñi chaftuqueel. Feimu quiñeque engün rupai huesaque dungu. ¿Chumngechi pünengequei ti plata ñi hulngequeel ñi quellungeal tüfachi pu peñi ca lamngen?

 Jalisco mapu mu mülei quiñe comunidad huichol tuhun-ngelu.⁠ b Tüfachi comunidad mu mülelu quiñeque peñi ca lamngen pilai ñi conal engün quiñeque huimtun mu. “Tüfa chaftuquefi ta Biblia” pingün. Quiñeque ti che mülelu feichi lof mu rume illcuingün. 4 conchi diciembre mu 2017 tripantu, quiñe quechan che trahuluhui ñi malocontuafiel quiñeque peñi ca lamngen ca quiñeque che fei engün mu mülelu. Fei huemünentufingün ca teifücañmafi ñi ruca engün. Fei “huiñotulmün, langümuhuayiñ”, pifingün.

 Tüfachi pu peñi quechanentungelu llohueyu pu peñi ca lamngen caque comunidad mu mülelu ca elungeingün chem tañi duamnieel. Huelu, ¿chumngechi quellungeafui tüfachi pu peñi ñi huiñotual ñi ruca mu engün? Quiñe peñi Agustín pingelu feipi: “Nielafuiñ plata taiñ culliafiel quiñe abogado ca inei no rume taiñ ramtuafiel”.

 Tañi caiñetuqueteu tüfachi pu peñi ca lamngen ayüfuingün tañi poyehuenoafiel ta Jehová. Feimu taiñ pu peñi mülelu Betel mu, Centroamérica mu, quellufemfingün taiñ pu peñi. Hunelu mu amuingün ti autoridad mu ñi inaduamngeal chem dungu ñi rupan. Fei ti Troquiñche Adcünuquelu ñi Quellucheal feipifi pu peñi cüdauquelu ley dungu mu central mundial mu tañi quelluafiel pu peñi mülelu ti Betel Centroamérica mu, femngechi quiñentrür ñi incañpeafiel taiñ pu peñi huichol tuhun-ngelu. Rupachi cüyen mu, tüfachi dungu puhui Corte Suprema mu. Tüfachi tribunal doi autoridad niei México mapu mu.

 Quiñeque abogado com mapu mu tuulu pepicahuingün ñi incañpeafiel taiñ pu peñi huichol tuhun-ngelu. Ñi hueupin mu, feipingün com pu che mülei ñi respetayafiel engün ti huimtun comunidad indigena mu mülelu. Huelu ca femngechi, pu comunidad indigena mülei ñi respetayafiel caquelu pu che feichi comunidad mu mülelu. Chem tuhun-ngechi che rume, com nieingün derechos humanos pingelu.

 8 conchi julio cüyen mu 2020 tripantu mu, dulli tati Corte Suprema ñi incayafiel ta Dunguquelu Ineingen Jehová. Fei huercüi quiñe dungu tañi huiñotual tati pu quechanentungelu tañi lof mu engün. Taiñ peñi Agustín, taiñ dungupeel deu, feipi: “Rume ayüucüleiñ ca rume mañumcüleiñ taiñ quellueteu taiñ pu peñi. Quellungenoliyiñ, chem chumlayafuiñ rume”.

 Ca femngechi dungu mu rupai taiñ pu peñi ca lamngen San Juan de Ilumán pingechi lof mu. Tüfachi lof mu mülei fentrenque che indigena tuhun-ngelu, ca mülei valle de Otavalo pingelu, Ecuador mapu mu. 2014 tripantu mu, taiñ pu peñi elungei permiso engün ñi deumayafiel quiñe trahunhue ruca. Taiñ pu peñi deu amulfui ñi cüdau engün, huelu quiñe sacerdote trahuli doi pataca che, femngechi eluñmalafi ñi amulnieal ñi cüdau engün. Ca femngechi taiñ pu peñi, pu lamngen feipingei ñi trahuluuhuenoal engün.

 Taiñ pu peñi cüdauquelu ti ley dungu mu, mülelu Betel Ecuador mu, ca ti central mundial mu mülelu, quiñehuingün ñi incañpeafiel taiñ pu peñi ca pu lamngen. Yefiel mu ti dungu tribunal mu, ti pu caiñe fentecünui ñi huesalcamequeafiel taiñ pu peñi. Fei hula, trahuluutui taiñ pu peñi ca deumai tañi trahunhue ruca engün. Taiñ pu peñi ayülafui ñi ca femngechi rupayal cüpalechi antü mu, feimu yefingün ti dungu doi nielu autoridad mu. Fei elcünumeingün tüfachi ramtun ti tribunal mu: tati lof che indigena tuhun-ngelu, ¿ca mülei ñi respetayafiel tati derechos humanos pingelu?

 16 conchi julio mu 2020 tripantu mu, ti tribunal doi nielu autoridad Ecuador mapu mu allcütuñmafi ñi dungu taiñ pu peñi. Quiñeque peñi abogadongelu Ecuador mu incañpefingün ti trahunche. Ca femngechi, eluñmangei ñi dungual engün meli peñi abogadongelu cüdauquelu fentrenque pais mu. Ñi mülen mu ti COVID-19, ti trahun deumangequei internet mu. Turpu rupaquelafui femngechi dungu. Tüfa ta hunen rupa tañi incañpehual ta Dunguquelu Ineingen Jehová internet mu.⁠ c Tüfachi pu peñi cüme pengelcünuingün com pu che indigenangele rume nieingün derechos humanos.

 Taiñ pu peñi, pu lamngen valle de Otavalo mu mülelu esperaleingün ñi chem pial ti tribunal. Rume mañumcüleingün tañi rume cüme quellungen mu engün. Taiñ peñi César loncolei quiñe trahunche quichua dunguquelu Ilumán pingechi lof mu, fei feipi: “Taiñ pichin chengen mu rume, huelu rume cüme quellungeiñ. Feimu rume mañumniefiyiñ ta Jehová ca tañi troquiñche”.

 Tüfachi pu abogado com ta Dunguquelu Ineingen Jehová ngei; feimu cofralai tañi cüdau mu engün. Huelu ñi yeafiel ti dungu Tribunal mu, ca tañi cüme pepicahual engün duamfali tiempo ca plata. México mapu mu, pu abogado ca caquelu pu peñi cüdahuingün 380 hora ñi trahulafiel fillque papel, ca cüdahuingün 240 hora ñi rulpadunguafiel. Ecuador mu, 40 abogado com mapu tuulu cüdahuingün patacaque hora. ¿Chumngechi cullingequei tüfachi cüdau ñi incañpengeal taiñ pu peñi ca pu lamngen? Eimün tamün hulqueelchi plata mu. Ti pagina donate.pr418.com mu feipingequei chumngechi ñi hulngequeel plata. Mañumuhuiyiñ tamün hulqueel com tamün piuque mu.