2020 tripantu mu taiñ peñi Geoffrey Jackson feipi: “Quiñeque tripantu cuifi raquiduamquelafuiñ rume ñi pünengeal electronico chemcün taiñ quimeltungeal. Huelu feula tañi mülen ti huesa cutran com tüfachi fillque quellu rume falintuquefiyiñ. Quimfali taiñ pepicaeteu Jehová taiñ nehuencüleal fantepu meu” (Tüfa tripai ti video numero 6, We dungu ñi feypial ti Kiñewkülechi Ngünenielu 2020 pingelu).

 ¿Chumngechi am pepicamequeiñmu Jehová? ¿Chumngechi deumangei ti aplicacion JW Library? ¿Chumngequei ñi cümelcaleal ti aplicacion fill antü?

 Mayo 2013 tripantu mu, tati Cuerpo Gobernante feipifi pu adcünuquelu ti programa MEPS ñi deumayal quiñe aplicacion ñi pengeal ti Traduccion del Nuevo Mundo. Quiñe peñi coneltulelu ti Troquiñche Adcünuquelu ti Programa MEPS, Paul Willies pingei, feipi: “Turpu tuculelquelafuiñ quiñe aplicacion tati tienda de aplicaciones mu. Taiñ deumayal feiti aplicacion mülefui taiñ quiñepülecünuafiel caquelu cüdau ca mülefui taiñ adcünuafiel quiñe troquiñche ñi cüdahual. Cafei mülefui taiñ quiñentrür cüdahual caquelu troquiñche Betel mu. Fentren rupa llellipufiyiñ Jehová taiñ quelluaeteu. ¡Quimfali taiñ quellueteu llemai! Rupalu quechu cüyen müten, pengelngei ti hue aplicacion ti falin trahun mu femngequelu fill tripantu”.

 Fei hula mülei cangelu fütra cüdau. Mülefui taiñ tuculelafiel ti aplicacion caquelu publicacion fillque quehun nielu, fei ñi doi nieal ta lifru quiñe biblioteca reque. Enero 2015 tripantu mu, ti aplicacion deu tuculelngefui epe com publicacion gringodungun mu ca rupalu cayu cüyen müten fentren publicacion mülefui aplicacion mu ñi entual pu che.

 Ti aplicacion doi cüme elcünungequetui, por ejemplo tuculelngei fillque video ca deumangei quiñe troquiñ pengelquelu com taiñ inaduamal fillque trahun mu. Cafei, papeltufilmi tati Biblia aplicacion mu, peafuimi chem pilei tati Guía de estudio.

 Fill cüyen doi 15 millon electronico chemcün pünengequei ñi conal JW Library mu ca tüfa 8 millon femquei fill antü. ¿Chem cüdau femquei ñi funcionayal ti aplicacion? Taiñ peñi Paul Willies feipi: “Tüfachi cüdau afnoalu quechilei. Tuculelquefiyiñ fillque hueque dungu tati aplicacion mu, fei ñi doi cüme adümfalngeal. Caquerumechi electronico chemcün niei tañi sistema operativo, tüfa rumel cüme elcünungetuquei. Fei ca femngechi, mülei taiñ cüme elcünutuafiel ti aplicacion ñi pünengeal fillque sistema operativo mu. Cafei ti aplicacion JW Library doi amulei ñi nieal fillque audio, video ca publicacion. Feimu duamfali ñi cüme elcünungetual taiñ fillque programa. Famülque mu, JW Library mu mülei 200 mil publicaciones peno ca doi 600 mil audio ca video caquerumechi quehun mu.

 Mülei taiñ nieal fillque electronico chemcün, fei taiñ cüme elcünutuafiel ti aplicacion JW Library. Fei ca müten no, mülei ñi ngillangeal permiso, fei ñi pünengeal fillque programa. Quiñe permiso müten, fali doi quiñe millon de pesos chilenos fill tripantu. Tati troquiñche adcünuquelu ti programa MEPS gastaquei doi regle millon de pesos fill tripantu ñi ngillayal fillque electronico chemcün caquerumechi marca nielu, hueque computador, tablet ca telefono. Femngechi quimnieingün ti aplicacion ñi cüme funcionaquen caquerumechi electronico chemcün mu.

 JW Library ñi duam mu gastangehuelai fentren plata, ¿chumngelu? Feula entuhuiringehuelai ca mandangehuelai fentren publicacion papel mu cuifi reque. Por ejemplo, peaiñ ñi rupan feichi folleto fill antü ngüneduamaiñ tati Biblia pingelu. 2013 tripantu mu, mülefui doi 7 millon 600 mil amuldunguquelu, fei entuhuiringei 12 millon tüfachi folleto mu. Ca 2020 tripantu mu, mülefui epe 8 millon 500 mil amuldunguquelu, huelu entuhuiringei 5 millon müten tüfachi folleto mu. ¿Chumngelu? Feula fentren taiñ pu peñi ca pu lamngen papeltuqueingün tüfachi folleto JW Library mu. a

 JW Library quelluqueiñmu taiñ femal fillque dungu. Por ejemplo, taiñ lamngen Geneviève, Canada mapu meu mülelu, ti aplicacion rume quellueyu ñi doi cüme chillcatual ta Biblia. Taiñ lamngen feipi: “Mülefuli ñi quintual fentren lifru ñi chillcatual ta Biblia, femlayafun fill pulihuen. Huelu mülen mu ti aplicacion doi matu pefiñ com tañi duamnieel ñi chillcatual ta Biblia. Tüfa quelluqueneu fill antü tañi ngüneduamafiel Biblia, femngechi doi maneluuquen ca fülmaniefiñ Jehová”.

 Tüfachi aplicacion doi quelluqueiñmu mülen mu cai chi pandemia. Quiñe lamngen Estados Unidos mu mülelu, Charlyn pingei, feipi: “Mülen mu ti coronavirus, rupai doi quiñe tripantu ñi pepi llouquenofiel chem publicacion no rume papel mu. Huelu JW Library mu pequefiyiñ com taiñ duamnieel taiñ cüme hueniyeafiel Jehová. Mañumniefiñ Jehová tüfachi falin regalo mu”.

 Fentren che raquiduamquei taiñ lamngen Faye reque, Filipinas meu mülei, feipi: “Afmatufali tüfachi aplicacion. Fei mu pefiñ com ñi duamnieel tañi ñi fülmanieafiel Jehová. Pünequefiñ tüfachi aplicacion ñi femal fillque dungu: ñi papeltual pulihuen mu, ñi allcütual cümeque dungu petu ñi duamngemequen ca ñi pepicacünuafiel ti trahun ca ñi chillcatual Biblia. Tüfachi aplicacion doi fali ta plata mu”.

 Tüfachi aplicacion rume ayüfali, rume quelluqueiñmu taiñ amuldungual. Quiñe lamngen tripai ñi amuldungual Camerún mapu mu, fei tañi compañ papeltui quiñe texto. “Rume cümei tati texto” pi taiñ lamngen. Fei rupalu quiñeque semana, ayüfui ñi papeltual feichi texto, huelu acordahuetulai tati texto. Acordaniehui quiñe frase müten, fei aplicacion mu quintufi tati frase cheu ñi mülen quiñe pichi lupa. Taiñ lamngen feipi: “Tüfachi aplicacion ñi duam mu, pequefiñ com feichi texto tañi ngüyunentuqueel”

 Fentren eimün conqueimün taiñ pagina donate.pr418.com tamün quelluntucual plata mu. Com feichi plata quelluqueiñmu taiñ doi cüme elcünutuafiel ca ñi cüme amuleal ti aplicacion JW Library, femngechi com taiñ pu peñi, pu lamngen huall mapu mu nieafuingün tüfachi cüme aplicacion. Rume mañumniehuiyiñ com eimün tamün ayühunquechi piuque mu quelluntucuquen plata mu.

1. Octubre 2013: Tripai ti aplicacion nielu tati Traducción del Nuevo Mundo gringodungun meu.

2. Enero 2015: Ti aplicacion doi tuculelngei fillque publicacion gringodungun mu, fei hula fentren quehun dungun mu.

3. Noviembre 2015: Feula marcacünungeafui doi ayüfalchi texto.

4. Mayo 2016: Ti aplicacion tuculelngei quiñe troquiñ feipilu “Reuniones”.

5. Mayo 2017: Feula huirintucuafuiñ fillque nota.

6. Diciembre 2017: Ti aplicacion tuculelngei tati Biblia de estudio gringodungun mu.

7. Marzo 2019: Feula descargangeafui fillque audio ca pengeafui video internet mu. Cafei inaduamngeafui tati Guía de estudio.

8. Enero 2021: Doi cüme elcünungequetui ti aplicacion ñi papeltual tati lifru ¡Rumel ayüucüleaimi!