2020 tripantu mu, rupai fentren huesaque dungu com Mapu mu. Arengechi mapu mu mülei fütraque cürüftucu mahun, África mapu mu mülei ta mangiñ, Venezuela mapu mu mülei ta filla ca Zimbabue mapu mu mahunhuelai. Cafei tati cutran COVID-19 pingelu puhui com Mapu meu. Pu Dunguquelu Ineingen Jehová, ¿chumingün ñi quelluafiel pu cutrancaumequelu?

 Rupan mu huesaque dungu Mapu mu, trahuluuqueingün quiñeque peñi coneltulelu Cuerpo Gobernante mu, fei ngüneduamqueingün chumngechi quelluafiel pu peñi ca pu lamngen. Tüfachi pu peñi huichucünuingün 28 millon dolar ñi quellucheal rupafule huesaque dungu septiembre cüyen 2019 tripantu puhual agosto cüyen 2020 tripantu. Tüfachi plata mu ngillafingün co, iyael, jabon ca caquelu chemcün ñi duamnieel pu huesa rupamequelu. Ca femngechi, quellufingün pu cutrancülelu ca cüme eltufingün ti ruca huesañmaucülelu. Feula ca nütramcayaiñ chumngechi quelluchequeiñ rupan mu quiñe fütra huesa dungu.

 COVID-19 pingechi cutran. Tüfachi pandemia mu, fentren pu peñi pu lamngen com Mapu mu cutraningün, huesa duamcüleingün ca contueyu filla dungu. Fei elfalcünungei 800 troquiñ loncolelu ñi quelluafiel com pu peñi, pu lamngen huall Mapu meu. Tüfachi pu loncolelu ngüneduamqueingün chem duamniei pu peñi ca pu lamngen huesa rupamequelu, fei quimeltuquefingün tati troquiñche adcünuquelu ñi quellucheal tati central mundial mu mülelu.

 2020 tripantu mu, tüfachi pu loncolelu quellufingün pu peñi ca pu lamngen ñi nieal iyael, co, lahuen ca quiñeque chemcün ñi liftuam. Cafei quiñeque troquiñ mapu mu, tüfachi pu loncolelu adcünufingün pu peñi, pu lamngen ñi llohual ti gobierno ñi quellun.

 Pu che testigongenolu ca ngüneduamqueingün chumngechi taiñ quelluchequen iñchiñ pu Dunguquelu Ineingen Jehová. Quiñe pengelün dungu, Field Simwinga, loncolelu quiñe troquiñ soltau Nakonde huaria mu (Zambia), feipifi taiñ pu peñi: “Rume mañumuhuiyiñ tamün quellufiel pu familia huesa rupamequelu. Tamün quellun yochi cüme puhui”.

 Filla dungu ñi mülen Angola mapu mu. Aculu COVID cutran Angola mapu mu, tüfachi pais rume fillai. Rume falilerpui ti iyael, feimu puque peñi, lamngen cüdautuingün tañi ngillayafiel.

 Tati betel Brasil mu mülelu elfalcünungei ñi mandalelafiel iyael pu peñi, pu lamngen Angola mapu mu mülelu. Ñi cüme pünengeal chi plata, pu peñi cüme inaduamingün cheu ñi doi faratulen iyael, fei com trür ngillafingün. Fei deumafingün quiñe caja ca tuculelfingün arroz, porotos, aceite ca fillque iyael. Tati caja epe 20 kilo fanei. Ñi pepicangeal quiñe caja ca ñi mandangeal pünengei 22 dolar peno. Tüfachi fecha mu, yeniengei 33.544 caja ñi mandalelngen pu peñi ca pu lamngen. Com tüfachi iyael fanei 654 tonelada. Com tüfachi caja ca caquelu iyael ñi ngillangeel Angola mu pünengei ñi quellungeal doi 50.000 che.

 ¿Chem raquiduamingün pu peñi pu lamngen tañi quellungeel? Quiñe peñi Alexandre pingelu mülei quiñe lof mu camapulelu huaria mu, fei feipi: “Mañumcülen tañi quellungeel, tüfa pengeli ñi poyenieteu Jehová. Ca pefiñ ñi quisulenon, Jehová ñi pu che rume falintueneu”. Ca Mariza pingelu taiñ lamngen quisu tremümmequei tañi püñeñ, fei feipi: “Chau Dios allcütueneu tañi llellipun. Mañumfiñ ta Chau Jehová ca tañi adcünuelchi pu che”.

 Mahunhuelai Zimbabue mapu mu. Quiñeque tripantu rupauyei ñi mahunhuenon Zimbabue mapu mu, feimu millonque che epe laingün entrin mu. Pütrün Dunguquelu Ineingen Jehová rupamequeingün filla dungu mu.

 Quechu troquiñ loncolelu elfalcünungei tüfachi cüdau ñi eluafiel iyael taiñ pu peñi ca pu lamngen. Pütrün puque peñi ca lamngen quelluingün ñi trahulal tati iyael ca yefingün auto mu, fei ñi elelmeafiel tati pu duamnielu. a Septiembre cüyen 2019 tripantu puhual agosto cüyen 2020 tripantu mu pünengei 691.561 dolar ñi elungeal iyael doi 22.700 pu che.

 Aculu chi iyael, quiñeque peñi ca lamngen niehuelafuingün chem no rume. Feimu lloufilu engün tati quellu, püramyefingün Chau Jehová. Quiñeque engün eluhuingün tañi ülcantulafiel.

 Quiñe lof mu, quiñe troquiñche quelluchequelu feipicünui ñi eluafiel iyael tati pu fillalelu. Feimu trahulngei che ca feipingei chumngechi ñi quellungeal. Tati trahun mu amui epu lantu lamngen, huelu nütramcaingün re politico dungu mu. Taiñ epu lamngen pilafui ñi coneltual femngechi dungu mu, feimu amutuingu. Petu tañi amuletun, ayentucangei ca feipingei: “Amutulmu, mongetupalayaimün”. Huelu rupalu epu semana müten, acuingün taiñ pu peñi ca yelelfingün iyael tati epu lantu lamngen. Huelu tati troquiñche quelluchequelu pütrün semana rupai ñi yelelafiel iyael tati pu che.

 Llohun mu fentren quellun taiñ pu peñi pu lamngen, doi alün che eluhui tañi quimafiel ta Biblia. Peaiñ chem rupai taiñ lamngen Prisca pingelu, quiñe pichi huaria mu mülelu. Feichi lof mu mahunhuelafui, feimu mülefui filla feichi mapu mu. Huelu taiñ lamngen Prisca fill miercoles ca fill viernes amuldunguquefui. Feichi cüyen ñi quetrangequen mapu, taiñ lamngen ca amuldunguquefui. Tañi pu lof che ayentuquefeyu taiñ lamngen ca feipingequei: “Tami amuldungumequen mu entrilafimi tami pu che”, pingequei. Taiñ lamngen feipiquefui: “Jehová chumcaunorume quisucünuquelafi tañi pu che”. Pichin mu pu peñi pu lamngen mandalelfingün iyael taiñ lamngen Prisca. Quiñeque tañi pu carucatu afmatulehuingün, feipingün: “Tami Chau Ngünechen turpu quisucünuquelaimu, ayüfuiñ taiñ doi quimafiel”. Feula regle tañi pu carucatu allcütuquefingün tati trahun radio mu.

 Püllelepalu Jehová tañi antü, doi rupamequei fütraque huesaque dungu (Mateo 24:3, 7). Mañumuhuiyiñ tamün hulqueel plata com tamün piuque mu. Tati pagina donate.pr418.com mu, feipingequei chumngechi ñi hulngeal plata. Tati plata ñi hulngequeel pünengequei ñi quelluafiel pu peñi ca pu lamngen huesaque dungu mu rupamequelu.