Ti revista The Watch Tower cam La Torre del Vigía pingelu huincadungun mu, tripalu hunen conchi Junio, 1912, feipi: “Fentren che papeltuquelu tüfachi chillca, quimniepelafi quiñeque che traumalelu”. Cafei ti revista feipi ñi mülen quiñeque publicacion pu traumalelu ñi papeltual, cofrangelaingün. Ca feipi: “Feichi publicacion entuhuiringei, fei pichi huefcülei ti huirin, fei tocangele papeltuafui pu trauma”. Fentren che traumalelu ayüucülei ñi müleal fentren cümelcan tüfachi mapu mu.

 Feichi huirintucungelu feichi revista, caquerumefui chumngechi ñi huirintucungequen braille gringodungun mu. Huelu pu Dunguquelu Ineingen Jehová deu deumaquefui quiñeque publicacion braille huirin mu. Fachantü, iñchiñ entuquefiyiñ publicacion pu trauma chengealu. Entuqueiñ fillque publicacion doi 50 caquerumechi braille huirin. ¿Chumngechi deumangequei?

 Tati publicacion deumangelu gringodungun mu, rulpangequei braille huirin mu. Patterson, Nueva York huaria mu, quiñe peñi coneltulelu tati troquiñche pepicaquelu fillque papel ñi pengelngeal, Michael Millen pingei, feipi: “Cuifi mu, ngillaquefuiñ quiñeque programa ñi rulpadungual braille huirin mu. Huelu pepi rulpaquelafui com quehun dungu braille huirin mu. Feula pünequefiyiñ quiñe programa Watchtower Translation System pingelu. Tüfa pepi rulpadunguquei epe com quehun dungu braille huirin mu. Trürümfalngelai tüfachi programa, rume falin-ngei”.

 Fillque publicacion re rulpadunguquelai tañi feipilen müten, doi mai ca huirintucungequei braille huirin mu chem ñi pengelngequen fillque adentun. Por ejemplo, huente tapa ti lifru ¡Rumel ayüucüleaimi! pingelu mülei quiñe adentun. Tüfa famngechi rulpadungungequei braille dungun mu: “Quiñe huentru amulei quiñe rüpü mu üncülenolu. Mülei adchi flor, huincul ca fütraque huincul”. Quiñe peñi traumalelu, Jamshed pingei, hunelequei amuldungun mu ca siervo ministerial ngei tañi trahunche mu. Fei feipi: “Rume falintuquefiñ ñi feipingeal chumlei ti fillque adentun ca chem mülei ti adentun mu. Rume falintuquefiñ iñche”.

 Deu rulpangelu ti huirin braille mu, mülei ñi entuhuiringeal. Feimu huercüngequei quiñeque Betel ruca ñi femal. Ñi entuhuiringeal pünengequei quiñe nehuen-ngechi papel. Fei marcacünungen mu ti papel, catangequelai. Ca fentren rupa tocangele rume ñi papeltungeal, huesañmauquelai. Fillque pagina adcünungequei ca trapümngequei quiñe espiral mu, quiñe cuaderno reque. Fei hula, huercüngequei fillque trahunche mu. Ca quiñeque mu, ti servicio de correo cofraquelai ñi huercüngeal quiñeque dungu pu trauma chengealu, femle, fei mu huercüngeafui. Cafei taiñ pu peñi, pu lamngen traumalelu duamniele ñi pürüm llohuafiel fillque publicacion chillcatungealu ti trahun mu, fillque Betel adcünuquei ñi matu huercüngeal.

 Alüñmaquei ñi femngeal com tüfachi cüdau ca gastangequei fentren plata. Inaduamnge tüfa, Betel Wallkill Nueva York meu, tunteñma ñi deumangeam 2 Biblia braille huirin mu ca fenteñma mu deumangeafui 50.000 caquelu Biblia. Fütra lifru tati, feimu quiñe Biblia müten braille grado 2 gringodungun mu, hudamngequei 25 lifru mu. a Ñi deumangeam quiñe Biblia braille mu gastangequei fentren plata, feichi plata mu deumangeafui 123 caquelu Biblia. Ti tapa ñi deumangeam quiñe Biblia müten doi 100.000 pesos chilenos fali.

 Pu quelluntucuquelu ñi femngeal tüfachi cüdau, ¿chum duamcüleingün? Quiñe lamngen Nadia pingei, Betel Sudáfrica mapu meu mülelu, feipi: “Quiñeque taiñ pu lamngen müte pelohuelai cam traumalei cütu, fei doi cüdaungetui tañi mongen. Feimu rume mañumcülen ñi quellufiel engün. Quimfali Jehová ñi piuqueyefiel engün”.

 Pu che traumalelu quim papeltunole braille, ¿chumafui? Quiñeque tripantu cuifi, tripai quiñe folleto Aprenda a leer braille pingelu. Tüfachi folleto quimeltuquei chumngechi ñi papeltungeal braille. Fei quiñe che traumalelu ca quiñe che tañi quelluaeteu trür ngüneduamafui ti folleto. Elungequei tüfachi folleto, quiñe pichi punzon ca quiñe regla huechodhuechodcülelu fei tati che quimeltungelu braille traumalelu püneafui tüfachi herramienta ñi quimürpual chumngechi huirintucungequei braille. Femngechi adümadümcantuai ca loncontucuai caque quiñeque letra ñi chumngen, fei ñi quimafiel tañi changüll cuhu mu.

 ¿Chumngechi quelluquefi pu peñi pu lamngen fillque publicacion braille mu?Inaduamnge ñi rupan taiñ peñi Ernst, Haiti mapu meu mülelu. Amuquefui trahun mu, huelu nielafui publicacion braille huirin mu. Feimu mülefui ñi loncontucual com tañi huiñoldungual trahun mu ca ñi hueupial. Huelu feula niei publicacion braille huirin mu. Müna ayüucületui. Taiñ peñi feipi: “Feula fentren rupa rume, huiñoldunguafun trahun mu ca doi fülmaniefiñ tañi pu peñi pu lamngen trahunche mu. Jehová eluqueiñmu ca femngechi quimeltun caque quiñeque iñchiñ”.

 Jan, loncolei quiñe trahunche Austria mapu mu. Fei müte pelohuelai. Felefule rume, loncolequei Ti Huerquen mu ca loncolei ti chillcatun Biblia trahunche mu. Taiñ peñi feipi: “Taiñ fillque publicacion braille mu doi adümfali ta caquelu lifru braille meu. Por ejemplo, caque quiñeque pagina niei tañi numero, fillque quimal dungu cüdaungelai ñi pengeal. Cafei cüme quimfalcünungei chem ñi pengelcülen caque quiñeque adentun”.

 Corea del Sur mapu mu, mülei quiñe lamngen Seon-ok pingelu. Hunelequei amuldungun mu, fei traumalei ca pilungei. Cuifi duamniefui tañi rulpadungungeal com tati trahun señas tactiles mu. Fei hula, quisutu papeltuafui tati fillque publicacion braille mu. Fei feipi: “Doi cüdaungei papeltual caquelu lifru braille mu, ngelai quiñeque punto, huichurcalei tati linea ca tati papel rüngelai. Doi adümfali ñi papeltungeal ti publicacion ñi nieel pu testigo. Doi cümei tati papel ca doi huefcülei chi punto. Cuifi papeltuquefun Biblia ñi quellungeel müten, fei hula quisu papeltuafun. Ayüquen ñi pepicahual ñi amual trahun mu ca ñi huiñoldungual com tañi pepicahun. Chem publicacion rume tañi elungeel braille mu, com papeltuquefiñ. Rume ayüquefiñ, ngüneuquelan tañi papeltuafiel com tati publicacion braille huirin mu”.

 Fillque publicacion braille huirin mu, ca feipiquei: “Tüfachi publicacion fendengequelai. Huall Mapu püle hulngequei ñi quelluntucual quiñe falin cüdau mu: quimeltuafiel ta che Biblia ñi dungu. Fentren che ayühunquechi hulquei plata ñi femngeal tüfachi cüdau”. Com eimün quelluntucuqueimün plata mu taiñ pagina donate.pr418.com internet mu. Femngechi com pu che llohuafui taiñ fillque publicacion, pu müte pelohuenolu ca pu traumalelu cütu. Rume mañumtuuqueiñ tamün ayühunquechi hulquen.