Ti fütra trahun 2020 tripantungealu com grabangei ca tucungei internet mu, turpu femngechi femngequelafui. Huelu fentren taiñ pu peñi ca pu lamngen, Malaui ca Mozambique mapu mu, nielaingün internet. Feimu adcünungei caquelu dungu, fei ñi peafiel. ¿Chumngechi femingün?

 Ti Troquiñche Adcünuquelu ñi Quellucheal ca ti Troquiñche Pepicaquelu ti Quimeltun adcünuingu ñi pengelngeal ti fütra tahun television mu ca ñi allcütungeal radio mu. ¿Chumngelu femngechi femingu? Malaui mapu mu rume fali nieal internet, feimu pichin pu peñi ca lamngen müten nieingün internet üye mu. Quiñe peñi coneltulelu ti Troquiñche Adcünuquelu Betel ruca, William Chumbi pingelu, feipi: “Television ca radio mu müten pengelngeafui ti fütra trahun taiñ pu peñi ca pu lamngen”. Ca quiñe peñi coneltulelu ti Troquiñche Adcünuquelu Betel ruca, Luka Sibeko pingelu, feipi: “Pengelngenofule ti fütra trahun radio ca television mu, pichin peñi ca lamngen müten peafuingün chi programa. Ca femngechi dungu rupaingün taiñ pu peñi ca pu lamngen Mozambique mapu mu. Pichin pu peñi ca pu lamngen müten ngillayafui quiñe cüme electronico chemcün ca doi cüdaungei ñi nieal ta internet”.

 Mülen mu ti coronavirus, quiñeque radio ca television mu pengelngequei taiñ fillque trahun. a Huelu taiñ pu peñi feipifingün tati pu adniefilu radio ca television ñi eluaeteu doi tiempo ñi pengelngeal ti fütra trahun.

 Malaui mapu mu, pu adniequefilu tati radio ca television re hulquei quiñe hora müten ñi pengelngeal quiñe programa, femngechi ñi afeluunoal tañi pu allcütuqueteu. Huelu taiñ pu peñi quimeleyu ñi fente quelluchequen taiñ cüdau. Feipieyu engün: “Tati pu che rucaluucülelu rume, allcütuafui tati cümeque dungu. Allcütufiel mu tüfa, tati pu che doi cüme chengerpuafui ca doi quiñeucüleafui tañi pu che engün”. Quimelngelu tüfa, tati pu adniefilu ti radio ca television elufingün doi tiempo tati pu peñi ñi pengelal ti programa.

 Malaui mapu mu, quiñe radio ca quiñe canal de television pengelingün ti fütra trahun. Üye mu fentren millonque che allcütuquei ca pequei tati radio ca television. Mozambique mapu mu, quiñe canal de television ca 85 radio pengelingün ti fütra trahun.

 Tüfachi epu pais mu, gastangei doi 21 millon de pesos chilenos tañi pengelngeal tüfachi fütra trahun television mu ca gastangei 15 millon de pesos chilenos ñi allcütungeal radio mu. Caquerumei tunte ñi cullingequen fillque radio. Quiñeque radio doi camapu puuquei ñi señal, feimu doi alün plata cullingequei. Quiñeque cullingeafui 11 mil pesos ca puhuafui 2 millon de pesos chilenos cütu.

 Pu peñi cüme raquiduamingün chumngechi ñi gastayal ti plata, fei ñi ngünamcanoafiel. Malaui mapu mu, pu peñi nütramcafingün tati pu adniefilu chi radio, fei ñi doi pichin cofrayaeteu. Fei “mai” pieyu engün. Quiñe rupa elungei 30% de descuento. Femün mu tüfa, ahorraingün doi 1 millon de pesos chilenos. Iñchiñ pu Dunguquelu Ineingen Jehová quimniengeiñ taiñ ngünencachequenon ca taiñ culliquen ti plata puuchi antü meu. Feimu Mozambique mapu mu, quiñeque radio doi pichin cofraeiñmu,.

 Taiñ pu peñi ca pu lamngen rume mañumcülefuingün tañi allcütufiel tüfachi fütra trahun radio ca television mu. Quiñe loncolelu Malaui mapu mu, Patrick pingei, feipi: “Mañumniefiyiñ tati pu peñi coneltulelu tati Cuerpo Gobernante mu, ñi femün fillque dungu taiñ allcütuafiel ti fütra trahun pandemia mu”. Ca quiñe peñi Malaui mapu mu, Isaac pingei, feipi: “Rume mañumcüleiñ taiñ allcütufiel ti fütra trahun radio mu. Nielaiñ cangelu electronico chemcün. ‘Quiñe falin regalo taiñ elueteu Jehová tañi troquiñche’ piqueiñ. Femngechi com tañi pu che cüme allcütufingün tati fütra trahun. Cüme quimnieiñ Jehová ñi piuqueyeniefiel tañi pu che” pi taiñ peñi.

 Mozambique mapu mu, quiñe amuldunguquelu petu fautizaunolu allcütui ti fütra trahun 2020 tripantu, fei turpu amuquelafui cangelu fütra trahun mu. Fei feipi: “Pefilu ti fütra trahun tele mu, ngüneduamün Jehová ñi fentren nehuen-ngen. Ti pandemia catrütulafi ta Jehová, taiñ eluaeteu com taiñ duamnieel. Allcütufiyiñ ti fütra trahun iñchiñ taiñ ruca mu. Quimfali Jehová tañi troquiñche tañi huelucontu piuqueyeuquen. Tüfa lle tati rüfngechi religion”.

 Quiñe loncolelu, Wyson pingelu, feipi: “Rume mañumniefiñ tati esclavo fiel y prudente taiñ duamtueteu pandemia mu. Cheu taiñ mülen rume pofrengei che ca iñchiñ pichiquen chemcün müten nieiñ. Müna cümei ñi allcütungeal tati fütra trahun radio ca television meu. Rume ayühulqueiñmu ca quelluqueiñmu”.

 2021 tripantu mu, ca huiño femngei tüfa. Tati Troquiñche Adcünuquelu ñi Quellucheal ca ti Troquiñche Pepicaquelu ti Quimeltun adcünuingu ñi pengelngeal ti fütra trahun television meu quiñeque troquiñ mapu mu. ¿Chumngechi cullingequei tüfa? Tati plata tamün hulqueel taiñ pagina donate.pr418.com internet mu. Rume mañumniehuiyiñ tamün ayühunquechi quelluntucumufiel plata mu.