Jakob ñi antü mu petu elngelafuy kiñe ley ñi poyengenoal adentun, welu Jakob küme kimniefuy Chaw Jewba müten müley ñi poyengeal (Éx 20:⁠3-5). Fey kiñe antü Jewba feypieyew ta Jakob ñi wiñotual ta Fetel waria mu. Feychi mu Jakob feypifi tañi pu che ñi küpalelaetew kom adentun pünengekelu poyengeam koylake dios. Fey wüla Jakob kom ütrüfentufi, fillke chaway kütu. Feychi mu pu che pünekefuy chaway tañi ingkañpeaetew peno pu wedake püllü mew (Gé 35:⁠1-4). Tüfa mu kimafuiñ ñi ayüwün ta Jewba tañi femün Jakob.

Famülke mu, ¿chumngechi pengelafuiñ taiñ poyekefiel ta Jewba müten? Famentuafiyiñ llemay itrokom dungu nüwkülelu koylake dios mu, ka chem dungu rume nüwkülelu pu wedake püllü mu. ¿Chem dungu chi? Ngüneduamaiñ kiñe dungu: chem taiñ peel fey taiñ küme rupaleal. Fey ramtuwafuiñ: “Pefili kiñe pelicula ka papeltufili kiñe lifru, ¿nütramkakepey may vampiro, kiñe la ñi trekayawün kam chem dungu rume femkelu pu che wedake püllü ñi newen mew? Fillke dungu tañi pefiel, ¿pengelkey may kalku dungu, dawün dungu kam malisian dungu? Fey, ¿rakiduamelkeenew ñi kuñiwün-ngenon tüfa?”. Poyefiliyiñ ta Jewba, famentuafiyiñ kom feytachi wedake dungu (Sl 97:⁠10).

PEFINGE TI VIDEO FEYPILELU NEWENTUWMÜN TAMÜN NGÜNENKANOAETEW TA WEKÜFÜ, KA WIÑOLDUNGUNGE TI MÜLEYECHI RAMTUN:

• ¿Chem weda dungu mu rupay Palesa?

• Kontupaeliyiñmu pu wedake püllü, ¿chumngelu eluwaiñ taiñ kelluaetew pu longkolelu?

• Taiñ kuñiwtukuaetew ta Jewba, ¿chem müley taiñ famentuafiel?

• ¿Chem eluwi ñi femal ta Palesa?

• Chew taiñ mülen pu che femkey kakerume dungu nüwkülelu pu wedake püllü mew, ¿chumafuiñ taiñ inayentunoafiel?