Biblia feypikünuy ta Satana taiñ kayñetuaetew fey ñi katrütuafiel taiñ amuldungun (Jn 15:20; Ap 12:17). ¿Chumafuiñ kay ñi kelluafiel tati pu peñi ka lamngen kayñetumekengelu? Kiñe falin dungu, ngillatuafuiñ kidu engün mew. Biblia feypi: “Tati nor piwke che ñi ngillatun [...] niey fentren pepiluwün” (San 5:16).

¿Chem llellipuafuiñ? Jewba mu llellipukeaiñ ñi kelluaetew engün ñi llükanoal ka fütra piwkengeal (Isa 41:10-13). Ka ngillatuafuiñ tati pu awtoridad taiñ eluñmayaetew ta amuldungual, “femngechi taiñ nieael kiñe küme ayüwünngechi mongen ka tüngduamünngelu” (1Ti 2:1, 2).

Kayñetungefulu Pablo engu Pedro, tati pu kristiano ngillatukefuyngün fey engu mu ka üytuñmakefuyngün tañi ngillatun mu (Hch 12:5; Rom 15:30, 31). Welu iñchiñ kimnofiliyiñ rume tati pu kayñetumekengelu tañi üy, taiñ ngillatun mu üytuafuiñ kidu tañi trawünche kam ti trokiñ mapu ñi mülen engün.