BIBLIA kimeltukelaeiñmew chumül am ñi choyüngen Jesus. Welu may kellukeeiñmew taiñ rakiduamal Jesus ñi choyüngenon diciembre küyen mu.

Belen mu, ti waria chew ñi choyüngen ta Jesus, ¿chumngechi antüngekey diciembre küyen mu? Judio ñi rakin tripantuwe mu, niey kiñe küyen kislev pingekey, tüfa koni noviembre puwlu diciembre, tüfachi küyen mu wütrengey ka mawün-ngey. Inalechi küyen tebet pingelu, koni diciembre puwlu enero, welu tüfachi küyen mu doy wütrengey, kafey pirekey doy wingkulkülechi mapu mu. Ngüneduamaiñ chem pin ta Biblia chumngechi antüngekey Belen mu.

Kiñe wirintukulu Biblia Esdra pingelu, pengeli kislev chi küyen wütrengekefuy ka mawünkefuy. Ka feypi “20 antü, aylla küyen mu [kislev]” Jerusalen mu trawüluwi fentren che, feymu “trüntrünümekey [...] fütra mawün mew”. Kafey feychi che  trawüluwkülelu feypingün chumngechi antüngekey feychi küyen mu: “Famülke mu fütra mawünkey ka wekuntu pepi mülen-ngelay” (Esdras 10:9, 13; Jeremías 36:22). Feymu lle, diciembre akuchi küyen mu tati pu ufisa kamañ müleyelu Belen püle ñikümüwniekefuy ñi pu ufisa engün wekuntu ñi mülenoal pun mew.

Welu Biblia feypi feychi pun choyüngelu ta Jesus mülekefuy pu kamañ llüwatunielu tañi pu ufisa lelfün mew. Luka pengeli feychi antü mu, “Belen ñi fülpüle mülerkey kiñeke ufisa kamañ pun llüwatunielu ñi pu ufisa lelfün mew” (Luka 2:8-12). Ngüneduamnge tati pu kamañfe pun mew llüwatuniekefuyngün tañi pu ufisa lelfün mu. Diciembre küyen mu, rume wütrengekefuy ka müna mawünkefuy Belen mu, feymu lle ¿mülenagpeafuy may tati pu ufisa kamañ lelfün mew? Femlayafuy llemay. Feymew kom tüfachi dungu ñi rupan pengeli Jesus ñi choyüngenon diciembre küyen mu. *

Chaw Ngünechen ñi Dungu küme feypi chumül am ñi lan ta Jesus, welu pichi feypi müten chumül ñi choyüngen. Tüfa tukulpalelkeeiñmew ti longko ülmen Salomon ñi feypin: “Kiñe küme üy doy kümey ta küme aseyte mew, ka tati antü ñi lan doy kümey tati antü ñi choyüngen” (Eclesiastés 7:1). Femngechi kimtukuiñ Biblia feypi fentren dungu Jesus ñi amuldungun ka tañi lan, welu pichi feypi chumül ñi choyüngen.