1-3. ¿Chem kayñe inantukunieeiñmu kom iñchiñ? Ka ngüneduamlu iñchiñ Biblia ñi kimeltukeel, ¿chem küme maneluwün nietuiñ?

RAKIDUAMNGE tami lefmawkülen kiñe fütra kayñe, doy matu leflu ka doy newen-ngelu ta eymi mu. Ka kimnieymi dituelmu, molayaeymu, kafey dewma pefimi chumngechi langümfi kiñeke tami pu weni. Welu doy lefülmi rume, ngeñi püllelepay. Feymew montupelayaymi chi. Welu may, akurumey kiñe che tami montulaetew. Tüfa doy newen-ngey tami kayñe mu, ka kellueymu. ¡Müna küme dungu!

² Ka femngechi reke inantukunieeymu tüfachi kayñe, kafey kom iñchiñ inantukunieeiñmu. Chumngechi peiñ rupachi chillkatun mu, Biblia pengelkey tati lan kiñe kayñe reke feley. Feymu iney no rume montulayafuy ka pepi wewlayafuy rume tüfachi kayñe, feymu epe kom iñchiñ pekeiñ chumngechi taiñ piwkeyen che müntuñmangey ñi mongen. Welu Jewba doy newen-ngey tati lan mu. Feymu kidu taiñ piwkeyen Montulchengelu am. Kafey Ngünechen pepikawküley ñi wewafiel ka feypikünuy ñi apümafiel tati lan rumel mu. Biblia ta kimeltukey: “Fey ti kiñelewechi kayñe, tati lan dungu ka femngechi wewngeay” (1 Korintio 15:26). ¡Müna küme dungu tüfa!

³ Peaiñ chumngechi tati lan, kiñe kayñe reke felelu, rume kutrankakeeiñmu lalu kiñe piwkeyen che. Welu nieiñ kiñe  maneluwün taiñ ayüwküleal: Jewba feypikünuy kom pu layelu wiñotuay ñi mongen (Isaías 26:19). Feymu Jewba wiño elutuaeyew ta mongen, tüfachi maneluwün tati wiñomongetun mu.

4. a) Ngüneduamlu iñchiñ Jesus ñi kutrankawün lalu tañi weni, ¿chem kimeltukeeiñmew Jewba ñi rakiduam mu? b) Jesus, ¿iney engün wenikawkülekefuy?

⁴ ¿Ñamümimi kiñekentu tami pu che kam kiñe piwkeyen weni tati lan mu? Yafüngewelay fente kutrankawün ka weñangkün mu, fey tüngduamngewenolu chi piwke chem no rume taiñ pepi femal. Feymu may, doy duamkeiñ Chaw Ngünechen ñi Dungu taiñ yafültukuaetew (papeltunge 2 Korintio 1: 3, 4). Welu Biblia kimeltukeeiñmew Jewba ka Jesus chem rakiduamkeyngu ti lan mu. Ka pengelkeeiñmew fente kutrankawi Jesus lalu kiñe piwkeyen weni, femngechi Jesus küme pengeli tañi Chaw ñi chumngen (Juan 14:9). Fey amulu Jerusalen waria mu, amukefuy ñi pemeafiel Lasaru ka tañi pu lamngen, Maria ka Marta, inafül Betania waria mu mülekefulu. Ka wenikawkülekefuyngün, feymu Biblia feypi: “Jesus rume piwkeyeniefuy ta Marta ka Maria ñi domo lamngen ka Lasaru” (Juan 11:5). Welu Lasaru lay, chumngechi peiñ kayu chillkatun mu.

5, 6. a) ¿Chumi Jesus pefilu Lasaru ñi pu che ka tañi pu weni mekelu ñi ngüman tañi lan mu? b) Jesus fente kutrankawlu tati lan mu, ¿chumngelu (chemu) yafültukukeeiñmew tüfa?

⁵ ¿Chumi Jesus lalu tañi weni? Ti nütram pengeli, Jesus amulu ñi pemeafiel Lasaru ñi pu che ka tañi pu weni, tüfa engün mekey ñi ngüman Lasaru ñi lan mu. Fey Jesus pefilu engün, rume weñangkünagi. “Rume fütra kutrantupiwkey ka weñangkünagi” kafey “Jesus ngümay” (Juan 11:33, 35). ¿Chumngelu müna weñangkünagi? ¿Niepelafuy may chem maneluwün no rume? Femlafuy llemay. Jesus kimniefulu am ñi epe rupayal kiñe afmatufalchi dungu (Juan 11:3, 4). Welu kimniefulu rume tüfa, kutrankawi ka weñangkünagi tati lan ñi duam mu.

⁶ Kimlu iñchiñ Jesus fente kutrankawi tati lan mu, tüfa yafültukukeeiñmew. Ka kimeltukeeiñmew Jesus ka Jewba üdekefingu tati lan. Kafey Jewba niey fentren pepiluwün ñi  chaftuafiel ka apümafiel tüfachi kayñe. Feymu peaiñ Jesus ñi afmatufalchi dungu femkefulu Ngünechen ñi newen mu.

7, 8. Lasaru ñi lan mu, ¿chumngelu tati che feypiafuy “ngelay chem maneluwün no rume”, welu chumi Jesus?

⁷ Lasaru rüngaltukuley kiñe lolo mu, fey Jesus werküy ñi nentungeal ti kura rakümtukungelu chi lolo. Welu Marta katrütudungufi ta Jesus, feymu feypieyew “dew weda nümüpelay tati, meli antülu am ñi tukukünungeel” (Juan 11:39). Feymu tati pu che feypiafuy: “Ngelay chem maneluwün no rume”.

⁸ Chüwüdngelu ti kura, Jesus newentu dunguy: “¡Lasaru, tripatunge tüfey mew!”. ¿Chem rupay? ‘Fey ti wentru dew lafulu tripapatuy’ (Juan 11:43, 44). ¿Rakiduamafuymi fente ayüwkületuyngün kom feychi che? Lasaru tañi pu lamngen, ñi pu che, ñi pu weni ka tañi pu karukatu küme kimkefuyngün Lasaru ñi lan; welu fewla wiño nietufingün tüfachi fütra piwkeyekefilu chi wentru. Feymu ramtuwpelayngün, ¿rüfngepey may fente küme dungu? Feymu may, rume ayüwün mu pangkofingün. ¡Müna küme dungu wewngelu tati lan!

9, 10. a) ¿Chumngechi pengeli Jesus iney ñi eluetewchi pepiluwün ñi wiñomongeltual ta Lasaru? b) Papeltulu iñchiñ Biblia ñi nütram tati wiñomongetun mu, ¿chumngechi kellukeeiñmew?

⁹ Jesus turpu feypilay, kidu ñi newen mu femün tüfachi afmatun dungu. Fey petu mütrümnofilu ta Lasaru, Jesus ngillatufi ta Chaw Ngünechen, fey pengeli Jewba müten niey pepiluwün ñi wiñomongeltuafiel ta che (papeltunge Juan 11:41, 42). Welu Jewba ñi pepiluwün mu, kiñe rupa mu müten femlay ñi wiñomongeltuafiel kiñe layechi che. Chaw Ngünechen ñi Dungu kimeltukey pura rupa mu, kidu tañi newen mu wiñomongeltufi pu layechi che. * Ayüfali ñi papeltuafiel ka chillkatuafiel tüfachi nütram. Ka pengelkeeiñmew ta Chaw Ngünechen dullintuchekelay iney no rume, feymu wiñomongeltufi tati pu wekeche, füchakeche, wentru ka domo, israelche ka tripanche.  ¡Müna ayüwün-ngey ngüneduamal tüfachi nütram! Rakiduamnge Jesus wiñomongeltufilu kiñe pichi malen, tañi epu chaw ‘rume afmatulewey engu’ (Marku 5:42). ¡Femi tati! Fey turpu ngoymalayayngu Jewba ñi eluetewchi ayüwün.

¹⁰ Fey llemay, tati pu che Jesus ñi wiñomongeltufiel, ka wiño larpuyngün. Welu, ¿falipelay may Jesus wiñomongeltufilu kom feychi che? ¡Femlay llemay! Kom tüfachi nütram Biblia mu mülelu, kimeltukeeiñmew tati rüf dungu ka elukeeiñmew maneluwün.

11. Lasaru ñi wiñomongetun mu, ¿chumngechi pengeli tüfachi nütram ñi chem pin Eclesiastés 9:5?

¹¹ Biblia kimeltukey “tati pu layelu chem dungu no rume kimwetukelayngün” (Eclesiastés 9:5). Feymu amukelay ñi mongeleal chew no rume ka kimwetukelay rume. Lasaru ñi nütram pengeli tüfa. Feymu lle wiñomongetulu Lasaru, ¿ayüfal nütramkapefi may ta che ñi chumlen ta wenu mapu? Kam, ¿llükalkapefi may ta che ñi mülen kiñe lululkülechi kütral? ¡Femlay tati! Biblia ta feypikelay tüfachi dungu. Feymu Lasaru meli antülu ñi lan mu ‘chem dungu no rume kimwetukelay’. Welu may, umawkülekefuy müten ti lan mu (Juan 11:11).

12. Lasaru ñi wiñomongetun, ¿chumngelu maneluwafuiñ ñi rüfngen?

¹² Lasaru ñi rupan mu, kimeltukeeiñmew tati wiñomongetun chem epew no rume tati, tüfa rüfngey. Feymu Jesus wiñomongeltufilu ta Lasaru fentren che peeyew ñi femün tüfa. Kafey tati pu longkolechi religioso pepi famentulafingün ñi rüfngen ti afmatun dungu, üdeniefilu rume ta Jesus. Welu may, feypingün: “¿Chem chumaiñ am? Tüfachi wentru ta femmekey rume fentren afmatufalchi dungu” (Juan 11:47). Fentren che amuyngün ñi pemeafiel ta Lasaru, ka feyenturpuyngün Jesus mu. Feymu llemay, Lasaru ñi wiñomongetun pengeleleyew engün Jesus ñi werküetew ta Chaw Ngünechen. Tüfachi dungu mu, kiñeke wedake judio longkolechi religioso adkünuwingün ñi langümafiel ta Jesus ka Lasaru (Juan 11:53; 12:9-11).

13. ¿Chumngelu maneluwafuiñ ta Jewba ñi wiñomongeltuafiel tati pu layelu?

 ¹³ ¿Rüfngepey may tati wiñomongetun? Fey llemay, Jesus feypikünuy akule tati antü “itrokom tati pu layelu [Ngünechen ñi tukulpaniefiel]” wiñomongetuay (Juan 5:28). Jewba dewmafilu am itrokom mongen, feymu ¿küdawngepey may rakiduamal ñi wiño dewmangetual pu layechi che? Femlay llemay, tüfa femürpuay Jewba ñi tukulpanieafiel mu. Feymu, ¿pepi tukulpaniepeafuy may taiñ pu layechi che? Rakiduamnge tüfa: Ngünechen kimniey fentren warangka wangülen ñi üy mülelu fütra kallfü wenu mu (Isaías 40:26). Feymu llemay, Jewba pepilniey ñi tukulpaniefiel kom ñi chumngekefel taiñ pu layechi che, kafey müna ayüniey ñi wiñomongeltuafiel.

14, 15. Chumngechi feypi Job, ¿tunte duamküley Jewba ñi wiñomongeltuafiel tati pu layelu?

¹⁴ Feymu lle, ¿tunte duamküley Jewba ñi wiñomongeltuafiel tati pu layelu? Biblia kimeltukey rume ayüniey ñi femal tüfa. Chaw Ngünechen ñi manelfalchi kona, Job pingelu ramtuy: “Lale kiñe wentru, ¿ka wiñomongepetuafuy may?”. Ka feypi ñi üngümküleal ti rüngan mu, akule wüla chi antü Chaw Ngünechen tañi tukulpaetew. Feymu lle Job feypifi ta Jewba: “Eymi mütrümaymi, iñche llowdunguaeyu. Ayüaymi tami femün kidu tami kuwü mew” (Job 14:13-15).

¹⁵ Rakiduamnge tüfa mew: Jewba ayüniey ñi wiñomongeltuafiel tati pu layelu. ¿Rüf yafülduamkeeiñmew may kimal Jewba rume ayünieel ñi femal tüfa? Welu, ¿chumngechi femay tüfachi wiñomongetun küpalechi antü mu? ¿Iney engün wiñomongetuay, ka chew?

16. Tati pu wiñomongetualu, ¿chem ayüwün-ngechi mongen nieayngün?

¹⁶ Papeltukelu iñchiñ kuyfike wiñomongetun Biblia ñi nütram mu, doy kimiyiñ chem rupayal küpalechi antü mu. Tati pu che wiñomongetulu Mapu mu wiño trawükefuy tañi pu piwkeyen che engün. Ka femngechi tati wiñomongetun  mülealu küpalechi antü mu, doy kümeay. Chumngechi peiñ küla chillkatun mu, kom tati Mapu kiñe küme mülewe ngetuay, tüfa Ngünechen ñi ayükeelchi dungu. Feymu tati pu layelu wiñomongetuayngün Mapu mu, chew ngewetunoalu pu wedake che, weychan ka kutran. Welu may, ayüwün-ngechi mongen nieayngün ka tüngküleayngün ti Mapu rumel mew.

17. ¿Tunten che wiñomongetuay?

¹⁷ ¿Iney engün wiñomongetuay? Jesus feypi ta “itrokom tati pu layelu [Ngünechen ñi tukulpaniefiel] allküay ta kisu ñi dungun, fey tripapatuay engün” (Juan 5:28, 29). Ka femngechi Apokalipsi 20:13, TNM, feypi: “Tati lafken wültuy tati pu layelu mülelu fey mu, ka tati lan ka Rüngan wültuy tati pu layelu mülelu fey mu” (pefinge ti Doy Kimngeam pingechi dungu, feypilelu “¿Chem am tati Seol ka Hades?”). Tüfachi rüngan chew ñi mülen tati pu layelu wellilewetuay, wiñomongetualu am rume fentren warangka che umawkülelu reke üye mu. Ka tati apostol Pablo feypi: “Wiñomongetuael engün tati norngechi che ka tati norngenochi che” (Hecho 24:15, TNM). ¿Chem piley tüfachi dungu?

18. ¿Iney engün müleyey tati pu “norngechi che” mu ñi wiñomongetual, ka chumngechi kelluafeymu tüfachi maneluwün?

¹⁸ Tati pu “norngechi che” mu, müleyey fentren che Biblia mu nütramngelu mongelekefulu petu ñi küpanon Jesus Mapu mew, tüfa engün Noe, Abraam, Sara, Moyse, Rut, Ester ka doy kakelu che. Ka Ebrew kapitulo mari kiñe nütramkangey kiñeke mupiltulechi wentru ka domo. Ka femngechi tati pu “norngechi che” mu müleyey Jewba ñi pu kona larpulu famülke mu. Feymu tati maneluwün wiñomongetun mu, kellukeeiñmu taiñ llükawenoal ti lan mu (Ebrew 2:15).

19. ¿Iney engün am tati pu “norngenochi che”, ka chem afmatufalchi maneluwün eluaeyew Jewba?

¹⁹ Fentren warangka che kimlafingün ta Chaw Jewba, feymu poyelafingün ka femlayngün kidu tañi ayükeelchi dungu. ¿Chem rupayafuy fey engün mew? Tüfachi pu “norngenochi che” Jewba ngoymalayaeyew engün. Feymu ti rüfngechi Ngünechen ka wiñomongeltuafi ka eluñmayafi fey engün ñi kimaetew ka poyeaetew. Kafey rupamekele warangka tripantu,  tati pu layelu wiñomongetuay ka trawüayngün pu manelfalchi che poyekefilu ta Jewba ti Mapu mew. Feymu ayüfalchi rupan müleay feychi antü mu, Biblia ta üytukefi tati Antü ñi Ramtukadungungeal ta pu che. *

20. ¿Chem adentuley ti Gehena, ka iney engün amuay üye mew?

²⁰ Feymu, ¿wiñomongetupeay may kom tati che mongelekefulu? Femlayay tati. Biblia feypi kiñeke pu che Gehena mu müleyngün (Luka 12:5, TNM). Gehena pingekefuy, chew ñi ütrüftukungemum itrofill pod ka lüpümngekefuy lachi kuerpu. Tüfa mülekefuy wekuntu Jerusalen waria mu. Tati pu judioche, ¿chem layüm che ütrüftukungefuy üye mew? Tati pu wedake che ñi lachi kuerpu ütrüftukungefuy üye mew, ka falingenolu ñi wiñomongelngetual. Feymu ti Gehena pingelu adentuley tati rumel apümkangen. Jesus koneltuleay ñi ramtukadunguafiel pu wiñomongelngetuchi che, welu Jewba tati doykülechi Kues (Hecho 10:42). Ka Chaw Ngünechen turpu wiñomongeltulayafi tati pu wedake che pikenolu kangetual tañi mongen.

21, 22. a) ¿Chem kangelu wiñomongetun müley? b) ¿Iney am wünen wiñomongetuy kiñe püllü reke?

²¹ Biblia ka kimeltukey ñi mülen kangelu wiñomongetun. Tüfachi wiñomongetun mu, tati mülealu wenu mapu mu kiñe püllü reke. Feymu Ngünechen ñi Dungu nütramkakey kiñe che müten niekefuy feychi wiñomongetun: Jesukristo llemay.

²² Jesus kiñe che ngefuy; fey langümngey, welu Jewba elkünulay tañi manelfalchi Fotüm ti Rüngan mu (Salmo 16:10; Hecho 13:34, 35). Feymu Jewba wiñomongeltufi ta Jesus, welu kiñe wentru reke femlafi. Ti apostol Pedro feypi Jesukristo ‘lay kiñe che reke, welu ti küme püllü ñi mongen nielu am, feymew wiñomongetuy’ (1 Pedro 3:18). ¡Fütra afmatufalchi dungu tüfa!  Jesus wiño mongeley kiñe newen-ngechi püllü reke (papeltunge 1 Korintio 15:3-6). Jesus wünelechi che ñi llowün tüfachi afmatufalchi wiñomongetun, welu fentepuwlay tüfachi wiñomongetun (Juan 3:13).

23, 24. ¿Iney engün koneltuley tati “pichi kechan ufisa” pingelu, ka tunten ngeayngün?

²³ Jesus kimniefuy ñi wiñotual wenu mapu mu, feymu feypifi tañi pu manelfalchi inanieetew ñi “pepikameael kiñe küme mülewe” fey engün ngealu üye mu (Juan 14:2). Ka femngechi tati pu che amualu wenu mapu mu, Jesus üytufi “pichi kechan ufisa” (Luka 12:32, TNM). ¿Tunten manelfalchi kristiano koneltuley tüfachi pichi trokiñche mu? Apokalipsi 14:1 papeltuiñ apostol Juan ñi feypin: ‘Fey wüla ka pefiñ tati Korderu, witralelu Sion pingechi wingkul mew. Kompañnieeyew 144.000 che, wirintukunielu tañi tol mew tati Korderu tañi üy ka kisu tañi Chaw ñi üy’.

²⁴ Chaw Ngünechen wiñomongeltufi tati 144.000 kristiano ñi müleal wenu mapu mu, ka koneltuley tüfa Jesus ñi pu manelfalchi apostol. Tüfachi wiñomongetun, ¿chumül rupaley? Ti apostol Pablo wirintukuy rupayalu wiñometule ta Kristo (1 Korintio 15:23). Feymu tüfachi dungu ‘wiñometule ta Kristo’ griego kewün dungun mu feypiley feychi antü Kristo ngüneniele wenu mapu mu. Chumngechi peaiñ aylla chillkatun mu, fewla müleiñ feychi antü mu. Taiñ mülen antü mu, tati trokiñ 144.000 mu pichileweyngün. Feymu lale fey engün, wiñomongelfemngetuay ñi amual wenu mapu mu engün (1 Korintio 15:51-55). Welu fentren che maneluwküley ñi wiñomongetual küpalechi antü mu, kom Mapu kiñe küme mülewe ngetule.

25. ¿Chem kimaiñ inalechi chillkatun mu?

²⁵ Rüf maneluwküleafuymi Jewba mu ñi wewafiel ti kayñe, femngechi apümafi tati lan rumel mew (papeltunge Isaías 25:8). Welu ramtukeymi chi: “¿Chumayngün tati wiñomongetulu wenu mapu mu?”. Fey engün koneltuleay Ngünechen ñi afmatufalchi Ngünenien wenu mapu mu. Inalechi chillkatun mu doy kimaiñ tüfachi Ngünenien.