¿Chumquei pu cümeque hueni?
CAPITULO 8
¿Chumquei pu cümeque hueni?
Brittany feipi: “Illculeli, mülei tañi feipiafiel quiñe che tañi chum duamcülen. Hueñancüleli, duamnien tañi yafültucungeal. Ayüucüleli, cüpa feipiquefiñ caquelu che tañi ayüucüleal. Duamnien tañi pu hueni”.
TATI pu pichiqueche duamniei hueni ñi aucantual müten. Huelu tati pu huechequeche duamniei rüfngechi hueni ñi quelluaeteu ca yafültucuaeteu.
Biblia feipi: “Quiñe rüfngechi hueni rumel piuqueyechequei, ca quiñe peñi reque felei ñi mülen mu hueñancün” (Proverbios 17:17). Tüfachi hueni caletui tami cuifique hueni niequefel pichicalu eimi.
Rüf dungu: Amulele tami tremün, duamnieimi cümeque hueni:
1. Cüme piuquengelu.
2. Cüme mongen yenielu.
3. Tami quelluaeteu ñi cüme chengeal.
Ramtuunge: ¿Femngechi chengei tami pu hueni? Ngüneduamaiñ tüfachi cüla dungu.
Hunen dungu: Dullifinge hueni cüme piuquengelu
Tami quimal. Quiñeque che hueni piafeimu, huelu rüf cüme hueningelayafui chi. Biblia feipilei: “Quiñeque huenihuen eluuquei tañi hueluconque huesalcahual” (Proverbios 18:24). ¿Femngechi felepei mai? Femi llemai. Raquiduamnge tüfa: quiñe che, ¿tami hueni femfaluhui, huelu quisutu ñi cümelcahual müten? ¿Quiñe tami pu hueni huesa dunguyeimu? Femngechi rupalmi, fentepuafui tami huenihuen. * Loncontucunieaimi: pichin hueni niefulmi rume, huelu doi falin-ngei ñi cümeque hueningeal.
¿Chumafuimi? Dulliaimi cümeque hueni tami inayentuafiel.
Yvette, 17 tripantu nielu feipi: “Com che cüme dunguyequefi tañi hueni Fiona. Iñche ayüafun tati pu che ca femngechi ñi cüme dunguyeaeteu ta iñche. Inayentufali tañi hueni”.
Chem tami femal:
1. Papeltunge Gálatas 5:22, 23.
2. Ramtuunge: “Chumngechi ñi feipin tüfachi texto, ¿femngechi chengei tañi pu hueni?”.
3. Huirintucunge ñi üi tami pu saquin hueni ca quisuque ñi chumngen engün.
Üi
․․․․․
Chumngei
․․․․․
Quiñe ngülamtun: Huirintuculmi re huesaque dungu tami pu hueni mu, fei cümeafui tami quintual doi cümeque hueni.
Epu dungu: Dullifinge tami pu hueni cüme mongen yenielu
Tami quimal. Pürüm dullifilmi tami pu hueni, cüme dullilayafuimi chi. Cafei ngoimalayaimi chem pin Biblia ñi ngülam, “tati quiñeucülelu pu huedhuedque che engün huesa triparpuai” (Proverbios 13:20). Biblia feipilu huedhuedque che feipilai feichi pu che nienolu cüme nota. Doi mai feipilei pu quimchengenolu ca feichi pu che femquelu quisu ñi ayüqueel müten. Eimi ayülaimi nieal femngechi hueni, ¿felelai?
¿Chumafuimi? Chem che rume hueniyelayafimi. Doi mai hune cüme ngüneduamnge ñi chumngechi chengen engün (Salmo 26:4). Femngechi quimaimi “ñi trürnon quiñe nor che ca quiñe huesa che, ñi trürnon quiñe poyequefilu ta Chau Dios ca quiñe femquenolu” (Malaquías 3:18).
Christopher 13 tripantu nielu feipi: “Ayüucülen tañi pu chau ñi quellueteu ñi peal cümeque hueni poyequefilu ta Jehová”.
Lloudunguafuimi tüfachi epu ramtun:
¿Llicaleimi am tami pu hueni dicümtucuaeteu tami femal huesaque dungu?
□ Mai
□ Femlai
¿Llicaleimi ñi chem raquiduamal tami pu chau quimfile tami pu hueni?
□ Mai
□ Femlai
Quiñe ngülamtun: Mai feipilmi tüfachi ramtun mu, cümeafui tami quintual hueni poyequefilu ta Jehová.
Cüla dungu: Quintunge hueni tami quelluaeteu ñi cüme chengeal
Tami quimal. Biblia feipilei: “Tati huesaque hueni huesalcaquefi quiñe che ñi cümeque huimtun” (1 Corintios 15:33). Ca femngechi rupai ta Lauren, quisu feipi: “Colegio mu quisulelu troquiuquefun. Feimu tañi llohuaeteu tañi pu compañ, femquen com tañi feipieteu”. Lauren ngüneduamürpui femquelu com ñi feipieteu tañi pu hueni, fei engün ta ngünenieyu. ¿Eimi cai? ¿Ayünieimi tami pu hueni tami ngünenieaeteu?
¿Chumafuimi? Quiñepülecünufinge tami pu hueni tami dicümtucueteu ñi femal quisu ñi ayüqueel. Femülmi, doi pichin hueni niehueafuimi. Huelu doi cüme duamcüleaimi ca quintuafuimi cümeque hueni, quelluaimu tami doi cüme chengeal (Romanos 12:2).
Jason, 21 tripantu nielu feipi: “Quiñe tañi doi cüme hueni Clint pingei. Tañi hueni cüme dulliquei ñi mongen mu ca duamtuchequei. Feimu rume yafültucuqueneu”.
Lloudunguafuimi tüfachi epu ramtun:
Tami cüme llohuaeteu tami pu hueni, ¿inayentuquefimi mai ñi tuculuhun, ñi dunguquen ca ñi femquen engün?
□ Mai
□ Femlai
Tami ayühuelafiel tami pu hueni, ¿amuqueimi mai cheu ñi femquen chem rume tañi ayüqueel?
□ Mai
□ Femlai
Quiñe ngülamtun: Mai pilmi, nütramcafinge tami pu chau cam cangelu quimche tami ngülamtuaeteu, femngechi tami nieal doi cümeque hueni. Dunguquelu Ineingen Jehová ngelmi, ca nütramcayafuimi quiñe loncolelu tami trahunche mu.
[Quimngeal dungu]
^ Com huelulcauqueiñ (Romanos 3:23). Feimu quiñe tami pu hueni huesalcayafeimu. Huelu huiñoduamtuen pielmu rüf piuque mu, cümeafui tami perdonayafiel (1 Pedro 4:8).
FALIN TEXTO
“Mülei ti huenihuen doi piuqueyeuquei tati pu peñihuen mu” (Proverbios 18:24).
QUIÑE NGÜLAM
Femülmi cümeque dungu, nieaimi cümeque hueni ca femngechi nor mongen yenielu. ¡Feique ta cümeque hueni tati!
¿QUIMIMI TÜFA?
Dios dullintuchequelai, huelu cüme dulliquefi tañi pu hueni (Salmo 15:1-5).
¡FEI TÜFA FEMAN!
¿Chumafun tañi quintual cümeque hueni? ․․․․․
Tüfa quiñeque doi fücha che ayüfun tañi doi quimafiel: ․․․․․
¿Chem ramtuafun tañi pu chau tüfachi dungu mu? ․․․․․
¿CHEM PIMI CAI?
● ¿Chem chumngen doi ayüfimi quiñe hueni mu? ¿Chumngelu?
● ¿Chem mülei tami femal tami doi cüme hueningerpual?
[Feipin]
Carlos feipi: “Tañi pu chau ngülamtueneu tañi quiñepülecünuafiel quiñeque tañi pu hueni. Pürüm feyentulafiñ ñi feipin, raquiduamlu am ñi penoal caquelu hueni. Huelu cümei tati ngülam. Quellueneu ñi raquiduamal ñi mülen doi cümeque hueni”.
[Huichulechi dungu]
Caquelu ngülam
Nütramcafinge tami pu chau tami huenihuen mu. Ramtuafuimi chem hueni ñi niequefel huechengelu engu. Quiñeque mu, ¿huesa dullipei mai tañi pu hueni? Cafei ramtufinge chem ngülamtuafeimu tami nieal cümeque hueni.
Tüfa tañi hueni feipiafuimi tami pu chau. Pinolmi, ramtuhuafuimi chumngelu. ¿Llicaleimi tami pu hueni ñi ayühuelnoafiel tami pu chau? Femngechi rupalmi, mülei tami doi cüme dullial tami pu hueni.
Cüme allcütufinge tami pu hueni. Falintufinge ñi feipin ca ñi cümelcaleal (Filipenses 2:4).
Perdonafinge tami pu hueni. Biblia pengeli com huelulcauqueiñ, feimu raquiduamlayaimi ñi turpu huelulcaunoal tami pu hueni (Santiago 3:2).
Tami pu hueni ca duamniei ñi quisuleal. Catrütulayafimi ñi femal caquelu duam. Nielmi rüfngechi hueni, quisucünulayaimu rupalmi huesaque dungu (Eclesiastés 4:9, 10).
[Adentun]
Femülmi com tami feipieteu tami pu hueni, fei engün ta ngünenieaimu.
Eimi ca ayüafuimi
HUECHEQUECHE
Pu huechequeche ñi ramtuqueel
Pu huechequeche ñi ramtuqueel: cudumuhun dungu, hueni, pu chau, colegio ca fillque dungu.
