DOY MÜLELU che Mapu mew, epe kom che itrofill wedalkamekeyngün Kain reke. Welu kiñe wentru kangefuy. Enok pingekefuy tüfachi wentru. Kidu kiñe llükakenochi wentru ngefuy. Kidu wallmalekefuy wedake che, welu kidu amuley ñi poyefiel Ngünechen.

¿Kimimi chumngelu (chemu) feyti pu che rume (mütre) wedalkamekefuyngün? Rakiduamnge tüfa mew: ¿Iney am feypieyew Adan ka Eva ñi feyentunoafiel (müngeltunoafiel) Ngünechen, ka ifilu engu feyti fün, Ngünechen ‘ilaaymu’ pieyew? Kiñe weda werken püllü. Tati Biblia üytukefi Satana. Kidu ayükey kom iñchiñ ñi wedachengeal.

Kiñe antü Chaw Ngünechen Jewba dungufi Enok kiñe dungu ñi feypiafiel ta che, welu kidu engün küpa allkütulayngün. Fey tüfa: ‘Akuay kiñe antü Ngünechen ñi apümal kom wedake che’. Feyti rume lladkülkaeyew chi che. Küpa langümfingün Enok. Feymu lle, Enok mülefuy ñi rume llükankenochi wentru ngeal, ñi feypiafiel che chem ñi femal Ngünechen.

Ngünechen elkünulay Enok ñi alün mo­ngenieal rangi feychi wedake che. Mongey 365 tripantu müten. ¿Chumngelu feypiyiñ “365 tripantu müten”? Feychi antü mu, tati pu che doy rume ­newen ngekefuy famülke chi che mew, ka doy mongelekefuyngün. ¡Welu ­Matusalen, Enok ñi fotüm, mongekey 969 tripantu!

Lalu Enok, tati pu che doy wedañmawi. Biblia feypi: ‘Kom ñi rakiduam engün rumel wedañmangey,’ ka ‘ti Mapu apoy re wedake che mu.’

¿Kimimi kiñe dungu chumngelu müley fentren wedake dungu feychi antü mu? Feychi Satana niey kiñe we ad dungu ñi yenieafiel ta che ñi wedalkamekeal. Peayiñ chem anta fey.