WEKUN malaltükulechi rayen, Adan ka Eva nierkefuyngu rume wedake dungu. Rume küdawniekefuyngu ñi mongeleal. Dew mülewelay ti anümka wülkelu kümeke fün, welu may peyngu wall ñi mapu mu, fentren wayun ka troltro (rükafün). Tüfa rupay Adan ka Eva feyentunofilu Ngünechen, ka weniyewelafingün.

Welu doy wedalkayngu, Adan ka Eva larpuyngu. Tukulpaymi Ngünechen feypikünueyew: ‘Layafuymu ifilmu feychi fün nielu ti anümka’, feymew femngen femngen amuley ñi füchan ka lan engu. ¡Müna wedalkay ñi allkütunoafiel Ngünechen!

Kom pu yall Adan ka Eva, ñi choyüel dew Ngünechen wemüfilu ñi chaw ka ñuke Eden malaltükulechi rayen mu. Fey tüfa kom ñi pu yall engu, kafey müley ñi füchaleal ka layal.

Adan ka Eva feyentufile (müngeltufile) Jewba, ayüngechi küme mongen yenieafuy engu ka ñi pu yall engün. Nieafuyngün afnoachi mongen, ayüwünkechi tüfachi Mapu mew. Iney no rume füchalayafuy, kutrankawlayafuy ka lalayafuy.

Ngünechen ayükey kom pu che ñi afnoachi mongeleal ayüwünkechi mu, ka feypikünuy ñi femal küpalechi antü mu. Kom Mapu tutelkaleay, ka kom pu che doy kümelkaletuay. Ka kom che welukonkechi küme weniyewayngün, ka Ngünechen mu.

Welu Eva dew weniyewelafuy Ngünechen. Feymu lle, kutrankawi ñi nieal ñi püñeñ. Rüfkünu llemay, ñi feyentunofiel Jewba, küpaleyew fentren kutrankawün, ¿mupiñ pe no?

Adan ka Eva niefuyngu fentren pu yall, wentru ka domo. Wünen fotüm choyüngelu, üytufi Kain. Ñi inan fotüm üytufi ta Abel. ¿Kimimi chem dungu rupan tüfa engu?