¿KIMFIMI tüfachi domo mülelu adentun mu? Rebeka pingerkey. Ka feytichi wentru fülkonkülepalu Isaak pingerkey. Fey ñi kure ngerpual. ¿Chumngechi rupay tüfa?

Abraam, Isaak ñi chaw, ayükefuy tañi fotüm nieal kiñe küme domo. Pilay tañi fotüm Isaak ñi kurengeal kiñe Kanaan domoche, feytichi pu che am poyeniefi koylake dio. Feymu lle Abraam mütrümfi ñi kona ka feypifi: ‘Ayün may tami wiñoal chew tañi mülen pu reñma, Aran mew, ka küpalaymi kiñe domo, Isaak ñi kurengeal.’

Fey wüla Abraam ñi kona yemey mari kamellu, ka amuy kamapu. Fülpulu chi mapu mu chew ñi mülen Abraam ñi pu reñma, witrakünuwi kiñe rünganko (posoko) mew. Epe konün antü, amulu ti waria domo che ñi nentupayael ko, ti rünganko mew. Feymu lle, Abraam ñi kona ngillatufi Jewba mew: ‘Feychi domo nentupayalu ko iñche mew ka tañi pu kamellu, fey eymi dulliafimi (ngümintuafimi) Isaak ñi kurengeal.’

Pichin mu, akuy Rebeka ñi nentupayal ko. Ti kona ‘eluafen ko’ pifi, ti domo elueyew ko. Feymu amuy ka entuy fentren ko kom wiwülechi kamellu. Rume küdawi, feytichi pu kamellu am fentren ko pütokokey engün.

Dewmalu Rebeka, Abraam ñi kona ramtufi: ‘¿Iney pingey tami chaw?’ Ka ramtufi: ‘¿Rulpayafun pun tami ruka mew?’ Ti domo feypi: ‘Tañi chaw Betuel pingey, ka müley kiñe mülewe tami müleam tañi ruka mew.’ Abraam ñi kona kimkerkey Betuel Nakor ñi fotüm ngen, Abraam ñi peñi. Feymu lle, lukutuy ka mañumtufi Jewba tañi yenieetew Abraam ñi reñma mew.

Feychi pun Abraam ñi kona feypifi Betuel ka Laban, Rebeka ñi lamngen, fey ñi duam küpan. Feymu mür feypi engu amuafuy Rebeka kidu engu, ka ñi fütayafiel Isaak. ¿Chem pi Rebeka ramtungelu? ‘May, ayün tañi amual’ pi. Feymu lle feychi ka antü, pürakamelluy engün ka wiñoamutual engün ñi alüngechi kamapu Kanaan mew.

Puwlu engün, dew konchi antü. Rebeka pey kiñe wentru miawlu ti lelfün mew. Isaak ürke. Isaak ayüwi ñi pefiel Rebeka. Sara, Isaak ñi ñuke yem, dew küla tripantu ruparkey ñi lan, feymu Isaak petu weñangküley. Welu fewla Isaak rume piwkeyerpufi Rebeka, ka wiño ayüwkületuy.