¿PEFIMI Dina? ¿Iney pemeafilu? Amuy ñi pemeafiel kiñeke üllchake domo mülelu Kanaan ti mapu mew. ¿Ayüwichi am tañi chaw Jakob ñi femün? Tami kelluaetew tami wiñoldungual tüfachi ramtun, müley tami tukulpafiel ka rakiduamal Abraam mew, ka Isaak ñi chumngechi pekefiel tüfachi Kanaan domo.

¿Ayüfuy Abraam ñi kurengeal ñi fotüm Isaak Kanaan domo ñi yemeal? Femlayafuy llemay. ¿Ayüfuy Isaak ka Rebeka tañi yall engu, Jakob ñi kurengeal Kanaan domo? Femlayafuy llemay. ¿Kimimi chumngelu (chemu)?

Tüfachi Kanaan che, poyekefuy koylake dio. Fey engün küme che ngerkelafuyngün ñi fütayeafiel ka kureyeafiel, ka weniyeafiel engün. Feymu lle, rüftuafuyiñ Jakob ayükelafuy ñi ñawe ñi weniyeafiel feychi Kanaan domo.

Feymu llemay, Dina koni rume weda dungu mew. ¿Pefimi tüfachi adentun mu feyti Kanaan wentru ñi adkintuniefiel Dina? Sikem pingey. Kiñe antü Dina amulu Kanaan mapu, Sikem newenkafi Dina ñi kudumafiel, feymu nüntufi. Rume weda dungu tüfa, feyti pu kurewen müten müley ñi kudumuwal. Tüfachi weda dungu Sikem ñi femfiel ta Dina, rume weda dungu mu tukufi.

Dina ñi pu lamngen allkülu tüfachi dungu, rume lladküyngün. Epu doy lladküyngu, Simeon ka Levi, yeyngu fütrake kuchillo, ka upeduamkechi koni waria mew. Fey engu ka ñi pu peñi, langümfingün Sikem ka itrokom kakelu wentru mülelu üye mew. Tüfachi weda dungu ñi femün Jakob ñi pu fotüm, rume lladkülkafi tañi chaw engün.

¿Chumngechi tuwi kom tüfachi weda dungu? Dina ñi wenikafiel che ñi feyentunofiel ñi feypiel Ngünechen. Iñchiñ kintulayayiñ femngechi weni, ¿feley?