¡ADKINTUFINGE müna weñangküley ka maneluwkülelay tüfachi weche! Jose tati. We fenderkeeyew ñi pu peñi tüfachi pu wentru amulelu Egipto mu. Üye mew ngillan kona ngetuay Jose. ¿Chumngelu (chemu) am femingün tüfachi weda dungu ñi pu kiñe chaw peñi? Ütrirfilu am engün Jose.

Jakob, ñi chaw engün, müna rume piwkeyefi Jose. Sakikefi dewmalfi kiñe tute wif takun. Ñi wünen mari pu peñi pefilu Jakob rume piwkeyefilu am Jose, feymu ütrirfi engün ka üdefi engün Jose. Welu ka müley ka dungu am ñi üdengeken.

Jose nierkey epu pewma. Jose ñi epu pewma mew, ñi pu peñi lloyünagingün kidu mu. Jose feypifilu tüfachi epu pewma, ti üdewün ñi pu peñi doy tremürpuy.

Kiñe antü, Jose ñi pu wünen peñi ngüneytukefilu engün ñi chaw ñi pu ufisa, Jakob feypifi Jose: ‘Amunge ka pemeafimi chumleyngün tami pu peñi.’ Jose ñi pu peñi pefilu ñi küpan, kiñeke feypi engün: ‘¡Amuyiñ ñi langümafiel!’ Welu ti wünen peñi, Ruben, feypi: ‘¡No, femkilmün tüfa!’ Feymu feypi: ‘Ütrüftükuafimün tüfachi arkenkülechi rünganko (posoko).’ Feymew anüyngün ñi pepikawal engün ñi chumafiel ñi peñi Jose.

Fey mew küpayngün kiñeke Ismael che. Juda feypifi tañi pu kiñe chaw peñi: ‘Fendeafiyiñ Ismael che mew.’ Tüfa femi engün. Fendefi engün Jose epu mari moneda plata mu. ¡Müna illamfal ka weda piwke ngey tüfa!

¿Chem feypiafi engün am ñi chaw tati pu peñi? Langümfingün kiñe kapüra, ka mufüchi tukufingün feychi tuten takun kapüra ñi mollfüñ mew. Feymew yelfingün ti takun ñi chaw Jakob ka feypifingün: ‘Peiñ tüfa. Ngüneduamfinge, ka peaymi Jose ñi takun-ngenon.’

Jakob pey feyngen tüfachi dungu. ‘Kiñe awka kulliñ langümeyew ta Jose,’ wirari. Jose ñi pu peñi ayüy ñi femngechi rakiduamal tañi chaw. Jakob rume weñangküley. Fill antü ngümay. Welu larkelay Jose. Peafiyiñ chem ñi rupan chew ñi yengen.